পটিচ্চৰারো

পচ্চযপচ্চনীযৰণ্ণনা

৮৬-৮৭. রূপসমুট্ঠাপকৰসেনেৰ ৰেদিতব্বন্তি ইদং অট্ঠকথাৰচনং অনন্তরং ‘‘চিত্তসমুট্ঠানঞ্চ রূপ’’ন্তি পাল়িযং আগতত্তা ৰুত্তং, পঞ্চৰিঞ্ঞাণানং পন অহেতুকপটিসন্ধিচিত্তানঞ্চ ৰসেন যোজনা সম্ভৰতীতি কত্ৰা ৰুত্তং ‘‘সব্বসঙ্গাহিকৰসেন পনেতং ন ন সক্কা যোজেতু’’ন্তি.

৯৩. সহজাতপুরেজাতপচ্চযাতি ইদং পচ্চযেন পচ্চযধম্মোপলক্খণন্তি দস্সেতুং ‘‘সহজাতা চ হেতুআদযো…পে… অত্থো দট্ঠব্বো’’তি ৰত্ৰা ‘‘ন হী’’তিআদিনা তমেৰত্থং সমত্থেতি.

৯৪-৯৭. সো পচ্চযোতি সো পটিচ্চট্ঠফরণকো পচ্চযো.

৯৯-১০২. চিত্তসমুট্ঠানাদযোতি আদি-সদ্দেন বাহিররূপআহারসমুট্ঠানাদযো রূপকোট্ঠাসা সঙ্গয্হন্তি. তস্সাতি মগ্গপচ্চযং লভন্তস্স রূপস্স. এৰমেৰ পনাতি ইমিনা যথা নমগ্গপচ্চযে ৰুত্তং, এৰমেৰ নহেতুপচ্চযাদীসু যং হেতুপচ্চযং লভতি, তস্স পরিহীনত্তাতি ইমমত্থং উপসংহরতি. তেনাহ ‘‘একচ্চরূপস্স পচ্চযুপ্পন্নতা দট্ঠব্বা’’তি.

১০৭-১৩০. সব্বত্থাতি পন্নরসমূলকাদীসু সব্বেসু নযেসু. কামং সুদ্ধিকনযাদীসু ৰিসদিসৰিস্সজ্জনা, ইধাধিপ্পেতত্থং পন দস্সেতুং ‘‘একেসূ’’তিআদি ৰুত্তং. ইধাতি এতেসু নাহারমূলকাদিনযেসু. গণনাযেৰ ন সরূপদস্সনন্তি সুদ্ধিকনযে ৰিয গণনায এৰ ন সরূপদস্সনং অধিপ্পেতন্তি অত্থো.

পচ্চযপচ্চনীযৰণ্ণনা নিট্ঠিতা.

পচ্চযানুলোমপচ্চনীযৰণ্ণনা

১৩১-১৮৯. তিণ্ণন্তি হেতু অধিপতি মগ্গোতি ইমেসং তিণ্ণং পচ্চযানং. সাধারণানন্তি যে তেসং তিণ্ণং সাধারণা পচ্চযা পচ্চনীকতো ন লব্ভন্তি, যস্মা তেসং সঙ্গণ্হনৰসেন ৰুত্তং, তস্মা. মগ্গপচ্চযেতি মগ্গপচ্চযে অনুলোমতো ঠিতে. ইতরেহীতি হেতুঅধিপতিপচ্চযেহি. সাধারণা সত্তেৰাতি মগ্গপচ্চযৰজ্জে সত্তেৰ. হেতুপচ্চযোপি পচ্চনীযতো ন লব্ভতীতি হেতুরহিতেসু অধিপতিনো অভাৰা. সো পনাতি হেতুপচ্চযো অসাধারণোতি কত্ৰা ন ৰুত্তো সাধারণানং অলব্ভমানানং ৰুচ্চমানত্তা. ন হি হেতুপচ্চযো মগ্গপচ্চযস্স সাধারণো. যেহীতি যেহি পচ্চযেহি. তেতি অনন্তরপচ্চযাদযো. একন্তিকত্তাতি অৰিনাভাৰতো. অরূপট্ঠানিকাতি অরূপপচ্চযা অরূপধম্মানংযেৰ পচ্চযভূতা অনন্তরপচ্চযাদযো. তেনাতি ‘‘একন্তিকানং অরূপট্ঠানিকা’’তি ইধাধিপ্পেতত্তা. তেহীতি পুরেজাতাসেৰনপচ্চযেহি. তেসং ৰসেনাতি তেসং ঊনতরগণনানং এককাদীনং ৰসেন. তস্স তস্সাতি পচ্চনীযতো যোজিতস্স তস্স তস্স দুকাদিকস্স বহুগণনস্স. গণনাতি ঊনতরগণনা. অনুলোমতো ঠিতস্সপীতি পি-সদ্দেন অনুলোমতো ঠিতো ৰা হোতু পচ্চনীযতো যোজিতো ৰা, ঊনতরগণনায সমানন্তি দস্সেতি. নযিদং লক্খণং একন্তিকন্তি ইমিনা যথাৰুত্তলক্খণং যেভুয্যৰসেন ৰুত্তন্তি দস্সেতি.

পচ্চযানুলোমপচ্চনীযৰণ্ণনা নিট্ঠিতা.

পচ্চযপচ্চনীযানুলোমৰণ্ণনা

১৯০. সব্বেসুপীতি পচ্ছাজাতং ঠপেত্ৰা সব্বেসুপি পচ্চযেসু. সো হি অনুলোমতো অলব্ভমানভাৰেন গহিতো ‘‘সব্বেসূ’’তি এত্থ সঙ্গহং ন লভতি. অরূপাৰচরৰিপাকস্স আরুপ্পে উপ্পন্নলোকুত্তরৰিপাকস্স চ পুরেজাতাসেৰনানং অলব্ভনতোতি ‘‘কিঞ্চি নিদস্সনৰসেন দস্সেন্তো’’তি আহ.

অৰসেসানং লাভমত্তন্তি অৰসেসানং একচ্চানং লাভং. তেনাহ ‘‘ন সব্বেসং অৰসেসানং লাভ’’ন্তি. পচ্ছাজাতে পসঙ্গো নত্থীতি পচ্ছাজাতো অনুলোমতো তিট্ঠতীতি অযং পসঙ্গো এৰ নত্থি. পুরেজা…পে… লব্ভতীতি ইমিনা ৰিপ্পযুত্তে পচ্চনীযতো ঠিতে পুরেজাতো লব্ভতীতি অযম্পি অত্থতো আপন্নো হোতীতি তং নিদ্ধারেত্ৰা তত্থ যং ৰত্তব্বং, তং দস্সেতুং ‘‘পুরেজাতো পন ৰিপ্পযুত্তে পচ্চনীযতো ঠিতে অনুলোমতো লব্ভতীতি ইদম্পী’’তিআদি ৰুত্তং. তত্থ ‘‘অৰসেসা সব্বেপীতি অত্থে গয্হমানে আপজ্জেয্যা’’তি ইদং তস্সা অত্থাপত্তিযা সব্ভাৰদস্সনমত্তং দট্ঠব্বং, অত্থো পন তাদিসো ন উপলব্ভতীতি অযমেত্থ অধিপ্পাযো. তেনাহ ‘‘যম্পি কেচী’’তিআদি.

তত্থ কেচীতি পদকারে সন্ধাযাহ. তে হি ‘‘অরূপধাতুযা চৰিত্ৰা কামধাতুং উপপজ্জন্তস্স গতিনিমিত্তং আরম্মণপুরেজাতং হোতীতি ঞাপেতুং ‘নৰিপ্পযুত্তপচ্চযা পুরেজাতে’তি অযমত্থো নিদ্ধারিতো’’তি ৰদন্তি, তং ন যুজ্জতি আরুপ্পে রূপং আরব্ভ চিত্তুপ্পাদস্স অসম্ভৰতো. তথা হেকে অসঞ্ঞভৰানন্তরস্স ৰিয আরুপ্পানন্তরস্স কামাৰচরপটিসন্ধিৰিঞ্ঞাণস্স পুরিমানুপট্ঠিতারম্মণং ইচ্ছন্তি. তেনেৰাহ ‘‘তম্পি তেসং রুচিমত্তমেৰা’’তিআদি. যুজ্জমানকপচ্চযুপ্পন্নৰসেন ৰাতি যস্মিং যস্মিং পচ্চযে অনুলোমতো ঠিতে যং যং পচ্চযুপ্পন্নং ভৰিতুং যুজ্জতি, তস্স তস্স ৰসেনাতি অত্থো. ন ৰিচারিতং সুৰিঞ্ঞেয্যত্তাতি অধিপ্পাযো. নৰাতি আরম্মণঅনন্তরসমনন্তরূপনিস্সযপুরেজাতাসেৰনসম্পযুত্তনত্থিৰিগতপচ্চযা. তম্পি তেসং নৰন্নং পচ্চযানং অনুলোমতো অলব্ভমানতং.

১৯১-১৯৫. ন অঞ্ঞমঞ্ঞেন ঘটিতস্স মূলস্সাতি অঞ্ঞমঞ্ঞপচ্চযেন পচ্চনীযতো ঠিতেন যোজিতস্স সত্তমস্স মূলস্স ৰিত্থারিতত্তা. সব্বং সদিসন্তি সব্বপাল়িগমনং সদিসং.

ইমস্মিং…পে… ৰেদিতব্বোতি এত্থ ইমস্মিং এত্থাতি দ্ৰে ভুম্মনিদ্দেসা. তেসু পঠমস্স ৰিসযো পচ্চনীযানুলোমেতি অট্ঠকথাযমেৰ দস্সিতোতি অদস্সিতস্স ৰিসযং দস্সেতুং ‘‘এতেসূ’’তিআদি ৰুত্তং. পি-সদ্দেনাতি ‘‘ইমেসম্পী’’তি এত্থ পি-সদ্দেন. কিস্মিঞ্চি পচ্চযে. কম্মপচ্চযং লভন্তানিপি চক্খাদীনি ৰিপাকৰিঞ্ঞাণাদীনি চ ইন্দ্রিযং ন লভন্তীতি কত্ৰা ‘‘যেভুয্যেনা’’তি ৰুত্তং, কতিপযং ন লভতীতি ৰুত্তং হোতি. মগ্গপচ্চযন্তিআদীসুপি এসেৰ নযো. যথাৰুত্তানীতি পঞ্চৰোকারপৰত্তিঅসঞ্ঞভৰপরিযাপন্নানি কটত্তারূপানেৰ ৰদতি, ন চিত্তসমুট্ঠানরূপানীতি অধিপ্পাযো. যে রূপধম্মানং পচ্চযা হোন্তীতি যে হেতুঅধিপতিসহজাতাদিপচ্চযা রূপধম্মানং পচ্চযা হোন্তি, এতেযেৰ হেতুঅধিপতিআদিকে ছ পচ্চযে ন লভন্তি. এতেযেৰাতি ৰচনেন অঞ্ঞে কতিপযে লভন্তীতি সিদ্ধং হোতীতি তং দস্সেন্তো ‘‘পচ্ছাজাতা…পে… লভতী’’তি আহ. অযঞ্চ পচ্চযলাভো ন জনকৰসেন ৰেদিতব্বোতি দস্সেতুং ‘‘লব্ভমানা…পে… দস্সন’’ন্তি ৰুত্তং. ধম্মৰসেনাতি পচ্চযুপ্পন্নধম্মৰসেন. ইন্দ্রিযন্তি ইন্দ্রিযপচ্চযং. যদি এৰন্তি কটত্তারূপং যং যং ন লভতি, তং তং যদি ৰত্তব্বং, এৰং সন্তে রূপধম্মেসু ভূতরূপানিযেৰ অঞ্ঞমঞ্ঞপচ্চযং লভন্তীতি আহ ‘‘উপাদারূপানি…পে… ৰত্তব্ব’’ন্তি. তং পন উপাদারূপানং অঞ্ঞমঞ্ঞপচ্চযালাভৰচনং. অরূপিন্দ্রিযালাভন্তি অরূপীনং ইন্দ্রিযানং ৰসেন ইন্দ্রিযপচ্চযালাভং.

১৯৬-১৯৭. বহুগণনম্পি ঊনতরগণনেন যোজিতং ঊনতরগণমেৰ হোতীতি কত্ৰা ৰুত্তং ‘‘যদিপি তিকাদীসু ‘হেতুযা পঞ্চা’তি ইদং নত্থী’’তি. অনুত্তানং দুৰিঞ্ঞেয্যতায গম্ভীরং. যথা চ ভূতরূপানি নারম্মণপচ্চযা অঞ্ঞমঞ্ঞপচ্চযা উপ্পজ্জন্তি, এৰং পটিসন্ধিক্খণে ৰত্থুরূপন্তি আহ ‘‘ৰত্থুপি পন লভতী’’তি. যথা হেট্ঠা একমূলকং ‘‘দুমূলক’’ন্তি ৰুত্তং, এৰং ইধাপি দুমূলকং ‘‘তিমূলক’’ন্তি ৰদন্তি.

২০৩-২৩৩. চেতনামত্তসঙ্গাহকেতি চেতনামত্তংযেৰ পচ্চযুপ্পন্নং গহেত্ৰা ঠিতে পঞ্হে. তত্থ হি ‘‘নকম্মপচ্চযা হেতুপচ্চযা’’তি ৰত্তুং সক্কা. এৰংপকারেতি ইদং ‘‘তীণীতিআদীসূ’’তি এত্থ আদি-সদ্দস্স অত্থৰচনন্তি দস্সেন্তো ‘‘আদি-সদ্দো হি পকারত্থোৰ হোতী’’তি আহ. রূপম্পি লব্ভতি চেতনামত্তমেৰ অসঙ্গণ্হনতো.

পচ্চযপচ্চনীযানুলোমৰণ্ণনা নিট্ঠিতা.

পটিচ্চৰারৰণ্ণনা নিট্ঠিতা.

২. সহজাতৰারৰণ্ণনা

২৩৪-২৪২. সহজাতপচ্চযকরণন্তি সহজাতং পচ্চযধম্মং পচ্চযং কত্ৰা পৰত্তি. সহজাতাযত্তভাৰগমনন্তি সহজাতে পচ্চযধম্মে আযত্তভাৰস্স গমনং পচ্চযুপ্পন্নস্স অত্তনা সহজাতপচ্চযাযত্তৰুত্তিতা. এত্থ চ সহজাতপচ্চযসঙ্খাতং সহজাতং করোতীতি সহজাতো, তথাপৰত্তো পচ্চযুপ্পন্নধম্মো. তত্থ পৰত্তমানো সহজাতসদ্দো যস্মা তস্স পচ্চযুপ্পন্নস্স অত্তনা সহজাতং পচ্চযধম্মং পচ্চযং কত্ৰা পৰত্তিং তদাযত্তভাৰূপগমনঞ্চ ৰদতীতি ৰুচ্চতি, তস্মা ৰুত্তং ‘‘সহজাতসদ্দেন…পে… ৰুত্ত’’ন্তি. তস্স করণস্স গমনস্স ৰাতি তস্স যথাৰুত্তস্স সহজাতপচ্চযকরণস্স সহজাতাযত্তভাৰূপগমনস্স ৰা. ‘‘কুসলং ধম্মং সহজাতো’’তি ইমস্স কুসলং ধম্মং সহজাতং তংসহভাৰিতঞ্চ পচ্চযং কত্ৰাতি অযমত্থোতি আহ ‘‘কুসলাদীনং কম্মভাৰতো’’তি. সহজাতপচ্চযসহভাৰীনং পচ্চযানং সঙ্গণ্হত্থঞ্হেত্থ ‘‘সহজাতাযত্তভাৰগমনং ৰা’’তি ৰুত্তং.

