চূল়সীলৰণ্ণনা

৭. কো অনুসন্ধীতি পুচ্ছা ‘‘ননু এত্তকেনেৰ যথাৰুত্তেহি অৰণ্ণৰণ্ণেহি সম্বন্ধা দেসনামত্থকং পত্তা’’তি অনুযোগসম্ভৰতো কতা. ৰণ্ণেন চ অৰণ্ণেন চাতি তদুভযপদেন. অত্থনিদ্দেসো ৰিয হি সদ্দনিদ্দেসোপীতি অক্খরচিন্তকা. অথ ৰা তথাভাসনস্স কারণত্তা, কোট্ঠাসত্তা চ ‘‘পদেহী’’তি ৰুত্তং. অৰণ্ণেন চ ৰণ্ণেন চাতি পন অগুণগুণৰসেন, নিন্দাপসংসাৰসেন চ সরূপদস্সনং. ‘‘নিৰত্তো অমূলকতায ৰিস্সজ্জেতব্বতাভাৰতো’’তি (দী. নি. টী. ১.৭) আচরিযধম্মপালত্থেরেন ৰুত্তং. তং ৰিত্থারেত্ৰা দেসনায বোধেতব্বপুগ্গলাভাৰতো এত্তকাৰ সা যুত্তরূপাতি ভগৰতো অজ্ঝাসযেনেৰ অদেসনাভাৰেন নিৰত্তো, যথা তং ৰণ্ণভূমিযং ততিযৰারোতিপি দট্ঠব্বং. তথা বোধেতব্বপুগ্গলসম্ভৰেন ৰিস্সজ্জেতব্বতায অধিগতভাৰতো অনুৰত্ততিযেৰ. ইতিপেতং ভূতন্তি এত্থ ইতি-সদ্দো আদিঅত্থো তদুপরিপি অনুৰত্তকত্তা, তেন ৰক্খতি ‘‘ইধ পনা’’তিআদি. এত্তাৰতা অযং ৰণ্ণানুসন্ধীতি দস্সেত্ৰা দুৰিধেসু পন তেসু ৰণ্ণেসু ব্রহ্মদত্তস্স ৰণ্ণানুসন্ধীতি দস্সেন্তো ‘‘সো পনা’’তিআদিমাহ. উপরি সুঞ্ঞতাপকাসনে অনুসন্ধিং দস্সেস্সতি ‘‘অত্থি ভিক্খৰে’’তিআদিনা (দী. নি. ১.২৮).

এৰং পুচ্ছাৰিস্সজ্জনামুখেন সমুদাযত্থতং ৰত্ৰা ইদানি অৰযৰত্থতং দস্সেতি ‘‘তত্থা’’তিআদিনা. অপ্পমেৰ পরিতো সমন্ততো খণ্ডিতত্তা পরিত্তং নামাতি আহ ‘‘অপ্পমত্তকন্তি পরিত্তস্স নাম’’ন্তি. মত্তা ৰুচ্চতি পমাণং মীযতে পরিমীযতেতি কত্ৰা. সমাসন্তককারেন অপ্পমত্তকং যথা ‘‘বহুপুত্তকো’’তি, এৰং ওরমত্তকেপি. এতেনেৰ ‘‘অপ্পা মত্তা অপ্পমত্তা, সা এতস্সাতি অপ্পমত্তক’’ন্তিআদিনা কপচ্চযস্স সাত্থকতম্পি দস্সেতি অত্থতো অভিন্নত্তা. মত্তকসদ্দস্স অনত্থকভাৰতো সীলমেৰ সীলমত্তকং. অনত্থকভাৰোতি চ সকত্থতা পুরিমপদত্থেযেৰ পৰত্তনতো. ন হি সদ্দা কেৰলং অনত্থকা ভৰন্তীতি অক্খরচিন্তকা. ননু চ ভগৰতো পারমিতানুভাৰেন নিরত্থকমেকক্খরম্পি মুখৰরং নারোহতি, সকলঞ্চ পরিযত্তিসাসনং পদে পদে চতুসচ্চপ্পকাসনন্তি ৰুত্তং, কথং তস্স অনত্থকতা সম্ভৰতীতি? সচ্চং, তম্পি পদন্তরাভিহিতস্স অত্থস্স ৰিসেসনৰসেন তদভিহিতং অত্থং ৰদতি এৰ, সো পন অত্থো ৰিনাপি তেন পদন্তরেনেৰ সক্কা ৰিঞ্ঞাতুন্তি অনত্থকমিচ্চেৰ ৰুত্তন্তি. ননু অৰোচুম্হ ‘‘অনত্থকভাৰো…পে… পৰত্তনতো’’তি. অপিচ ৰিনেয্যজ্ঝাসযানুরূপৰসেন ভগৰতো দেসনা পৰত্ততি, ৰিনেয্যা চ অনাদিমতিসংসারে লোকিযেসুযেৰ সদ্দেসু পরিভাৰিতচিত্তা, লোকে চ অসতিপি অত্থন্তরাৰবোধে ৰাচাসিলিট্ঠতাদিৰসেন সদ্দপযোগো দিস্সতি ‘‘লব্ভতি পলব্ভতি, খঞ্জতি নিখঞ্জতি, আগচ্ছতি পচ্চাগচ্ছতী’’তিআদিনা. তথাপরিচিতানঞ্চ তথাৰিধেনেৰ সদ্দপযোগেন অত্থাৰগমো সুখো হোতীতি অনত্থকসদ্দপযোগো ৰুত্তোতি. এৰং সব্বত্থ. হোতি চেত্থ –

‘‘পদন্তরৰচনীয-স্সত্থস্স ৰিসেসনায;

বোধনায ৰিনেয্যানং, তথানত্থপদং ৰদে’’তি.

অথ ৰা সীলমত্তকন্তি এত্থ মত্ত-সদ্দো ৰিসেসনিৰত্তিঅত্থো ‘‘অৰিতক্কৰিচারমত্তা ধম্মা (ধ. স. তিকমাতিকা) মনোমত্তা ধাতু মনোধাতূ’’তি (ধ. স. মূলটী. ৪৯৯) চ আদীসু ৰিয. ‘‘অপ্পমত্তকং ওরমত্তক’’ন্তি পদদ্ৰযেন সামঞ্ঞতো ৰুত্তোযেৰ হি অত্থো ‘‘সীলমত্তক’’ন্তি পদেন ৰিসেসতো ৰুত্তো, তেন চ সীলং এৰ সীলমত্তং, তদেৰ সীলমত্তকন্তি নিব্বচনং কাতব্বন্তি দস্সেতুং ‘‘সীলমেৰ সীলমত্তক’’ন্তি ৰুত্তং.

অযং পন অট্ঠকথামুত্তকো নযো – ওরমত্তকন্তি এত্থ ওরন্তি অপারভাগো ‘‘ওরতো ভোগং (মহাৰ. ৬৬) ওরং পার’’ন্তিআদীসু ৰিয. অথ ৰা হেট্ঠাঅত্থো ওরসদ্দো ওরং আগমনায যে পচ্চযা, তে ওরম্ভাগিযানি সংযোজনানীতিআদীসু ৰিয. সীলঞ্হি সমাধিপঞ্ঞাযো অপেক্খিত্ৰা অপারভাগে, হেট্ঠাভাগে চ হোতি, উভযত্থাপি ‘‘ওরে পৰত্তং মত্তং যস্সা’’তিআদিনা ৰিগ্গহো. সীলমত্তকন্তি এত্থাপি মত্তসদ্দো অমহত্থৰাচকো ‘‘ভেসজ্জমত্তা’’তিআদীসু ৰিয. অথ ৰা সীলেপি তদেকদেসস্সেৰ সঙ্গহণত্থং অমহত্থৰাচকো এত্থ মত্তসদ্দো ৰুত্তো. তথা হি ইন্দ্রিযসংৰরপচ্চযসন্নিস্সিতসীলানি ইধ দেসনং অনারুল়্হানি. কস্মাতি চে? যস্মা তানি পাতিমোক্খসংৰরআজীৰপারিসুদ্ধিসীলানি ৰিয ন সব্বপুথুজ্জনেসু পাকটানীতি. মত্তন্তি চেত্থ ৰিসেসনিৰত্তিঅত্থে নপুংসকলিঙ্গং. পমাণপ্পকত্থেসু পন ‘‘মত্ত’’ন্তি ৰা ‘‘মত্তা’’তি ৰা নপুংসকিত্থিলিঙ্গং.

‘‘ইদং ৰুত্তং হোতী’’তিআদিনা সহ যোজনায পিণ্ডত্থং দস্সেতি. যেন সীলেন ৰদেয্য, এতং সীলমত্তকং নামাতি সম্বন্ধো. ‘‘ৰণ্ণং ৰদামীতি উস্সাহং কত্ৰাপী’’তি ইদং ‘‘ৰণ্ণং ৰদমানো’’তি এতস্স ৰিৰরণং. এতেন হি ‘‘একপুগ্গলো ভিক্খৰে, লোকে উপ্পজ্জমানো উপ্পজ্জতী’’তিআদীসু (অ. নি. ১.১৭০) ৰিয মানসদ্দস্স সামত্থিযত্থতং দস্সেতি. ‘‘উস্সাহং কুরুমানো’’তি অৰত্ৰা ‘‘কত্ৰা’’তি চ ৰচনং ত্ৰাদিপচ্চযন্তপদানমিৰ মানন্তপচ্চযন্তপদানম্পি পরকিরিযাপেক্খমেৰাতি দস্সনত্থং. ‘‘তত্থ সিযা’’তিআদিনা সন্ধাযভাসিতমত্থং অজানিত্ৰা নীতত্থমেৰ গহেত্ৰা সুত্তন্তরৰিরোধিতং মঞ্ঞমানস্স কস্সচি ঈদিসী চোদনা সিযাতি দস্সেতি. তত্থাতি তস্মিং ‘‘অপ্পমত্তকং খো পনেত’’ন্তিআদিৰচনে (দী. নি. ১.৭). কম্মট্ঠানভাৰনে যুঞ্জতি সীলেনাতি যোগী, তস্স.

অলঙ্করণং ৰিভূসনং অলঙ্কারো, পসাধনকিরিযা. অলং করোতি এতেনেৰাতি ৰা অলঙ্কারো, কুণ্ডলাদিপসাধনং. মণ্ডীযতে মণ্ডনং, ঊনট্ঠানপূরণং. মণ্ডীযতি এতেনাতি ৰা মণ্ডনং, মুখচুণ্ণাদিঊনপূরণোপকরণং. ইধ পন সদিসৰোহারেন, তদ্ধিতৰসেন ৰা সীলমেৰ তথা ৰুত্তং. মণ্ডনেতি মণ্ডনহেতু, মণ্ডনকিরিযানিমিত্তং গতোতি অত্থো. অথ ৰা মণ্ডতি সীলেনাতি মণ্ডনো, মণ্ডনজাতিকো পুরিসো. বহুম্হি চেতং জাত্যাপেক্খায একৰচনং. উব্বাহনত্থেপি হি একৰচনমিচ্ছন্তি কেচি, তদযুত্তমেৰ সদ্দসত্থে অনাগতত্তা, অত্থযুত্তিযা চ অভাৰতো. কথঞ্হি একৰচননিদ্দিট্ঠতো উব্বাহনকরণং যুত্তং সিযা একস্মিং যেৰত্থে উব্বাহিতব্বস্স অঞ্ঞস্সত্থস্স অভাৰতো. তস্মা ৰিপল্লাসৰসেন বহ্ৰত্থে ইদং একৰচনং দট্ঠব্বং, মণ্ডনসীলেসূতি অত্থো. আচরিযধম্মপালত্থেরেনপি হি অযমেৰিধ ৰিনিচ্ছযো (দী. নি. টী. ১.৭) ৰুত্তো. অগ্গতন্তি উত্তমভাৰং.

অস্সং ভৰিস্সামীতি আকঙ্খেয্যাতি সম্বন্ধো. অস্সাতি ভৰেয্য. পরিপূরকারীতি চেত্থ ইতি-সদ্দো আদিঅত্থো, পকারত্থো ৰা, তেন সকলম্পি সীলথোমনসুত্তং দস্সেতি.

কিকীৰ অণ্ডন্তি এত্থাপি তদত্থেন ইতি-সদ্দেন –

‘‘কিকীৰ অণ্ডং চমরীৰ ৰালধিং,

পিযংৰ পুত্তং নযনংৰ এককং;

তথেৰ সীলং অনুরক্খমানা,

সুপেসলা হোথ সদা সগারৰা’’তি. (ৰিসুদ্ধি. ১.১৯); –

গাথং সঙ্গণ্হাতি. ‘‘পুপ্ফগন্ধো’’তি ৰত্ৰা তদেকদেসেন দস্সেতুং ‘‘ন চন্দন’’ন্তিআদি ৰুত্তং. চন্দনং তগরং মল্লিকাতি হি তংসহচরণতো তেসং গন্ধোৰ ৰুত্তো. পুপ্ফগন্ধোতি চ পুপ্ফঞ্চ তদৰসেসো গন্ধো চাতি অত্থো. তগরমল্লিকাহি ৰা অৰসিট্ঠো ‘‘পুপ্ফগন্ধো’’তি ৰুত্তো. সতঞ্চ গন্ধোতি এত্থ সীলমেৰ সদিসৰোহারেন ৰা তদ্ধিতৰসেন ৰা গন্ধো. সীলনিবন্ধনো ৰা থুতিঘোসো ৰুত্তনযেন ‘‘গন্ধো’’তি অধিপ্পেতো. সীলঞ্হি কিত্তিযা নিমিত্তং. যথাহ ‘‘সীলৰতো কল্যাণো কিত্তিসদ্দো অব্ভুগ্গচ্ছতী’’তি (দী. নি. ২.১৫০; ৩.৩১৬; অ. নি. ৫.২১৩; মহাৰ. ৭৮৫; উদা. ৭৬). সপ্পুরিসো পৰাযতি পকারেহি গন্ধতি তস্স গন্ধূপগরুক্খপটিভাগত্তা.

ৰস্সিকীতি সুমনপুপ্ফং, ‘‘ৰস্সিক’’ন্তিপি পাঠো, তদত্থোৰ. গন্ধা এৰ গন্ধজাতা, গন্ধপ্পকারা ৰা. য্ৰাযন্তি যদিদং, উত্তমো গন্ধো ৰাতীতি সম্বন্ধো.

সম্মদঞ্ঞা ৰিমুত্তানন্তি সম্মা অঞ্ঞায জানিত্ৰা, অগ্গমগ্গেন ৰা ৰিমুত্তানং. মগ্গং ন ৰিন্দতীতি কারণং ন লভতি, ন জানাতি ৰা.

‘‘সীলে পতিট্ঠাযা’’তি গাথায পটিসন্ধিপঞ্ঞায সপঞ্ঞো আতাপী ৰীরিযৰা পারিহারিকপঞ্ঞায নিপকো নরসঙ্খাতো ভিক্খু সীলে পতিট্ঠায চিত্তং তপ্পধানেন ৰুত্তং সমাধিং ভাৰযং ভাৰযন্তো ভাৰনাহেতু তথা পঞ্ঞং ৰিপস্সনঞ্চ ইমং অন্তোজটাবহিজটাসঙ্খাতং জটং ৰিজটযে ৰিজটেয্য ৰিজটিতুং সমত্থেয্যাতি সঙ্খেপত্থো.

পথৰিং নিস্সাযাতি পথৰিং রসগ্গহণৰসেন নিস্সায, সীলস্মিং পন পরিপূরণৰসেন নিস্সায পতিট্ঠানং দট্ঠব্বং.

অপ্পকমহন্ততায পারাপারাদি ৰিয উপনিধাপঞ্ঞত্তিভাৰতো অঞ্ঞমঞ্ঞং উপনিধায আহাতি ৰিস্সজ্জেতুং ‘‘উপরি গুণে উপনিধাযা’’তি ৰুত্তং. সীলঞ্হীতি এত্থ হি-সদ্দো কারণত্থো, তেনিদং কারণং দস্সেতি ‘‘যস্মা সীলং কিঞ্চাপি পতিট্ঠাভাৰেন সমাধিস্স বহূপকারং, পভাৰাদিগুণৰিসেসে পনস্স উপনিধায কলম্পি ভাগং ন উপেতি, তথা সমাধি চ পঞ্ঞাযা’’তি. তেনেৰাহ ‘‘তস্মা’’তিআদি. ন পাপুণাতীতি গুণসমভাৰেন ন সম্পাপুণাতি, ন সমেতীতি ৰুত্তং হোতি. উপরিমন্তি সমাধিপঞ্ঞং. উপনিধাযাতি উপত্থম্ভং কত্ৰা. তঞ্হি তাদিসায পঞ্ঞত্তিযা উপত্থম্ভনং হোতি. হেট্ঠিমন্তি সীলসমাধিদ্ৰযং.

‘‘কথ’’ন্তিআদি ৰিত্থারৰচনং. কণ্ডম্বমূলিকপাটিহারিযকথনঞ্চেত্থ যথাকথঞ্চিপি সীলস্স সমাধিমপাপুণতাসিদ্ধিযেৰিধাধিপ্পেতাতি পাকটতরপাটিহারিযভাৰেন, নিদস্সননযেন চাতি দট্ঠব্বং. ‘‘অভি…পে… তিত্থিযমদ্দন’’ন্তি ইদং পন তস্স যমকপাটিহারিযস্স সুপাকটভাৰদস্সনত্থং, অঞ্ঞেহি বোধিমূলে ঞাতিসমাগমাদীসু চ কতপাটিহারিযেহি ৰিসেসদস্সনত্থঞ্চ ৰুত্তং. সম্বোধিতো হি অট্ঠমেপি দিৰসে দেৰতানং ‘‘বুদ্ধো ৰা নো ৰা’’তি উপ্পন্নকঙ্খাৰিধমনত্থং আকাসে রতনচঙ্কমং মাপেত্ৰা চঙ্কমন্তো পাটিহারিযং অকাসি, ততো দুতিযসংৰচ্ছরে কুলনগরগতো কপিলৰত্থুপুরে নিগ্রোধারামে ঞাতীনং সমাগমেপি তেসং মানমদপ্পহানত্থং যমকপাটিহারিযং অকাসি. তত্থ অভিসম্বোধিতোতি অভিসম্বুজ্ঝনকালতো. সাৰত্থিনগরদ্ৰারেতি সাৰত্থিনগরস্স দক্খিণদ্ৰারে. কণ্ডম্বরুক্খমূলেতি কণ্ডেন নাম পসেনদিরঞ্ঞো উয্যানপালেন রোপিতত্তা কণ্ডম্বনামকস্স রুক্খস্স মূলে. যমকপাটিহারিযকরণত্থায ভগৰতো চিত্তে উপ্পন্নে ‘‘তদনুচ্ছৰিকং ঠানং ইচ্ছিতব্ব’’ন্তি রতনমণ্ডপাদি সক্কেন দেৰরঞ্ঞা আণত্তেন ৰিস্সকম্মুনা কতন্তি ৰদন্তি কেচি. ভগৰতা নিম্মিতন্তি অপরে. অট্ঠকথাসু পন অনেকাসু ‘‘সক্কেন দেৰানমিন্দেন আণাপিতেন ৰিস্সকম্মদেৰপুত্তেন মণ্ডপো কতো, চঙ্কমো পন ভগৰতা নিম্মিতো’’তি ৰুত্তং. দিব্বসেতচ্ছত্তে দেৰতাহি ধারিযমানেতি অত্থো ৰিঞ্ঞাযতি অঞ্ঞেসমসম্ভৰতো. ‘‘দ্ৰাদসযোজনায পরিসাযা’’তি ইদং চতূসু দিসাসু পচ্চেকং দ্ৰাদসযোজনং মনুস্সপরিসং সন্ধায ৰুত্তং. তদা কির দসসহস্সিলোকধাতুতো চক্কৰাল়গব্ভং পরিপূরেত্ৰা দেৰব্রহ্মানোপি সন্নিপতিংসু. যো কোচি এৰরূপং পাটিহারিযং কাতুং সমত্থো চে, সো আগচ্ছতূতি চোদনাসদিসত্তা ৰুত্তং ‘‘অত্তাদানপরিদীপন’’ন্তি. অত্তাদানঞ্হি অনুযোগো পটিপক্খস্স অত্তস্স আদানং গহণন্তি কত্ৰা. তিত্থিযমদ্দনন্তি ‘‘পাটিহারিযং করিস্সামা’’তি কুহাযনৰসেন পুব্বে উট্ঠিতানং তিত্থিযানং মদ্দনং, তঞ্চ তথা কাতুং অসমত্থতাসম্পাদনমেৰ. তদেতং পদদ্ৰযং ‘‘যমকপাটিহারিয’’ন্তি এতেন সম্বন্ধিতব্বং. রাজগহসেট্ঠিনো চন্দনঘটিকুপ্পত্তিতো পট্ঠায সব্বমেৰ চেত্থ ৰত্তব্বং.

