আৰত্তহারৰণ্ণনা

আঘাতাদীনমকরণীযতাৰচনেন খন্তিসোরচ্চানুট্ঠানং. তত্থ খন্তিযা সদ্ধাপঞ্ঞাপরাপকারদুক্খসহগতানং সঙ্গহো, তথা সোরচ্চেন সীলস্স. সদ্ধাদিগ্গহণেন চ সদ্ধিন্দ্রিযাদিসকলবোধিপক্খিযধম্মা আৰত্তন্তি. সীলগ্গহণেন অৰিপ্পটিসারাদযো সব্বেপি সীলানিসংসধম্মা আৰত্তন্তি. পাণাতিপাতাদীহি পটিৰিরতিৰচনেন অপ্পমাদৰিহারো, তেন সকলং সাসনব্রহ্মচরিযং আৰত্ততি. গম্ভীরতাদিৰিসেসযুত্তধম্মগ্গহণেন মহাবোধিপকিত্তনং. অনাৰরণঞাণপদট্ঠানঞ্হি আসৰক্খযঞাণং, আসৰক্খযঞাণপদট্ঠানঞ্চ অনাৰরণঞাণং মহাবোধীতি ৰুচ্চতি, তেন দসবলাদযো সব্বে বুদ্ধগুণা আৰত্তন্তি. সস্সতাদিদিট্ঠিগ্গহণেন তণ্হাৰিজ্জানং সঙ্গহো, তাহি অনমতগ্গং সংসারৰট্টং আৰত্ততি. ৰেদনানং যথাভূতং সমুদযাদিপটিৰেধনেন ভগৰতো পরিঞ্ঞাত্তযৰিসুদ্ধি, তায পঞ্ঞাপারমিমুখেন সব্বাপি পারমিযো আৰত্তন্তি. ‘‘অজানতং অপস্সত’’ন্তি এত্থ অৰিজ্জাগ্গহণেন অযোনিসোমনসিকারপরিগ্গহো, তেন চ নৰ অযোনিসোমনসিকারমূলকা ধম্মা আৰত্তন্তি. ‘‘তণ্হাগতানং পরিতস্সিতৰিপ্ফন্দিত’’ন্তি এত্থ তণ্হাগ্গহণেন নৰ তণ্হামূলকা ধম্মা আৰত্তন্তি. ‘‘তদপি ফস্সপচ্চযা’’তিআদি সস্সতাদিপঞ্ঞাপনস্স পচ্চযাধীনৰুত্তিদস্সনং, তেন অনিচ্চতাদিলক্খণত্তযং আৰত্ততি. ছন্নং ফস্সাযতনানং যথাভূতং পজাননেন ৰিমুত্তিসম্পদানিদ্দেসো, তেন সত্তপি ৰিসুদ্ধিযো আৰত্তন্তি. ‘‘উচ্ছিন্নভৰনেত্তিকো তথাগতস্স কাযো’’তি তণ্হাপহানং ৰুত্তং, তেন ভগৰতো সকলসংকিলেসপ্পহানং আৰত্ততীতি অযং দেসনায গহিতধম্মানং সভাগৰিসভাগধম্মৰসেন আৰত্তনলক্খণো আৰত্তহারো নাম. যথাহ ‘‘একম্হি পদট্ঠানে, পরিযেসতি সেসকং পদট্ঠান’’ন্তিআদি (নেত্তি. ৪.৭).