তংকম্মভাৰতোতি তেসং যথাৰুত্তপচ্চযকরণতদাযত্তভাৰগমনানং কম্মভাৰতো. অট্ঠকথাযং পন ‘‘কুসলং ধম্মং সহজাতোতি কুসলং ধম্মং পটিচ্চ তেন সহজাতো হুত্ৰা’’তি পটিচ্চসদ্দং আহরিত্ৰা অত্থো ৰুত্তো, তং ‘‘পটিচ্চত্থো সহজাতত্থো’’তি কত্ৰা ৰুত্তং. সহজাতসদ্দযোগে কুসলং ধম্মন্তি উপযোগৰচনস্স যুত্তি ন ৰুত্তা, ‘‘তেন সহজাতো হুত্ৰা’’তি পন ৰুত্তত্তা করণত্থে উপযোগৰচনন্তি দস্সিতন্তি কেচি. নিস্সযৰারে পন কুসলং ধম্মং নিস্সযত্থেন পচ্চযং কত্ৰাতি ৰদন্তেন ইধাপি ‘‘কুসলং ধম্মং সহজাতত্থেন পচ্চযং কত্ৰা’’তি অযমত্থো ৰুত্তোযেৰ হোতি, পটিচ্চসদ্দাহরণম্পি ইমমেৰত্থং ঞাপেতীতি দট্ঠব্বং. উপাদারূপং কিঞ্চি ভূতরূপস্স অনুপালকং উপত্থম্ভকঞ্চ হোন্তম্পি সহজাতলক্খণেন ন হোতি, তস্মা পটিচ্চত্থং ন ফরতীতি আহ ‘‘পটিচ্চাতি ইমিনা ৰচনেন দীপিতো পচ্চযো ন হোতী’’তি. নিদস্সনৰসেন ৰুত্তন্তি উদাহরণৰসেন ৰুত্তং, ন অনৰসেসতোতি অত্থো. যথাৰুত্তোতি পটিচ্চত্থফরণৰসেন ৰুত্তো. যথা চ উপাদারূপং ভূতরূপস্স উপাদারূপস্স চ পচ্চযো ন হোতি, এৰং ঠপেত্ৰা ছ ৰত্থূনি সেসরূপানি অরূপধম্মানং পচ্চযো ন হোতীতি দস্সেন্তো ‘‘ৰত্থুৰজ্জানি রূপানি চ অরূপান’’ন্তি আহ.

সহজাতৰারৰণ্ণনা নিট্ঠিতা.

৩. পচ্চযৰারৰণ্ণনা

২৪৩. পতি-সদ্দো পতিট্ঠত্থং দীপেতি ‘‘সারে পতিট্ঠিতো’’তিআদীসু, অয-সদ্দো গতিং দীপেতি ‘‘এতি এত্থাতি অযো’’তি.

ভূতুপাদারূপানি সহ সঙ্গণ্হিত্ৰা ৰুত্তং উপাদারূপানং ৰিয ভূতরূপানি নিস্সযো হোতীতি কত্ৰা. যদি এৰং কস্মা অট্ঠকথাযং ‘‘মহাভূতে নিস্সায চিত্তসমুট্ঠানং উপাদারূপ’’ন্তি উপাদারূপংযেৰ দস্সিতন্তি আহ ‘‘অট্ঠকথাযং পনা’’তিআদি.

২৫৫. পটিচ্চৰারে সহজাতেতি পটিচ্চৰারে সহজাতপচ্চযৰণ্ণনাযং, কম্মউতুজানন্তি কম্মজানং উতুজানঞ্চ ৰসেন অত্থো ৰুত্তোতি যোজনা. তথা হি তত্থ ৰুত্তং ‘‘দ্ৰিসন্ততিসমুট্ঠানভূতৰসেন ৰুত্ত’’ন্তি (পট্ঠা. অট্ঠ. ১.৫৭). কম্মে চাতি কম্মে জনককম্মপচ্চযে গহিতে. একন্তানেকন্তকম্মজানন্তি একন্তেন কম্মজানং ন একন্তকম্মজানঞ্চ. তত্থ অসঞ্ঞভৰে একন্তকম্মজং নাম জীৰিতিন্দ্রিযং, ইতরং উপাদারূপং ভূতরূপঞ্চ ন একন্তকম্মজং, তদুভযম্পি তত্থ একজ্ঝং কত্ৰা ৰুত্তং, ‘‘মহাভূতে পটিচ্চ কটত্তারূপ’’ন্তি ইদং পন কম্মসমুট্ঠানৰসেনেৰ ৰুত্তন্তি. সো নাধিপ্পেতোতি যো যথাদস্সিতো পটিচ্চৰারে সহজাতপচ্চযে অত্থো ৰুত্তো, সো ইধ ন অধিপ্পেতো. কস্মাতি চে, আহ ‘‘কটত্তা…পে… গহিতত্তা’’তি. তং পহাযাতি তং পটিচ্চৰারে ৰুত্তমত্থং পহায অগ্গহেত্ৰা. যথাগহিতস্সাতি ‘‘অসঞ্ঞ…পে… কটত্তারূপং উপাদারূপ’’ন্তি পাল়িযং এৰ গহিতস্স. পটিচ্চ পচ্চযাতি ইদং দ্ৰিন্নং ৰারানং উপলক্খণং. পটিচ্চৰারে আগতনযেন মহাভূতে পটিচ্চ, পচ্চযৰারে আগতনযেন মহাভূতে পচ্চযা মহাভূতানং উপ্পত্তি ন নিৰারেতব্বা, তস্মা ‘‘উপাদারূপসঙ্খাতং কটত্তারূপ’’ন্তি এৰং উপাদারূপগ্গহণেন কটত্তারূপং অৰিসেসেত্ৰা উপাদারূপানং নিৰত্তেতব্বানং উতুচিত্তাহারসমুট্ঠানানং অত্থিতায কটত্তা…পে… ৰিসেসনং দট্ঠব্বন্তি এৰমেত্থ যোজনা ৰেদিতব্বা.

২৮৬-২৮৭. একচ্চস্স রূপস্সাতি অহেতুকচিত্তসমুট্ঠানস্স. ইতো পরেসুপি একচ্চরূপগ্গহণে এসেৰ নযো. চক্খাদিধম্মৰসেনাতি চক্খাযতনাদিরূপধম্মৰসেন. চিত্তসমুট্ঠানাদিকোট্ঠাসৰসেনাতি চিত্তজাদিরূপধম্মভাগৰসেন. সব্বং লব্ভতীতি সতিপি ইমস্স নযস্স নহেতুমূলকত্তে নোনত্থিনোৰিগতেসু একন্তি গণনং সব্বং রূপং সব্বস্স রূপস্স ৰসেন গণনা লব্ভতি চতুসন্ততিৰসেন ৰত্তমানেসু পঞ্চৰীসতিযা রূপধম্মেসু ৰজ্জিতব্বস্স অভাৰা.

পচ্চযৰারৰণ্ণনা নিট্ঠিতা.

৪. নিস্সযৰারৰণ্ণনা

৩২৯-৩৩৭. নিস্সযপচ্চযভাৰন্তি নিস্সযৰারে ৰুত্তস্স সহজাতপুরেজাতস্স চ নিস্সযট্ঠস্স ধম্মস্স পচ্চযভাৰং পচ্চযৰারেন নিযমেতুন্তি যোজনা. তথা পচ্চযৰারে ‘‘পচ্চযা’’তি ৰুত্তস্স পচ্চযধম্মস্স সহজাতপুরেজাতভাৰং নিস্সযৰারেন নিযমেতুন্তি যোজনা. নিযমনঞ্চেত্থ পচ্চযট্ঠনিস্সযট্ঠানং পরিযাযন্তরেন পকাসিতত্তা অত্থতো ভেদাভাৰদস্সনন্তি ৰেদিতব্বো. তেন ৰুত্তং ‘‘পচ্চযত্তং নাম নিস্সযত্তং, নিস্সযত্তং নাম পচ্চযত্ত’’ন্তি.

নিস্সযৰারৰণ্ণনা নিট্ঠিতা.

৫. সংসট্ঠৰারৰণ্ণনা

৩৫১-৩৬৮. সাতি সৰত্থুকা পটিসন্ধি. ইধাপীতি ইমস্মিং সংসট্ঠৰারেপি. অধিপতিপুরেজাতাসেৰনেসু অনুলোমতো নকম্মনৰিপাকনঝাননৰিপ্পযুত্তেসু পচ্চনীযতো ঠিতেসু ন লব্ভতি, অঞ্ঞেসু সহজাতাদীসু অনুলোমতো হেতুআদীসু পচ্চনীযতো চ অনুলোমতো চ ঠিতেসু লব্ভতীতি. তেনাহ ‘‘লব্ভমানপচ্চযেসূ’’তি. ইমস্স ৰিসেসস্সাতি ইমস্স যথাৰুত্তস্স ৰিসেসস্স দস্সনত্থং উদ্ধটা, তস্মা তাদিসস্স ৰিসেসস্স দস্সেতব্বস্স অভাৰতো ৰত্থুৰিরহিতা পটিসন্ধি অনুদ্ধটা, ন ৰিপ্পযুত্তে পচ্চনীযতো ঠিতে অভাৰতোতি অত্থো. হেতুপচ্চযৰিরহিতমত্তদস্সনত্থন্তি ইমিনা ভূতকথনং অহেতুকগ্গহণং ন ব্যভিচারনিৰত্তনন্তি দস্সেতি. ‘‘অহেতুকৰিপাককিরিযৰসেনা’’তি ভৰিতব্বং হেতুপরিযন্তত্তা মগ্গস্স.

৩৬৯-৩৯১. ‘‘হেতুম্হি অনুলোমতো ঠিতে ঝানমগ্গা পচ্চনীযতো ন লব্ভন্তী’’তিআদি যং ইধ অট্ঠকথাযং ৰুত্তং, তং হেতুপচ্চযাদিৰসেন উপ্পজ্জমানো ধম্মো চত্তারো সব্বট্ঠানিকা আহারিন্দ্রিযঝানমগ্গা চাতি ইমে অট্ঠ পচ্চযে অলভন্তো নাম নত্থীতি ইমিনা পটিচ্চৰারে অনুলোমপচ্চনীযৰণ্ণনাযং ৰুত্তেন নযেন ৰেদিতুং সক্কাতি আহ ‘‘পটিচ্চৰারে…পে… নযেনা’’তি. সেসেসূতি অহেতুকমোহৰজ্জাহেতুকেসু পঞ্চৰিঞ্ঞাণা…পে… ঝানপচ্চযং লভন্তি, তস্মা ‘‘অহেতুকমোহোৰ ঝানমগ্গপচ্চযং লভতী’’তি ন সক্কা ৰত্তুং, কিঞ্চ পচ্চনীযানুলোমে দ্ৰিন্নং পচ্চযানং অনুলোমেন অনুলোমৰসেন সহ যোজনা নত্থি একেকস্সেৰ যোজনায আগতত্তা, তস্মা অহেতুকমোহোৰ মগ্গপচ্চযং লভতীতি এৰমেত্থ যোজনা ৰেদিতব্বা.

সংসট্ঠৰারৰণ্ণনা নিট্ঠিতা.

৬. সম্পযুত্তৰারৰণ্ণনা

৩৯২-৪০০. সদিসং সম্পযুত্তন্তি ‘‘যং সদিসং, তং সংসট্ঠ’’ন্তি ৰুচ্চমানং সম্পযুত্তং ন হোতি ‘‘সংসট্ঠা যোজিতা হযা’’তিআদীসু. অসংসট্ঠং ৰোকিণ্ণন্তি যং ন সংসট্ঠং অন্তরন্তরা উপ্পজ্জমানেন ৰোকিণ্ণম্পি ৰিমিস্সতায সম্পযুত্তন্তি ৰুচ্চমানং, তং সংসট্ঠং ন হোতি ‘‘যা সা ৰীমংসা…পে… কোসজ্জসম্পযুত্তা’’তিআদীসু. এৰং অসম্পযুত্তস্সপি সংসট্ঠপরিযাযো অসংসট্ঠস্স চ সম্পযুত্তপরিযাযো অত্থীতি তদুভযং ইতরেতরং নিযমেতীতি দস্সনত্থং ৰারদ্ৰযদেসনাতি দস্সেন্তো আহ ‘‘উভযং…পে… নিযামকং হোতী’’তি, সংসট্ঠসদ্দো হি ৰোকিণ্ণট্ঠো নত্থি, সম্পযুত্তসদ্দো চ সদিসত্থো, তস্মা যথা সংসট্ঠসদ্দো সম্পযুত্তসদ্দাপেক্খো সদিসত্থতো ৰিনিৰত্তিত্ৰা একুপ্পাদাদিসভাৰমেৰ অত্থং বোধেতি, এৰং সম্পযুত্তসদ্দোপি সংসট্ঠসদ্দাপেক্খো ৰোকিণ্ণট্ঠতো ৰিনিৰত্তিত্ৰাতি অঞ্ঞমঞ্ঞাপেক্খস্স সদ্দদ্ৰযস্স অঞ্ঞমঞ্ঞনিযামকতা ৰেদিতব্বা.

সম্পযুত্তৰারৰণ্ণনা নিট্ঠিতা.

৭. পঞ্হাৰারৰিভঙ্গৰণ্ণনা

৪০১-৪০৩. তে পচ্চযেতি তে হেতুআদিকে পচ্চযে. পটিপাটিযাতি এত্থ পচ্চযপটিপাটিযা কুসলাদিপদপটিপাটিযা ৰাতি আসঙ্কাযং উভযৰসেনপি অত্থো যুজ্জতীতি দস্সেন্তো পঠমং তাৰ সন্ধাযাহ ‘‘যথাক্কমেনা’’তিআদি. তস্সত্থো – ‘‘হেতুপচ্চযো আরম্মণপচ্চযো’’তিআদিনা নযেন দেসনাক্কমেন যায পটিপাটিযা পটিচ্চৰারে পচ্চযা আগতা, তদনুরূপং তে দস্সেতুন্তি. দুতিযং পন দস্সেতুং ‘‘কুসলো কুসলস্সা’’তিআদি ৰুত্তং. সা পনাযং পদপটিপাটি যস্মা ন কুসলপদদস্সনমত্তেন দস্সিতা হোতি, তস্মা তং একদেসেন সকলং নযতো দস্সেন্তো আহ ‘‘কুসলো কুসলস্সাতি…পে… হোতী’’তি. তেনাতি নিদস্সনমত্তেন ‘‘কুসলো কুসলস্সা’’তি পদেন. সব্বো পভেদোতি যং তত্থ তত্থ পচ্চযে ‘‘কুসলো কুসলস্সা’’তিআদিকো যত্তকো পভেদো ৰিস্সজ্জনং লভতি, সো সব্বো পভেদোতি অত্থো. তে পচ্চযে পটিপাটিযা দস্সেতুন্তি তে হেতুআদিপচ্চযে কুসলাদিপদপটিপাটিযা দস্সেতুং.