উপরিমকাযতোতিআদি পটিসম্ভিদামগ্গে (পটি. ম. ১.১১৬) আগতনযদস্সনং, তেন ৰুত্তং ‘‘ইতিআদিনযপ্পৰত্ত’’ন্তি, ‘‘সব্বং ৰিত্থারেতব্ব’’ন্তি চ. তত্থাযং পাল়িসেসো –

‘‘হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততি. পুরত্থিমকাযতো অগ্গি, পচ্ছিমকাযতো উদকং. পচ্ছিমকাযতো অগ্গি, পুরত্থিমকাযতো উদকং. দক্খিণঅক্খিতো অগ্গি, ৰামঅক্খিতো উদকং. ৰামঅক্খিতো অগ্গি, দক্খিণঅক্খিতো উদকং. দক্খিণকণ্ণসোততো অগ্গি, ৰামকণ্ণসোততো উদকং. ৰামকণ্ণসোততো অগ্গি, দক্খিণকণ্ণসোততো উদকং. দক্খিণনাসিকাসোততো অগ্গি, ৰামনাসিকাসোততো উদকং. ৰামনাসিকাসোততো অগ্গি, দক্খিণনাসিকাসোততো উদকং. দক্খিণঅংসকূটতো অগ্গি, ৰামঅংসকূটতো উদকং. ৰামঅংসকূটতো অগ্গি, দক্খিণঅংসকূটতো উদকং. দক্খিণহত্থতো অগ্গি, ৰামহত্থতো উদকং. ৰামহত্থতো অগ্গি, দক্খিণহত্থতো উদকং. দক্খিণপস্সতো অগ্গি, ৰামপস্সতো উদকং. ৰামপস্সতো অগ্গি, দক্খিণপস্সতো উদকং. দক্খিণপাদতো অগ্গি, ৰামপাদতো উদকং. ৰামপাদতো অগ্গি, দক্খিণপাদতো উদকং. অঙ্গুলঙ্গুলেহি অগ্গি, অঙ্গুলন্তরিকাহি উদকং. অঙ্গুলন্তরিকাহি অগ্গি, অঙ্গুলঙ্গুলেহি উদকং. একেকলোমতো অগ্গি, একেকলোমতো উদকং. লোমকূপতো লোমকূপতো অগ্গিক্খন্ধো পৰত্ততি, লোমকূপতো লোমকূপতো উদকধারা পৰত্ততী’’তি.

অট্ঠকথাযং পন ‘‘একেকলোমকূপতো’’ ইচ্চেৰ (পটি. ম. অট্ঠ. ২.১.১১৬) আগতং.

ছন্নং ৰণ্ণানন্তি এত্থাপি নীলানং পীতকানং লোহিতকানং ওদাতানং মঞ্জিট্ঠানং পভস্সরানন্তি অযং সব্বোপি পাল়িসেসো পেয্যালনযেন, আদি-সদ্দেন চ দস্সিতো. এত্থ চ ছন্নং ৰণ্ণানং উব্বাহনভূতানং যমকা যমকা ৰণ্ণা পৰত্তন্তীতি পাঠসেসেন সম্বন্ধো, তেন ৰক্খতি ‘‘দুতিযা দুতিযা রস্মিযো’’তিআদি. তত্থ হি তাসং যমকং যমকং পৰত্তনাকারেন সহ আৰজ্জনপরিকম্মাধিট্ঠানানং ৰিসুং পৰত্তি দস্সিতা. কেচি পন ‘‘ছন্নং ৰণ্ণান’’ন্তি এতস্স ‘‘অগ্গিক্খন্ধো উদকধারা’’তি পুরিমেহি পদেহি সম্বন্ধং ৰদন্তি, তদযুত্তমেৰ অগ্গিক্খন্ধউদকধারানং অত্থায তেজোকসিণৰাযোকসিণানং সমাপজ্জনস্স ৰক্খমানত্তা. ছন্নং ৰণ্ণানং ছব্বণ্ণা পৰত্তন্তীতি কত্তুৰসেন ৰা সম্বন্ধো যথা ‘‘একস্স চেপি ভিক্খুনো ন পটিভাসেয্য তং ভিক্খুনিং অপসাদেতু’’ন্তি (পাচি. ৫৫৮). কত্তুকম্মেসু হি বহুলা সামিৰচনং আখ্যাতপযোগেপি ইচ্ছন্তি নেরুত্তিকা.

এৰং পাল়িনযেন যমকপাটিহারিযং দস্সেত্ৰা ইদানি তং অট্ঠকথানযেন ৰিৰরন্তো পচ্চাসত্তিনযেন ‘‘ছন্নং ৰণ্ণান’’ন্তি পদমেৰ পঠমং ৰিৰরিতুং ‘‘তস্সা’’তিআদিমাহ. তত্থ তস্সাতি ভগৰতো. ‘‘সুৰণ্ণৰণ্ণা রস্মিযো’’তি ইদং তাসং পীতাভানং যেভুয্যতায ৰুত্তং, ছব্বণ্ণাহি রস্মীহি অলঙ্করণকালো ৰিযাতি অত্থো. তাপি হি চক্কৰাল়গব্ভতো উগ্গন্ত্ৰা ব্রহ্মলোকমাহচ্চ পটিনিৰত্তিত্ৰা চক্কৰাল়মুখৰট্টিমেৰ গণ্হিংসু. একচক্কৰাল়গব্ভং ৰঙ্কগোপানসিকং ৰিয বোধিঘরং অহোসি একালোকং. দুতিযা দুতিযা রস্মিযোতি পুরিমপুরিমতো পচ্ছা পচ্ছা নিক্খন্তা রস্মিযো. কস্মা সদিসাকারৰসেন ‘‘ৰিযা’’তি ৰচনং ৰুত্তন্তি আহ ‘‘দ্ৰিন্নঞ্চা’’তিআদি. দ্ৰিন্নঞ্চ চিত্তানং একক্খণে পৰত্তি নাম নত্থি, যেহি তা এৰং সিযুং, তথাপি ইমিনা কারণদ্ৰযেন এৰমেৰ খাযন্তীতি অধিপ্পাযো. ভৰঙ্গপরিৰাসস্সাতি ভৰঙ্গৰসেন পরিৰসনস্স, ভৰঙ্গসঙ্খাতস্স পরিৰসনস্স ৰা, ভৰঙ্গপতনস্সাতি ৰুত্তং হোতি. আচিণ্ণৰসিতাযাতি আৰজ্জনসমাপজ্জনাদীহি পঞ্চহাকারেহি সমাচিণ্ণপরিচযতায. ননু চ একস্সাপি চিত্তস্স পৰত্তিযা দ্ৰে কিস্সো রস্মিযোপি সম্ভৰেয্যুন্তি অনুযোগমপনেতি ‘‘তস্সা তস্সা পন রস্মিযা’’তিআদিনা. চিত্তৰারনানত্তা আৰজ্জনপরিকম্মচিত্তানি, কসিণনানত্তা অধিট্ঠানচিত্তৰারানিপি ৰিসুং ৰিসুংযেৰ পৰত্তন্তি. আৰজ্জনাৰসানে তিক্খত্তুং পৰত্তজৰনানি পরিকম্মনামেনেৰ ইধ ৰুত্তানি.

কথন্তি আহ ‘‘নীলরস্মিঅত্থায হী’’তিআদি. ‘‘মঞ্জিট্ঠরস্মিঅত্থায লোহিতকসিণং, পভস্সররস্মিঅত্থায পীতকসিণ’’ন্তি ইদং লোহিতপীতরস্মীনং কারণেযেৰ ৰুত্তে সিদ্ধন্তি ন ৰুত্তং. তাসমেৰ হি মঞ্জিট্ঠপভস্সররস্মিযো ৰিসেসপভেদভূতাতি. ‘‘অগ্গিক্খন্ধত্থাযা’’তিআদিনা ‘‘উপরিমকাযতো’’তিআদীনং ৰিৰরণং. অগ্গিক্খন্ধউদকক্খন্ধাপি অঞ্ঞমঞ্ঞঅসম্মিস্সা যাৰ ব্রহ্মলোকা উগ্গন্ত্ৰা চক্কৰাল়মুখৰট্টিযং পতিংসু, তং দিৰসং পন সত্থা যো যো যস্মিং যস্মিং ধম্মে চ পাটিহারিযে চ পসন্নো, তস্স তস্স অজ্ঝাসযৰসেন তং তং ধম্মঞ্চ কথেসি, পাটিহারিযঞ্চ দস্সেসি, এৰং ধম্মে ভাসিযমানে, পাটিহারিযে চ করিযমানে মহাজনো ধম্মাভিসমযো অহোসি. তস্মিঞ্চ সমাগমে অত্তনো মনং গহেত্ৰা পঞ্হং পুচ্ছিতুং সমত্থং অদিস্ৰা নিম্মিতং বুদ্ধং মাপেসি, তেন পুচ্ছিতং পঞ্হং সত্থা ৰিস্সজ্জেসি. সত্থারা পুচ্ছিতং পঞ্হং সো ৰিস্সজ্জেসি, সত্থু চঙ্কমনকালে নিম্মিতো ঠানাদীসু অঞ্ঞতরং কপ্পেসি, তস্স চঙ্কমনকালে সত্থা ঠানাদীসু অঞ্ঞতরং কপ্পেসীতি এতমত্থং দস্সেতুং ‘‘সত্থা চঙ্কমতী’’তিআদি ৰুত্তং. ‘‘সব্বং ৰিত্থারেতব্ব’’ন্তি এতেন ‘‘সত্থা তিট্ঠতি, নিম্মিতো চঙ্কমতি ৰা নিসীদতি ৰা সেয্যং ৰা কপ্পেতী’’তিআদিনা (পটি. ম. ১.১১৬) চতূসু ইরিযাপথেসু একেকমূলকা সত্থুপক্খে চত্তারো, নিম্মিতপক্খে চত্তারোতি সব্বে অট্ঠ ৰারা ৰিত্থারেত্ৰা ৰত্তব্বাতি দস্সেতি. যস্মা সীলং সমাধিস্স পতিট্ঠামত্তমেৰ হুত্ৰা নিৰত্ততি, সমাধিযেৰ তত্থ পতিট্ঠায যথাৰুত্তং সব্বং পাটিহারিযকিচ্চং পৰত্তেতি, তস্মা তদেতং সমাধিকিচ্চমেৰাতি ৰুত্তং ‘‘এত্থ একম্পী’’তিআদি.

‘‘যং পনা’’তিআদিনা সমাধিস্স পঞ্ঞমপাপুণতা ৰিভাৰিতা, যং পন পটিৰিজ্ঝি, ইদং পটিৰিজ্ঝনং পঞ্ঞাকিচ্চন্তি অত্থো. তং অনুক্কমতো দস্সেতি ‘‘ভগৰা’’তিআদিনা. ‘‘কপ্পসতসহস্সাধিকানি চত্তারি অসঙ্খ্যেয্যানী’’তি ইদং দীপঙ্করপাদমূলে কতপঠমাভিনীহারতো পট্ঠায ৰুত্তং, ততো পুব্বেপি যত্তকেন তস্মিং ভৰে ইচ্ছন্তো সাৰকবোধিং পত্তুং সক্কুণেয্য, তত্তকং পুঞ্ঞসম্ভারং সমুপচিনীতি ৰেদিতব্বং. ততোযেৰ হি ‘‘মনুস্সত্তং লিঙ্গসম্পত্তি, হেতু সত্থারদস্সন’’ন্তিআদিনা (বু. ৰং. ৫৯) ৰুত্তেসু অট্ঠধম্মেসু হেতুসম্পন্নতা অহোসি. কেচি পন মনোপণিধানৰচীপণিধানৰসেন অনেকধা অসঙ্খ্যেয্যপরিচ্ছেদং কত্ৰা পুব্বসম্ভারং ৰদন্তি, তদযুত্তমেৰ সঙ্গহারুল়্হাসু অট্ঠকথাসু তথা অৰুত্তত্তা. তাসু হি যথাৰুত্তনযেন পঠমাভিনীহারতো পুব্বে হেতুসম্পন্নতাযেৰ দস্সিতা. একূনতিংসৰস্সকালে নিক্খম্ম পব্বজিত্ৰাতি সম্বন্ধো. চক্করতনারহপুঞ্ঞৰন্ততায বোধিসত্তো চক্কৰত্তিসিরিসম্পন্নোতি তস্স নিৰাসভৰনং ‘‘চক্কৰত্তিসিরিনিৰাসভূত’’ন্তি ৰুত্তং. ভৰনাতি রম্মসুরম্মসুভসঙ্খাতা নিকেতনা. পধানযোগন্তি দুক্করচরিযায উত্তমৰীরিযানুযোগং.

উরুৰেলাযং কির সেনানিগমে কুটুম্বিকস্স ধীতা সুজাতা নাম দারিকা ৰযপ্পত্তা নেরঞ্জরায তীরে নিগ্রোধমূলে পত্থনমকাসি ‘‘সচাহং সমজাতিকং কুলঘরং গন্ত্ৰা পঠমগব্ভে পুত্তং লভিস্সামি, খীরপাযাসেন বলিকম্মং করিস্সামী’’তি, (ম. নি. অট্ঠ. ২.২৮৪; জা. অট্ঠ. ১.অৰিদূরে নিদানকথা) তস্সা সা পত্থনা সমিজ্ঝি. সা সত্ত ধেনুযো লট্ঠিৰনে খাদাপেত্ৰা তাসম্পি ধীতরো গাৰিযো লদ্ধা তথেৰ খাদাপেত্ৰা পুন তাসম্পি ধীতরো তথেৰাতি সত্তপুত্তিনত্তিপনত্তিপরম্পরাগতাহি ধেনূহি খীরং গহেত্ৰা খীরপাযাসং পচিতুমারভি. তস্মিং খণে মহাব্রহ্মা তিযোজনিকং সেতচ্ছত্তং উপরি ধারেসি, সক্কো দেৰরাজা অগ্গিং উজ্জালেসি, সকললোকে ৰিজ্জমানরসং দেৰতা পক্খিপিংসু, পাযাসং দক্খিণাৰট্টং হুত্ৰা পচতি, তং সা সুৰণ্ণপাতিযা সতসহস্সগ্ঘনিকায সহেৰ বোধিসত্তস্স দত্ৰা পক্কামি. অথ বোধিসত্তো তং গহেত্ৰা নেরঞ্জরায তীরে সুপ্পতিট্ঠিতে নাম তিত্থে একতালট্ঠিপ্পমাণে একূনপঞ্ঞাসপিণ্ডে করোন্তো পরিভুঞ্জি, তং সন্ধায ৰুত্তং ‘‘ৰিসাখাপুণ্ণমাযং উরুৰেলগামে সুজাতায দ্ৰিন্নং পক্খিত্তদিব্বোজং মধুপাযাসং পরিভুঞ্জিত্ৰা’’তি. তত্থ সুজাতাযাতি আযস্মতো যসত্থেরস্স মাতুভূতায পচ্ছা সরণগমনট্ঠানে এতদগ্গপ্পত্তায সুজাতায নাম সেট্ঠিভরিযায. অঙ্গমঙ্গানুসারিনো রসস্স সারো উপত্থম্ভবলকরো ভূতনিস্সিতো একো ৰিসেসো ওজা নাম, সা দিৰি ভৰা পক্খিত্তা এত্থাতি পক্খিত্তদিব্বোজো, তং. পাতব্বো চ সো অসিতব্বো চাতি পাযাসো, রসং কত্ৰা পিৰিতুং, আলোপং কত্ৰা চ ভুঞ্জিতুং যুত্তো ভোজনৰিসেসো, মধুনা সিত্তো পাযাসো মধুপাযাসো, তং.

