অসঞ্ঞীনেৰসঞ্ঞীনাসঞ্ঞীৰাদৰণ্ণনা

৭৮-৮৩. অথ ন কোচি ৰিসেসো অত্থীতি চোদনং সোধেতি ‘‘কেৰলঞ্হী’’তিআদিনা. ‘‘অসঞ্ঞী’’তি চ ‘‘নেৰসঞ্ঞীনাসঞ্ঞী’’তি চ গণ্হন্তানং তা দিট্ঠিযোতি সম্বন্ধো. কারণন্তি ৰিসেসকারণং, দিট্ঠিসমুদাগমকারণং ৰা. সতিপি কিঞ্চি কারণপরিযেসনসম্ভৰে দিট্ঠিগতিকৰাদানং অনাদরিযভাৰং দস্সেতুং ‘‘ন একন্তেন কারণং পরিযেসিতব্ব’’ন্তি ৰুত্তং. কস্মাতি আহ ‘‘দিট্ঠিগতিকস্সা’’তিআদি, এতেন পরিযেসনক্খমাভাৰতোতি অপরিযেসিতব্বকারণং দস্সেতি. ইদং ৰুত্তং হোতি – অসঞ্ঞীৰাদে অসঞ্ঞীভৰে নিব্বত্তসত্তৰসেন পৰত্তো পঠমৰাদো, ‘‘সঞ্ঞং অত্ততো সমনুপস্সতী’’তি এত্থ ৰুত্তনযেন সঞ্ঞংযেৰ ‘‘অত্তা’’তি গহেত্ৰা তস্স কিঞ্চনভাৰেন ঠিতায অঞ্ঞায সঞ্ঞায অভাৰতো ‘‘অসঞ্ঞী’’তি পৰত্তো দুতিযৰাদো, তথা সঞ্ঞায সহ রূপধম্মে, সব্বে এৰ ৰা রূপারূপধম্মে ‘‘অত্তা’’তি গহেত্ৰা পৰত্তো ততিযৰাদো, তক্কগাহৰসেনেৰ চতুত্থৰাদো পৰত্তো.

দুতিযচতুক্কেপি কসিণরূপস্স অসঞ্জাননসভাৰতায অসঞ্ঞীতি কত্ৰা অন্তানন্তিকৰাদে ৰুত্তনযেন চত্তারো ৰিকপ্পা পৰত্তা. নেৰসঞ্ঞীনাসঞ্ঞীৰাদে পন নেৰসঞ্ঞীনাসঞ্ঞীভৰে নিব্বত্তসত্তস্সেৰ চুতিপটিসন্ধীসু, সব্বত্থ ৰা পটুসঞ্ঞাকিচ্চং কাতুং অসমত্থায সুখুমায সঞ্ঞায অত্থিভাৰপটিজাননৰসেন পঠমৰাদো, অসঞ্ঞীৰাদে ৰুত্তনযেন সুখুমায সঞ্ঞায ৰসেন, সঞ্জাননসভাৰতাপটিজাননৰসেন চ দুতিযৰাদাদযো পৰত্তাতি. এৰং কেনচি পকারেন সতিপি কারণপরিযেসনসম্ভৰে দিট্ঠিগতিকৰাদানং পরিযেসনক্খমাভাৰতো আদরং কত্ৰা মহুস্সাহেন তেসং কারণং ন পরিযেসিতব্বন্তি. এতেসং পন সঞ্ঞীঅসঞ্ঞীনেৰসঞ্ঞীনাসঞ্ঞীৰাদানং সস্সতদিট্ঠিসঙ্গহো ‘‘অরোগো পরং মরণা’’তি ৰচনতো পাকটোযেৰ.