৪০৪. ফলৰিসেসং আকঙ্খন্তা পটিগ্গাহকতো ৰিয দাযকতোপি যথা দক্খিণা ৰিসুজ্ঝতি, এৰং দানং দেন্তীতি আহ ‘‘ৰিসুদ্ধং কত্ৰা’’তি. তেসন্তি ৰত্তব্বতারহন্তি ইমিনা ৰোদানস্স সকদাগামিআদীনং আৰেণিকতং দস্সেতি. কামং অগ্গমগ্গপুরেচারিকম্পি ৰোদানমেৰ, অসেক্খো পন হুত্ৰা তং পচ্চৰেক্খতীতি ন তং ইধ গহিতং. তন্তি ৰোদানং. গোত্রভুচিত্তন্তি অট্ঠমকস্স উপ্পজ্জনকালে ‘‘গোত্রভূ’’তি ৰত্তব্বতারহং চিত্তং. গোত্রভুসদিসন্তি ৰা সোতাপন্নাদিগোত্রাভিভাৰীতি ৰা গোত্রভুচিত্তন্তি এৰমেত্থ অত্থো ৰেদিতব্বো. পচ্চযুপ্পন্নং ভূমিতো ৰৰত্থপেতি, ‘‘তেভূমককুসলমেৰা’’তি এত্থ ৰিয ন পচ্চযধম্মন্তি অত্থো. দেসনন্তরত্তাতি ‘‘কুসলচিত্তসমঙ্গিস্সা’’তিআদিনা পুগ্গলামসনদেসনতো অঞ্ঞত্তা, অঞ্ঞথা গহিতং পুন ন গণ্হেয্যাতি অধিপ্পাযো.

৪০৫. রাগরহিতস্স ৰিয সোমনস্সরহিতস্স চ রাগস্স ন আরম্মণে অস্সাদনৰসেন পৰত্তি অজ্ঝুপেক্খনতোতি ৰুত্তং ‘‘অস্সাদনং…পে… কিচ্চ’’ন্তি. সহসাকারপ্পৰত্তায উপ্পিলাৰিতসভাৰায পীতিযা আহিতৰিসেসায তণ্হায তং তণ্হাভিনন্দনন্তি ৰুচ্চতীতি তং সন্ধাযাহ ‘‘পীতিকিচ্চসহিতায তণ্হায কিচ্চ’’ন্তি. যথা চ যথাৰুত্তকিচ্চৰিসেসায পীতিযা আহিতৰিসেসা তণ্হা তণ্হাভিনন্দনা, এৰং দিট্ঠাভিনন্দনা ৰেদিতব্বা. যস্মা পন সা অত্থতো পচ্চযৰিসেসৰিসিট্ঠা দিট্ঠিযেৰ, তস্মা ৰুত্তং ‘‘দিট্ঠাভিনন্দনা দিট্ঠিযেৰা’’তি. এত্থ পনাতি ‘‘অভিনন্দতী’’তি পদস্স তণ্হাদিট্ঠিৰসেন ৰুত্তেসু এতেসু পন দ্ৰীসু অত্থেসু. অভিনন্দন্তস্সাতি ইদং দিট্ঠাভিনন্দনংযেৰ সন্ধায ৰুত্তন্তি অধিপ্পাযেন ‘‘পচ্ছিমত্থমেৰ গহেত্ৰা’’তি ৰুত্তং. অভিনন্দন্তস্সাতি পন অৰিসেসতো ৰুত্তত্তা তণ্হাৰসেন দিট্ঠিৰসেন অভিনন্দন্তস্সাতি অযমেত্থ অত্থো অধিপ্পেতো, তস্মা ‘‘অভিনন্দনা…পে… ন সক্কা ৰত্তু’’ন্তি ইদমিধ ৰচনমনোকাসং. কস্মা? দিট্ঠিরহিতেপি সন্তানে অভিনন্দনস্স ৰুত্তত্তা. তণ্হাৰসেন নন্দতীতি তণ্হাভিনন্দনৰসেনেৰ ৰুত্তো অত্থো পুরিমো অত্থো. দ্ৰীসু পন সোমনস্সসহগতচিত্তুপ্পাদেসূতি দিট্ঠিরহিতানি সোমনস্সসহগতচিত্তানি সন্ধাযাহ. যথাৰুত্তেনাতি ‘‘সরাগস্স সোমনস্সস্সা’’তিআদিনা ৰুত্তেন সোমনস্সেন অস্সাদেন্তস্স, রাগেন চ তেসুযেৰ যথাৰুত্তেসু দ্ৰীসু চিত্তেসু অস্সাদেন্তস্স, চতূসুপি সোমনস্সসহগতচিত্তেসু সপ্পীতিকতণ্হায অভিনন্দন্তস্স, চতূসুপি দিট্ঠিসম্পযুত্তেসু দিট্ঠাভিনন্দনায অভিনন্দন্তস্স দিট্ঠি উপ্পজ্জতীতি এৰমেত্থ যোজনা ৰেদিতব্বা. তেন ৰুত্তং ‘‘ইতিপি সক্কা যোজেতু’’ন্তি. যথা দিট্ঠূপনিস্সযতো দিট্ঠাভিনন্দনা সম্ভৰতি, এৰং তণ্হূপনিস্সযতো তণ্হাভিনন্দনাপি সম্ভৰতীতি দট্ঠব্বং. ‘‘অভিনন্দতি রাগো উপ্পজ্জতী’’তি ৰচনতো সপ্পীতিকতণ্হায অভিনন্দন্তস্স রাগুপ্পত্তিপি ৰত্তব্বা, ন ৰা ৰত্তব্বা তণ্হাভিনন্দনায এৰ রাগুপ্পত্তিযা ৰুত্তত্তা.

৪০৬. ‘‘তদারম্মণতাযা’’তি ৰত্তব্বে ‘‘তদারম্মণতা’’তি ৰুত্তন্তি আহ ‘‘ৰিভত্তিলোপো হেত্থ কতো’’তি. তদারম্মণতাতি এত্থ তা-সদ্দাভিধেয্যো অত্থো ভাৰো নাম, সো পন তদারম্মণসদ্দাভিধেয্যতো অঞ্ঞো নত্থীতি দস্সেন্তো আহ ‘‘ভাৰৰন্ততো ৰা অঞ্ঞো ভাৰো নাম নত্থী’’তি. এতেন সকত্থে অযং তা-সদ্দোতি দস্সেতি. তেনাহ ‘‘ৰিপাকো তদারম্মণভাৰভূতোতি অত্থো’’তি. এতস্মিঞ্চত্থে ‘‘তদারম্মণতা’’তি পচ্চত্তেকৰচনং দট্ঠব্বং. ৰিঞ্ঞাণঞ্চাযতন…পে… ন ৰুত্তন্তি যদিপি কামাৰচরৰিপাকানম্পি কম্মং আরম্মণং লব্ভতি, তং পন ৰিঞ্ঞাণঞ্চাযতননেৰসঞ্ঞানাসঞ্ঞাযতনৰিপাকানং ৰিয ন একন্তেন ইমস্স ৰিপাকচিত্তস্স ইদং কম্মং আরম্মণন্তি ৰৰত্থিতং কামাৰচরৰিপাকচিত্তানং বহুভেদত্তা, তস্মা তং লব্ভমানম্পি ন ৰুত্তন্তি অত্থো. যদি এৰং কিং তং লব্ভমানম্পি ন দস্সিতমেৰাতি আসঙ্কাযং আহ ‘‘তদারম্মণেন পনা’’তিআদি. অনুলোমতো সমাপজ্জনে যেভুয্যেন আসন্নসমাপত্তিযা আরম্মণভাৰো দস্সিতো, অঞ্ঞথা ‘‘পটিলোমতো ৰা একন্তরিকৰসেন ৰা’’তি ৰচনং নিরত্থকং সিযাতি অধিপ্পাযো. ভৰেয্যাতি অনাসন্নাপি সমাপত্তি আরম্মণং ভৰেয্য, ন সক্কা পটিক্খিপিতুন্তি অত্থো. তেনেৰ হি ‘‘যেভুয্যেনা’’তি ৰুত্তং. এৰং সতীতি যদি আৰজ্জনায এৰ আরম্মণভাৰেন কুসলানং খন্ধানং অব্যাকতারম্মণতা অধিপ্পেতা, এৰং সন্তে. ৰত্তব্বং সিযাতি ‘‘ইদ্ধিৰিধঞাণস্সা’’তি চ পাল়িযং ৰত্তব্বং সিযা তস্সাপি আৰজ্জনায আরম্মণভাৰতো. তং ন ৰুত্তন্তি তং অব্যাকতং ইদ্ধিৰিধঞাণং ‘‘কুসলা খন্ধা ইদ্ধিৰিধঞাণস্সা’’তি ন ৰুত্তং. হোন্তীতি আরম্মণং হোন্তি. তানীতি চেতোপরিযঞাণাদীনি. যায কাযচীতি চেতোপরিযঞাণাদীনং অঞ্ঞেসঞ্চ কুসলানং আরম্মণকরণৰসেন আৰজ্জন্তিযা.

৪০৭-৪০৯. আদীনৰদস্সনেন সভাৰতো চ অনিট্ঠতামত্তৰসেন চ দোমনস্সস্স উপ্পত্তি ৰেদিতব্বাতি যোজেতব্বং. আঘাতৰত্থুআদিভেদেন অক্খন্তিভেদা ৰেদিতব্বা.

৪১০. সব্বস্সাতি পকরণপরিচ্ছিন্নে গয্হমানে সব্বস্স অব্যাকতস্স, অত্থন্তরৰসেন পন গয্হমানে সব্বস্স ঞেয্যস্সাতি অত্থো. অসক্কুণেয্যত্তাতি ইদং ৰত্তব্বস্স অনন্তাপরিমেয্যতায ৰুত্তং, ন অঞ্ঞাণপটিঘাততো.

৪১৭. ৰোদানসঙ্খাতং ৰুট্ঠানং অপুব্বতো ন হোতীতি ৰুত্তং ‘‘অপুব্বতো চিত্তসন্তানতো ৰুট্ঠানং ভৰঙ্গমেৰা’’তি. তঞ্হি যথালদ্ধস্স ৰিসেসস্স ৰোদাপনং পগুণভাৰাপাদনং অপুব্বং নাম ন হোতি. তথা হি ৰুত্তং ‘‘হেট্ঠিমং হেট্ঠিমঞ্হি পগুণজ্ঝানং উপরিমস্স উপরিমস্স পদট্ঠানং হোতি, তস্মা ৰোদানম্পি ৰুট্ঠানন্তি ৰুত্ত’’ন্তি. অৰজ্জেতব্বত্তা ৰত্তব্বং নত্থীতি কুসলভাৰেন সমানত্তা ৰজ্জেতব্বতায অভাৰতো ৰিভজিত্ৰা ৰত্তব্বং নত্থি, তস্মা যদেত্থ ৰিসেসনং লব্ভতি, তং দস্সেন্তো ‘‘নেৰসঞ্ঞানাসঞ্ঞাযতনং…পে… সমাপত্তিযা’’তি আহ. চিত্তুপ্পাদকণ্ডে ৰুত্তমেৰাতি পট্ঠানে পন ‘‘কুসলে নিরুদ্ধে ৰিপাকো তদারম্মণতা উপ্পজ্জতী’’তিআদিনা ‘‘কিরিযানন্তরং তদারম্মণভাৰে’’তি যং ৰত্তব্বং, তং চিত্তুপ্পাদকণ্ডৰণ্ণনাযং ৰুত্তমেৰ.

তা উভোপীতি যা ‘‘কুসলৰিপাকাহেতুকসোমনস্সসহগতা উপেক্খাসহগতা চা’’তি দ্ৰে মনোৰিঞ্ঞাণধাতুযো ৰুত্তা, তা উভোপি সোমনস্সসহগতমনোৰিঞ্ঞাণধাতুৰসেন ৰুত্তা. কস্মা? দসন্নং কামাৰচরভৰঙ্গানং অত্তনো তদারম্মণকালে সন্তীরণকালে চ ৰোট্ঠব্বনস্স অনন্তরপচ্চযভাৰতো. উপেক্খাসহগতা পন যথাৰুত্তানং দসন্নং ৰিপাকানং মনোৰিঞ্ঞাণধাতূনং অত্তনো তদারম্মণাদিকালে ৰোট্ঠব্বনকিরিযস্স সন্তীরণকালে মনোধাতুকিরিযস্স ভৰঙ্গকালেতি যোজেতব্বং.

৪২৩. পটিৰিজ্ঝিত্ৰাতি জানিত্ৰা. দল়্হং ন গহেতব্বন্তি দল়্হগ্গাহং ন গহেতব্বং. বলৰতো…পে… ৰিপচ্চনতোতি এতেন বলৰতা দুব্বলতা চ অপ্পমাণং, কতোকাসতা পমাণন্তি দস্সেতি. কতোকাসতা চ অৰসেসপচ্চযসমৰাযে ৰিপাকাভিমুখতাতি দট্ঠব্বং. যং কিঞ্চীতি চ বলৰং দুব্বলং ৰাতি অত্থো. ৰিপাকজনকম্পি কিঞ্চি কম্মং উপনিস্সযপচ্চযো ন হোতীতি সক্কা ৰত্তুং. সতি হি কম্মউপনিস্সযপচ্চযানং অৰিনাভাৰে ৰিপাকত্তিকে উপনিস্সযপচ্চযে গহিতে কম্মপচ্চযো ৰিসুং ন উদ্ধরিতব্বো সিযা, ৰেদনাত্তিকে চ উপনিস্সযে পচ্চনীযতো ঠিতে কম্মপচ্চযেন সদ্ধিং অট্ঠাতি ন ৰত্তব্বং সিযাতি অধিপ্পাযো. পচ্চযদ্ৰযস্স পন লব্ভমানতপ্পরায দেসনায উপনিস্সযে গহিতেপি কম্মপচ্চযো উদ্ধরিতব্বোযেৰাতি সক্কা ৰত্তুং. লব্ভমানস্স হি উদ্ধরণং ঞাযাগতং, তথা উপনিস্সযে পচ্চনীযতো ঠিতেপি কম্মপচ্চযো ৰত্তব্বোৰ উপনিস্সযস্স অনেকভেদত্তা, ৰিপাকং জনেন্তং কম্মং ৰিপাকস্স উপনিস্সযো ন হোতীতি ন ৰত্তব্বমেৰাতি ৰেদিতব্বং.

পরস্স পৰত্তং ওমানন্তি পরসন্তানে অত্তানং উদ্দিস্স পৰত্তং অৰমানং. তেসূতি যো অনেন পুব্বে হতো, তস্স ঞাতিমিত্তেসু. মাতুঘাতনত্থং পৰত্তিততায পুরিমচেতনায মাতুঘাতকম্মেন সদিসতা, যথা চ আণত্তিযং পহারেপি এসেৰ নযো. তেন ৰুত্তং ‘‘এস নযো দ্ৰীহি পকারেহীতি এত্থাপী’’তি.