ততো নেরঞ্জরায তীরে মহাসালৰনে নানাসমাপত্তীহি দিৰাৰিহারস্স কতত্তা ‘‘সাযন্হসমযে’’তিআদি ৰুত্তং. ৰিত্থারো তত্থ তত্থ গহেতব্বো. দক্খিণুত্তরেনাতি দিৰাৰিহারতো বোধিযা পৰিসনমগ্গং সন্ধাযাহ, উজুকং দক্খিণুত্তরগতেন দেৰতাহি অলঙ্কতেন মগ্গেনাতি অত্থো. এৰম্পি ৰদন্তি ‘‘দক্খিণুত্তরেনাতি দক্খিণপচ্ছিমুত্তরেন আদিঅৰসানগহণেন মজ্ঝিমস্সাপি গহিতত্তা, তথা লুত্তপযোগস্স চ দস্সনতো. এৰঞ্হি সতি ‘দক্খিণপচ্ছিমুত্তরদিসাভাগেন বোধিমণ্ডং পৰিসিত্ৰা তিট্ঠতী’তি (জা. অট্ঠ. ১.অৰিদূরেনিদানকথা) জাতকনিদানে ৰুত্তৰচনেন সমেতী’’তি. দক্খিণদিসতো গন্তব্বো উত্তরদিসাভাগো দক্খিণুত্তরো, তেন পৰিসিত্ৰাতি অপরে. কেচি পন ‘‘উত্তরসদ্দো চেত্থ মগ্গৰাচকো. যদি হি দিসাৰাচকো ভৰেয্য, ‘দক্খিণুত্তরাযা’তি ৰদেয্যা’’তি, তং ন ‘‘উত্তরেন নদী সীদা, গম্ভীরা দুরতিক্কমা’’তিআদিনা দিসাৰাচকস্সাপি এনযোগস্স দস্সনতো, উত্তরসদ্দস্স চ মগ্গৰাচকস্স অনাগতত্তা. অপিচ দিসাভাগং সন্ধায এৰং ৰুত্তং. দিসাভাগোপি হি দিসা এৰাতি. অথ অন্তরামগ্গে সোত্থিযেন নাম তিণহারকব্রাহ্মণেন দিন্না অট্ঠ কুসতিণমুট্ঠিযো গহেত্ৰা অসিতঞ্চনগিরিসঙ্কাসং সব্ববোধিসত্তানমস্সাসজননট্ঠানে সমাৰিরুল়্হং বোধিযা মণ্ডনভূতং বোধিমণ্ডমুপগন্ত্ৰা তিক্খত্তুং পদক্খিণং কত্ৰা দক্খিণদিসাভাগে অট্ঠাসি, সো পন পদেসো পদুমিনিপত্তে উদকবিন্দু ৰিয পকম্পিত্থ, ততো পচ্ছিমদিসাভাগং, উত্তরদিসাভাগঞ্চ গন্ত্ৰা তিট্ঠন্তেপি মহাপুরিসে তথেৰ তে অকম্পিংসু, ততো ‘‘নাযং সব্বোপি পদেসো মম গুণং সন্ধারেতুং সমত্থো’’তি পুরত্থিমদিসাভাগমগমাসি, তত্থ পল্লঙ্কপ্পমাণং নিচ্চলমহোসি, তস্সেৰ চ নিপ্পরিযাযেন বোধিমণ্ডসমঞ্ঞা, মহাপুরিসো ‘‘ইদং কিলেসৰিদ্ধংসনট্ঠান’’ন্তি সন্নিট্ঠানং কত্ৰা পুব্বুত্তরদিসাভাগে ঠিতো তত্থ অকম্পনপ্পদেসে তানি তিণানি অগ্গে গহেত্ৰা সঞ্চালেসি, তাৰদেৰ চুদ্দসহত্থো পল্লঙ্কো অহোসি, তানিপি তিণানি ৰিচিত্তাকারেন তূলিকায লেখা গহিতানি ৰিয অহেসুং. সো তত্থ তিসন্ধিপল্লঙ্কং আভুজিত্ৰা চতুরঙ্গসমন্নাগতং মেত্তাকম্মট্ঠানং পুব্বঙ্গমং কত্ৰা চতুরঙ্গিকং ৰীরিযং অধিট্ঠহিত্ৰা নিসীদি, তমত্থং সঙ্খিপিত্ৰা দস্সেন্তো ‘‘বোধিমণ্ডং পৰিসিত্ৰা’’তিআদিমাহ.

তত্থ বোধি ৰুচ্চতি অরহত্তমগ্গঞাণং, সব্বঞ্ঞুতঞ্ঞাণঞ্চ, সা মণ্ডতি থামগততায পসীদতি এত্থাতি বোধিমণ্ডো, নিপ্পরিযাযেন যথাৰুত্তপ্পদেসো, পরিযাযেন পন ইধ দুমরাজা. তথা হি আচরিযানন্দত্থেরেন ৰুত্তং ‘‘বোধিমণ্ডসদ্দোপঠমাভিসম্বুদ্ধট্ঠানে এৰ দট্ঠব্বো, ন যত্থ কত্থচি বোধিরুক্খস্স পতিট্ঠিতট্ঠানে’’তি, তং.

মারৰিজযসব্বঞ্ঞুতঞ্ঞাণপটিলাভাদীহি ভগৰন্তং অস্সাসেতীতি অস্সত্থো. আপুব্বঞ্হি সাসসদ্দং অনুসিট্ঠিতোসনেসু ইচ্ছন্তি, যং তু লোকে ‘‘চলদলো, কুঞ্জরাসনো’’ তিপি ৰদন্তি. অচ্চুগ্গতভাৰেন, অজেয্যভূমিসীসগতভাৰেন, সকলসব্বঞ্ঞুগুণপটিলাভট্ঠানৰিরুল়্হভাৰেন চ দুমানং রাজাতি দুমরাজা, অস্সত্থো চ সো দুমরাজা চাতি অস্সত্থদুমরাজা তং. দ্ৰিন্নং ঊরুজাণুসন্ধীনং, ঊরুমূলকটিসন্ধিস্স চ ৰসেন তযো সন্ধযো, সণ্ঠানৰসেন ৰা তযো কোণা যস্সাতি তিসন্ধি, স্ৰেৰ পল্লঙ্কো ঊরুবদ্ধাসনং পরিসমন্ততো অঙ্কনং আসনন্তি অত্থেন র-কারস্স ল-কারং, দ্ৰিভাৰঞ্চ কত্ৰা, তীহি ৰা সন্ধীহি লক্খিতো পল্লঙ্কো তিসন্ধিপল্লঙ্কো, তং. আভুজিত্ৰাতি আবন্ধিত্ৰা, উভো পাদে সমঞ্ছিতে কত্ৰাতি ৰুত্তং হোতি. ৰিত্থারো সামঞ্ঞফলসুত্তৰণ্ণনাযং (দী. নি. অট্ঠ. ১.২১৬) আগমিস্সতি. অত্তা, মিত্তো, মজ্ঝত্তো, ৰেরীতি চতূসুপি সমপ্পৰত্তনৰসেন চতুরঙ্গসমন্নাগতং মেত্তাকম্মট্ঠানং. ‘‘চতুরঙ্গসমন্নাগত’’ন্তি ইদং পন ‘‘ৰীরিযাধিট্ঠান’’ন্তি এতেনাপি যোজেতব্বং. তম্পি হি –

কামং তচো চ ন্হারু চ অট্ঠি চ অৰসিস্সতু, উপসুস্সতু সরীরে মংসলোহিতং, যং তং পুরিসথামেন পুরিসৰীরিযেন পুরিসপরক্কমেন পত্তব্বং, ন তং অপাপুণিত্ৰা ৰীরিযস্স সণ্ঠানং ভৰিস্সতী’’তি (ম. নি. ২.১৮৪; সং. নি. ১.২৬৬; অ. নি. ৩.৫১; অ. নি. ৮.১৩; মহানি. ১৭, ১৯৬) –

ৰুত্তনযেন চতুরঙ্গসমন্নাগতমেৰ.

চুদ্দস হত্থা ৰিত্থতপ্পমাণভাৰেন যস্সাতি চুদ্দসহত্থো. পরিসমন্ততো অঙ্কীযতে লক্খীযতে পরিচ্ছেদৰসেনাতি পল্লঙ্কো র-কারস্স ল-কারং, তস্স চ দ্ৰিত্তং কত্ৰা. অপিচ ‘‘ইদং কিলেসৰিদ্ধংসনট্ঠান’’ন্তি অট্ঠকথাসু ৰচনতো পল্লং কিলেসৰিদ্ধংসনং করোতি এত্থাতি পল্লঙ্কো নিগ্গহিতাগমৰসেন, অলুত্তসমাসৰসেন ৰা, চুদ্দসহত্থো চ সো পল্লঙ্কো চ, স্ৰেৰ উত্তমট্ঠেন পত্থনীযট্ঠেন চ ৰরোতি চুদ্দসহত্থপল্লঙ্কৰরো, তত্থ গতো পৰত্তো নিসিন্নো তথা. চুদ্দসহত্থতা চেত্থ ৰিত্থারৰসেন গহেতব্বা. তানিযেৰ হি তিণানি অপরিমিতপুঞ্ঞানুভাৰতো চুদ্দসহত্থৰিত্থতপল্লঙ্কভাৰেন পৰত্তানি, ন চ তানি অট্ঠমুট্ঠিপ্পমাণানি চুদ্দসহত্থঅচ্চুগ্গতানি সম্ভৰন্তি. ততোযেৰ চ ইধ ‘‘তিণসন্থরং সন্থরিত্ৰা’’তি ৰুত্তং, ধম্মপদট্ঠকথাদীসু চ ‘‘তিণানি সন্থরিত্ৰা…পে… পুরত্থিমাভিমুখো নিসীদিত্ৰা’’তি (ধ. স. অট্ঠ. ১.সারিপুত্থেরৰণ্ণনা; ধ. স. অট্ঠ. ১.নিদানকথা). অঞ্ঞত্থ চ ‘‘তিণাসনে চুদ্দসহত্থসম্মতে’’তি. কেচি পন ‘‘অচ্চুগ্গতভাৰেনেৰ চুদ্দসহত্থো’’তি যথা তথা পরিকপ্পনাৰসেন ৰদন্তি, তং ন গহেতব্বং যথাৰুত্তেন কারণেন, সাধকেন চ ৰিরুদ্ধত্তা. কামঞ্চ মনোরথপূরণিযা চতুরঙ্গুত্তরৰণ্ণনায ‘‘তিক্খত্তুং বোধিং পদক্খিণং কত্ৰা বোধিমণ্ডং আরুয্হ চুদ্দসহত্থুব্বেধে ঠানে তিণসন্থরং সন্থরিত্ৰা চতুরঙ্গৰীরিযং অধিট্ঠায নিসিন্নকালতো’’তি (অ. নি. অট্ঠ. ২.৪.৩৩) পাঠো দিস্সতি, তথাপি তত্থ উব্বেধসদ্দো ৰিত্থারৰাচকোতি ৰেদিতব্বো, যথা ‘‘তিরিযং সোল়সুব্বেধো, উদ্ধমাহু সহস্সধা’’তি (জা. ১.৩.৪০) মহাপনাদজাতকে. তথা হি তদট্ঠকথাযং ৰুত্তং ‘‘তিরিযং সোল়সুব্বেধোতি ৰিত্থারতো সোল়সকণ্ডপাতৰিত্থারো অহোসী’’তি (জাতক অট্ঠ. ২-৩০২ পিট্ঠে). অঞ্ঞথা হি আকাসেযেৰ উক্খিপিত্ৰা তিণসন্থরণং কতং, ন অচলপদেসেতি অত্থো আপজ্জেয্য সন্থরণকিরিযাধারভাৰতো তস্স, সো চত্থো অনধিপ্পেতো অঞ্ঞত্থ অনাগতত্তাতি.

রজতক্খন্ধং পিট্ঠিতো কত্ৰা ৰিযাতি সম্বন্ধো. অত্থন্তি পচ্ছিমপব্বতং. মারবলন্তি মারং, মারবলঞ্চ, মারস্স ৰা সামত্থিযং. পুব্বেনিৰাসন্তি পুব্বে নিৰুত্থক্খন্ধং. দিব্বচক্খুন্তি দিব্বচক্খুঞাণং. ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪) জরামরণমুখেন পচ্চযাকারে ঞাণং ওতারেত্ৰা. আনাপানচতুত্থজ্ঝানন্তি এত্থাপি ‘‘সব্ববুদ্ধানং আচিণ্ণ’’ন্তি ৰিভত্তিৰিপরিণামং কত্ৰা যোজেতব্বং. তম্পি হি বুদ্ধানমাচিণ্ণমেৰাতি ৰদন্তি. পাদকং কত্ৰাতি কারণং, পতিট্ঠানং ৰা কত্ৰা. ‘‘ৰিপস্সনং ৰড্ঢেত্ৰাতি ছত্তিংসকোটিসতসহস্সমুখেন আসৰক্খযঞাণসঙ্খাতমহাৰজিরঞাণগব্ভং গণ্হাপনৰসেন ৰিপস্সনং ভাৰেত্ৰা. সব্বঞ্ঞুতঞ্ঞাণাধিগমায অনুপদধম্মৰিপস্সনাৰসেন অনেকাকারৰোকারে সঙ্খারে সম্মসতো ছত্তিংসকোটিসতসহস্সমুখেন পৰত্তং ৰিপস্সনাঞাণম্পি হি ‘‘মহাৰজিরঞাণ’’ন্তি ৰুচ্চতি, চতুৰীসতিকোটিসতসহস্সসঙ্খ্যায দেৰসিকং ৰল়ঞ্জনকসমাপত্তীনং পুরেচরানুচরঞাণম্পি. ইধ পন মগ্গঞাণমেৰ, ৰিসেসতো চ অগ্গমগ্গঞাণং, তস্মা তস্সেৰ ৰিপস্সনাগব্ভভাৰো ৰেদিতব্বোতি. সব্ববুদ্ধগুণেতি সব্বঞ্ঞুতাদিনিরৰসেসবুদ্ধগুণে. তস্সা পাদকং কত্ৰা সমাধি নিৰত্তোতি ৰুত্তং ‘‘ইদমস্স পঞ্ঞাকিচ্চ’’ন্তি. অস্সাতি ভগৰতো.

‘‘তত্থ যথা হত্থে’’তিআদিনা উপমায পাকটীকরণং. হত্থেতি হত্থপসতে, করপুটে ৰা. পাতিযন্তি সরাৰকে. ঘটেতি উদকহরণঘটে. দ্ৰত্তিংসদোণগণ্হনপ্পমাণং কুণ্ডং কোলম্বো. ততো মহতরা চাটি. ততোপি মহতী মহাকুম্ভী. সোণ্ডী কুসোব্ভো. নদীভাগো কন্দরো. চক্কৰাল়পাদেসু সমুদ্দো চক্কৰাল়মহাসমুদ্দো.সিনেরুপাদকে মহাসমুদ্দেতি সীদন্তরসমুদ্দং সন্ধাযাহ. ‘‘পাতিয’’ন্তিআদিনাপি তদেৰত্থং পকারন্তরেন ৰিভাৰেতি. পরিত্তং হোতি যথাতি সম্বন্ধো. যস্সা পাল়িযা অত্থৰিভাৰনত্থায যা সংৰণ্ণনা ৰুত্তা, তদেৰ তস্সা গুণভাৰেন দস্সেতুং ‘‘তেনাহা’’তিআদি ৰুত্তং. এৰং সব্বত্থ.

‘‘দুৰে পুথুজ্জনা’’তিআদি পুথুজ্জনেসু লব্ভমানৰিভাগদস্সনত্থমেৰ ৰুত্তং, ন পন মূলপরিযাযসংৰণ্ণনাদীসু (ম. নি. অট্ঠ. ১.২) ৰিয পুথুজ্জনৰিসেসনিদ্ধারণত্থং নিরৰসেসপুথুজ্জনস্সেৰ ইধ অধিপ্পেতত্তা. সব্বোপি হি পুথুজ্জনো ভগৰতো উপরিগুণে ৰিভাৰেতুং ন সক্কোতি, তিট্ঠতু তাৰ পুথুজ্জনো, অরিযসাৰকপচ্চেকবুদ্ধানম্পি অৰিসযা এৰ বুদ্ধগুণা. তথা হি ৰক্খতি ‘‘সোতাপন্নো’’তিআদি (দী. নি. অট্ঠ. ১.৭). গোত্তসম্বন্ধতায আদিচ্চস্স সূরিযদেৰপুত্তস্স বন্ধূতি আদিচ্চবন্ধু, তেন ৰুত্তং নিদ্দেসে –

‘‘আদিচ্চো ৰুচ্চতি সূরিযো. সূরিযো গোতমো গোত্তেন, ভগৰাপি গোতমো গোত্তেন, ভগৰা সূরিযস্স গোত্তঞাতকো গোত্তবন্ধু, তস্মা বুদ্ধো আদিচ্চবন্ধূ’’তি (মহানি. ১৫০; চূল়নি. ৯৯).

সদ্দৰিদূ পন ‘‘বুদ্ধস্সাদিচ্চবন্ধুনা’’তি পাঠমিচ্ছন্তি. আদিচ্চস্স বন্ধুনা গোত্তেন সমানো গোত্তসঙ্খাতো বন্ধু যস্স, বুদ্ধো চ সো আদিচ্চবন্ধু চাতি কত্ৰা. যস্মা পন খন্ধকথাদিকোসল্লেনাপি উপক্কিলেসানুপক্কিলেসানং জাননহেতুভূতং বাহুসচ্চং হোতি, যথাহ –

‘‘কিত্তাৰতা নু খো ভন্তে বহুস্সুতো হোতীতি? যতো খো ভিক্খু খন্ধকুসলো হোতি. ধাতু…পে… আযতন…পে… পটিচ্চসমুপ্পাদকুসলো হোতি, এত্তাৰতা খো ভিক্খু বহুস্সুতো হোতী’’তি.

তস্মা ‘‘যস্স খন্ধধাতুআযতনাদীসূ’’তিআদি ৰুত্তং. আদি-সদ্দেন চেত্থ যাৰ পটিচ্চসমুপ্পাদা সঙ্গণ্হাতি. তত্থ ৰাচুগ্গতকরণং উগ্গহো. অত্থস্স পরিপুচ্ছনং পরিপুচ্ছা. অট্ঠকথাৰসেন অত্থস্স সোতদ্ৰারপটিবদ্ধতাকরণং সৰনং. ব্যঞ্জনত্থানং সুনিক্খেপসুনযনেন ধম্মস্স পরিহরণং ধারণং. এৰং সুতধাতপরিচিতানং ৰিতক্কনং মনসানুপেক্খনং পচ্চৰেক্খণং.

এৰং পভেদং দস্সেত্ৰা ৰচনত্থম্পি দস্সেতি ‘‘দুৰিধো’’তিআদিনা. পুথূনন্তি অনেকৰিধানং কিলেসাদীনং. পুথুজ্জনন্তোগধত্তাতি বহূনং জনানং অব্ভন্তরে সমৰরোধভাৰতো পুথুজ্জনোতি সম্বন্ধো. পুথুচাযং জনোতি পুথু এৰ ৰিসুংযেৰ অযং সঙ্খ্যং গতো. ইতীতি তস্মা পুথুজ্জনোতি সম্বন্ধো. এৰং গাথাবন্ধেন সঙ্খেপতো দস্সিতমত্থং ‘‘সো হী’’তিআদিনা ৰিৰরতি. ‘‘নানপ্পকারান’’ন্তি ইমিনা পুথু-সদ্দো ইধ বহ্ৰত্থোতি দস্সেতি.

