ফস্সপচ্চযৰারৰণ্ণনা

১১৮. পরম্পরপচ্চযদস্সনত্থন্তি যং দিট্ঠিযা মূলকারণং, তস্সাপি কারণং, পুন তস্সপি কারণন্তি এৰং পচ্চযপরম্পরদস্সনত্থং. যেন হি তণ্হাপরিতস্সিতেন এতানি দিট্ঠিগতানি পৰত্তন্তি, তস্স ৰেদযিতং পচ্চযো, ৰেদযিতস্সাপি ফস্সো পচ্চযোতি এৰং পচ্চযপরম্পরৰিভাৰিনী অযং দেসনা. কিমত্থিযং পন পচ্চযপরম্পরদস্সনন্তি চে? অত্থন্তরৰিঞ্ঞাপনত্থং. তেন হি যথা দিট্ঠিসঙ্খাতো পঞ্ঞাপনধম্মো, তপ্পচ্চযধম্মা চ যথাসকং পচ্চযৰসেনেৰ উপ্পজ্জন্তি, ন পচ্চযেহি ৰিনা, এৰং পঞ্ঞপেতব্বধম্মাপি রূপৰেদনাদযো, ন এত্থ কোচি সস্সতো অত্তা ৰা লোকো ৰাতি এৰমত্থন্তরং ৰিঞ্ঞাপিতং হোতি. তণ্হাদিট্ঠিপরিফন্দিতং তদপি ৰেদযিতং দিট্ঠিকারণভূতায তণ্হায পচ্চযভূতং ফস্সপচ্চযা হোতীতি অত্থো.

১৩১. তস্স পচ্চযস্সাতি তস্স ফস্সসঙ্খাতস্স পচ্চযস্স. দিট্ঠিৰেদযিতে দিট্ঠিযা পচ্চযভূতে ৰেদযিতে, ফস্সপধানেহি অত্তনো পচ্চযেহি নিপ্ফাদেতব্বে. সাধেতব্বে চেতং ভুম্মং. বলৰভাৰদস্সনত্থন্তি বলৰকারণভাৰদস্সনত্থং. তথা হি ৰিনাপি চক্খাদিৰত্থূহি, সম্পযুত্তধম্মেহি চ কেহিচি ৰেদনা উপ্পজ্জতি, ন পন কদাচিপি ফস্সেন ৰিনা, তস্মা ফস্সো ৰেদনায বলৰকারণং. ন কেৰলং ৰেদনায এৰ, অথ খো সেসসম্পযুত্তধম্মানম্পি. সন্নিহিতোপি হি ৰিসযো সচে চিত্তুপ্পাদো ফুসনাকারৰিরহিতো হোতি, ন তস্স আরম্মণপচ্চযো ভৰতীতি ফস্সো সব্বেসম্পি সম্পযুত্তধম্মানং ৰিসেসপচ্চযো. তথা হি ভগৰতা ধম্মসঙ্গণীপকরণে চিত্তুপ্পাদং ৰিভজন্তেন ‘‘ফস্সো হোতী’’তি ফস্সস্সেৰ পঠমমুদ্ধরণং কতং, ৰেদনায পন সাতিসযমধিট্ঠানপচ্চযো এৰ. ‘‘পটিসংৰেদিস্সন্তী’’তি ৰুত্তত্তা ‘‘তদপী’’তি এত্থাধিকারোতি আহ ‘‘তং ৰেদযিত’’ন্তি. গম্যমানত্থস্স ৰা-সদ্দস্স পযোগং পতি কামচারত্তা, লোপত্তা, সেসত্তাপি চ এস ন পযুত্তো. এৰমীদিসেসু. হোতি চেত্থ –

‘‘গম্যমানাধিকারতো, লোপতো সেসতো চাতি;

কারণেহি চতূহিপি, ন কত্থচি রৰো যুত্তো’’তি.

‘‘যথা হী’’তিআদিনা ফস্সস্স বলৰকারণতাদস্সনেন তদত্থং সমত্থেতি. তত্থ পততোতি পতন্তস্স. থূণাতি উপত্থম্ভকদারুস্সেতং অধিৰচনং.