ৰট্টনিস্সিতো দানাদিৰসেন সদ্ধং উপ্পাদেন্তো রাগং উপনিস্সায দানাদিৰসেন সদ্ধং উপ্পাদেতি নাম, ন ৰিৰট্টনিস্সিতো অৰিসেসেন ৰুত্তত্তাতি আহ ‘‘ইমিনা অধিপ্পাযেন ৰদতী’’তি. এতেসন্তি কাযিকসুখদুক্খানং. একতোপীতি ইদং যদিপি একস্মিং সন্তানে সুখদুক্খানং একস্মিং খণে উপ্পত্তি নত্থি, পচ্চযসমাযোগো পন তেসং একজ্ঝম্পি হোতীতি কত্ৰা ৰুত্তং.

৪২৫. পুরিমৰারেসু ৰিযাতি পটিচ্চৰারাদীসু পুরিমেসু ৰিয. ইমস্মিন্তি পঞ্হাৰারে. পচ্চযেন উপ্পত্তি ৰুচ্চতীতি হেতুআদিনা তেন তেন পচ্চযেন তংতংপচ্চযুপ্পন্নস্স উপ্পত্তি ন ৰুচ্চতি. তেসং তেসং ধম্মানন্তি হেতুআদীনং তেসং তেসং পচ্চযধম্মানং. তংতংপচ্চযভাৰোতি হেতুআদীনং তংতংপচ্চযভাৰো ৰুচ্চতি. তেনেৰ পুরিমেসু ছসু ৰারেসু ‘‘কুসলো ধম্মো উপ্পজ্জতী’’তিআদিনা তত্থ তত্থ উপ্পাদগ্গহণং কতং, ইধ পন ‘‘কুসলস্স ধম্মস্স হেতুপচ্চযেন পচ্চযো’’তিআদিনা পচ্চযভাৰো গহিতো. তেনাতি উপত্থম্ভকত্তেন পচ্চযভাৰেন. ইধাতি পঞ্হাৰারে.

৪২৭. পতিট্ঠাভূতস্সাতি নিস্সযভূতস্স. কম্মপচ্চযোতি সহজাতকম্মপচ্চযো. দুকমূলকদুকাৰসানাতি ‘‘কুসলো চ অব্যাকতো চ ধম্মা কুসলস্স চ অব্যাকতস্স চ ধম্মস্সা’’তি এৰং দুকমূলকদুকাৰসানা কত্ৰা ৰুত্তপঞ্হা. তত্থাতি পচ্চযৰারে. কুসলো চ অব্যাকতো চ ধম্মাতি কুসলাব্যাকতপ্পভেদা পচ্চযুপ্পন্না ধম্মা. যতো ততো ৰাতি পচ্চযধম্মনিযমং অকত্ৰা যতো ততো ৰা কুসলাব্যাকতৰসেন উভযপচ্চযতো উপ্পত্তিমত্তমেৰ তত্থ পচ্চযৰারে অধিপ্পেতং, উভযস্স যথাৰুত্তস্স পচ্চযুপ্পন্নস্স উভিন্নং যথাৰুত্তানংযেৰ পচ্চযধম্মানং পচ্চযভাৰো ন অধিপ্পেতো উপ্পাদপধানত্তা তস্সা দেসনাযাতি অধিপ্পাযো. নিস্সযাদিভূতাতি নিস্সযঅত্থিঅৰিগতভূতা পচ্চযধম্মা ন লব্ভন্তি, তস্মা কুসলো চ…পে… ন ৰুত্তন্তি যোজনা.

পঞ্হাৰারৰিভঙ্গৰণ্ণনা নিট্ঠিতা.

পঞ্হাৰারস্স ঘটনে অনুলোমগণনা

৪৩৯. এত্থাতি অব্যাকতমূলকে. যদি এৰন্তি যদি কুসলাকুসলমূলেহি অলব্ভমানম্পি লব্ভতি, এৰং সন্তে. গণনমত্তসামঞ্ঞতো, ন পচ্চযসামঞ্ঞতোতি অধিপ্পাযো.

৪৪০. নিদস্সনৰসেন দট্ঠব্বো যেভুয্যেন ইন্দ্রিযমগ্গপচ্চযানঞ্চ হেতুপচ্চযস্স ৰিসভাগত্তা. ইন্দ্রিযমগ্গপচ্চযা চ ৰিসভাগাতি ৰিসেসনেন যো তত্থ সভাগভাৰো, তং নিৰত্তেতি. তথা ভাৰাভাৰতোতি তস্মিং হেতুপচ্চযাকারে সতি ভাৰতো, হেতুধম্মানং হেতুপচ্চযভাৰে সতি সহজাতাদিপচ্চযভাৰতোতি অত্থো. অধিপতিপচ্চযাদীনন্তি অধিপতিন্দ্রিযমগ্গপচ্চযানং. ৰিসভাগতা হেতুপচ্চযস্স. কুসলাদিহেতূনন্তি কুসলাকুসলকিরিযাব্যাকতহেতূনং. হেতুপচ্চযভাৰেতি হেতুপচ্চযত্তে হেতুভাৰেন উপকারকত্তে. ৰিপাকপচ্চযভাৰাভাৰতোতি ৰিপাকপচ্চযভাৰস্স অভাৰতো. ন হি ৰিপাকানং ৰিপাকপচ্চযতা অত্থি. ৰিপাকহেতূনং ইতরহেতূহি হেতুপচ্চযতায অত্থি সভাগতাতি আহ ‘‘হেতুৰজ্জান’’ন্তি. ৰিপাকানং ৰিসভাগতায ভৰিতব্বং, ন হি ৰিপাকধম্মধম্মনেৰৰিপাকনৰিপাকধম্মধম্মানং ৰিপাকেহি সভাগতা অত্থি রাসন্তরভাৰতোতি অধিপ্পাযো. উভযপচ্চযসহিতেতি হেতুৰিপাকপচ্চযসহিতে. হেতুপচ্চযভাৰে ৰিপাকম্হীতি হেতুপচ্চযভাৰেন ৰত্তমানে ৰিপাকধম্মে. ৰিপাকপচ্চযত্তাভাৰাভাৰতোতি ৰিপাকপচ্চযভাৰাভাৰস্স অভাৰতো. ন হি ৰিপাকো ৰিপাকস্স ৰিপাকপচ্চযো ন হোতি, তস্মা নত্থি হেতুৰিপাকপচ্চযানং ৰিসভাগতাতি অধিপ্পাযো.

ইদানি ৰুত্তমেৰত্থং উদাহরণেন সমত্থেন্তো ‘‘যথা হী’’তিআদিমাহ. হেতুসহজাতপচ্চযসহিতেতি হেতুপচ্চযসহজাতপচ্চযসহিতে, উভযপচ্চযযুত্তেতি অত্থো. হেতূনন্তি ইদং ‘‘সহজাতপচ্চযত্তাভাৰো’’তি ইমিনাপি সম্বন্ধিতব্বং. হেতূনঞ্হি হেতুপচ্চযসহিতে রাসিম্হি হেতুপচ্চযভাৰো ৰিয সহজাতপচ্চযভাৰোপি অত্থীতি. তত্থ হেতুৰজ্জানং সহজাতধম্মানং হেতুধম্মস্স চ ন সভাগতা ৰুচ্চতি সহজাতপচ্চযেন সভাগভাৰতো. এৰমিধাপীতি যথা হেতুসহজাতপচ্চযেসু ৰুত্তপ্পকারেন নত্থি ৰিসভাগতা, এৰমিধাপি হেতুৰিপাকপচ্চযেসু নত্থি ৰিসভাগতাতি অত্থো. এস নযো ৰিপ্পযুত্তপচ্চযেপীতি য্ৰাযং নযো হেতুসহজাতপচ্চযেসু ৰিসভাগতাভাৰো ৰুত্তো, এস নযো হেতুসহিতে ৰিপ্পযুত্তপচ্চযেপীতি অত্থো. তত্থাপি হি ‘‘হেতুৰিপ্পযুত্তপচ্চযসহিতে রাসিম্হী’’তিআদি সক্কা যোজেতুন্তি. পচ্চুপ্পন্নো এৰ পচ্চযুপ্পন্নো, পচ্চযো পন অতীতোপি অনাগতোপি কালৰিনিমুত্তোপি হোতীতি পচ্চুপ্পন্নক্খণে হেতুপচ্চযভাৰে সহজাতাদিপচ্চযভাৰং সন্ধায তথাভাৰাভাৰৰসেন সভাগতায ৰুচ্চমানায নানাক্খণিকানং কুসলাদীনং হেতূনং ৰিপাকানঞ্চ ৰসেন ৰিসভাগতা তস্সেৰ হেতুস্স ন ৰত্তব্বাতি ইমমত্থং দস্সেতি ‘‘অপিচা’’তিআদিনা.

অগ্গহিতৰিসেসতো সামঞ্ঞতো ৰিসেসো ন সুৰিঞ্ঞেয্যো হোতীতি অধিপ্পাযেনাহ ‘‘কুসলা ৰীমংসাধিপতীতি এৰং ৰত্তব্ব’’ন্তি.

৪৪১-৪৪৩. ‘‘ইতরানি দ্ৰে লভতী’’তি এৰং ৰত্তুং ন সক্কা, হেতাধিপতিদুকেহি দস্সিতানি যানি ‘‘কুসলো ধম্মো কুসলস্স ধম্মস্স, কুসলো ধম্মো অব্যাকতস্স, কুসলো ধম্মো কুসলস্স চ অব্যাকতস্স চ, অব্যাকতো ধম্মো অব্যাকতস্সা’’তি চত্তারি ৰিস্সজ্জনানি, তেসু হেতুসহজাতনিস্সযঅত্থিঅৰিগতইন্দ্রিযমগ্গপচ্চযেসু সম্পযুত্তপচ্চযে পৰিট্ঠে ‘‘কুসলো ধম্মো কুসলস্স, অব্যাকতো ধম্মো অব্যাকতস্সা’’তি ইমানি দ্ৰে লভতি. যং সন্ধায অট্ঠকথাযং ৰুত্তং ‘‘সচে তেহি সদ্ধিং…পে… তানেৰ দ্ৰে লভতী’’তি, তেহি পন ইতরানি নাম ‘‘কুসলো ধম্মো অব্যাকতস্স, কুসলো ধম্মো কুসলস্স চ অব্যাকতস্স চা’’তি ইমানি দ্ৰেপি সিযুং. ন হি কুসলো ধম্মো কুসলস্স ৰিপ্পযুত্তপচ্চযেন পচ্চযো হোতি. তেন ৰুত্তং ‘‘ইতরানি দ্ৰে লভতীতি পুরিমপাঠো’’তিআদি. ইতরানি দ্ৰেতি ৰা অঞ্ঞানি দ্ৰে, যানি সম্পযুত্তপচ্চযৰসেন দ্ৰে ৰিস্সজ্জনানি, ৰিপ্পযুত্তপৰেসে পন ততো অঞ্ঞানি অঞ্ঞথাভূতানি দ্ৰে ৰিস্সজ্জনানি. যানি সন্ধায ৰুত্তং ‘‘কুসলো অব্যাকতস্স, অব্যাকতো অব্যাকতস্সাতি দ্ৰে লভতীতি পঠন্তী’’তি. তেসূতি ঊনতরগণনাহেতূসু ৰিপাকঅঞ্ঞমঞ্ঞাদীসু.

অনামট্ঠৰিপাকানীতি অগ্গহিতৰিপাকপচ্চযানি, ঘটনং অপেক্খিত্ৰা অযং নপুংসকনিদ্দেসো. ন ৰিপাকহেতুরহিতানি সাধারণৰসেন ৰুত্তত্তা. তেন ৰুত্তং অট্ঠকথাযং ‘‘সামঞ্ঞতো নৰন্নম্পি হেতূনং ৰসেন ৰুত্তানী’’তি, ‘‘ৰিপাকহেতুপি লব্ভতী’’তি চ.

তত্থাতি পঞ্চমঘটনতো পট্ঠায পঞ্চসু ঘটনেসু. তেন ৰিপাকেন সহ, সমং ৰা উট্ঠানং এতস্সাতি সমুট্ঠানন্তি অযম্পি অত্থো সম্ভৰতীতি ৰুত্তং ‘‘পটিসন্ধিযং কটত্তারূপম্পি তংসমুট্ঠানগ্গহণেনেৰ সঙ্গণ্হাতী’’তি. এসেৰ নযোতি ইমিনা কটত্তারূপম্পি তংসমুট্ঠানগ্গহণেনেৰ সঙ্গণ্হাতীতি ইমমেৰত্থং অতিদিসতি.

এৰম্পীতি ‘‘এতেসু পনা’’তিআদিনা সঙ্খেপতো ৰুত্তপ্পকারেপীতি অত্থো. তেনাহ ‘‘এতেসু পন…পে… ৰুত্তনযেনপী’’তি. যো যো পচ্চযোতি যো যো হেতুআদিপচ্চযো মূলভাৰেন ঠিতো পরেসং পচ্চযানং. তপ্পচ্চযধম্মানন্তি তেহি হেতুআদিপচ্চযেহি পচ্চযভূতানং হেতুআদিধম্মানং. নিরৰসেসঊনঊনতরঊনতমলাভক্কমেনাতি তে ধম্মা যেসু ৰিস্সজ্জনেসু যথারহং নিরৰসেসা লব্ভন্তি, যেসু ঊনা ঊনতরা ঊনতমা চ লব্ভন্তি, তেন কমেন ঘটনাৰচনতো পচ্চযুপ্পন্নাপি যথাক্কমং নিরৰসেসাদিক্কমেনেৰ লব্ভন্তি. তেনাহ ‘‘নিরৰসেসলাভে চ…পে… ৰেদিতব্বো’’তি.

হেতুমূলকং নিট্ঠিতং.

৪৪৫. পঞ্চমে একন্তি সনিস্সযতো অব্যাকতমূলং অকুসলন্তি ইদং সন্ধাযাহ ‘‘ৰত্থুৰসেন সনিস্সযং ৰক্খতী’’তি. ন ইদন্তি ইদং চতুত্থং ঘটনং লব্ভমানস্সপি ৰত্থুস্স ৰসেন ঘটনং ন হোতি তস্স ৰক্খমানত্তা, তস্মা ‘‘আরম্মণৰসেনেৰা’’তি একংসো গহিতোতি অত্থযোজনা.

৪৪৬. সহজাতপুরেজাতা একো নিস্সযপচ্চযোতি ইমিনা সতিপি পচ্চযধম্মভেদে পচ্চযভাৰভেদো নত্থীতি দস্সেতি, তথা ‘‘অত্থিপচ্চযো’’তি ইমিনাপি. অৰিগতপচ্চযোপেত্থ অত্থিপচ্চযেনেৰ সঙ্গহিতোতি দট্ঠব্বো. ‘‘অত্থিঅৰিগতপচ্চযো’’তি পাঠো. সহজাতারম্মণাধিপতি পন ন কেৰলং পচ্চযধম্মপ্পভেদোৰ, অথ খো পচ্চযভাৰভেদোপি অত্থেৰাতি আহ ‘‘এৰং…পে… অভাৰতো’’তি. ৰুত্তমেৰত্থং পাকটতরং কাতুং ‘‘নিস্সযভাৰো হী’’তিআদি ৰুত্তং. তত্থ সহজাতপুরেজাতনিস্সযাদীনন্তি সহজাতনিস্সযপুরেজাতনিস্সযাদীনং. আদি-সদ্দেন সহজাতপুরেজাতঅত্থিঅৰিগতভাৰে সঙ্গণ্হাতি. ন পনেৰন্তিআদিনা ৰুত্তমেৰত্থং ৰিৰরন্তো ‘‘সহজাতো হী’’তিআদিমাহ. ভিন্নসভাৰাতি সমানেপি অধিপতিসদ্দৰচনীযভাৰে পচ্চযভাৰৰিসিট্ঠেন সভাৰেন ভিন্নসভাৰা, ন হেতুপচ্চযাদযো ৰিয সভাৰমত্তেন. তেনেৰাতি ভিন্নসভাৰত্তা এৰ. অঞ্ঞথা ‘‘কুসলো কুসলস্স সহজাতৰসেন, অব্যাকতো আরম্মণৰসেন অধিপতিপচ্চযেন পচ্চযো হোতী’’তি তদুভযং একজ্ঝং কত্ৰা ৰত্তব্বং সিযা, ন চ ৰুত্তন্তি দস্সেন্তো আহ ‘‘পঞ্হাৰারৰিভঙ্গে…পে… ন ৰুত্ত’’ন্তি.