আদি-সদ্দেন সঙ্গহিতমত্থং, তদত্থস্স চ সাধকং অম্বসেচনগরুসিনাননযেন নিদ্দেসপাল়িযা দস্সেন্তো ‘‘যথাহা’’তিআদিমাহ. অৰিহতা সক্কাযদিট্ঠিযো, পুথু বহুকা তা এতেসন্তি পুথুঅৰিহতসক্কাযদিট্ঠিকা, এতেন অৰিহতত্তা পুথু সক্কাযদিট্ঠিযো জনেন্তি, পুথূহি ৰা সক্কাযদিট্ঠীহি জনিতাতি অত্থং দস্সেতি. অৰিহতত্থমেৰ ৰা জনসদ্দো ৰদতি, তস্মা পুথু সক্কাযদিট্ঠিযো জনেন্তি ন ৰিহনন্তি, জনা ৰা অৰিহতা পুথু সক্কাযদিট্ঠিযো এতেসন্তি অত্থং দস্সেতীতিপি ৰট্টতি, ৰিসেসনপরনিপাতনঞ্চেত্থ দট্ঠব্বং যথা ‘‘অগ্যাহিতো’’তি. ‘‘পুথু সত্থারানং মুখুল্লোকিকা’’তি এতেন পুথু বহৰো জনা সত্থারো এতেসন্তি নিব্বচনং দস্সিতং. পুথু সব্বগতীহি অৰুট্ঠিতাতি এত্থ পন কম্মকিলেসেহি জনেতব্বা, জাযন্তি ৰা সত্তা এত্থাতি জনা, গতিযো, পুথু সব্বা এৰ জনা গতিযো এতেসন্তি ৰচনত্থো. ‘‘পুথু নানাভিসঙ্খারে অভিসঙ্খরোন্তী’’তি এতেন চ জাযন্তি এতেহি সত্তাতি জনা, পুঞ্ঞাভিসঙ্খারাদযো, পুথু নানাৰিধা জনা সঙ্খারা এতেসং ৰিজ্জন্তি, পুথু ৰা নানাভিসঙ্খারে জনেন্তি অভিসঙ্খরোন্তীতি অত্থমাহ. ততো পরং পন ‘‘পুথু নানাওঘেহি ৰুয্হন্তী’’তিআদিঅত্থত্তযং জনেন্তি এতেহি সত্তাতি জনা, কামোঘাদযো, রাগসন্তাপাদযো, রাগপরিল়াহাদযো চ, সব্বেপি ৰা কিলেসপরিল়াহা. পুথু নানপ্পকারা তে এতেসং ৰিজ্জন্তি, তেহি ৰা জনেন্তি ৰুয্হন্তি, সন্তাপেন্তি, পরিডহন্তি চাতি নিব্বচনং দস্সেতুং ৰুত্তং. ‘‘রত্তা গিদ্ধা’’তিআদি পরিযাযৰচনং.

অপি চ রত্তাতি ৰত্থং ৰিয রঙ্গজাতেন চিত্তস্স ৰিপরিণামকরেন ছন্দরাগেন রত্তা. গিদ্ধাতি অভিকঙ্খনসভাৰেন অভিগিজ্ঝনেন গিদ্ধা. গথিতাতি গন্থিতা ৰিয দুম্মোচনীযভাৰেন তত্থ পটিবদ্ধা. মুচ্ছিতাতি কিলেসাৰিসনৰসেন ৰিসঞ্ঞীভূতা ৰিয অনঞ্ঞকিচ্চমোহং সমাপন্না. অজ্ঝোসন্নাতি অনঞ্ঞাসাধারণে ৰিয কত্ৰা গিলিত্ৰা পরিনিট্ঠপেত্ৰা ঠিতা. লগ্গাতি গাৰো কণ্টকে ৰিয আসত্তা, মহাপলিপে ৰা পতনেন নাসিকগ্গপলিপন্নপুরিসো ৰিয উদ্ধরিতুমসক্কুণেয্যভাৰেন নিমুগ্গা. লগ্গিতাতি মক্কটালেপেন ৰিয মক্কটো পঞ্চন্নং ইন্দ্রিযানং ৰসেন আসঙ্গিতা, পলিবুদ্ধাতি সম্বদ্ধা, উপদ্দুতা ৰাতি অযমত্থো অঙ্গুত্তরটীকাযং (অ. নি. অট্ঠ. ১.৫১) ৰুত্তো. এতেন জাযতীতি জনো, ‘‘রাগো গেধো’’তি এৰমাদিকো, পুথু নানাৰিধো জনো রাগাদিকো এতেসং, পুথূসু ৰা পঞ্চসু কামগুণেসু জনা রত্তা গিদ্ধা…পে… পলিবুদ্ধাতি অত্থং দস্সেতি.

‘‘আৰুতা’’তিআদিপি পরিযাযৰচনমেৰ. অপিচ ‘‘আৰুতাতি আৰরিতা. নিৰুতাতি নিৰারিতা. ওফুতাতি পলিগুণ্ঠিতা, পরিযোনদ্ধা ৰা. পিহিতাতি পিদহিতা. পটিচ্ছন্নাতি ছাদিতা. পটিকুজ্জিতাতি হেট্ঠামুখজাতা’’তি তত্থেৰ (অ. নি. অট্ঠ. ১.৫১) ৰুত্তং. এত্থ চ জনেন্তি এতেহীতি জনা, নীৰরণা, পুথু নানাৰিধা জনা নীৰরণা এতেসং, পুথূহি ৰা নীৰরণেহি জনা আৰুতা…পে… পটিকুজ্জিতাতি নিব্বচনং দস্সেতি. পুথূসু নীচধম্মসমাচারেসু জাযতি, পুথূনং ৰা অব্ভন্তরে জনো অন্তোগধো, পুথু ৰা বহুকো জনোতি অত্থং দস্সেতি ‘‘পুথূন’’ন্তিআদিনা, এতেন চ ততিযপাদং ৰিৰরতি, সমত্থেতি ৰা. ‘‘পুথুৰা’’তিআদিনা পন চতুত্থপাদং. পুথু ৰিসংসট্ঠো এৰ জনো পুথুজ্জনোতি অযঞ্হেত্থ ৰচনত্থো.

যেহি গুণৰিসেসেহি নিমিত্তভূতেহি ভগৰতি ‘‘তথাগতো’’তি অযং সমঞ্ঞা পৰত্তা, তং দস্সনত্থং ‘‘অট্ঠহি কারণেহি ভগৰা তথাগতো’’তিআদি ৰুত্তং. একোপি হি সদ্দো অনেকপৰত্তিনিমিত্তমধিকিচ্চ অনেকধা অত্থপ্পকাসকো, ভগৰতো চ সব্বেপি নামসদ্দা অনেকগুণনেমিত্তিকাযেৰ. যথাহ –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. (ধ. স. ১৩১৩; উদা. অট্ঠ. ৫৭; পটি. ম. অট্ঠ. ১.৭৬; দী. নি. টী. ১.৪১৩);

কানি পন তানীতি অনুযোগে সতি পঠমং তস্সরূপং সঙ্খেপতো উদ্দিসিত্ৰা ‘‘কথ’’ন্তিআদিনা নিদ্দিসতি. তথা আগতোতি এত্থ আকারনিযমনৰসেন ওপম্মসম্পটিপাদনত্থো তথা-সদ্দো. সামঞ্ঞজোতনায ৰিসেসাৰট্ঠানতো, ৰিসেসত্থিনা চ সামঞ্ঞসদ্দস্সাপি ৰিসেসত্থেযেৰ অনুপযুজ্জিতব্বতো পটিপদাগমনত্থো আগত সদ্দো দট্ঠব্বো, ন ঞাণগমনত্থো তথলক্খণং আগতো’’তিআদীসু (দী. নি. অট্ঠ. ১.৭; ম. নি. অট্ঠ. ১.১২; সং. নি. অট্ঠ. ২.৩.৭৮; অ. নি. অট্ঠ. ১.১৭০; থেরগা. অট্ঠ. ১.৪৩; ইতিৰু. অট্ঠ. ৩৮; পটি. ম. অট্ঠ. ১.৩৭; বু. ৰং. অট্ঠ. ২; মহানি. অট্ঠ. ১৪) ৰিয, নাপি কাযগমনাদি অত্থো ‘‘আগতো খো মহাসমণো, মাগধানং গিরিব্বজ’’ন্তিআদীসু (মহাৰ. ৫৩) ৰিয. তত্থ যস্স আকারস্স নিযমনৰসেন ওপম্মসম্পটিপাদনত্থো তথা-সদ্দো, তদাকারং করুণাপধানত্তা তস্স মহাকরুণামুখেন পুরিমবুদ্ধানং আগমনপটিপদায উদাহরণৰসেন সামঞ্ঞতো দস্সেন্তো ‘‘যথা সব্বলোকে’’তিআদিমাহ. যংতং-সদ্দানং একন্তসম্বন্ধভাৰতো চেত্থ তথা-সদ্দস্সত্থদস্সনে যথা-সদ্দেন অত্থো ৰিভাৰিতো. তদেৰ ৰিত্থারেতি ‘‘যথা ৰিপস্সী ভগৰা’’তিআদিনা, ৰিপস্সীআদীনঞ্চেত্থ ছন্নং সম্মাসম্বুদ্ধানং মহাপদানসুত্তাদীসু (দী. নি. ২.৪) সম্পহুলনিদ্দেসেন (দী. নি. অট্ঠ. ২.সম্বহুলপরিচ্ছেদৰণ্ণনা) সুপাকটত্তা, আসন্নত্তা চ তেসং ৰসেন তং পটিপদং দস্সেতীতি দট্ঠব্বং. আগতো যথা, তথা আগতোতি সব্বত্র সম্বন্ধো. ‘‘কিং ৰুত্তং হোতী’’তিআদিনাপি তদেৰ পটিনিদ্দিসতি. তত্থ যেন অভিনীহারেনাতি মনুস্সত্তলিঙ্গসম্পত্তিহেতুসত্থারদস্সনপব্বজ্জাগুণসম্পত্তিঅধিকারছন্দানং ৰসেন অট্ঠঙ্গসমন্নাগতেন মহাপণিধানেন. সব্বেসঞ্হি বুদ্ধানং পঠমপণিধানং ইমিনাৰ নীহারেন সমিজ্ঝতি. অভিনীহারোতি চেত্থ মূলপণিধানস্সেতং অধিৰচনন্তি দট্ঠব্বং.

এৰং মহাভিনীহারৰসেন ‘‘তথাগতো’’তি পদস্স অত্থং দস্সেত্ৰা ইদানি পারমীপূরণৰসেনপি দস্সেতুং ‘‘অথ ৰা’’তিআদিমাহ. ‘‘এত্থ চ সুত্তন্তিকানং মহাবোধিযানপটিপদায কোসল্লজননত্থং পারমীসু অযং ৰিত্থারকথা’’তিআদিনা আচরিযধম্মপালত্থেরেন (দী. নি. টী. ১.৭) যা পারমীসু ৰিনিচ্ছযকথা ৰুত্তা, কিঞ্চাপি সা অম্হেহি ইধ ৰুচ্চমানা গন্থৰিত্থারকরা ৰিয ভৰিস্সতি, যস্মা পনাযং সংৰণ্ণনা এতিস্সং পচ্ছা পমাদলেখৰিসোধনৰসেন, তদৰসেসত্থপরিযাদানৰসেন চ পৰত্তা, তস্মা সাপি পারমীকথা ইধ ৰত্তব্বাযেৰাতি ততো চেৰ চরিযাপিটকট্ঠকথাতো চ আহরিত্ৰা যথারহং গাথাবন্ধেহি সমলঙ্করিত্ৰা অত্থমধিপ্পাযঞ্চ ৰিসোধযমানা ভৰিস্সতি. কথং?

কা পনেতা পারমিযো, কেনট্ঠেন কতীৰিধা;

কো চ তাসং কমো কানি, লক্খণাদীনি সব্বথা.

কো পচ্চযো, সংকিলেসো, ৰোদানং পটিপক্খকো;

পটিপত্তিৰিভাগো চ, সঙ্গহো সম্পদা তথা.

কিত্তকেন সম্পাদনং, আনিসংসো চ কিং ফলং;

পঞ্হমেতং ৰিস্সজ্জিত্ৰা, ভৰিস্সতি ৰিনিচ্ছযো.

তত্রিদং ৰিস্সজ্জনং –

কা পনেতা পারমিযোতি –

তণ্হামানাদিমঞ্ঞত্র, উপাযকুসলেন যা;

ঞাণেন পরিগ্গহিতা, পারমী সা ৰিভাৰিতা.

তণ্হামানাদিনা হি অনুপহতা করুণূপাযকোসল্লপরিগ্গহিতা দানাদযো গুণসঙ্খাতা এতা কিরিযা ‘‘পারমী’’তি ৰিভাৰিতা.

কেনট্ঠেন পারমিযোতি –

পরমো উত্তমট্ঠেন, তস্সাযং পারমী তথা;

কম্মং ভাৰোতি দানাদি, তদ্ধিততো তিধা মতা.

পূরেতি মৰতি পরে, পরং মজ্জতি মযতি;

মুনাতি মিনোতি তথা, মিনাতীতি ৰা পরমো.

পারে মজ্জতি সোধেতি, মৰতি মযতীতি ৰা;

মাযেতি তং ৰা মুনাতি, মিনোতি মিনাতি তথা.

পারমীতি মহাসত্তো, ৰুত্তানুসারতো পন;

তদ্ধিতত্থত্তযেনেৰ, পারমীতি অযং মতা.

দানসীলাদিগুণৰিসেসযোগেন হি সত্তুত্তমতায মহাবোধিসত্তো পরমো, তস্স অযং, ভাৰো, কম্মন্তি ৰা পারমী, দানাদিকিরিযা. অথ ৰা পরতি পূরেতীতি পরমো নিরুত্তিনযেন, দানাদিগুণানং পূরকো, পালকো চ বোধিসত্তো, পরমস্স অযং, ভাৰো, কম্মং ৰা পারমী. অপিচ পরে সত্তে মৰতি অত্তনি বন্ধতি গুণৰিসেসযোগেন, পরং ৰা অতিরেকং মজ্জতি সংকিলেসমলতো, পরং ৰা সেট্ঠং নিব্বানং ৰিসেসেন মযতি গচ্ছতি, পরং ৰা লোকং পমাণভূতেন ঞাণৰিসেসেন ইধলোকমিৰ মুনাতি পরিচ্ছিন্দতি, পরং ৰা অতিৰিয সীলাদিগুণগণং অত্তনো সন্তানে মিনোতি পক্খিপতি, পরং ৰা অত্তভূততো ধম্মকাযতো অঞ্ঞং, পটিপক্খং ৰা তদনত্থকরং কিলেসচোরগণং মিনাতি হিংসতীতি পরমো, মহাসত্তো, ‘‘পরমস্স অয’’ন্তিআদিনা ৰুত্তনযেন পারমী. পারে ৰা নিব্বানে মজ্জতি সুজ্ঝতি, সত্তে চ সোধেতি, তত্থ ৰা সত্তে মৰতি বন্ধতি যোজেতি, তং ৰা মযতি গচ্ছতি, সত্তে চ মাযেতি গমেতি, তং ৰা যাথাৰতো মুনাতি পরিচ্ছিন্দতি, তত্থ ৰা সত্তে মিনোতি পক্খিপতি, তত্থ ৰা সত্তানং কিলেসারিং মিনাতি হিংসতীতি পারমী, মহাসত্তো, ‘‘তস্স অয’’ন্তিআদিনা দানাদিকিরিযাৰ পারমীতি. ইমিনা নযেন পারমীনং ৰচনত্থো ৰেদিতব্বো.

কতিৰিধাতি সঙ্খেপতো দসৰিধা, তা পন বুদ্ধৰংসপাল়িযং (বু. ৰং. ১.৭৬) সরূপতো আগতাযেৰ. যথাহ ‘‘ৰিচিনন্তো তদাদক্খিং, পঠমং দানপারমি’’ন্তিআদি (বু. ৰং. ২.১১৬). যথা চাহ –

‘‘কতি নু খো ভন্তে বুদ্ধকারকা ধম্মাতি? দস খো সারিপুত্ত বুদ্ধকারকা ধম্মা, কতমে দস? দানং খো সারিপুত্ত বুদ্ধকারকো ধম্মো, সীলং নেক্খম্মং পঞ্ঞা ৰীরিযং খন্তি সচ্চং অধিট্ঠানং মেত্তা উপেক্খা বুদ্ধকারকো ধম্মো, ইমে খো সারিপুত্ত দস বুদ্ধকারকা ধম্মাতি. ইদমৰোচ ভগৰা, ইদং ৰত্ৰান সুগতো অথাপরং এতদৰোচ সত্থা –

‘দানং সীলঞ্চ নেক্খম্মং, পঞ্ঞাৰীরিযেন পঞ্চমং;

খন্তিসচ্চমধিট্ঠানং, মেত্তুপেক্খাতি তে দসা’তি’’. (বু. ৰং. ১.৭৬);

কেচি পন ‘‘ছব্বিধা’’তি ৰদন্তি, তং এতাসং সঙ্গহৰসেন ৰুত্তং. সো পন সঙ্গহো পরতো আৰি ভৰিস্সতি.

কো চ তাসং কমোতি এত্থ কমো নাম দেসনাক্কমো, সো চ পঠমসমাদানহেতুকো, সমাদানং পৰিচযহেতুকং, ইতি যথা আদিম্হি পঠমাভিনীহারকালে পৰিচিতা, সমাদিন্না চ, তথা দেসিতা. যথাহ ‘‘ৰিচিনন্তো তদাদক্খিং, পঠমং দানপারমি’’ন্তিআদি (বু. ৰং. ২.১১৬) তেনেতং ৰুচ্চতি –

‘‘পঠমং সমাদানতা-ৰসেনাযং কমো রুতো;

অথ ৰা অঞ্ঞমঞ্ঞস্স, বহূপকারতোপি চা’’তি.

তত্থ হি দানং সীলস্স বহূপকারং, সুকরঞ্চাতি তং আদিম্হি ৰুত্তং. দানং পন সীলপরিগ্গহিতং মহপ্ফলং হোতি মহানিসংসন্তি দানানন্তরং সীলং ৰুত্তং. সীলং নেক্খম্মপরিগ্গহিতং…পে… নেক্খম্মং পঞ্ঞাপরিগ্গহিতং…পে… পঞ্ঞা ৰীরিযপরিগ্গহিতা…পে… ৰীরিযং খন্তিপরিগ্গহিতং…পে… খন্তি সচ্চপরিগ্গহিতা…পে… সচ্চং অধিট্ঠানপরিগ্গহিতং…পে… অধিট্ঠানং মেত্তাপরিগ্গহিতং…পে… মেত্তা উপেক্খাপরিগ্গহিতা মহপ্ফলা হোতি মহানিসংসাতি মেত্তানন্তরং উপেক্খা ৰুত্তা. উপেক্খা পন করুণাপরিগ্গহিতা, করুণা চ উপেক্খাপরিগ্গহিতাতি ৰেদিতব্বা. কথং পন মহাকারুণিকা বোধিসত্তা সত্তেসু উপেক্খকা হোন্তীতি? উপেক্খিতব্বযুত্তকেসু কঞ্চি কালং উপেক্খকা হোন্তি, ন পন সব্বত্থ, সব্বদা চাতি কেচি. অপরে পন ন চ সত্তেসু উপেক্খকা, সত্তকতেসু পন ৰিপ্পকারেসু উপেক্খকা হোন্তীতি, ইদমেৰেত্থ যুত্তং.

