৬. সম্পযুত্তৰারৰণ্ণনা

৩৯২-৪০০. সদিসং সম্পযুত্তন্তি ‘‘যং সদিসং, তং সংসট্ঠ’’ন্তি ৰুচ্চমানং সম্পযুত্তং ন হোতি ‘‘সংসট্ঠা যোজিতা হযা’’তিআদীসু. অসংসট্ঠং ৰোকিণ্ণন্তি যং ন সংসট্ঠং অন্তরন্তরা উপ্পজ্জমানেন ৰোকিণ্ণম্পি ৰিমিস্সতায সম্পযুত্তন্তি ৰুচ্চমানং, তং সংসট্ঠং ন হোতি ‘‘যা সা ৰীমংসা…পে… কোসজ্জসম্পযুত্তা’’তিআদীসু. এৰং অসম্পযুত্তস্সপি সংসট্ঠপরিযাযো অসংসট্ঠস্স চ সম্পযুত্তপরিযাযো অত্থীতি তদুভযং ইতরেতরং নিযমেতীতি দস্সনত্থং ৰারদ্ৰযদেসনাতি দস্সেন্তো আহ ‘‘উভযং…পে… নিযামকং হোতী’’তি, সংসট্ঠসদ্দো হি ৰোকিণ্ণট্ঠো নত্থি, সম্পযুত্তসদ্দো চ সদিসত্থো, তস্মা যথা সংসট্ঠসদ্দো সম্পযুত্তসদ্দাপেক্খো সদিসত্থতো ৰিনিৰত্তিত্ৰা একুপ্পাদাদিসভাৰমেৰ অত্থং বোধেতি, এৰং সম্পযুত্তসদ্দোপি সংসট্ঠসদ্দাপেক্খো ৰোকিণ্ণট্ঠতো ৰিনিৰত্তিত্ৰাতি অঞ্ঞমঞ্ঞাপেক্খস্স সদ্দদ্ৰযস্স অঞ্ঞমঞ্ঞনিযামকতা ৰেদিতব্বা.

সম্পযুত্তৰারৰণ্ণনা নিট্ঠিতা.