৪৪৭-৪৫২. সাধারণৰসেনাতি অধিপতিন্দ্রিযভাৰসামঞ্ঞেন. তথা চেৰ ছ ঘটনানি যোজেত্ৰা দস্সেতি ‘‘অধিপতী’’তিআদিনা. দ্ৰে পচ্চযধম্মাতি ৰীরিযৰীমংসানং ৰসেন দ্ৰে পচ্চযধম্মা, একোযেৰ চিত্তাধিপতিৰসেন. সমগ্গকানি পুব্বে ৰত্তব্বানি সিযুং অধিপতিপটিপাটিযাতি অধিপ্পাযো. পঠমঞ্হি ৰীরিযাধিপতি পচ্ছা চিত্তাধিপতীতি. তেসং আহারমগ্গপচ্চযানং পচ্ছা ৰুত্তানি সমগ্গকানি. সদিসত্তাতি ইদং পরতো ‘‘হেতুৰসেন ৰুত্তঘটনেহি সদিসত্তা’’তিআদিৰচনং সন্ধায ৰুত্তং.

৪৫৭-৪৬০. দুমূলকন্তি কুসলাব্যাকতমূলকং. তং কুসলমূলকেসু কস্মা ৰুত্তন্তি চোদনাযং আহ ‘‘অব্যাকতসহিতস্স কুসলস্স পচ্চযভাৰদস্সনৰসেনা’’তি. এত্থাতি অনুলোমগণনে. যথাৰুত্তেসূতি ‘‘সহজাতঅঞ্ঞমঞ্ঞনিস্সযৰিপাকসম্পযুত্তৰিপ্পযুত্তঅত্থিঅৰিগতমূলকেসূ’’তি এৰং ৰুত্তেসু সহজাতাদিমূলকেসু. অত্থিঅৰিগতমূলকৰজ্জেসূতি অত্থিঅৰিগতমূলকানি ঠপেত্ৰা অৰসেসেসু আহারেন আহারপচ্চযেন ঘটনানি ন যোজিতানীতি সম্বন্ধো. অধিপতিন্দ্রিযেহি চ নিস্সযাদিৰজ্জেসু সহজাতাদীসু ঘটনানি ন যোজিতানীতি যোজনা. তেসূতি হেতুকম্মঝানমগ্গেসু আহারে অধিপতিন্দ্রিযেসু চ তংতংঘটনৰসেন যথাৰুত্তেসু যোজিযমানেসু. তেনাতি হেতুআদিঅরূপধম্মানংযেৰ লব্ভনতো. তেহি ঘটনানীতি হেতুআদীহি যোজিযমানানি ঘটনানি. রূপমিস্সকত্তাভাৰেনাতি ইদং ৰুত্তসদিসতায কারণৰচনং. কস্মা পনেত্থ অত্থিঅৰিগতমূলকানি নিস্সযৰিপ্পযুত্তঅত্থিঅৰিগতানি তেহি ৰজ্জিতানীতি আহ ‘‘অত্থিঅৰিগতেহি পনা’’তিআদি. নিস্সযাদীহি যোজিযমানানি অধিপতিন্দ্রিযানি রূপমিস্সকানি হোন্তীতি ন ৰুত্তানীতি সম্বন্ধো. যদি এৰং কস্মা অত্থিঅৰিগতমূলকেসু আহারেন, নিস্সযাদিমূলকেসু চ অধিপতিন্দ্রিযেহি যোজনা কতাতি চোদনং সন্ধাযাহ ‘‘অধিপতাহারিন্দ্রিযমূলকেসূ’’তিআদি.

৪৭৩-৪৭৭. এদিসেসু ঠানেসু খন্ধ-সদ্দো অরূপেস্ৰেৰ নিরুল়্হোতি কত্ৰা ৰুত্তং ‘‘ন পৰত্তে ৰিয খন্ধাযেৰ পচ্চযুপ্পন্নভাৰেন গহেতব্বা’’তি. কটত্তারূপম্পি পন লব্ভতীতি ইমিনা ‘‘একক্খণিককম্মৰসেন ৰুত্তানী’’তি ৰচনং পটিক্খিপতি. যমত্থং সন্ধায ‘‘কস্মা ন ৰুত্ত’’ন্তি ৰুত্তং, তং পাকটতরং করোন্তো ‘‘ননূ’’তিআদিং ৰত্ৰা পুন তং উদাহরণেন ৰিভাৰেতুং ‘‘যথাচা’’তিআদি ৰুত্তং. আরম্মণনিস্সযপচ্চযভাৰেনাতি আরম্মণপচ্চযভাৰেন নিস্সযপচ্চযভাৰেন চ. কম্মস্স চ পচ্চযভাৰো পাকটোযেৰাতি আহ ‘‘কম্মম্পি আরম্মণপচ্চযভাৰেন ৰত্তব্ব’’ন্তি. দ্ৰিন্নং পচ্চযভাৰানন্তি কম্মারম্মণপচ্চযভাৰানং. অঞ্ঞমঞ্ঞপটিক্খেপতোতি ইমিনা দ্ৰিন্নং পচ্চযভাৰানং ভিন্নত্তা পৰত্তিআকারস্স একক্খণে একস্মিং পচ্চযধম্মে অযুজ্জমানতং দস্সেতি. যথাদস্সিতস্স নিদস্সিতব্বেন অসমানতং দস্সেন্তো ‘‘পচ্চুপ্পন্নঞ্হি…পে… যুত্তং ৰত্তু’’ন্তি আহ. কম্মং পনাতিআদিনা কম্মারম্মণপচ্চযানং পৰত্তিআকারস্স ভিন্নত্তা একজ্ঝং হুত্ৰা অপ্পৰত্তিমেৰ ৰিভাৰেতি. যতো তে অঞ্ঞমঞ্ঞং পটিক্খেপকা ৰুত্তা, কস্মা পন তংযেৰ ৰত্থু আরম্মণপচ্চযো হোতি নিস্সযপচ্চযো চ, ন তংযেৰ কম্মং আরম্মণপচ্চযো চ কম্মপচ্চযো চাতি? ন চোদেতব্বমেতং, ধম্মসভাৰো এসোতি দস্সেন্তো ‘‘এস চ সভাৰো’’তিআদিমাহ. তত্থ ৰত্তমানানন্তি পচ্চুপ্পন্নানং. যন্তি ইদং ‘‘ৰত্তব্বতা’’তি ইমিনা সম্বন্ধিযমানং ‘‘যা’’তি ইত্থিলিঙ্গৰসেন ৰিপরিণামেতব্বং. যথাতিআদিনা তমেৰত্থং উদাহরণদস্সনেন ৰিভাৰেতি.

৪৭৮-৪৮৩. যং ৰিঞ্ঞাণং অধিপতিপচ্চযো ন হোতি, তং অনামট্ঠাধিপতিভাৰং দট্ঠব্বং. ৰত্থুস্স ৰসেনাতি হাপেতব্বস্স ৰত্থুস্স ৰসেন.

৪৮৪-৪৯৫. অরূপিন্দ্রিযানি রূপানং পচ্চযত্তেন লব্ভন্তীতি যোজনা. যদিপি এৰং ৰুত্তং রূপিন্দ্রিযানং অরূপানং পচ্চযত্তঞ্চ লব্ভতীতি আহ ‘‘চক্খাদীনি চ পন চক্খুৰিঞ্ঞাণাদীনং লব্ভন্তী’’তি. তংসমানগতিকাতি ৰীরিযেন সমানগতিকা মগ্গপচ্চযতায.

৫১১-৫১৪. ৰিপ্পযুত্তমূলকে ‘‘দসমে কুসলাদযো চিত্তসমুট্ঠানান’’ন্তি ইদং পৰত্তিৰসেন অট্ঠকথাযং ৰুত্তন্তি আহ ‘‘পটিসন্ধিযং পন ‘খন্ধা কটত্তারূপানং ৰত্থু চ খন্ধান’ন্তি ইদম্পি লব্ভতী’’তি. তস্স দস্সনৰসেনাতি তস্স ৰত্থুস্স দস্সনৰসেন, ন অনৰসেসতো পচ্চযধম্মস্স দস্সনৰসেন. তেনাহ ‘‘খন্ধা চ ৰত্থুস্সাতি ইদম্পি পন লব্ভতেৰা’’তি. ন ৰজ্জেতব্বানীতি তেসম্পি পচ্চযুপ্পন্নভাৰেন যোজেতব্বত্তা.

৫১৫-৫১৮. অরূপৰত্থারম্মণমহাভূতইন্দ্রিযাহারানং পচ্চযধম্মানন্তি অত্থো. ‘‘আহারিন্দ্রিযপচ্চযা চা’’তিপি পন ৰত্তব্বং. কস্মা? ন হি ইন্দ্রিযাহারানং ৰসেন সহজাতাদযো লব্ভন্তি, ইন্দ্রিযাহারানং পন ৰসেন ইন্দ্রিযাহারপচ্চযাৰ লব্ভন্তি. ‘‘সহজাতং পুরেজাতং পচ্ছাজাতং আহারং ইন্দ্রিয’’ন্তি হি উদ্দিসিত্ৰা অত্থিপচ্চযো ৰিভত্তোতি. কেচি পনেত্থ ‘‘আহারগ্গহণেন কবল়ীকারো আহারোৰ গহিতো, ইন্দ্রিযগ্গহণেন চ রূপজীৰিতিন্দ্রিযমেৰ, সেসাহারিন্দ্রিযানি সহজাতাদীস্ৰেৰ অন্তোগধানি কতানি. যানি তদন্তোগধানি, তে সন্ধায অট্ঠকথাযং ‘অরূপৰত্থারম্মণমহাভূতইন্দ্রিযাহারানং ৰসেনা’তি এত্থ ইন্দ্রিযাহারগ্গহণং কতন্তি ‘সহজাতপুরেজাতপচ্ছাজাতপচ্চযা লব্ভন্তী’তি ৰুত্ত’’ন্তি ৰদন্তি.

তত্থ অরূপানং সহজাতপচ্ছাজাতাহারিন্দ্রিযপচ্চযভাৰো যথারহং ৰেদিতব্বো. ৰত্থু সহজাতং পুরেজাতঞ্চ, আরম্মণং পুরেজাতমেৰ, অভিঞ্ঞাঞাণস্স পন কদাচি সহজাতম্পি আরম্মণপচ্চযো হোতিযেৰ. সহজাতগ্গহণেন পনেত্থ সহজাতপচ্চযভূতোৰ গয্হতি, সো চ একুপ্পাদাদিলক্খণযুত্তোৰাতি যো ধম্মো সহজাতো হুত্ৰা আরম্মণং হোতি, ন সো ইধ অধিপ্পেতো. যদি সহজাতোপি আরম্মণং হোতি, কস্মা পাল়িযং তথা ন ৰিভত্তন্তি? এককলাপপরিযাপন্নস্স একুপ্পাদাদিলক্খণযুত্তস্স ভিন্নকলাপপরিযাপন্নতো সঙ্করমোচনত্থং. অপিচ অপ্পচুরভাৰতো অপাকটভাৰতো চ তং ন গহিতং. ততোতি নৰমতোতি অত্থো, ন দসমতোতি অধিপ্পাযো. ন হি একাদসমে অধিপতি অত্থীতি. তথা চুদ্দসমেতি এত্থ তথা-সদ্দেন ৰত্থুগ্গহণেন চক্খাদিৰত্থূনিপি গহিতানীতি ইমমত্থং উপসংহরতি. তদেৰাতি আরম্মণমেৰ.

৫১৯. সহজাতানি ৰিযাতি সহজাতপচ্চযসহিতানি ৰিয ঘটনানি. সহজাতেনাতি সহজাতপচ্চযেন. তানীতি ‘‘পকিণ্ণকঘটনানী’’তি ৰুত্তঘটনানি. যানি হি সহজাতপচ্চযেন ন যোজিতানি, তানেত্থ পকিণ্ণকঘটনানীতি ৰুত্তানি. পুরেজাত…পে… ৰসেনাতি এত্থ অযং যোজনা – পুরেজাতস্স পচ্ছাজাতস্স আহারস্স ইন্দ্রিযস্স চ সহজাতেন অঞ্ঞমঞ্ঞঞ্চ সামঞ্ঞৰসেন, তেসংযেৰ সহজাতেন অঞ্ঞমঞ্ঞঞ্চ অসামঞ্ঞৰসেন চাতি ৰুত্তং হোতি. যথা পুরেজাতস্স পচ্ছাজাতস্স চ সহজাতেন অসামঞ্ঞং ভিন্নসভাৰত্তা, ততো এৰ আহারিন্দ্রিযানম্পি তেন অসামঞ্ঞং, এৰং পুরেজাতাদীনং চতুন্নম্পি অঞ্ঞমঞ্ঞং অসামঞ্ঞং ভিন্নসভাৰত্তা. এৰং অসামঞ্ঞৰসেন অসমানতাৰসেন যথাৰুত্তানি ঘটনানি ৰিপ্পকিণ্ণানি. যথা পন সহজাতপচ্চযধম্মা অরূপক্খন্ধাদযো তেনেৰ সহজাতপচ্চযতাসঙ্খাতেন মিথূনং সমানভাৰেন অঞ্ঞেহি অসংকিণ্ণা অত্তনো পচ্চযুপ্পন্নানং পচ্চযো হোন্তীতি অসামঞ্ঞৰসেন তেসং পৰত্তি, এৰং পুরেজাতাদিপচ্চযধম্মাপীতি তেসং সহজাতেন অঞ্ঞমঞ্ঞঞ্চ যথাৰুত্তস্স সামঞ্ঞস্স অসামঞ্ঞস্স চ ৰসেন তানি ঘটনানি ৰিপ্পকিণ্ণানীতি পকিণ্ণকানি ৰুত্তানি. এৰং সন্তে সহজাতানম্পি ঘটনানং পকিণ্ণকভাৰো আপজ্জতীতি? নাপজ্জতি, তেসং সহজাততায এৰ অৰিপ্পকিণ্ণভাৰসিদ্ধিতো. তেন ৰুত্তং ‘‘সহজাতং অগ্গহেত্ৰা ৰুত্তানি পকিণ্ণকানি নামা’’তি.