অপরো নযো –

সব্বসাধারণতাদি-কারণেহিপি ঈরিতং;

দানং আদিম্হি সেসা তু, পুরিমেপি অপেক্খকা.

পচুরজনেসুপি হি পৰত্তিযা সব্বসত্তসাধারণত্তা, অপ্পফলত্তা, সুকরত্তা চ দানং আদিম্হি ৰুত্তং. সীলেন দাযকপটিগ্গাহকসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানস্সানন্তরং সীলং ৰুত্তং. নেক্খম্মেন সীলসম্পত্তিসিদ্ধিতো, কাযৰচীসুচরিতং ৰত্ৰা মনোসুচরিতৰচনতো, ৰিসুদ্ধসীলস্স সুখেনেৰ ঝানসমিজ্ঝনতো, কম্মাপরাধপ্পহানেন পযোগসুদ্ধিং ৰত্ৰা কিলেসাপরাধপ্পহানেন আসযসুদ্ধিৰচনতো, ৰীতিক্কমপ্পহানে ঠিতস্স পরিযুট্ঠানপ্পহানৰচনতো চ সীলস্সানন্তরং নেক্খম্মং ৰুত্তং. পঞ্ঞায নেক্খম্মস্স সিদ্ধিপরিসুদ্ধিতো, ঝানাভাৰে পঞ্ঞাভাৰৰচনতো. সমাধিপদট্ঠানা হি পঞ্ঞা, পঞ্ঞাপচ্চুপট্ঠানো চ সমাধি. সমথনিমিত্তং ৰত্ৰা উপেক্খানিমিত্তৰচনতো, পরহিতজ্ঝানেন পরহিতকরণূপাযকোসল্লৰচনতো চ নেক্খম্মস্সানন্তরং পঞ্ঞা ৰুত্তা. ৰীরিযারম্ভেন পঞ্ঞাকিচ্চসিদ্ধিতো, সত্তসুঞ্ঞতাধম্মনিজ্ঝানক্খন্তিং ৰত্ৰা সত্তহিতায আরম্ভস্স অচ্ছরিযতাৰচনতো, উপেক্খানিমিত্তং ৰত্ৰা পগ্গহনিমিত্তৰচনতো, নিসম্মকারিতং ৰত্ৰা উট্ঠানৰচনতো চ. নিসম্মকারিনো হি উট্ঠানং ফলৰিসেসমাৰহতীতি পঞ্ঞাযানন্তরং ৰীরিযং ৰুত্তং.

ৰীরিযেন তিতিক্খাসিদ্ধিতো. ৰীরিযৰা হি আরদ্ধৰীরিযত্তা সত্তসঙ্খারেহি উপনীতং দুক্খং অভিভুয্য ৰিহরতি. ৰীরিযস্স তিতিক্খালঙ্কারভাৰতো. ৰীরিযৰতো হি তিতিক্খা সোভতি. পগ্গহনিমিত্তং ৰত্ৰা সমথনিমিত্তৰচনতো, অচ্চারম্ভেন উদ্ধচ্চদোসপ্পহানৰচনতো. ধম্মনিজ্ঝানক্খন্তিযা হি উদ্ধচ্চদোসো পহীযতি. ৰীরিযৰতো সাতচ্চকরণৰচনতো. খন্তিবহুলো হি অনুদ্ধতো সাতচ্চকারী হোতি. অপ্পমাদৰতো পরহিতকিরিযারম্ভে পচ্চুপকারতণ্হাভাৰৰচনতো. যাথাৰতো ধম্মনিজ্ঝানে হি সতি তণ্হা ন হোতি. পরহিতারম্ভে পরমেপি পরকতদুক্খসহনতাৰচনতো চ ৰীরিযস্সানন্তরং খন্তি ৰুত্তা. সচ্চেন খন্তিযা চিরাধিট্ঠানতো, অপকারিনো অপকারখন্তিং ৰত্ৰা তদুপকারকরণে অৰিসংৰাদৰচনতো, খন্তিযা অপৰাদৰাচাৰিকম্পনেন ভূতৰাদিতায অৰিজহনৰচনতো, সত্তসুঞ্ঞতাধম্ম-নিজ্ঝানক্খন্তিং ৰত্ৰা তদুপব্রূহিতঞাণসচ্চস্স ৰচনতো চ খন্তিযানন্তরং সচ্চং ৰুত্তং. অধিট্ঠানেন সচ্চসিদ্ধিতো. অচলাধিট্ঠানস্স হি ৰিরতি সিজ্ঝতি. অৰিসংৰাদিতং ৰত্ৰা তত্থ অচলভাৰৰচনতো. সচ্চসন্ধো হি দানাদীসু পটিঞ্ঞানুরূপং নিচ্চলো পৰত্ততি. ঞাণসচ্চং ৰত্ৰা সম্ভারেসু পৰত্তিনিট্ঠাপনৰচনতো. যথাভূতঞাণৰা হি বোধিসম্ভারেসু অধিট্ঠাতি, তে চ নিট্ঠাপেতি. পটিপক্খেহি অকম্পিযভাৰতো চ সচ্চস্সানন্তরং অধিট্ঠানং ৰুত্তং. মেত্তায পরহিতকরণসমাদানাধিট্ঠানসিদ্ধিতো, অধিট্ঠানং ৰত্ৰা হিতূপসংহারৰচনতো. বোধিসম্ভারে হি অধিতিট্ঠমানো মেত্তাৰিহারী হোতি. অচলাধিট্ঠানস্স সমাদানাৰিকোপনেন সমাদানসম্ভৰতো চ অধিট্ঠানস্সানন্তরং মেত্তা ৰুত্তা. উপেক্খায মেত্তাৰিসুদ্ধিতো, সত্তেসু হিতূপসংহারং ৰত্ৰা তদপরাধেসু উদাসীনতাৰচনতো, মেত্তাভাৰনং ৰত্ৰা তন্নিস্সন্দভাৰনাৰচনতো, ‘‘হিতকামসত্তেপি উপেক্খকো’’তি অচ্ছরিযগুণতাৰচনতো চ মেত্তাযানন্তরং উপেক্খা ৰুত্তাতি এৰমেতাসং কমো ৰেদিতব্বো.

কানি লক্খণাদীনি সব্বথাতি এত্থ পন অৰিসেসেন –

পরেসমনুগ্গহণং, লক্খণন্তি পৰুচ্চতি;

উপকারো অকম্পো চ, রসো হিতেসিতাপি চ.

বুদ্ধত্তং পচ্চুপট্ঠানং, দযা ঞাণং পৰুচ্চতি;

পদট্ঠানন্তি তাসন্তু, পচ্চেকং তানি ভেদতো.

সব্বাপি হি পারমিযো পরানুগ্গহলক্খণা, পরেসং উপকারকরণরসা, অৰিকম্পনরসা ৰা, হিতেসিতাপচ্চুপট্ঠানা, বুদ্ধত্তপচ্চুপট্ঠানা ৰা, মহাকরুণাপদট্ঠানা, করুণূপাযকোসল্লপদট্ঠানা ৰা.

ৰিসেসেন পন যস্মা করুণূপাযকোসল্লপরিগ্গহিতা অত্তুপকরণপরিচ্চাগচেতনা দানপারমী. করুণূপাযকোসল্লপরিগ্গহিতং কাযৰচীসুচরিতং অত্থতো অকত্তব্বৰিরতি, কত্তব্বকরণচেতনাদযো চ সীলপারমী. করুণূপাযকোসল্লপরিগ্গহিতো আদীনৰদস্সনপুব্বঙ্গমো কামভৰেহি নিক্খমনচিত্তুপ্পাদো নেক্খম্মপারমী. করুণূপাযকোসল্লপরিগ্গহিতো ধম্মানং সামঞ্ঞৰিসেসলক্খণাৰবোধো পঞ্ঞাপারমী. করুণূপাযকোসল্লপরিগ্গহিতো কাযচিত্তেহি পরহিতারম্ভো ৰীরিযপারমী. করুণূপাযকোসল্লপরিগ্গহিতো সত্তসঙ্খারাপরাধসহনসঙ্খাতো অদোসপ্পধানো তদাকারপ্পৰত্তো চিত্তুপ্পাদো খন্তিপারমী. করুণূপাযকোসল্লপরিগ্গহিতং ৰিরতিচেতনাদিভেদং অৰিসংৰাদনং সচ্চপারমী. করুণূপাযকোসল্লপরিগ্গহিতো অচলসমাদানাধিট্ঠানসঙ্খাতো তদাকারপ্পৰত্তো চিত্তুপ্পাদো অধিট্ঠানপারমী. করুণূপাযকোসল্লপরিগ্গহিতো লোকস্স হিতসুখূপসংহারো অত্থতো অব্যাপাদো মেত্তাপারমী. করুণূপাযকোসল্লপরিগ্গহিতা অনুনযপটিঘৰিদ্ধংসনসঙ্খাতা ইট্ঠানিট্ঠেসু সত্তসঙ্খারেসু সমপ্পৰত্তি উপেক্খাপারমী.

তস্মা পরিচ্চাগলক্খণং দানং, দেয্যধম্মে লোভৰিদ্ধংসনরসং, অনাসত্তিপচ্চুপট্ঠানং, ভৰৰিভৰসম্পত্তিপচ্চুপট্ঠানং ৰা, পরিচ্চজিতব্বৰত্থুপদট্ঠানং. সীলনলক্খণং সীলং, সমাধানলক্খণং, পতিট্ঠানলক্খণং ৰাতি ৰুত্তং হোতি. দুস্সীল্যৰিদ্ধংসনরসং, অনৰজ্জরসং ৰা, সোচেয্যপচ্চুপট্ঠানং, হিরোত্তপ্পপদট্ঠানং. কামতো, ভৰতো চ নিক্খমনলক্খণং নেক্খম্মং, তদাদীনৰৰিভাৰনরসং, ততোযেৰ ৰিমুখভাৰপচ্চুপট্ঠানং, সংৰেগপদট্ঠানং. যথাসভাৰপটিৰেধলক্খণা পঞ্ঞা, অক্খলিতপটিৰেধলক্খণা ৰা কুসলিস্সাসখিত্তউসুপটিৰেধো ৰিয, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসকো ৰিয, সমাধিপদট্ঠানা, চতুসচ্চপদট্ঠানা ৰা. উস্সাহলক্খণং ৰীরিযং, উপত্থম্ভনরসং, অসংসীদনপচ্চুপট্ঠানং, ৰীরিযারম্ভৰত্থুপদট্ঠানং, সংৰেগপদট্ঠানং ৰা.

খমনলক্খণা খন্তি, ইট্ঠানিট্ঠসহনরসা, অধিৰাসনপচ্চুপট্ঠানা, অৰিরোধপচ্চুপট্ঠানা ৰা, যথাভূতদস্সনপদট্ঠানা. অৰিসংৰাদনলক্খণং সচ্চং, যাথাৰৰিভাৰনরসং, সাধুতাপচ্চুপট্ঠানং, সোরচ্চপদট্ঠানং. বোধিসম্ভারেসু অধিট্ঠানলক্খণং অধিট্ঠানং, তেসং পটিপক্খাভিভৰনরসং, তত্থ অচলতাপচ্চুপট্ঠানং, বোধিসম্ভারপদট্ঠানং. হিতাকারপ্পৰত্তিলক্খণা মেত্তা, হিতূপসংহাররসা, আঘাতৰিনযনরসা ৰা, সোম্মভাৰপচ্চুপট্ঠানা, সত্তানং মনাপভাৰদস্সনপদট্ঠানা. মজ্ঝত্তাকারপ্পৰত্তিলক্খণা উপেক্খা, সমভাৰদস্সনরসা, পটিঘানুনযৰূপসমপচ্চুপট্ঠানা, কম্মস্সকতাপচ্চৰেক্খণপদট্ঠানা. এত্থ চ করুণূপাযকোসল্লপরিগ্গহিততা দানাদীনং পরিচ্চাগাদিলক্খণস্স ৰিসেসনভাৰেন ৰত্তব্বা, যতো তানি পারমীসঙ্খ্যং লভন্তি. ন হি সম্মাসম্বোধিযাদিপত্থনমঞ্ঞত্র অকরুণূপাযকোসল্লপরিগ্গহিতানি ৰট্টগামীনি দানাদীনি পারমীসঙ্খ্যং লভন্তীতি.

কো পচ্চযোতি –

অভিনীহারো চ তাসং, দযা ঞাণঞ্চ পচ্চযো;

উস্সাহুম্মঙ্গৰত্থানং, হিতাচারাদযো তথা.

অভিনীহারো তাৰ পারমীনং সব্বাসম্পি পচ্চযো. যো হি অযং ‘‘মনুস্সত্তং লিঙ্গসম্পত্তী’’তিআদি (বু. ৰং. ২.৫৯) অট্ঠধম্মসমোধানসম্পাদিতো ‘‘তিণ্ণো তারেয্যং মুত্তো মোচেয্যং, বুদ্ধো বোধেয্যং সুদ্ধো সোধেয্যং, দন্তো দমেয্যং, সন্তো সমেয্যং, অস্সত্থো অস্সাসেয্যং, পরিনিব্বুতো পরিনিব্বাপেয্য’’ন্তিআদিনা পৰত্তো অভিনীহারো, সো অৰিসেসেন সব্বপারমীনং পচ্চযো. তপ্পৰত্তিযা হি উদ্ধং পারমীনং পৰিচযুপট্ঠানসমাদানাধিট্ঠাননিপ্ফত্তিযো মহাপুরিসানং সম্ভৰন্তি, অভিনীহারো চ নামেস অত্থতো ভেসমট্ঠঙ্গানং সমোধানেন তথাপৰত্তো চিত্তুপ্পাদো, ‘‘অহো ৰতাহং অনুত্তরং সম্মাসম্বোধিং অভিসম্বুজ্ঝেয্যং, সব্বসত্তানং হিতসুখং নিপ্ফাদেয্য’’ন্তিআদিপত্থনাসঙ্খাতো অচিন্তেয্যং বুদ্ধভূমিং, অপরিমাণং লোকহিতঞ্চ আরব্ভ পৰত্তিযা সব্ববুদ্ধকারকধম্মমূলভূতো পরমভদ্দকো পরমকল্যাণো অপরিমেয্যপ্পভাৰো পুঞ্ঞৰিসেসোতি দট্ঠব্বো.

তস্স চ উপ্পত্তিযা সহেৰ মহাপুরিসো মহাবোধিযানপটিপত্তিং ওতিণ্ণো নাম হোতি, নিযতভাৰসমধিগমনতো, ততো চ অনিৰত্তনসভাৰতো ‘‘বোধিসত্তো’’তি সমঞ্ঞং লভতি, সব্বভাগেন সম্মাসম্বোধিযং সম্মাসত্তমানসতা, বোধিসম্ভারে সিক্খাসমত্থতা চস্স সন্তিট্ঠতি. যথাৰুত্তাভিনীহারসমিজ্ঝনেন হি মহাপুরিসা সব্বঞ্ঞুতঞ্ঞাণাধিগমনপুব্বলিঙ্গেন সযম্ভুঞাণেন সম্মদেৰ সব্বপারমিযো ৰিচিনিত্ৰা সমাদায অনুক্কমেন পরিপূরেন্তি, যথা তং কতমহাভিনীহারো সুমেধপণ্ডিতো. যথাহ –

‘‘হন্দ বুদ্ধকরে ধম্মে, ৰিচিনামি ইতো চিতো;

উদ্ধং অধো দস দিসা, যাৰতা ধম্মধাতুযা;

ৰিচিনন্তো তদা দক্খিং, পঠমং দানপারমি’’ন্তি. (বু. ৰং. ২.১১৫, ১১৬); –

ৰিত্থারো. লক্খণাদিতো পনেস সম্মদেৰ সম্মাসম্বোধিপণিধানলক্খণো, ‘‘অহো ৰতাহং অনুত্তরং সম্মাসম্বোধিং অভিসম্বুজ্ঝেয্যং, সব্বসত্তানং হিতসুখং নিপ্ফাদেয্য’’ন্তিআদিপত্থনারসো, বোধিসম্ভারহেতুভাৰপচ্চুপট্ঠানো, মহাকরুণাপদট্ঠানো, উপনিস্সযসম্পত্তিপদট্ঠানো ৰা.

তস্স পন অভিনীহারস্স চত্তারো পচ্চযা, চত্তারো হেতূ, চত্তারি চ বলানি ৰেদিতব্বানি. তত্থ কতমে চত্তারো পচ্চযা মহাভিনীহারায? ইধ মহাপুরিসো পস্সতি তথাগতং মহতা বুদ্ধানুভাৰেন অচ্ছরিযব্ভুতং পাটিহারিযং করোন্তং, তস্স তং নিস্সায তং আরম্মণং কত্ৰা মহাবোধিযং চিত্তং সন্তিট্ঠতি ‘‘মহানুভাৰা ৰতাযং ধম্মধাতু, যস্সা সুপ্পটিৰিদ্ধত্তা ভগৰা এৰং অচ্ছরিযব্ভুতধম্মো, অচিন্তেয্যানুভাৰো চা’’তি, সো তমেৰ মহানুভাৰদস্সনং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি, অযং পঠমো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, অপিচ খো সুণাতি ‘‘এদিসো চ এদিসো চ ভগৰা’’তি, সো তং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি, অযং দুতিযো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, নাপি তং পরতো সুণাতি, অপিচ খো তথাগতস্স ধম্মং দেসেন্তস্স ‘‘দসবলসমন্নাগতো ভিক্খৰে, তথাগতো’’তিআদিনা (সং. নি. ২.২১) বুদ্ধানুভাৰপটিসংযুত্তং ধম্মং সুণাতি, সো তং নিস্সায…পে… অযং ততিযো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, নাপি তং পরতো সুণাতি, নাপি তথাগতস্স ধম্মং সুণাতি, অপিচ খো উল়ারজ্ঝাসযো কল্যাণাধিমুত্তিকো ‘‘অহমেতং বুদ্ধৰংসং বুদ্ধতন্তিং বুদ্ধপৰেণিং বুদ্দধম্মতং পরিপালেস্সামী’’তি যাৰদেৰ ধম্মঞ্ঞেৰ সক্করোন্তো গরুং করোন্তো মানেন্তো পূজেন্তো ধম্মং অপচযমানো তং নিস্সায…পে… ঠপেতি, অযং চতুত্থো পচ্চযো মহাভিনীহারাযাতি.

কতমে চত্তারো হেতূ মহাভিনীহারায? ইধ মহাপুরিসো পকতিযা উপনিস্সযসম্পন্নো হোতি পুরিমকেসু বুদ্ধেসু কতাধিকারো, অযং পঠমো হেতু মহাভিনীহারায. পুন চপরং মহাপুরিসো পকতিযাপি করুণাজ্ঝাসযো হোতি করুণাধিমুত্তো সত্তানং দুক্খং অপনেতুকামো, অপিচ অত্তনো কাযঞ্চ জীৰিতঞ্চ পরিচ্চজি, অযং দুতিযো হেতু মহাভিনীহারায. পুন চপরং মহাপুরিসো সকলতোপি ৰট্টদুক্খতো সত্তহিতায দুক্করচরিযতো সুচিরম্পি কালং ঘটেন্তো ৰাযমন্তো অনিব্বিন্নো হোতি অনুত্রাসী, যাৰ ইচ্ছিতত্থনিপ্ফত্তি, অযং ততিযো হেতু মহাভিনীহারায. পুন চপরং মহাপুরিসো কল্যাণমিত্তসন্নিস্সিতো হোতি, যো অহিততো নং নিৰারেতি, হিতে পতিট্ঠাপেতি, অযং চতুত্থো হেতু মহাভিনীহারায.

তত্রাযং মহাপুরিসস্স উপনিস্সযসম্পদা – একন্তেনেৰস্স যথা অজ্ঝাসযো সম্বোধিনিন্নো হোতি সম্বোধিপোণো সম্বোধিপব্ভারো, তথা সত্তানং হিতচরিযায, যতো অনেন পুরিমবুদ্ধানং সন্তিকে সম্বোধিযা পণিধানং কতং হোতি মনসা, ৰাচায চ ‘‘অহম্পি এদিসো সম্মাসম্বুদ্ধো হুত্ৰা সম্মদেৰ সত্তানং হিতসুখং নিপ্ফাদেয্য’’ন্তি. এৰং সম্পন্নূপনিস্সযস্স পনস্স ইমানি উপনিস্সযসম্পত্তিযা লিঙ্গানি সম্ভৰন্তি, যেহি সমন্নাগতস্স সাৰকবোধিসত্তেহি, পচ্চেকবোধিসত্তেহি চ মহাৰিসেসো মহন্তং নানাকরণং পঞ্ঞাযতি ইন্দ্রিযতো, পটিপত্তিতো, কোসল্লতো চ. ইধ হি উপনিস্সযসম্পন্নো মহাপুরিসো যথা ৰিসদিন্দ্রিযো হোতি ৰিসদঞাণো, ন তথা ইতরে. পরহিতায পটিপন্নো হোতি, নো অত্তহিতায. তথা হি সো যথা বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং পটিপজ্জি, ন তথা ইতরে, তত্থ চ কোসল্লং আৰহতি ঠানুপ্পত্তিকপটিভানেন, ঠানাঠানকুসলতায চ.

তথা মহাপুরিসো পকতিযা দানজ্ঝাসযো হোতি দানাভিরতো, সতি দেয্যধম্মে দেতিযেৰ, ন দানতো সঙ্কোচং আপজ্জতি, সততং সমিতং সংৰিভাগসীলো হোতি, পমুদিতোৰ দেতি আদরজাতো, ন উদাসীনচিত্তো, মহন্তম্পি দানং দত্ৰা নেৰ দানেন সন্তুট্ঠো হোতি, পগেৰ অপ্পং. পরেসঞ্চ উস্সাহং জনেন্তো দানে ৰণ্ণং ভাসতি, দানপটিসংযুত্তং ধম্মকথং করোতি, অঞ্ঞে চ পরেসং দেন্তে দিস্ৰা অত্তমনো হোতি, ভযট্ঠানেসু চ পরেসং অভযং দেতীতি এৰমাদীনি দানজ্ঝাসযস্স মহাপুরিসস্স দানপারমিযা লিঙ্গানি.

তথা পাণাতিপাতাদীহি পাপধম্মেহি হিরীযতি ওত্তপ্পতি, সত্তানং অৰিহেঠনজাতিকো হোতি, সোরতো সুখসীলো অসঠো অমাযাৰী উজুজাতিকো সুব্বচো সোৰচস্সকরণীযেহি ধম্মেহি সমন্নাগতো মুদুজাতিকো অথদ্ধো অনতিমানী, পরসন্তকং নাদিযতি অন্তমসো তিণসলাকমুপাদায, অত্তনো হত্থে নিক্খিত্তং ইণং ৰা গহেত্ৰা পরং ন ৰিসংৰাদেতি, পরস্মিং ৰা অত্তনো সন্তকে ব্যামূল়্হে, ৰিস্সরিতে ৰা তং সঞ্ঞাপেত্ৰা পটিপাদেতি যথা তং ন পরহত্থগতং হোতি, অলোলুপ্পো হোতি, পরপরিগ্গহিতেসু পাপকং চিত্তম্পি ন উপ্পাদেতি, ইত্থিব্যসনাদীনি দূরতো পরিৰজ্জেতি, সচ্চৰাদী সচ্চসন্ধো ভিন্নানং সন্ধাতা সহিতানং অনুপ্পদাতা পিযৰাদী মিহিতপুব্বঙ্গমো পুব্বভাসী অত্থৰাদী ধম্মৰাদী অনভিজ্ঝালু অব্যাপন্নচিত্তো অৰিপরীতদস্সনো কম্মস্সকতাঞাণেন, সচ্চানুলোমিকঞাণেন চ, কতঞ্ঞূ কতৰেদী ৰুড্ঢাপচাযী সুৰিসুদ্ধাজীৰো ধম্মকামো, পরেসম্পি ধম্মে সমাদপেতা সব্বেন সব্বং অকিচ্চতো সত্তে নিৰারেতা কিচ্চেসু পতিট্ঠপেতা অত্তনা চ তত্থ কিচ্চে যোগং আপজ্জিতা, কত্ৰা ৰা পন সযং অকত্তব্বং সীঘঞ্ঞেৰ ততো পটিৰিরতো হোতীতি এৰমাদীনি সীলজ্ঝাসযস্স মহাপুরিসস্স সীলপারমিযা লিঙ্গানি.

তথা মন্দকিলেসো হোতি মন্দনীৰরণো পৰিৰেকজ্ঝাসযো অৰিক্খেপবহুলো, ন তস্স পাপকা ৰিতক্কা চিত্তমন্ৰাস্সৰন্তি, ৰিৰেকগতস্স চস্স অপ্পকসিরেনেৰ চিত্তং সমাধিযতি, অমিত্তপক্খেপি তুৰটং মেত্তচিত্ততা সন্তিট্ঠতি, পগেৰ ইতরস্মিং, সতিমা চ হোতি চিরকতম্পি চিরভাসিতম্পি সুসরিতা অনুস্সরিতা, মেধাৰী চ হোতি ধম্মোজপঞ্ঞায সমন্নাগতো, নিপকো চ হোতি তাসু তাসু ইতিকত্তব্বতাসু, আরদ্ধৰীরিযো চ হোতি সত্তানং হিতকিরিযাসু, খন্তিবলসমন্নাগতো চ হোতি সব্বসহো, অচলাধিট্ঠানো চ হোতি দল়্হসমাদানো, অজ্ঝুপেক্খকো চ হোতি উপেক্খাঠানীযেসু ধম্মেসূতি এৰমাদীনি মহাপুরিসস্স নেক্খম্মজ্ঝাসযাদীনং ৰসেন নেক্খম্মপারমিযাদীনং লিঙ্গানি ৰেদিতব্বানি.

এৰমেতেহি বোধিসম্ভারলিঙ্গেহি সমন্নাগতস্স মহাপুরিসস্স যং ৰুত্তং ‘‘মহাভিনীহারায কল্যাণমিত্তসন্নিস্সযো হেতূ’’তি, তত্রিদং সঙ্খেপতো কল্যাণমিত্তলক্খণং – ইধ কল্যাণমিত্তো সদ্ধাসম্পন্নো হোতি সীলসম্পন্নো সুতসম্পন্নো চাগৰীরিযসতিসমাধিপঞ্ঞাসম্পন্নো. তত্থ সদ্ধাসম্পত্তিযা সদ্দহতি তথাগতস্স বোধিং কম্মং, কম্মফলঞ্চ, তেন সম্মাসম্বোধিযা হেতুভূতং সত্তেসু হিতেসিতং ন পরিচ্চজতি. সীলসম্পত্তিযা সত্তানং পিযো হোতি মনাপো গরু ভাৰনীযো চোদকো পাপগরহিকো ৰত্তা ৰচনক্খমো. সুতসম্পত্তিযা সত্তানং হিতসুখাৰহং গম্ভীরং ধম্মকথং কত্তা হোতি. চাগসম্পত্তিযা অপ্পিচ্ছো হোতি সমাহিতো সন্তুট্ঠো পৰিৰিত্তো অসংসট্ঠো. ৰীরিযসম্পত্তিযা আরদ্ধৰীরিযো হোতি সত্তানং হিতপটিপত্তিযা. সতিসম্পত্তিযা উপট্ঠিতস্সতী হোতি অনৰজ্জেসু ধম্মেসু. সমাধিসম্পত্তিযা অৰিক্খিত্তো হোতি সমাহিতচিত্তো. পঞ্ঞাসম্পত্তিযা অৰিপরীতং পজানাতি. সো সতিযা কুসলানং ধম্মানং গতিযো সমন্ৰেসমানো পঞ্ঞায সত্তানং হিতাহিতং যথাভূতং জানিত্ৰা সমাধিনা তত্থ একগ্গচিত্তো হুত্ৰা ৰীরিযেন অহিতা সত্তে নিসেধেত্ৰা হিতে নিযোজেতি. তেনাহ –

‘‘পিযো গরু ভাৰনীযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজকো’’তি. (অ. নি. ৭.৩৭; নেত্তি. ১১৩);

এৰং গুণসমন্নাগতংৰ কল্যাণমিত্তং উপনিস্সায মহাপুরিসো অত্তনো উপনিস্সযসম্পত্তিং সম্মদেৰ পরিযোদপেতি. সুৰিসুদ্ধাসযপযোগোৰ হুত্ৰা চতূহি বলেহি সমন্নাগতো নচিরেনেৰ অট্ঠঙ্গে সমোধানেত্ৰা মহাভিনীহারং করোন্তো বোধিসত্তভাৰে পতিট্ঠহতি অনিৰত্তিধম্মো নিযতো সম্বোধিপরাযণো.

তস্সিমানি চত্তারি বলানি অজ্ঝত্তিকবলং যা সম্মাসম্বোধিযং অত্তসন্নিস্সযা ধম্মগারৰেন অভিরুচি একন্তনিন্নজ্ঝাসযতা, যায মহাপুরিসো অত্তাধিপতিলজ্জাসন্নিস্সযো, অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. বাহিরবলং যা সম্মাসম্বোধিযং পরসন্নিস্সযা অভিরুচি একন্তনিন্নজ্ঝাসযতা, যায মহাপুরিসো লোকাধিপতিওত্তপ্পনসন্নিস্সযো, অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. উপনিস্সযবলং যা সম্মাসম্বোধিযং উপনিস্সযসম্পত্তিযা অভিরুচি একন্তনিন্নজ্ঝাসযতা, যায মহাপুরিসো তিক্খিন্দ্রিযো, ৰিসদধাতুকো, সতিসন্নিস্সযো, অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. পযোগবলং যা সম্মাসম্বোধিযা তজ্জা পযোগসম্পদা সক্কচ্চকারিতা সাতচ্চকারিতা, যায মহাপুরিসো ৰিসুদ্ধপযোগো, নিরন্তরকারী, অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. এৰমযং চতূহি পচ্চযেহি, চতূহি হেতূহি, চতূহি চ বলেহি সম্পন্নসমুদাগমো অট্ঠঙ্গসমোধানসম্পাদিতো অভিনীহারো পারমীনং পচ্চযো হোতি মূলকারণভাৰতো.

যস্স চ পৰত্তিযা মহাপুরিসে চত্তারো অচ্ছরিযা অব্ভুতা ধম্মা পতিট্ঠহন্তি, সব্বং সত্তনিকাযং অত্তনো ওরসপুত্তং ৰিয পিযচিত্তেন পরিগ্গণ্হাতি, ন চস্স চিত্তং পুন সংকিলেসৰসেন সংকিলিস্সতি, সত্তানং হিতসুখাৰহো চস্স অজ্ঝাসযো, পযোগো চ হোতি, অত্তনো চ বুদ্ধকারকধম্মা উপরূপরি ৰড্ঢন্তি, পরিপচ্চন্তি চ, যতো মহাপুরিসো উল়ারতরেন পুঞ্ঞাভিসন্দেন কুসলাভিসন্দেন পৰড্ঢিযা [পৰত্তিযা (চরিযা. অট্ঠ. পকিণ্ণককথা)] পচ্চযেন সুখস্সাহারেন সমন্নাগতো সত্তানং দক্খিণেয্যো উত্তমং গারৰট্ঠানং, অসদিসং পুঞ্ঞক্খেত্তঞ্চ হোতি. এৰমনেকগুণো অনেকানিসংসো মহাভিনীহারো পারমীনং পচ্চযোতি ৰেদিতব্বো.

যথা চ মহাভিনীহারো, এৰং মহাকরুণা, উপাযকোসল্লঞ্চ. তত্থ উপাযকোসল্লং নাম দানাদীনং বোধিসম্ভারভাৰস্স নিমিত্তভূতা পঞ্ঞা, যাহি মহাকরুণূপাযকোসল্লতাহি মহাপুরিসানং অত্তসুখনিরপেক্খতা, নিরন্তরং পরসুখকরণপসুততা, সুদুক্করেহি মহাবোধিসত্তচরিতেহি ৰিসাদাভাৰো, পসাদসংৰুদ্ধিদস্সনসৰনানুস্সরণাৰত্থাসুপি সত্তানং হিতসুখপটিলাভহেতুভাৰো চ সম্পজ্জতি. তথা হি তস্স পঞ্ঞায বুদ্ধভাৰসিদ্ধি, করুণায বুদ্ধকম্মসিদ্ধি. পঞ্ঞায সযং তরতি, করুণায পরে তারেতি. পঞ্ঞায পরদুক্খং পরিজানাতি, করুণায পরদুক্খপটিকারং আরভতি. পঞ্ঞায দুক্খং নিব্বিন্দতি, করুণায দুক্খং সম্পটিচ্ছতি. পঞ্ঞায নিব্বানাভিমুখো হোতি, করুণায তং ন পাপুণাতি. তথা করুণায সংসারাভিমুখো হোতি, পঞ্ঞায তত্র নাভিরমতি. পঞ্ঞায সব্বত্থ ৰিরজ্জতি, করুণানুগতত্তা ন চ ন সব্বেসমনুগ্গহায পৰত্তো, করুণায সব্বেপি অনুকম্পতি, পঞ্ঞানুগতত্তা ন চ ন সব্বত্থ ৰিরত্তচিত্তো. পঞ্ঞায অহংকারমমংকারাভাৰো, করুণায আলসিযদীনতাভাৰো.

তথা পঞ্ঞাকরুণাহি যথাক্কমং অত্তনাথপরনাথতা, ধীরৰীরভাৰো, অনত্তন্তপাপরন্তপতা, অত্তহিতপরহিতনিপ্ফত্তি, নিব্ভযাভীসনকভাৰো, ধম্মাধিপতিলোকাধিপতিতা, কতঞ্ঞুপুব্বকারিভাৰো, মোহতণ্হাৰিগমো, ৰিজ্জাচরণসিদ্ধি, বলৰেসারজ্জনিপ্ফত্তীতি সব্বস্সাপি পারমিতাফলস্স ৰিসেসেন উপাযভাৰতো পঞ্ঞা করুণা পারমীনং পচ্চযো. ইদং পন দ্ৰযং পারমীনং ৰিয পণিধানস্সাপি পচ্চযো.

তথা উস্সাহউম্মঙ্গঅৰত্থানহিতচরিযা চ পারমীনং পচ্চযোতি ৰেদিতব্বো. যা চ বুদ্ধভাৰস্স উপ্পত্তিট্ঠানতায ‘‘বুদ্ধভূমিযো’’তি ৰুচ্চন্তি. তত্থ উস্সাহো নাম বোধিসম্ভারানং অব্ভুস্সাহনৰীরিযং. উম্মঙ্গো নাম বোধিসম্ভারেসু উপাযকোসল্লভূতা পঞ্ঞা. অৰত্থানং নাম অধিট্ঠানং, অচলাধিট্ঠানতা. হিতচরিযা নাম মেত্তাভাৰনা, করুণাভাৰনা চ. যথাহ –

‘‘কতি পন ভন্তে, বুদ্ধভূমিযোতি? চতস্সো খো সারিপুত্ত, বুদ্ধভূমিযো. কতমা চতস্সো? উস্সাহো চ হোতি ৰীরিযং, উম্মঙ্গো চ হোতি পঞ্ঞাভাৰনা, অৰত্থানঞ্চ হোতি অধিট্ঠানং, হিতচরিযা চ হোতি মেত্তাভাৰনা. ইমা খো সারিপুত্ত, চতস্সো বুদ্ধভূমিযো’’তি (সু. নি. অট্ঠ. ১.৩৪).

তথা নেক্খম্মপৰিৰেকঅলোভাদোসামোহনিস্সরণপ্পভেদা চ ছ অজ্ঝাসযা. ৰুত্তঞ্হেতং –

‘‘নেক্খম্মজ্ঝাসযা চ বোধিসত্তা কামেসু, ঘরাৰাসে চ দোসদস্সাৰিনো, পৰিৰেকজ্ঝাসযা চ বোধিসত্তা সঙ্গণিকায দোসদস্সাৰিনো. অলোভ…পে… লোভে…পে… অদোস…পে… দোসে…পে… অমোহ…পে… মোহে…পে… নিস্সরণ…পে… সব্বভৰেসু দোসদস্সাৰিনো’’তি (সু. নি. অট্ঠ. ১.৩৪; ৰিসুদ্ধি. ১.৪৯).

তস্মা এতে চ ছ অজ্ঝাসযাপি পারমীনং পচ্চযাতি ৰেদিতব্বা. ন হি লোভাদীসু আদীনৰদস্সনেন, অলোভাদীনং অধিকভাৰেন চ ৰিনা দানাদিপারমিযো সম্ভৰন্তি. অলোভাদীনঞ্হি অধিকভাৰেন পরিচ্চাগাদিনিন্নচিত্ততা, অলোভজ্ঝাসযাদিতা চাতি, যথা চেতে, এৰং দানজ্ঝাসযতাদযোপি. যথাহ –

‘‘কতি পন ভন্তে বোধায চরন্তানং বোধিসত্তানং অজ্ঝাসযাতি? দস খো সারিপুত্ত, বোধায চরন্তানং বোধিসত্তানং অজ্ঝাসযা. কতমে দস? দানজ্ঝাসযা সারিপুত্ত, বোধিসত্তা মচ্ছেরে দোসদস্সাৰিনো. সীল…পে… অসংৰরে…পে… নেক্খম্ম…পে… কামেসু…পে… যথাভূতঞাণ…পে… ৰিচিকিচ্ছায.…পে… ৰীরিয …পে… কোসজ্জে…পে… খন্তি…পে… অক্খন্তিযং…পে… সচ্চ…পে… ৰিসংৰাদনে…পে… অধিট্ঠান…পে… অনধিট্ঠানে…পে… মেত্তা…পে… ব্যাপাদে…পে… উপেক্খা…পে… সুখদুক্খেসু আদীনৰদস্সাৰিনো’’তি.