তানীতি পকিণ্ণকঘটনানি. কুসলৰিপাকাতি কুসলা চ ৰিপাকা চ, যে অভিন্নলক্খণা হুত্ৰা কুসলসভাৰা ৰিপাকসভাৰা চাতি অত্থো. এৰংসভাৰঞ্চ একং অঞ্ঞিন্দ্রিযমেৰাতি আহ ‘‘ইদং…পে… লব্ভতী’’তি. ননু চ সদ্ধিন্দ্রিযাদিৰসেনপি অযমত্থো লব্ভতীতি? তেসং কিরিযসভাৰতাপি অত্থেৰাতি. দুক্খন্তি চেতসিকদুক্খং. তেনাহ ‘‘অকুসলমেৰা’’তি. ৰিপাকস্স দুক্খস্সাতি যোজনা. তেন ৰুত্তং ‘‘অঝানঙ্গত্তা’’তি. অকুসলৰিপাককিরিযাতি ৰিচিকিচ্ছাচিত্তপঞ্চৰিঞ্ঞাণকিরিযামনোধাতূসু পৰত্তনতো অকুসলৰিপাককিরিযাৰ হোতি চিত্তট্ঠিতীতি অত্থো. যস্মা অকুসলৰিপাকাতি এৰমত্থে গয্হমানে দুক্খস্স চিত্তট্ঠিতিযা চ ৰসেন যথা ঝানেসু, এৰং অঞ্ঞেসং ৰসেন অঞ্ঞেসু চ ন লব্ভতি, তস্মা অকুসলস্স ৰিপাকাতি এৰমত্থে গয্হমানে দুক্খিন্দ্রিযস্স ৰসেন ইন্দ্রিযেসু লব্ভতীতি দস্সেন্তো আহ ‘‘অকুসলস্স…পে… লব্ভেয্যা’’তি. ইমস্মিং কুসলত্তিকে ৰিপাকো ৰিপাকাব্যাকতমিচ্চেৰ গয্হতি, ন অকুসলাদিপদেহি ৰিসেসেত্ৰাতি ইমমত্থং দস্সেন্তো ‘‘কুসলৰিপাকা…পে… নত্থী’’তি আহ.

পঞ্হাৰারস্স ঘটনে অনুলোমগণনা নিট্ঠিতা.

পচ্চনীযুদ্ধারৰণ্ণনা

৫২৭. নহেতুপচ্চযেনাতি এত্থ ন-কারো অঞ্ঞত্থোতি দস্সেন্তো ‘‘হেতুপচ্চযতো অঞ্ঞেন পচ্চযেনা’’তি আহ. অগ্গহিতগ্গহণেনাহি সহজাতাদিসঙ্গহৰসেন অগ্গহিতানং গহণেন. অট্ঠ হোন্তীতি ইমিস্সা পাল়িযা আগতা আরম্মণাদযো অট্ঠ পচ্চযা হোন্তি. তেসূতি অট্ঠসু পচ্চযেসু. তীহীতি আরম্মণসহজাতউপনিস্সযপচ্চযেহি. দ্ৰীহীতি আরম্মণপচ্চযউপনিস্সযপচ্চযেহি. তস্মিং তস্মিং পচ্চযেতি তস্মিং তস্মিং হেতুআদিকে পচ্চযে. ততো হেতুআদিপচ্চযতো. যথাযোগং যোজেতব্বাতি যস্মিং পচ্চযে পচ্চনীযতো ঠিতে যে পচ্চযা অনুলোমতো যোজনং লভন্তি, তে যোজেতব্বাতি অত্থো.

দ্ৰিন্নন্তি অনন্তরূপনিস্সযস্স পকতূপনিস্সযস্সাতি ইমেসং দ্ৰিন্নং. ৰত্থুপুরেজাতস্স ৰসেন পুরেজাতং আরম্মণপুরেজাতস্স আরম্মণেন সঙ্গহিতত্তা. অঞ্ঞিস্সা চেতনাযাতি নানাক্খণিককম্মপচ্চযভাৰেনেৰ পৰত্তায চেতনায. অরূপাহারা অপরিচ্চত্তসহজাতভাৰা এৰ আহারপচ্চযো হোন্তি, রূপাহারো ঠিতিপ্পত্তোযেৰাতি ৰুত্তং ‘‘সহজাততো অঞ্ঞস্স কবল়ীকারাহারস্স ৰসেন আহারো’’তি. সহজাততো অঞ্ঞস্সাতি চ ইদং অরূপাহারনিৰত্তনত্থং ৰুত্তং, ন কবল়ীকারাহারৰিসেসনিৰত্তনত্থং তাদিসস্সেৰ তস্স অভাৰতো. ন হি রূপাহারো সহজাতপচ্চযো হোতি, নাপি পুরেজাতপচ্চযো হোতি. যথা সহজাতানং সহজাতপচ্চযো ন হোতি, এৰং পুরেজাতানং পচ্ছাজাতপচ্চযো ন হোতি, পচ্ছাজাতানঞ্চ পুরেজাতপচ্চযো ন হোতি. কস্মা? তাদিসস্স পচ্চযলক্খণস্স অভাৰতো. যেসঞ্হি যো জনকো, ন তেহি তস্স সহজাততা অত্থি, নাপি পুরেজাততা পুরেজাতপচ্চযলক্খণযুত্তা, পচ্ছাজাতপচ্চযতায পন ৰত্তব্বমেৰ নত্থি রূপধম্মত্তা. উপত্থম্ভকত্তেপি এসেৰ নযো, তস্মা সহজাতাদিৰিধুরো এৰ তস্স পচ্চযভাৰো ৰেদিতব্বো. তেনেৰ হি ‘‘সহজাতং পুরেজাতং পচ্ছাজাতং আহারং ইন্দ্রিয’’ন্তি এত্থ রূপজীৰিতিন্দ্রিযং ৰিয রূপাহারো ৰিসুং গহিতো. তথা চাহ ‘‘রূপাহারো…পে… আহারপচ্চযোৰ হোতী’’তি. সহজাততো পুরেজাততো চ অঞ্ঞস্স রূপজীৰিতিন্দ্রিযস্সাতি এত্থ রূপাহারে ৰুত্তনযেনেৰ অত্থো ৰেদিতব্বো.

এৰঞ্চ কত্ৰাতি পুরিমপুরিমেহি অসঙ্গহিতসঙ্গণ্হনৰসেন পচ্ছিমপচ্ছিমানং গহিতত্তা তথা রূপাহারস্স জীৰিতিন্দ্রিযস্স চ ৰসেন ইধ আহারিন্দ্রিযপচ্চযানং গহিতত্তাতি অত্থো, অঞ্ঞথা ‘‘আহারপচ্চযেন পচ্চযো, ইন্দ্রিযপচ্চযেন পচ্চযো’’তি ৰত্তব্বং সিযাতি অধিপ্পাযো. তেনেৰাহ ‘‘আরম্মণ…পে… ইচ্চেৰ ৰুত্ত’’ন্তি. তদঞ্ঞাভাৰাতি ততো আরম্মণাদিপচ্চযতো অঞ্ঞস্স ইধাধিপ্পেতকম্মাদিপচ্চযস্স কুসলে অভাৰা. তস্মাতি যস্মা আরম্মণতো অঞ্ঞেসং দ্ৰিন্নং ৰসেন উপনিস্সযো ৰুত্তো, তস্মা ‘‘আরম্মণাধিপতি আরম্মণপচ্চযে সঙ্গহং গচ্ছতী’’তি ৰত্তব্বং, ন আরম্মণূপনিস্সযেতি অধিপ্পাযো. যদি এৰং কস্মা পরিত্তত্তিকপঞ্হাৰারপচ্চনীযে আরম্মণং ন ৰুত্তং. উপনিস্সযেন হি অসঙ্গহিতত্তে তং ৰত্তব্বমেৰ সিযাতি চোদনং সন্ধাযাহ ‘‘যং পনা’’তিআদি. তত্থ পুরিমেহি অসঙ্গহিতৰসেন ৰুত্তানন্তি পুরিমেহি পচ্চযেহি অসঙ্গহিতৰসেন ৰুত্তানং পচ্ছিমানং পচ্চযানং. সঙ্গহিতৰিৰজ্জনাভাৰতোতি অত্তনা সমানলক্খণতায সঙ্গহিতস্স পচ্চযস্স ৰিৰজ্জনাভাৰতো, ৰিৰজ্জনে কারণং নত্থীতি অত্থো. উপনিস্সযতো অঞ্ঞারম্মণাভাৰতোতি অপ্পমাণো ধম্মো অপ্পমাণস্স ধম্মস্স আরম্মণং হোন্তো আরম্মণূপনিস্সযোৰ হোতি আরম্মণাধিপতিভাৰতোতি অত্থো. যথা আরম্মণে গহিতে আরম্মণূপনিস্সযো গহিতোৰ হোতি বলৰারম্মণভাৰতো, এৰং আরম্মণূপনিস্সযে গহিতে আরম্মণং গহিতমেৰ হোতি তংসভাৰত্তাতি তত্থ তং ৰিসুং ন উদ্ধটন্তি দট্ঠব্বং. তেনাহ ‘‘ন পন আরম্মণূপনিস্সযস্স আরম্মণে অসঙ্গহিতত্তা’’তি.

পচ্ছাজাতআহারানন্তি অত্তনো পচ্চযুপ্পন্নতো পুরেজাতকাযতো পচ্ছাজাতানং অরূপাহারানং. তে হি অত্তনা সহজাতঅরূপধম্মানং তংসমুট্ঠানরূপধম্মানম্পি সহজাতঅত্থিপচ্চযা হোন্তি, পুরেজাতানং পন ৰত্থূনং পচ্ছাজাতঅত্থিপচ্চযো. পচ্ছাজাতিন্দ্রিযানন্তি পচ্ছাজাতানং অরূপিন্দ্রিযানং. সেসং আহারে ৰুত্তনযেন যোজেতব্বং. যস্মা এতে আহারিন্দ্রিযা যস্মিং খণে পুরেজাতঅত্থিপচ্চযং লভন্তি, তস্মিংযেৰ খণে তংতংপচ্চযুপ্পন্নানং সহজাতঅত্থিপচ্চযো পচ্ছাজাতঅত্থিপচ্চযো চ হোন্তি, তস্মা ৰুত্তং ‘‘সহাপি অত্থিঅৰিগতপচ্চযভাৰো হোতী’’তি. তিণ্ণন্তি সহজাতাদীনং তিণ্ণং. ছহি ভেদেহীতি ৰিসুং গহিতেহি সহজাতাদীহি পঞ্চহি যথারহং একজ্ঝং গহিতভেদেন চাতি ছহি অত্থিপচ্চযভেদেহি. একেকং সঙ্গহেত্ৰাতি অত্থিপচ্চযলক্খণং অৰিগতপচ্চযলক্খণঞ্চ ৰিসুং ৰিসুং ছহি ভেদেহি সঙ্গহেত্ৰা ৰুত্তং.

অজ্ঝত্তিকবাহিরভেদতোতি ৰত্তব্বং চক্খাদীনং জীৰিতিন্দ্রিযস্স চ অধিপ্পেতত্তা, সপরসন্তানিকানঞ্চ ইন্দ্রিযানং অনধিপ্পেতত্তা. নিস্সযপুরেজাতৰিপ্পযুত্তঅত্থিঅৰিগতানং পুরেজাতভূতানন্তি অধিপ্পাযো. তেসঞ্হি পুরেজাতে সঙ্গহো. তদেকদেসস্সাতি আরম্মণেকদেসস্স, আরম্মণাধিপতিআরম্মণূপনিস্সযানন্তি অত্থো. তেসন্তি নিস্সযাদীনং. উপনিস্সযাদীসূতি উপনিস্সযপুরেজাতপচ্চযাদীসু. তং পন পুরেজাতভূতং আরম্মণং. তত্থাতি উপনিস্সযপচ্চযসঙ্গহে. যথাৰুত্তনযো চেত্থ একন্তেন গহেতব্বোতি দস্সেতুং ‘‘অথ পনা’’তিআদি ৰুত্তং.

এৰ-সদ্দো আনেত্ৰা যোজেতব্বো, অঞ্ঞথা তেসু পঞ্হেসু একসভাৰতোৰ পচ্চযস্স আগমনং ৰুত্তং সিযা. তেনাতি ‘‘একোৰা’’তি অৰধারণেন অগ্গহিতেন. তেসূতি সহজাতপুরেজাতপচ্চযেসু. উক্কট্ঠৰসেনাতি ‘‘একো দ্ৰে’’তিআদিনা ৰুত্তউক্কংসৰসেন. তে তে পচ্চযে সঙ্গহেত্ৰাতি তে হেতুআদিপচ্চযে সহজাতাদিপচ্চযেহি সঙ্গহেত্ৰা. দস্সিতপচ্চযপরিচ্ছেদোতি সোল়সাদিভেদেন সঙ্গহেত্ৰা দস্সিতপচ্চযপরিচ্ছেদো.

পভেদপরিহানীসূতি সহজাতপচ্চযাদীহি সঙ্গহিতপচ্চযপ্পভেদে তংতংপচ্চযপটিক্খেপে পঞ্হাপরিহানিযঞ্চাতি অত্থো. নহেতুপচ্চযাতি ইমিনা হেতুপচ্চযতো অঞ্ঞে পচ্চযা গহিতাতি কত্ৰা ৰুত্তং ‘‘নহেতুপচ্চযাতি এত্থ লব্ভমানপচ্চযে সন্ধায ৰুত্ত’’ন্তি. এৰঞ্চ কত্ৰাতি সব্বপচ্চনীযসাধারণলক্খণৰসেন ৰুত্তত্তা এৰ ন ৰত্তব্বং সিযা, ন হি হেতুপচ্চযে পচ্চনীযতো ঠিতে হেতুধম্মো হেতুস্স ধম্মস্স সহজাতপচ্চযেন পচ্চযোতি সক্কা ৰত্তুং. ৰীসতি পচ্চযাতি হেতুপচ্চযেন সদ্ধিং ৰীসতি পচ্চযা. পরিহানীযং ৰিত্থারকথং দস্সেন্তোতি যোজনা.

৫২৮. তেহি তেহি পচ্চযেহীতি সহজাতপচ্চযাদীহি তেহি তেহি সঙ্গাহকভূতেহি পচ্চযেহি. তে তে পচ্চযাতি সঙ্গহেতব্বা অঞ্ঞমঞ্ঞপচ্চযাদযো হেতুপচ্চযাদযো ৰা তে তে পচ্চযা. অঞ্ঞেসং অভাৰং সন্ধায ৰুত্তং, ন তেসং সব্বেসং সম্ভৰন্তি অধিপ্পাযো. তেনাহ ‘‘ন হী’’তিআদি. তত্থ দ্ৰেযেৰাতি আরম্মণাধিপতিং অপনেত্ৰা আহ. অব্যাকতস্সপীতি পি-সদ্দেন ন কেৰলং কুসলস্সেৰ, অথ খো অব্যাকতস্সপীতি কুসলং সম্পিণ্ডেতি.

৫৩০. তেন সদ্ধিন্তি ৰত্থুনা সদ্ধিং. সুদ্ধানন্তি কেৰলানং ৰত্থুনা ৰিনা চ গহিতানং কুসলক্খন্ধানং. যদিপি ৰত্থুনা সদ্ধিং সহজাতট্ঠো নত্থি, নিস্সযাদিভাৰো পন অত্থেৰাতি দস্সেন্তো ‘‘ৰত্থুনা পনা’’তিআদিমাহ.