এতেসু হি মচ্ছেরঅসংৰরকামৰিচিকিচ্ছাকোসজ্জঅক্খন্তিৰিসংৰাদনঅনধিট্ঠান- ব্যাপাদসুখদুক্খসঙ্খাতেসু আদীনৰদস্সনপুব্বঙ্গমা দানাদিনিন্নচিত্ততাসঙ্খাতা দানজ্ঝাসযতাদযো দানাদিপারমীনং নিব্বত্তিযা পচ্চযো. তথা অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণম্পি দানাদিপারমীনং পচ্চযো হোতি.

তত্রাযং পচ্চৰেক্খণাৰিধি – খেত্তৰত্থুহিরঞ্ঞসুৰণ্ণগোমহিং সদাসীদাসপুত্তদারাদিপরিগ্গহব্যাসত্তচিত্তানং সত্তানং খেত্তাদীনং ৰত্থুকামভাৰেন বহুপত্থনীযভাৰতো, রাজচোরাদিসাধারণভাৰতো, ৰিৰাদাধিট্ঠানতো, সপত্তকরণতো, নিস্সারতো, পটিলাভপরিপালনেসু পরৰিহেঠনহেতুভাৰতো, ৰিনাসনিমিত্তঞ্চসোকাদিঅনেকৰিহিতব্যসনাৰহতো তদাসত্তিনিদানঞ্চ মচ্ছেরমলপরিযুট্ঠিতচিত্তানং অপাযূপপত্তিহেতুভাৰতোতি এৰং ৰিৰিধৰিপুলানত্থাৰহানি পরিগ্গহিতৰত্থূনি নাম, তেসং পরিচ্চাগোযেৰেকো সোত্থিভাৰোতি পরিচ্চাগে অপ্পমাদো করণীযো.

অপিচ ‘‘যাচকো যাচমানো অত্তনো গুয্হস্স আচিক্খনতো ময্হং ৰিস্সাসিকো’’তি চ ‘‘পহায গমনীযং অত্তনো সন্তকং গহেত্ৰা পরলোকং যাহীতিউপদিসনতো ময্হং উপদেসকো’’তি চ ‘‘আদিত্তে ৰিয অগারে মরণগ্গিনা আদিত্তে লোকে ততো ময্হং সন্তকস্স অপহরণতো অপৰাহকসহাযো’’তি চ ‘‘অপৰাহিতস্স চস্স অজ্ঝাপননিক্খেপট্ঠানভূতো’’তি চ ‘‘দানসঙ্খাতে কল্যাণকম্মস্মিং সহাযভাৰতো, সব্বসম্পত্তীনং অগ্গভূতায পরমদুল্লভায বুদ্ধভূমিযা সম্পত্তিহেতুভাৰতো চ পরমো কল্যাণমিত্তো’’তি চ পচ্চৰেক্খিতব্বং.

তথা ‘‘উল়ারে কম্মনি অনেনাহং সম্ভাৰিতো, তস্মা সা সম্ভাৰনা অৰিতথা কাতব্বা’’তি চ ‘‘একন্তভেদিতায জীৰিতস্স আযাচিতেনাপি মযা দাতব্বং, পগেৰ যাচিতেনা’’তি চ ‘‘উল়ারজ্ঝাসযেহি গৰেসিত্ৰাপি দাতব্বো, [দাতব্বতো (চরিযা. অট্ঠ. পকিণ্ণককথাৰণ্ণনা)] সযমেৰাগতো মম পুঞ্ঞেনা’’তি চ ‘‘যাচকস্স দানাপদেসেন ময্হমেৰাযমনুগ্গহো’’তি চ ‘‘অহং ৰিয অযং সব্বোপি লোকো মযা অনুগ্গহেতব্বো’’তি চ ‘‘অসতি যাচকে কথং ময্হং দানপারমী পূরেয্যা’’তি চ ‘‘যাচকানমেৰত্থায মযা সব্বোপি পরিগ্গহেতব্বো’’তি চ ‘‘অযাচিত্ৰাপি মং মম সন্তকং যাচকা কদা সযমেৰ গণ্হেয্যু’’ন্তি চ ‘‘কথমহং যাচকানং পিযো চস্সং মনাপো’’তি চ ‘‘কথং ৰা তে ময্হং পিযা চস্সু মনাপা’’তি চ ‘‘কথং ৰাহং দদমানো দত্ৰাপি চ অত্তমনো অস্সং পমুদিতো পীতিসোমনস্সজাতো’’তি চ ‘‘কথং ৰা মে যাচকা ভৰেয্যুং, উল়ারো চ দানজ্ঝাসযো’’তি চ ‘‘কথং ৰাহমযাচিতো এৰ যাচকানং হদযমঞ্ঞায দদেয্য’’ন্তি ‘‘সতি ধনে, যাচকে চ অপরিচ্চাগো মহতী ময্হং ৰঞ্চনা’’তি চ ‘‘কথমহং অত্তনো অঙ্গানি, জীৰিতঞ্চাপি পরিচ্চজেয্য’’ন্তি চ চাগনিন্নতা উপট্ঠপেতব্বা.

অপিচ ‘‘অত্থো নামাযং নিরপেক্খং দাযকমনুগচ্ছতি যথা তং নিরপেক্খং খেপকং কিটকো’’তি অত্থে নিরপেক্খতায চিত্তং উপ্পাদেতব্বং. যাচমানো পন যদি পিযপুগ্গলো হোতি ‘‘পিযো মং যাচতী’’তি সোমনস্সং উপ্পাদেতব্বং. অথ উদাসীনপুগ্গলো হোতি ‘‘অযং মং যাচমানো অদ্ধা ইমিনা পরিচ্চাগেন মিত্তো হোতী’’তি সোমনস্সং উপ্পাদেতব্বং. দদন্তো হি যাচকানং পিযো হোতীতি. অথ পন ৰেরীপুগ্গলো যাচতি, ‘‘পচ্চত্থিকো মং যাচতি, অযং মং যাচমানো অদ্ধা ইমিনা পরিচ্চাগেন ৰেরীপি পিযো মিত্তো হোতী’’তি ৰিসেসতো সোমনস্সং উপ্পাদেতব্বং. এৰং পিযপুগ্গলে ৰিয মজ্ঝত্তৰেরীপুগ্গলেসুপি মেত্তাপুব্বঙ্গমং করুণং উপট্ঠপেত্ৰাৰ দাতব্বং.

সচে পনস্স চিরকালং পরিভাৰিতত্তা লোভস্স দেয্যধম্মৰিসযা লোভধম্মা উপ্পজ্জেয্যুং, তেন বোধিসত্তপটিঞ্ঞেন ইতি পটিসঞ্চিক্খিতব্বং ‘‘ননু তযা সপ্পুরিস সম্বোধায অভিনীহারং করোন্তেন সব্বসত্তানমুপকারায অযং কাযো নিস্সট্ঠো, তপ্পরিচ্চাগমযঞ্চ পুঞ্ঞং, তত্থ নাম তে বাহিরেপি ৰত্থুস্মিং অভিসঙ্গপ্পৰত্তি হত্থিসিনানসদিসী হোতি, তস্মা তযা ন কত্থচি অভিসঙ্গো উপ্পাদেতব্বো. সেয্যথাপি নাম মহতো ভেসজ্জরুক্খস্স তিট্ঠতো মূলং মূলত্থিকা হরন্তি, পপটিকং, তচং, খন্ধং, ৰিটপং, সাখং, পলাসং, পুপ্ফং, ফলং ফলত্থিকা হরন্তি, ন তস্স রুক্খস্স ‘ময্হং সন্তকং এতে হরন্তী’তি ৰিতক্কসমুদাচারো হোতি, এৰমেৰ সব্বলোকহিতায উস্সুক্কমাপজ্জন্তেন মযা মহাদুক্খে অকতঞ্ঞুকে নিচ্চাসুচিম্হি কাযে পরেসং উপকারায ৰিনিযুজ্জমানে অণুমত্তোপি মিচ্ছাৰিতক্কো ন উপ্পাদেতব্বো. কো ৰা এত্থ ৰিসেসো অজ্ঝত্তিকবাহিরেসু মহাভূতেসু একন্তভেদনৰিকিরণৰিদ্ধংসনধম্মেসু. কেৰলং পন সম্মোহৰিজম্ভিতমেতং, যদিদং ‘এতং মম, এসোহমস্মি, এসো মে অত্তা’তি অভিনিৰেসো, তস্মা বাহিরেসু মহাভূতেসু ৰিয অজ্ঝত্তিকেসুপি করচরণনযনাদীসু, মংসাদীসু চ অনপেক্খেন হুত্ৰা ‘তং তদত্থিকা হরন্তূ’তি নিস্সট্ঠচিত্তেন ভৰিতব্ব’’ন্তি. এৰং পটিসঞ্চিক্খতো চস্স সম্বোধায পহিতত্তস্স কাযজীৰিতেসু নিরপেক্খস্স অপ্পকসিরেনেৰ কাযৰচীমনোকম্মানি সুৰিসুদ্ধানি হোন্তি, সো ৰিসুদ্ধকাযৰচীমনোকম্মন্তো ৰিসুদ্ধাজীৰো ঞাযপটিপত্তিযং ঠিতো আযাপাযুপাযকোসল্লসমন্নাগমেন ভিয্যোসো মত্তায দেয্যধম্মপরিচ্চাগেন, অভযদানসদ্ধম্মদানেহি চ সব্বসত্তে অনুগ্গণ্হিতুং সমত্থো হোতি, অযং তাৰ দানপারমিযং পচ্চৰেক্খণানযো.

সীলপারমিযং পন এৰং পচ্চৰেক্খিতব্বং – ‘‘ইদঞ্হি সীলং নাম গঙ্গোদকাদীহি ৰিসোধেতুং অসক্কুণেয্যস্স দোসমলস্স ৰিক্খালনজলং, হরিচন্দনাদীহি ৰিনেতুং অসক্কুণেয্যস্স রাগাদিপরিল়াহস্স ৰিনযনং, মুত্তাহারমকুটকুণ্ডলাদীহি পচুরজনালঙ্কারেহি অসাধারণো সাধূনমলঙ্কারৰিসেসো, সব্বদিসাৰাযনকো অতিকিত্তিমো [সব্বদিসাৰাযনতো অকিত্তিমো (চরিযা. অট্ঠ. পকিণ্ণককথাৰণ্ণনা; দী. নি. টী. ১.৭)] সব্বকালানুরূপো চ সুরভিগন্ধো, খত্তিযমহাসালাদীহি, দেৰতাহি চ ৰন্দনীযাদিভাৰাৰহনতো পরমো ৰসীকরণমন্তো, চাতুমহারাজিকাদিদেৰলোকারোহণসোপানপন্তি, ঝানাভিঞ্ঞানং অধিগমূপাযো, নিব্বানমহানগরস্স সম্পাপকমগ্গো, সাৰকবোধিপচ্চেকবোধিসম্মাসম্বোধীনং পতিট্ঠানভূমি, যং যং ৰা পনিচ্ছিতং পত্থিতং, তস্স তস্স সমিজ্ঝনূপাযভাৰতো চিন্তামণিকপ্পরুক্খাদিকে চ অতিসেতি. ৰুত্তঞ্হেতং ভগৰতা ‘‘ইজ্ঝতি ভিক্খৰে, সীলৰতো চেতোপণিধি ৰিসুদ্ধত্তা’’তি (দী. নি. ৩.৩৩৭; সং. নি. ৪.৩৫২; অ. নি. ৮.৩৫). অপরম্পি ৰুত্তং ‘‘আকঙ্খেয্য চে ভিক্খৰে, ভিক্খু সব্রহ্মচারীনং পিযো চ অস্সং মনাপো চ গরু চ ভাৰনীযো চাতি, সীলেস্ৰেৰস্স পরিপূরকারী’’তিআদি (ম. নি. ১.৬৫). তথা ‘‘অৰিপ্পটিসারত্থানি খো আনন্দ কুসলানি সীলানী’’তি, (অ. নি. ১০.১; ১১.১) ‘‘পঞ্চিমে গহপতযো, আনিসংসা সীলৰতো সীলসম্পদাযা’’তিআদিসুত্তানঞ্চ (দী. নি. ২.১৫০; অ. নি. ৫.২১৩; উদা. ৭৬; মহাৰ. ৩৮৫) ৰসেন সীলগুণা পচ্চৰেক্খিতব্বা. তথা অগ্গিক্খন্ধোপমসুত্তাদীনং (অ. নি. ৭.৭২) ৰসেন সীলৰিরহে আদীনৰা.

অপিচ পীতিসোমনস্সনিমিত্ততো, অত্তানুৰাদপরানুৰাদদণ্ডদুগ্গতিভযাভাৰতো, ৰিঞ্ঞূহি পাসংসভাৰতো, অৰিপ্পটিসারহেতুতো, পরমসোত্থিট্ঠানতো, কুলসাপতেয্যাধিপতেয্যজীৰিতরূপট্ঠানবন্ধুমিত্তসম্পত্তীনং অতিসযনতো চ সীলং পচ্চৰেক্খিতব্বং. সীলৰতো হি অত্তনো সীলসম্পদাহেতু মহন্তং পীতিসোমনস্সং উপ্পজ্জতি ‘‘কতং ৰত মযা কুসলং, কতং কল্যাণং, কতং ভীরুত্তাণ’’ন্তি.

তথা সীলৰতো অত্তা ন উপৰদতি, ন চ পরে ৰিঞ্ঞূ, দণ্ডদুগ্গতিভযানঞ্চ সম্ভৰোযেৰ নত্থি, ‘‘সীলৰা পুরিসপুগ্গলো কল্যাণধম্মো’’তি ৰিঞ্ঞূনং পাসংসো চ হোতি. তথা সীলৰতো য্ৰাযং ‘‘কতং ৰত মযা পাপং, কতং লুদ্দং, কতং কিব্বিস’’ন্তি দুস্সীলস্স ৰিপ্পটিসারো উপ্পজ্জতি, সো ন হোতি. সীলঞ্চ নামেতং অপ্পমাদাধিট্ঠানতো, ভোগব্যসনাদিপরিহারমুখেন মহতো অত্থস্স সাধনতো, মঙ্গলভাৰতো, পরমং সোত্থিট্ঠানং. নিহীনজচ্চোপি সীলৰা খত্তিযমহাসালাদীনং পূজনীযো হোতীতি কুলসম্পত্তিং অতিসেতি সীলসম্পদা, ‘‘তং কিং মঞ্ঞসি মহারাজ, ইধ তে অস্স দাসো কম্মকরো’’তিআদি (দী. নি. ১.১৮৩) ৰক্খমানসামঞ্ঞসুত্তৰচনঞ্চেত্থ সাধকং, চোরাদীহি অসাধারণতো, পরলোকানুগমনতো, মহপ্ফলভাৰতো, সমথাদিগুণাধিট্ঠানতো চ বাহিরধনং সাপতেয্যং অতিসেতি সীলং. পরমস্স চিত্তিস্সরিযস্স অধিট্ঠানভাৰতো খত্তিযাদীনমিস্সরিযং অতিসেতি সীলং. সীলনিমিত্তঞ্হি তংতংসত্তনিকাযেসু সত্তানমিস্সরিযং, ৰস্সসতাদিদীঘপ্পমাণতো চ জীৰিততো একাহম্পি সীলৰতো জীৰিতস্স ৰিসিট্ঠতাৰচনতো, সতিপি জীৰিতে সিক্খানিক্খিপনস্স মরণতাৰচনতো চ সীলং জীৰিততো ৰিসিট্ঠতরং. ৰেরীনম্পি মনুঞ্ঞভাৰাৰহনতো, জরারোগৰিপত্তীহি অনভিভৰনীযতো চ রূপসম্পত্তিং অতিসেতি সীলং. পাসাদহম্মিযাদিট্ঠানপ্পভেদে রাজযুৰরাজসেনাপতিআদিঠানৰিসেসে চ সুখৰিসেসাধিট্ঠানভাৰতো অতিসেতি সীলং. সভাৰসিনিদ্ধে সন্তিকাৰচরেপি বন্ধুজনে, মিত্তজনে চ একন্তহিতসম্পাদনতো, পরলোকানুগমনতো চ অতিসেতি সীলং. ‘‘ন তং মাতা পিতা কযিরা’’তিআদি (ধ. প. ৪৩) ৰচনঞ্চেত্থ সাধকং. তথা হত্থিঅস্সরথপত্তিবলকাযেহি, মন্তাগদসোত্থানপযোগেহি চ দুরারক্খানমনাথানং অত্তাধীনতো, অনপরাধীনতো, মহাৰিসযতো চ আরক্খভাৰেন সীলমেৰ ৰিসিট্ঠতরং. তেনেৰাহ ‘‘ধম্মো হৰে রক্খতি ধম্মচারি’’ন্তিআদি (থেরগা. ৩০৩; জা. ১.১০.১০২). এৰমনেকগুণসমন্নাগতং সীলন্তি পচ্চৰেক্খন্তস্স অপরিপুণ্ণা চেৰ সীলসম্পদা পারিপূরিং গচ্ছতি, অপরিসুদ্ধা চ পারিসুদ্ধিং.

সচে পনস্স দীঘরত্তং পরিচযেন সীলপটিপক্খধম্মা দোসাদযো অন্তরন্তরা উপ্পজ্জেয্যুং, তেন বোধিসত্তপটিঞ্ঞেন এৰং পটিসঞ্চিক্খিতব্বং ‘‘ননু তযা বোধায পণিধানং কতং, সীলৰেকল্লেন চ ন সক্কা ন চ সুকরা লোকিযাপি সম্পত্তিযো পাপুণিতুং, পগেৰ লোকুত্তরা’’তি. সব্বসম্পত্তীনমগ্গভূতায সম্মাসম্বোধিযা অধিট্ঠানভূতেন সীলেন পরমুক্কংসগতেন ভৰিতব্বং, তস্মা ‘‘কিকীৰ অণ্ড’’ন্তিআদিনা (দী. নি. অট্ঠ. ১.৭; ৰিসুদ্ধি. ১.১৯) ৰুত্তনযেন সম্মদেৰ সীলং রক্খন্তেন সুট্ঠু তযা পেসলেন ভৰিতব্বং.

অপিচ তযা ধম্মদেসনায যানত্তযে সত্তানমৰতারণপরিপাচনানি কাতব্বানি, সীলৰেকল্লস্স চ ৰচনং ন পচ্চেতব্বং হোতি, অসপ্পাযাহারৰিচারস্স ৰিয ৰেজ্জস্স তিকিচ্ছনং, তস্মা ‘‘কথাহং সদ্ধেয্যো হুত্ৰা সত্তানমৰতারণপরিপাচনানি করেয্য’’ন্তি সভাৰপরিসুদ্ধসীলেন ভৰিতব্বং. কিঞ্চ ঝানাদিগুণৰিসেসযোগেন মে সত্তানমুপকারকরণসমত্থতা, পঞ্ঞাপারমীআদিপরিপূরণঞ্চ ঝানাদযো গুণা চ সীলপারিসুদ্ধিং ৰিনা ন সম্ভৰন্তীতি সম্মদেৰ সীলং সোধেতব্বং.