সহজাতপুরেজাতপচ্ছাজাতআহারিন্দ্রিযানং অত্থিপচ্চযেন সঙ্গহেতব্বত্তা সহজাতাদীহি সঙ্গহেতব্বানং তংসঙ্গহো সুকরোতি দস্সেতুং উপনিস্সযেন সঙ্গহেতব্বানং সঙ্গহো ৰুত্তনযো এৰাতি ৰুত্তং ‘‘চতূসু সব্বপচ্চযে সঙ্গণ্হিত্ৰা’’তি. কম্মং পন সহজাতূপনিস্সযেহি অসঙ্গহেতব্বতাপি অত্থীতি সরূপতো গহিতং, অঞ্ঞথা ‘‘তীসু পচ্চযেসূ’’তি ৰত্তব্বং সিযা. মিস্সকামিস্সকস্সাতি সহজাতপুরেজাতাদিভাৰেহি মিস্সকস্স তথা অমিস্সকস্স চ. ৰুত্তমেৰত্থং ৰিত্থারতো দস্সেতুং ‘‘ন হী’’তিআদি ৰুত্তং. তেনাতি অত্থিপচ্চযৰিভাগসঙ্গাহকানং সহজাতাদীনং গহণেন. সব্বপচ্চযানং…পে… হোতীতি ইমিনা ‘‘ইমস্মিং পন পচ্চযুদ্ধারে’’তিআদিনা ৰুত্তোপি পচ্চযসঙ্গহো ইধ অত্থতো দস্সিতোযেৰাতি ইমমত্থং দস্সেতি.

নিস্সযো কস্মা ন ৰুত্তো? সহজাতনিস্সযো পুরেজাতনিস্সযোতি হি সক্কা ৰিভজিতুন্তি অধিপ্পাযো. ৰিপ্পযুত্তো ৰা কস্মা ন ৰুত্তো? পুরেজাতৰিপ্পযুত্তো পচ্ছাজাতৰিপ্পযুত্তোতি ৰিভজিতুং সক্কাতি অত্থো. যং মিস্সকামিস্সকভাৰং মনসি কত্ৰা ‘‘অৰত্তব্বত্তা’’তি ৰুত্তং, তং দস্সেন্তো ‘‘নিস্সযো তাৰা’’তিআদিমাহ. ৰিসেসিতব্বো ‘‘ৰিপ্পযুত্তপচ্চযেন পচ্চযো’’তি অৰিসেসেন পাল়িযং ৰুত্তত্তা. সো ৰিযাতি অত্থিপচ্চযো ৰিয, নিস্সযপচ্চযো ৰিয ৰা অত্থিপচ্চযৰিসেসাভাৰেন ৰিপ্পযুত্তপচ্চযো ন ৰত্তব্বোৰ. দ্ৰিন্নং পচ্চযানং ৰিয পভেদসব্ভাৰতোতি দস্সেন্তো ‘‘সহজাতপুরেজাতানঞ্চা’’তিআদিমাহ. তথাতিআদিনা ৰুত্তমত্থং পাল়িযা সমত্থেতুং ‘‘ৰক্খতী’’তিআদি ৰুত্তং. তত্থ মগ্গফলধম্মানং মগ্গফলতংসমুট্ঠানরূপৰসেন সহজাতঅত্থিপচ্চযো তেসংযেৰ পুরেজাতচতুসন্ততিরূপৰসেন পচ্ছাজাতঅত্থিপচ্চযো ৰুত্তো, ন পন ৰিপ্পযুত্তপচ্চযভাৰো ৰক্খতীতি যোজনা. সোতি ৰিপ্পযুত্তপচ্চযো.

হেতুআদীনং সহজাতন্তোগধত্তা হেতুআদযো তব্বিসেসা হোন্তীতি কত্ৰা ৰুত্তং ‘‘সহজাতপচ্চযো চ হেতুআদীহি ৰিসেসেতব্বো’’তি. সোতি সহজাতপচ্চযো. ৰিরুদ্ধপচ্চযেহীতি সহজাতপুরেজাতস্স সহজাতাদিভাৰেন ৰিরুদ্ধেহি পচ্চযেহি. তেনাহ ‘‘উপ্পত্তিকালৰিরুদ্ধেহি পচ্চযেহী’’তি.

পচ্চনীযুদ্ধারৰণ্ণনা নিট্ঠিতা.

পচ্চনীযগণনৰণ্ণনা

নহেতুমূলকৰণ্ণনা

৫৩২. অধিপতিপচ্চযাদিভূতো আরম্মণপচ্চযোতি আরম্মণআরম্মণাধিপতিআরম্মণূপনিস্সযে ৰদতি. তে চ যস্মা আরম্মণসভাৰা এৰ, তস্মা ৰুত্তং ‘‘পরিহাযতিযেৰা’’তি. পন্নরসসূতি দুতিযে সহজাতপচ্চযে ‘‘হেতুপচ্চযো’’তিআদিনা ৰুত্তেসু পন্নরসসু. একাদসন্নং ৰসেনাতি সহজাতপচ্চযো, সহজাততাৰিসিট্ঠা অধিপতিনিস্সযকম্মাহারিন্দ্রিযত্থিঅৰিগতহেতুঝানমগ্গা চাতি ইমেসং একাদসন্নং ৰসেন. সহজাতে অন্তোগধা হেতুআদযো. তস্মিং পটিক্খিত্তেতি তস্মিং সহজাতে পটিক্খিত্তে পচ্চনীযতো ঠিতে. অনন্তোগধা সহজাতে, কে পন তেতি আহ ‘‘আরম্মণাধিপতিপুরেজাতনিস্সযাদযো’’তি. আরম্মণাদিআকারেনাতি আরম্মণপুরেজাতনিস্সযনানাক্খণিককম্মাদিআকারেন.

তস্মিং পটিক্খিত্তেতি তস্মিং সহজাতপচ্চযে পটিক্খিত্তে. ইমে ৰারাতি সহজাতং পুরেজাতন্তি ৰিস্সজ্জিতৰারা. এতে নিস্সযাদযোতি সহজাততাৰিসিট্ঠে নিস্সযাদিকে ৰদতি, ন ইতরে. তেনাহ ‘‘যস্মা চ…পে… পটিক্খেপেন পটিক্খিত্তা’’তি.

নিস্সযাদিভূতঞ্চ সহজাতপচ্চযং ঠপেত্ৰাতি এতেন ‘‘ঠপেত্ৰা সহজাতপচ্চয’’ন্তি এত্থ অন্তোগধনিস্সযাদিভাৰোযেৰ সহজাতপচ্চযো গহিতোতি দস্সেতি. নিস্সযাদীতি আদি-সদ্দেন হেতুআদীনং সঙ্গহো দট্ঠব্বো. অঞ্ঞমঞ্ঞপচ্চযধম্মৰসেন পৰত্তিসব্ভাৰতোতি অঞ্ঞমঞ্ঞপচ্চযধম্মৰসেন সহজাতাদীহি পৰত্তিসব্ভাৰতো অঞ্ঞমঞ্ঞে পটিক্খিত্তে ‘‘কুসলো কুসলাব্যাকতস্সা’’তি ৰারো পরিহাযতি. তেসং তেসং পচ্চযুপ্পন্নানন্তি ইদং সামঞ্ঞৰচনম্পি ‘‘অঞ্ঞমঞ্ঞপচ্চযসঙ্গহং গতা’’তি ৰচনতো অঞ্ঞমঞ্ঞপচ্চযলাভীনংযেৰ গহণং সিযাতি আসঙ্কং নিৰত্তেতুং ‘‘কুসলো চ কুসলস্সা’’তিআদি ৰুত্তং. সমুদাযভূতোতি চতুক্খন্ধসমুদাযভূতো. একদেসভূতেহীতি তস্সেৰ একদেসভূতেহি. ‘‘কুসলো পনা’’তিআদি ‘‘নঅঞ্ঞমঞ্ঞপচ্চযেন…পে… পরিহাযতী’’তি ইমস্স অট্ঠকথাৰচনস্স সমাধানৰচনং.

রূপক্খন্ধেকদেসোৰ হোন্তি রূপাহাররূপিন্দ্রিযৰসেন, ‘‘একন্তেন ৰিপ্পযুত্তপচ্চযধম্মেহী’’তি ৰুত্তধম্মা ‘‘তে’’তি পচ্চামট্ঠাতি আহ ‘‘তেতি তে ৰিপ্পযুত্তপচ্চযধম্মা’’তি.

৫৩৩. পচ্চনীযগণনং দস্সেতুন্তি ৰুত্তেপি ননু পচ্চযগণনমেৰ দস্সিতং হোতীতি কস্সচি আসঙ্কা সিযাতি তং নিৰত্তেন্তো আহ ‘‘পচ্চনীযৰারগণনা হি দস্সিতা’’তি. বলৰকম্মং ৰিপাকস্স উপনিস্সযো হোতি, ইতরং কম্মপচ্চযো এৰাতি আহ ‘‘ৰিপাকস্সপি পন…পে… কম্মপচ্চযো হোতী’’তি.

নহেতুমূলকৰণ্ণনা নিট্ঠিতা.

৫৩৪. পরিচ্ছিন্নগণনানীতি ইদং ন গণনাপেক্খং, অথ খো ৰিস্সজ্জনাপেক্খন্তি আহ ‘‘পরিচ্ছিন্নগণনানি ৰিস্সজ্জনানী’’তি. পচ্চনীযতো ঠিতোপি হেতু নযানং মূলভাৰেনেৰ ঠিতোতি আহ ‘‘হেতুমূলকে’’তি, অট্ঠকথাযং পন ‘‘নহেতুমূলক’’মিচ্চেৰ ৰুত্তং.

৫৩৮. মূলং সঙ্খিপিত্ৰাতি সত্তমূলকং অট্ঠমূলকং নৰমূলকঞ্চ সঙ্খিপিত্ৰা. দ্ৰীসূতি ‘‘তীণী’’তি ৰুত্তেসু তীসু ৰিস্সজ্জনেসু পুরিমেসু দ্ৰীসু ‘‘কুসলো ধম্মো অব্যাকতস্স, অকুসলো ধম্মো অব্যাকতস্সা’’তি ইমেসু. তেনাহ ‘‘ৰিপাকো পচ্চযুপ্পন্নো হোতী’’তি. ততিযেতি ‘‘অব্যাকতো ধম্মো অব্যাকতস্সা’’তি ইমস্মিং. তেসমুট্ঠানিককাযোতি উতুচিত্তাহারানং ৰসেন তেসমুট্ঠানিককাযো.

৫৪৫. এতং দ্ৰযং সন্ধায ৰুত্তং, যথা অরূপং অরূপস্স, এৰং রূপম্পি রূপস্স ৰিপ্পযুত্তপচ্চযো ন হোতীতি. রূপাব্যাকতো অরূপাব্যাকতস্সাতি ইদং ৰত্থুখন্ধে সন্ধায ৰুত্তং. অরূপাব্যাকতো রূপাব্যাকতস্সাতি ইদং পন চিত্তসমুট্ঠানরূপঞ্চাতি তেসং একন্তিকো ৰিপ্পযুত্তপচ্চযভাৰোতি আহ ‘‘সহজাত…পে… হোতিযেৰা’’তি. সহজাতাহারিন্দ্রিযৰসেনাতি সহজাতঅরূপাহারিন্দ্রিযৰসেন.

৫৪৬. একমূলকেকাৰসানা অনন্তরপকতূপনিস্সযৰসেন লব্ভন্তীতি ইদং যথারহৰসেন ৰুত্তন্তি তং যথারহং পটিক্খেপাপটিক্খেপৰসেনপি দস্সেতব্বন্তি ‘‘অত্থিপচ্চযে পনা’’তিআদি ৰুত্তং. পুরিমেসূতি নারম্মণাদীসু. নৰাতি একমূলকাৰসানা নৰ. দ্ৰেযেৰাতি ‘‘কুসলো ধম্মো অব্যাকতস্স, অকুসলো ধম্মো অব্যাকতস্সা’’তি ইমে দ্ৰেযেৰ.

পচ্চনীযৰণ্ণনা নিট্ঠিতা.

অনুলোমপচ্চনীযৰণ্ণনা

৫৫০. ইমেহেৰাতি ‘‘কুসলো কুসলস্স, অকুসলো অকুসলস্সা’’তি ইমেহি এৰ সমানা হোন্তি কুসলাদিতাসামঞ্ঞেন. তেন ৰুত্তং ‘‘অত্থাভাৰতো পন ন অনুরূপা’’তি. ‘‘কুসলো কুসলস্সা’’তিআদিনা সতিপি উদ্দেসতো সামঞ্ঞে যেভুয্যেন সিযা ৰিভঙ্গে ৰিসেসোতি আহ ‘‘যথাযোগং নিদ্দেসতো চা’’তি.

৫৫১. হেতুনামন্তি হেতু চ তং নামঞ্চাতি হেতুনামং. পচ্চযন্তি তমেৰ পচ্চযভূতং সন্ধাযাতি যোজনা.

৫৫২. দ্ৰিন্নম্পি অধিপতীনন্তি সহজাতারম্মণাধিপতীনং ৰসেন, তং ‘‘কুসলং কুসলস্স সহজাততো চেৰ আরম্মণতো চা’’তিআদিনা অট্ঠকথাযং ৰুত্তনযেনেৰ ৰেদিতব্বং. নারম্মণে সত্তাতি সহজাতাধিপতিস্স ৰসেন ৰুত্তং, ন সহজাতে সত্তাতি আরম্মণাধিপতিস্স ৰসেন ৰুত্তন্তি যোজনা. এৰন্তি যথা অধিপতিম্হি ৰুত্তং, এৰং সব্বত্থ সব্বপচ্চযেসু. ‘‘তস্মিং তস্মিং…পে… উদ্ধরিতব্বা’’তি ৰত্ৰা তস্স গণনুদ্ধারস্স সুকরতং উপাযঞ্চ দস্সেন্তো ‘‘অনুলোমে…পে… ৰিঞ্ঞাতু’’ন্তি আহ.

অনুলোমপচ্চনীযৰণ্ণনা নিট্ঠিতা.

পচ্চনীযানুলোমৰণ্ণনা

৬৩১. পরিহাপনগণনাযাতি পরিহাপেতব্বগণনায সমানত্তঞ্চ ন একন্তিকং ঊনতমভাৰস্সপি সম্ভৰতোতি অধিপ্পাযো. তেনাহ ‘‘নহেতুনারম্মণদুকস্সা’’তিআদি. তত্থ সদ্ধিং যোজিযমানেন ঊনতরগণনেন অধিপতিপচ্চযেন পরিহীনাপীতি যোজনা. সদ্ধিং পরিহীনাপীতি ৰা ইমস্মিং পক্খে ‘‘অধিপতিপচ্চযেনা’’তি ইত্থম্ভূতলক্খণে করণৰচনং. এতন্তি লক্খণং.