তথা ‘‘সম্বাধো ঘরাৰাসো রজোপথো’’তিআদিনা (দী. নি. ১.১১১; ম. নি. ১.২৯১, ৩৭১; ২.১০; ৩.১৩, ২১৮; সং. নি. ২.১৫৪; ৫.১০০২; অ. নি. ১০.৯৯; নেত্তি. ৯৪) ঘরাৰাসে, ‘‘অট্ঠিকঙ্কলূপমা কামা’’তিআদিনা (ম. নি. ১.২৩৪; ২.৪২; পাচি. ৪১৭; চূল়নি. ১৪৭) ‘‘মাতাপি পুত্তেন ৰিৰদতী’’তিআদিনা (ম. নি. ১.১৬৮) চ কামেসু, ‘‘সেয্যথাপি পুরিসো ইণং আদায কম্মন্তে পযোজেয্যা’’তিআদিনা (ম. নি. ১.৪২৬) কামচ্ছন্দাদীসু আদীনৰদস্সনপুব্বঙ্গমা, ৰুত্তৰিপরিযাযেন ‘‘অব্ভোকাসো পব্বজ্জা’’তিআদিনা (দী. নি. ১.১৯১, ৩৯৮; ম. নি. ১.২৯১, ৩৭১; ২.১০; ৩.১৩, ২১৮; সং. নি. ১.২৯১; সং. নি. ৫.১০০২; অ. নি. ১০.৯৯; নেত্তি. ৯৮) পব্বজ্জাদীসু আনিসংসাপটিসঙ্খাৰসেন নেক্খম্মপারমিযং পচ্চৰেক্খণা কাতব্বা. অযমেত্থ সঙ্খেপো, ৰিত্থারো পন দুক্খক্খন্ধআসিৰিসোপমসুত্তাদি (ম. নি. ১.১৬৩, ১৭৫; সং. নি. ৪.২৩৮) ৰসেন ৰেদিতব্বো.

তথা ‘‘পঞ্ঞায ৰিনা দানাদযো ধম্মা ন ৰিসুজ্ঝন্তি, যথাসকং ব্যাপারসমত্থা চ ন হোন্তী’’তি পঞ্ঞায গুণা মনসি কাতব্বা. যথেৰ হি জীৰিতেন ৰিনা সরীরযন্তং ন সোভতি, ন চ অত্তনো কিরিযাসু পটিপত্তিসমত্থং হোতি. যথা চ চক্খাদীনি ইন্দ্রিযানি ৰিঞ্ঞাণেন ৰিনা যথাসকং ৰিসযেসু কিচ্চং কাতুং নপ্পহোন্তি, এৰং সদ্ধাদীনি ইন্দ্রিযানি পঞ্ঞায ৰিনা সককিচ্চপটিপত্তিযমসমত্থানীতি পরিচ্চাগাদিপটিপত্তিযং পঞ্ঞা পধানকারণং. উম্মীলিতপঞ্ঞাচক্খুকা হি মহাসত্তা বোধিসত্তা অত্তনো অঙ্গপচ্চঙ্গানিপি দত্ৰা অনত্তুক্কংসকা, অপরৰম্ভকা চ হোন্তি, ভেসজ্জরুক্খা ৰিয ৰিকপ্পরহিতা কালত্তযেপি সোমনস্সজাতা. পঞ্ঞাৰসেন হি উপাযকোসল্লযোগতো পরিচ্চাগো পরহিতপৰত্তিযা দানপারমিভাৰং উপেতি. অত্তত্থঞ্হি দানং মুদ্ধসদিসং [ৰুদ্ধিসদিসং (দী. নি. টী. ১.৭)] হোতি.

তথা পঞ্ঞায অভাৰেন তণ্হাদিসংকিলেসাৰিযোগতো সীলস্স ৰিসুদ্ধিযেৰ ন সম্ভৰতি, কুতো সব্বঞ্ঞুগুণাধিট্ঠানভাৰো. পঞ্ঞৰা এৰ চ ঘরাৰাসে কামগুণেসু সংসারে চ আদীনৰং, পব্বজ্জায ঝানসমাপত্তিযং নিব্বানে চ আনিসংসং সুট্ঠু সল্লক্খেন্তো পব্বজিত্ৰা ঝানসমাপত্তিযো নিব্বত্তেত্ৰা নিব্বাননিন্নো, পরে চ তত্থ পতিট্ঠপেতি.

ৰীরিযঞ্চ পঞ্ঞারহিতং যথিচ্ছিতমত্থং ন সাধেতি দুরারম্ভভাৰতো. অনারম্ভোযেৰ হি দুরারম্ভতো সেয্যো, পঞ্ঞাসহিতেন পন ৰীরিযেন ন কিঞ্চি দুরধিগমং উপাযপটিপত্তিতো. তথা পঞ্ঞৰা এৰ পরাপকারাদীনমধিৰাসকজাতিযো হোতি, ন দুপ্পঞ্ঞো. পঞ্ঞাৰিরহিতস্স চ পরেহি উপনীতা অপকারা খন্তিযা পটিপক্খমেৰ অনুব্রূহেন্তি. পঞ্ঞৰতো পন তে খন্তিসম্পত্তিযা অনুব্রূহনৰসেন অস্সা থিরভাৰায সংৰত্তন্তি. পঞ্ঞৰা এৰ তীণিপি সচ্চানি তেসং কারণানি পটিপক্খে চ যথাভূতং জানিত্ৰা পরেসং অৰিসংৰাদকো হোতি. তথা পঞ্ঞাবলেন অত্তানমুপত্থম্ভেত্ৰা ধিতিসম্পদায সব্বপারমীসু অচলসমাদানাধিট্ঠানো হোতি. পঞ্ঞৰা এৰ চ পিযমজ্ঝত্তৰেরিৰিভাগমকত্ৰা সব্বত্থ হিতূপসংহারকুসলো হোতি. তথা পঞ্ঞাৰসেন লাভালাভাদিলোকধম্মসন্নিপাতে নিব্বিকারতায মজ্ঝত্তো হোতি. এৰং সব্বাসং পারমীনং পঞ্ঞাৰ পারিসুদ্ধিহেতূতি পঞ্ঞাগুণা পচ্চৰেক্খিতব্বা.

অপিচ পঞ্ঞায ৰিনা ন দস্সনসম্পত্তি, অন্তরেন চ দিট্ঠিসম্পদং ন সীলসম্পদা, সীলদিট্ঠিসম্পদারহিতস্স চ ন সমাধিসম্পদা, অসমাহিতেন চ ন সক্কা অত্তহিতমত্তম্পি সাধেতুং, পগেৰ উক্কংসগতং পরহিতন্তি. ‘‘ননু তযা পরহিতায পটিপন্নেন সক্কচ্চং পঞ্ঞাপারিসুদ্ধিযা আযোগো করণীযো’’তি বোধিসত্তেন অত্তা ওৰদিতব্বো. পঞ্ঞানুভাৰেন হি মহাসত্তো চতুরধিট্ঠানাধিট্ঠিতো চতূহি সঙ্গহৰত্থূহি লোকং অনুগ্গণ্হন্তো সত্তে নিয্যানমগ্গে অৰতারেতি, ইন্দ্রিযানি চ নেসং পরিপাচেতি. তথা পঞ্ঞাবলেন খন্ধাযতনাদীসু পৰিচযবহুলো পৰত্তিনিৰত্তিযো যাথাৰতো পরিজানন্তো দানাদযো গুণৰিসেসে নিব্বেধভাগিযভাৰং নযন্তো বোধিসত্তসিক্খায পরিপূরকারী হোতীতি এৰমাদিনা অনেকাকারৰোকারে পঞ্ঞাগুণে ৰৰত্থপেত্ৰা পঞ্ঞাপারমী অনুব্রূহেতব্বা.

তথা দিস্সমানপারানিপি লোকিযানি কম্মানি নিহীনৰীরিযেন পাপুণিতুমসক্কুণেয্যানি, অগণিতখেদেন পন আরদ্ধৰীরিযেন দুরধিগমং নাম নত্থি. নিহীনৰীরিযো হি ‘‘সংসারমহোঘতো সব্বসত্তে সন্তারেস্সামী’’তি আরভিতুমেৰ ন সক্কুণোতি. মজ্ঝিমো পন আরভিত্ৰান অন্তরাৰোসানমাপজ্জতি. উক্কট্ঠৰীরিযো পন অত্তসুখনিরপেক্খো আরভিত্ৰা পারমধিগচ্ছতীতি ৰীরিযসম্পত্তি পচ্চৰেক্খিতব্বা.

অপিচ ‘‘যস্স অত্তনো এৰ সংসারপঙ্কতো সমুদ্ধরণত্থমারম্ভো, তস্সাপি ৰীরিযস্স সিথিলভাৰেন মনোরথানং মত্থকপ্পত্তি ন সক্কা সম্ভাৰেতুং, পগেৰ সদেৰকস্স লোকস্স সমুদ্ধরণত্থং কতাভিনীহারেনা’’তি চ ‘‘রাগাদীনং দোসগণানং মত্তমহানাগানমিৰ দুন্নিৰারণভাৰতো, তন্নিদানানঞ্চ কম্মসমাদানানং উক্খিত্তাসিকৰধকসদিসভাৰতো, তন্নিমিত্তানঞ্চ দুগ্গতীনং সব্বদা ৰিৰটমুখভাৰতো, তত্থ নিযোজকানঞ্চ পাপমিত্তানং সদা সন্নিহিতভাৰতো, তদোৰাদকারিতায চ ৰসলস্স পুথুজ্জনভাৰস্স সতি সম্ভৰে যুত্তং সযমেৰ সংসারদুক্খতো নিস্সরিতু’’ন্তি চ ‘‘মিচ্ছাৰিতক্কা ৰীরিযানুভাৰেন দূরী ভৰন্তী’’তি চ ‘‘যদি পন সম্বোধিং অত্তাধীনেন ৰীরিযেন সক্কা সমধিগন্তুং, কিমেত্থ দুক্কর’’ন্তি চ এৰমাদিনা নযেন ৰীরিযগুণা পচ্চৰেক্খিতব্বা.

তথা ‘‘খন্তি নামাযং নিরৰসেসগুণপটিপক্খস্স কোধস্স ৰিধমনতো গুণসম্পাদনে সাধূনং অপ্পটিহতমাযুধং, পরাভিভৰনে সমত্থানমলঙ্কারো, সমণব্রাহ্মণানং বলসম্পদা, কোধগ্গিৰিনযনা উদকধারা, কল্যাণকিত্তিসদ্দস্স সঞ্জাতিদেসো, পাপপুগ্গলানং ৰচীৰিসৰূপসমকরো মন্তাগদো, সংৰরে ঠিতানং পরমা ধীরপকতি, গম্ভীরাসযতায সাগরো, দোসমহাসাগরস্স ৰেলা, অপাযদ্ৰারস্স পিধানকৰাটং দেৰব্রহ্মলোকানং আরোহণসোপানং, সব্বগুণানমধিৰাসভূমি, উত্তমা কাযৰচীমনোৰিসুদ্ধী’’তি মনসি কাতব্বং. অপিচ ‘‘এতে সত্তা খন্তিসম্পত্তিযা অভাৰতো ইধলোকে তপন্তি, পরলোকে চ তপনীযধম্মানুযোগতো’’তি চ ‘‘যদিপি পরাপকারনিমিত্তং দুক্খং উপ্পজ্জতি, তস্স পন দুক্খস্স খেত্তভূতো অত্তভাৰো, বীজভূতঞ্চ কম্মং মযাৰ অভিসঙ্খত’’ন্তি চ ‘‘তস্স চ দুক্খস্স আণণ্যকরণমেত’’ন্তি চ ‘‘অপকারকে অসতি কথং ময্হং খন্তিসম্পদা সম্ভৰতী’’তি চ ‘‘যদিপাযং এতরহি অপকারকো, অযং নাম পুব্বে অনেন ময্হং উপকারো কতো’’তি চ ‘‘অপকারো এৰ ৰা খন্তিনিমিত্ততায উপকারো’’তি চ ‘‘সব্বেপিমে সত্তা ময্হং পুত্তসদিসা, পুত্তকতাপরাধেসু চ কো কুজ্ঝিস্সতী’’তি চ ‘‘যেন কোধভূতাৰেসেন অযং ময্হং অপরজ্ঝতি, স্ৰাযং কোধভূতাৰেসো মযা ৰিনেতব্বো’’তি চ ‘‘যেন অপকারেন ইদং ময্হং দুক্খং উপ্পন্নং, তস্স অহম্পি নিমিত্ত’’ন্তি চ ‘‘যেহি ধম্মেহি অপকারো কতো, যত্থ চ কতো, সব্বেপি তে তস্মিংযেৰ খণে নিরুদ্ধা, কস্সিদানি কেন কোপো কাতব্বো’’তি চ ‘‘অনত্ততায সব্বধম্মানং কো কস্স অপরজ্ঝতী’’তি চ পচ্চৰেক্খন্তেন খন্তিসম্পদা ব্রূহেতব্বা.

যদি পনস্স দীঘরত্তং পরিচযেন পরাপকারনিমিত্তকো কোধো চিত্তং পরিযাদায তিট্ঠেয্য, তেন ইতি পটিসঞ্চিক্খিতব্বং ‘‘খন্তি নামেসা পরাপকারস্স পটিপক্খপটিপত্তীনং পচ্চুপকারকারণ’’ন্তি চ ‘‘অপকারো চ ময্হং দুক্খুপ্পাদনেন দুক্খুপনিসায সদ্ধায, সব্বলোকে অনভিরতিসঞ্ঞায চ পচ্চযো’’তি চ ‘‘ইন্দ্রিযপকতিরেসা, যদিদং ইট্ঠানিট্ঠৰিসযসমাযোগো, তত্থ অনিট্ঠৰিসযসমাযোগো ময্হং ন সিযাতি তং কুতেত্থ লব্ভা’’তি চ ‘‘কোধৰসিকো সত্তো কোধেন উম্মত্তো ৰিক্খিত্তচিত্তো, তত্থ কিং পচ্চপকারেনা’’তি চ ‘‘সব্বেপিমে সত্তা সম্মাসম্বুদ্ধেন ওরসপুত্তা ৰিয পরিপালিতা, তস্মা ন তত্থ মযা চিত্তকোপো কাতব্বো’’তি চ ‘‘অপরাধকে চ সতি গুণে গুণৰতি মযা কোপো ন কাতব্বো’’তি চ ‘‘অসতি গুণে কস্সচিপি গুণস্সাভাৰতো ৰিসেসেন করুণাযিতব্বো’’তি চ ‘‘কোপেন ময্হং গুণযসা নিহীযন্তী’’তি চ ‘‘কুজ্ঝনেন ময্হং দুব্বণ্ণদুক্খসেয্যাদযো সপত্তকন্তা আগচ্ছন্তী’’তি চ ‘‘কোধো চ নামাযং সব্বদুক্খাহিতকারকো সব্বসুখহিতৰিনাসকো বলৰা পচ্চত্থিকো’’তি চ ‘‘সতি চ খন্তিযা ন কোচি পচ্চত্থিকো’’তি চ ‘‘অপরাধকেন অপরাধনিমিত্তং যং দুক্খং আযতিং লদ্ধব্বং, সতি চ খন্তিযা ময্হং তদভাৰো’’তি চ ‘‘চিন্তেন্তেন, কুজ্ঝন্তেন চ মযা পচ্চত্থিকোযেৰ অনুৰত্তিতো’’তি চ ‘‘কোধে চ মযা খন্তিযা অভিভূতে তস্স দাসভূতো পচ্চত্থিকো সম্মদেৰ অভিভূতো’’তি চ ‘‘কোধনিমিত্তং খন্তিগুণপরিচ্চাগো ময্হং ন যুত্তো’’তি চ ‘‘সতি চ কোধে গুণৰিরোধপচ্চনীকধম্মে কথং মে সীলাদিধম্মা পারিপূরিং গচ্ছেয্যুং, অসতি চ তেসু কথাহং সত্তানং উপকারবহুলো পটিঞ্ঞানুরূপং উত্তমং সম্পত্তিং পাপুণিস্সামী’’তি চ ‘‘খন্তিযা চ সতি বহিদ্ধা ৰিক্খেপাভাৰতো সমাহিতস্স সব্বে সঙ্খারা অনিচ্চতো দুক্খতো সব্বে ধম্মা অনত্ততো নিব্বানং অসঙ্খতামতসন্তপণীততাদিভাৰতো নিজ্ঝানং খমন্তি, ‘বুদ্ধধম্মা চ অচিন্তেয্যাপরিমেয্যপ্পভৰা’তি’’, ততো চ ‘‘অনুলোমিকখন্তিযং ঠিতো ‘কেৰলা ইমে অত্তত্তনিযভাৰরহিতা ধম্মমত্তা যথাসকং পচ্চযেহি উপ্পজ্জন্তি ৰিনস্সন্তি, ন কুতোচি আগচ্ছন্তি, ন কুহিঞ্চি গচ্ছন্তি, ন চ কত্থচি পতিট্ঠিতা, ন চেত্থ কোচি কস্সচি ব্যাপারো’তি অহংকারমমংকারানধিট্ঠানতা নিজ্ঝানং খমতি, যেন বোধিসত্তো বোধিযা নিযতো অনাৰত্তিধম্মো হোতী’’তি এৰমাদিনা খন্তিপারমিযা পচ্চৰেক্খণা ৰেদিতব্বা.

তথা ‘‘সচ্চেন ৰিনা সীলাদীনমসম্ভৰতো, পটিঞ্ঞানুরূপপটিপত্তিযা অভাৰতো, সচ্চধম্মাতিক্কমে চ সব্বপাপধম্মানং সমোসরণভাৰতো, অসচ্চসন্ধস্স অপ্পচ্চযিকভাৰতো, আযতিঞ্চ অনাদেয্যৰচনতাৰহনতো, সম্পন্নসচ্চস্স সব্বগুণাধিট্ঠানভাৰতো, সচ্চাধিট্ঠানেন সব্বসম্বোধিসম্ভারানং পারিসুদ্ধিপারিপূরিসমন্ৰাযতো, সভাৰধম্মাৰিসংৰাদনেন সব্ববোধিসম্ভারকিচ্চকরণতো, বোধিসত্তপটিপত্তিযা চ পরিনিপ্ফত্তিতো’’তিআদিনা সচ্চপারমিযা সম্পত্তিযো পচ্চৰেক্খিতব্বা.

তথা ‘‘দানাদীসু দল়্হসমাদানং, তপ্পটিপক্খসন্নিপাতে চ নেসং অচলাধিট্ঠানং, তত্থ চ ধীরৰীরভাৰং ৰিনা ন দানাদিসম্ভারা সম্বোধিনিমিত্তা সম্ভৰন্তী’’তিআদিনা অধিট্ঠানগুণা পচ্চৰেক্খিতব্বা.