অট্ঠানন্তি অনুলোমতো অট্ঠানং অতিট্ঠনং. তিট্ঠন্তীতি অনুলোমতোতি যোজনা. তেসন্তি হেতুআদীনং. ইতরেসূতি যাদিসা অধিপ্পেতা, তে দস্সেতুং ‘‘অধিপতী’’তিআদি ৰুত্তং. ইমানি দ্ৰেতি ‘‘কুসলাব্যাকতা অব্যাকতস্স, অকুসলাঅব্যাকতা অব্যাকতস্সা’’তি ইমানি চ দ্ৰে.

নহেতুমূলকৰণ্ণনা নিট্ঠিতা.

৬৩৬. হেতুযা ৰুত্তেহি তীহীতি হেতুপচ্চযা ৰুত্তেহি তীহি ৰিস্সজ্জনেহি সদ্ধিং. ৰারসামঞ্ঞমেৰ ৰদতি, ন অত্থসামঞ্ঞন্তি অধিপ্পাযো. তথা কম্মে তীণীতি হেতুযা ৰুত্তানেৰাতি চাতি ‘‘কম্মে তীণী’’তি এত্থ ‘‘হেতুযা ৰুত্তানেৰা’’তি ইমস্মিং অত্থৰচনেপি তথা ৰারসামঞ্ঞমেৰ সন্ধায ৰদতীতি অত্থো.

৬৪৪. একেকমেৰাতি একেকমেৰ ৰিস্সজ্জনং.

৬৫০. সকট্ঠানেতি অত্তনা ঠিতট্ঠানে. ততো পরেতরাতি ততো অগ্গহিতপচ্চযতো পরেতরা পচ্চনীযতো. নাহারে…পে… লাভো হোতীতি আহারপচ্চযে পচ্চনীযতো ঠিতে ইন্দ্রিযপচ্চযং, অনুলোমতো ইন্দ্রিযপচ্চযে চ পচ্চনীযতো ঠিতে আহারপচ্চযং অনুলোমতো যোজেত্ৰা যথা পঞ্হো লব্ভতীতি অত্থো. তেসূতি আহারিন্দ্রিযেসু. দ্ৰিধা ভিন্নানি পচ্চনীযতো অনুলোমতো চ যোজেতব্বভাৰেন.

পচ্চনীযানুলোমৰণ্ণনা নিট্ঠিতা.

কুসলত্তিকৰণ্ণনা নিট্ঠিতা.

২. ৰেদনাত্তিকৰণ্ণনা

১. ৰেদনাত্তিকে পটিচ্চাদিনিযমন্তি তিকপদসম্বন্ধৰসেন পটিচ্চৰারাদীসু ৰত্তব্বং পটিচ্চসহজাতট্ঠাদিনিযমনং ন লভন্তি ৰেদনারূপনিব্বানানি. কস্মা? তিকমুত্তকত্তা. তথা পচ্চযুপ্পন্নৰচনং. ন হি সক্কা ৰত্তুং ৰেদনং রূপং নিব্বানঞ্চ সন্ধায ‘‘সুখায ৰেদনায সম্পযুত্তং ধম্মং পটিচ্চ সুখায ৰেদনায সম্পযুত্তো উপ্পজ্জতী’’তি. তিকধম্মানন্তি ৰেদনাত্তিকধম্মানং. তত্থাতি হেতুপচ্চযাদীসু. যথানুরূপতোতি ৰেদনাদীসু যো যস্স ৰেদনায সম্পযুত্তধম্মস্স আরম্মণাদিপচ্চযো ভৰিতুং যুত্তো, তদনুরূপতো. আরম্মণাদীতি আদি-সদ্দেন আরম্মণাধিপতিআরম্মণূপনিস্সযাদিকে সঙ্গণ্হাতি.

১০. কুসলত্তিকেপি পরিহীনন্তি ইদং পচ্চনীযং সন্ধায ৰুত্তং. রূপারূপধম্মপরিগ্গাহকত্তাতি ইদং অনাদিভূতস্সপি সহজাতস্স আদিম্হি ঠপনে কারণৰচনং. আদি-সদ্দেনাতি ‘‘সহজাতাদযো’’তি এত্থ আদি-সদ্দেন. যথারহং আরব্ভ উপ্পত্তিৰসেন সব্বে অরূপধম্মা আরম্মণাদীনং পচ্চযুপ্পন্না হোন্তীতি ৰুত্তং ‘‘পচ্চযুপ্পন্নৰসেন সব্বারূপধম্মপরিগ্গাহকানং আরম্মণাদীন’’ন্তি. আদি-সদ্দেন আরম্মণাধিপতিআরম্মণূপনিস্সযাদিকে সঙ্গণ্হাতি. তেনাতি ‘‘সব্বারূপধম্মপরিগ্গাহকা পনা’’তিআদিৰচনেন. সব্বট্ঠানিকানং…পে… দস্সিতা হোতি সহজাতদস্সনেনাতি অত্থো. একদেসপরিহানিদস্সনেনেৰ হি সমুদাযপরিহানি দস্সিতা হোতীতি. সহজাতাদযোতি ৰা আদি-সদ্দেন সব্বট্ঠানিকা চত্তারোপি দস্সিতা হোন্তীতি. সহজাতমূলকাতি সহজাতপচ্চযে সতি ভৰন্তা ন সহজাতং পুরতো কত্ৰা পাল়িযং আগতা. তেনাহ ‘‘সহজাতনিবন্ধনা…পে… ৰুত্তং হোতী’’তি. সো পচ্ছাজাতো কস্মা পন ন পরিহাযতীতি সম্বন্ধো. তত্থাতি যথাৰুত্তায পরিহানিযং অপরিহানিযঞ্চ. সহজাতনিবন্ধনেহীতি সহজাতধম্মনিমিত্তেহি পচ্চযভাৰেহি ইধ পচ্চযধম্মহেতুকো ৰুত্তো. এত্থেৰাতি পরিহানিযংযেৰ. সা হি ইধ অধিকতা. সহজাতনিবন্ধনানমেৰ পরিহানীতি ৰুত্তে ‘‘কিং সব্বেসংযেৰ নেসং পরিহানী’’তি আসঙ্কায আহ ‘‘সহজাত…পে… দস্সিতমেত’’ন্তি.

১৭. নযদস্সনমেৰ করোতীতি যথা অহেতুককিরিযচেতনং সন্ধায ‘‘নহেতুপচ্চযা নকম্মপচ্চযা’’তি ৰত্তুং লব্ভা, এৰং নৰিপাকপচ্চযাতিপি লব্ভা. অহেতুকমোহং পন সন্ধায ‘‘নহেতুপচ্চযা নৰিপাকপচ্চযা’’তি লব্ভা, ন ‘‘নকম্মপচ্চযা’’তি. তেনাহ ‘‘ন চ পচ্চযপচ্চযুপ্পন্নধম্মসামঞ্ঞদস্সন’’ন্তিআদি.

২৫-৩৭. যথা কুসলত্তিকং, এৰং গণেতব্বন্তি ইদং যং সন্ধায পাল়িযং নিক্খিত্তং, তং দস্সেতুং ৰুত্তং ‘‘হেতুমূলকানং…পে… নগণনসামঞ্ঞ’’ন্তি. ন হি কুসলত্তিকে অনুলোমপচ্চনীযে গণনাহি ৰেদনাত্তিকে তা সমানা. পরিৰত্তেত্ৰাপি যোজিতাতি এত্থ ‘‘নহেতুপচ্চযা নপুরেজাতপচ্চযা আরম্মণে এক’’ন্তি আরম্মণং পঠমং ৰত্ৰা ৰত্তব্বম্পি পুরেজাতং পরিৰত্তেত্ৰা পঠমং ৰুত্তন্তি ৰদন্তি. তথা নহেতুপচ্চযা কম্মে তীণীতি ইদমেৰ পদং পরিৰত্তেত্ৰা ‘‘নকম্মপচ্চযা হেতুযা তীণীতি ৰুত্ত’’ন্তিপি ৰদন্তি.

৩৯. তংসম্পযুত্তেতি তেন দোমনস্সেন সম্পযুত্তে. দোমনস্সসীসেন সম্পযুত্তধম্মা ৰুত্তা. সদ্ধাপঞ্চকেসূতি সদ্ধাসীলসুতচাগপঞ্ঞাসু. কত্তব্বন্তি ৰা যোজনা কাতব্বাতি অত্থো. অৰসেসেসূতি রাগাদীসু. পাল়িগতিদস্সনত্থন্তি ‘‘এৰং পাল়ি পৰত্তা’’তি পাল়িযা পৰত্তিদস্সনত্থং. রাগাদীহি উপনিস্সযভূতেহি. অনুপ্পত্তিতোতি ন উপ্পজ্জনতো. তং পাল়িগতিং তিকন্তরপাল়িযা দস্সেন্তো ‘‘কুসলত্তিকেপিহী’’তিআদিমাহ. ইধাপীতি ইমস্মিং ৰেদনাত্তিকেপি.

৬২. অনঞ্ঞত্তন্তি অভেদং. সুখৰেদনাসম্পযুত্তো হি ধম্মো সুখৰেদনাসম্পযুত্তস্সেৰ ধম্মস্স হেতুপচ্চযেন পচ্চযো, ন ইতরেসং. এস নযো সেসপদেসু সেসেসু চ ‘‘তীণী’’তি আগতট্ঠানেসু. তেন ৰুত্তং ‘‘সব্বানি তীণি সুদ্ধানং তিণ্ণং পদানং ৰসেন ৰেদিতব্বানী’’তি. ‘‘পচ্ছাজাতা অরূপধম্মানং পচ্চযো ন হোন্তী’’তি যুত্তমেতং, পুরেজাতা পন অরূপধম্মানং পচ্চযা ন হোন্তীতি কথমিদং গহেতব্বন্তি চোদনং সন্ধাযাহ ‘‘পুরেজাতা’’তিআদি, পুরেজাতা হুত্ৰা পচ্চযো ন হোন্তীতি অত্থো. পুরিমতরং উপ্পজ্জিত্ৰা ঠিতা হি রূপধম্মা পচ্ছা উপ্পন্নানং অরূপধম্মানং পুরেজাতপচ্চযো হোন্তি, ন চাযং নযো অরূপধম্মেসু লব্ভতি. তেন ৰুত্তং ‘‘পুরেজাতত্তাভাৰতো’’তি. তথা পচ্ছাজাতত্তাভাৰতোতি যথা ইমস্মিং তিকে কস্সচি ধম্মস্স পুরেজাতত্তাভাৰতো পুরেজাতপচ্চযো ন হোন্তীতি ৰুত্তং, তথা পচ্ছাজাতত্তাভাৰতো পচ্ছাজাতা হুত্ৰা পচ্চযো ন হোন্তি, পচ্ছাজাতপচ্চযো ন হোন্তীতি অত্থো. ন হি একস্মিং সন্তানে কেসুচি অরূপধম্মেসু পঠমতরং উপ্পজ্জিত্ৰা ঠিতেসু পচ্ছা কেচি অরূপধম্মা উপ্পজ্জন্তি, যতো তে তেসং পচ্ছাজাতপচ্চযো ভৰেয্যুং.

৮৩-৮৭. অৰসেসেসু অট্ঠসূতি ‘‘সুখায ৰেদনায সম্পযুত্তো ধম্মো’’তিআদিনা একমূলকেকাৰসানা যে নৰ নৰ ৰারা আরম্মণপচ্চযাদীসু লব্ভন্তি, তেসু যথাৰুত্তমেকং ৰজ্জেত্ৰা সেসেসু অট্ঠসু. তীস্ৰেৰাতি সুদ্ধেসু তীস্ৰেৰ সহজাতকম্মপচ্চযো লব্ভতি.

ৰেদনাত্তিকৰণ্ণনা নিট্ঠিতা.

৩. ৰিপাকত্তিকৰণ্ণনা

১-২৩. সোযেৰাতি অকতসমাসেহি পদেহি যো অত্থো ৰুচ্চতি, সোযেৰ অত্থো ৰুত্তো হোতি.

২৪-৫২. তন্তি তং ৰচনং, তং ৰা কটত্তারূপং. যস্মা চিত্তসমুট্ঠানস্স উপাদারূপস্স যথা খন্ধে পটিচ্চ উপ্পত্তি, তথা মহাভূতে চ পটিচ্চ উপ্পত্তি. ন হি তস্স তদুভযং ৰিনা উপ্পত্তি অত্থি, ন এৰং কটত্তারূপস্স. তঞ্হি কম্মস্স কটত্তা উপ্পজ্জমানং মহাভূতে পটিচ্চ উপ্পজ্জতি, তস্মা চিত্তসমুট্ঠানং রূপং উপাদারূপস্স তং ৰিসেসং দস্সেতুং তদেৰ ৰুত্তং, ন কটত্তারূপং ৰুত্তন্তি ইমমত্থং দস্সেতুং ‘‘খন্ধে পটিচ্চা’’তিআদিমাহ. যদিপি কটত্তারূপং ‘‘মহাভূতে পটিচ্চ চিত্তসমুট্ঠানং রূপং উপাদারূপ’’ন্তি এত্থ ন গহিতং, ৰচনন্তরেন পন গহিতমেৰাতি দস্সেন্তো ‘‘পৰত্তিযং পনা’’তিআদিমাহ. এৰঞ্চ কত্ৰাতি খন্ধে পটিচ্চ উপ্পত্তিযা অভাৰতোযেৰ. নাহারপচ্চযেতি আহারপচ্চযে পচ্চনীযতো ঠিতে. তম্পীতি কটত্তারূপম্পি. ঠিতিক্খণে কটত্তারূপস্স আহারো উপত্থম্ভকো হোতীতি কত্ৰা ৰুত্তং ‘‘উপ্পাদক্খণে’’তি.

ৰিপাকত্তিকৰণ্ণনা নিট্ঠিতা.

৪. উপাদিন্নত্তিকৰণ্ণনা

৫১. অধিপতিধম্মোযেৰ লোকুত্তরধম্মেসু নাধিপতিপচ্চযা উপ্পজ্জতীতি আহ ‘‘নাধিপতিপচ্চযাতি সযং অধিপতিভূতত্তা’’তি. ননু অধিপতিধম্মোপি আরম্মণাধিপতিৰসেন অধিপতিপচ্চযেন উপ্পজ্জতীতি চোদনং সন্ধাযাহ ‘‘অৰিরহিতা…পে… দস্সেতী’’তি. অৰিরহিতারম্মণাধিপতীসূতি লোকুত্তরে সন্ধাযাহ. তে হি নিব্বানারম্মণত্তা এৰং ৰুচ্চতি. পি-সদ্দেন কো পন ৰাদো ৰিরহিতারম্মণাধিপতিঅনেকন্তারম্মণাধিপতীসূতি দস্সেতি.

৭২. অনুপালনুপত্থম্ভনৰসেনাতি জীৰিতিন্দ্রিযং ৰিয কটত্তারূপানং অনুপালনৰসেন ওজা তস্সেৰ কম্মজকাযস্স উপত্থম্ভনৰসেন পচ্চযো হোতি, ন জনকৰসেনাতি যোজনা. এতস্মিং পন অত্থে সতীতি কম্মজকলাপে ওজা তস্সেৰ কম্মজকাযস্স উপত্থম্ভকৰসেন পচ্চযো হোতীতি এতস্মিং অত্থে লব্ভমানে. আহারন্তিপি ৰত্তব্বন্তি যথা জীৰিতিন্দ্রিযৰসেন ‘‘উপাদিন্নুপাদানিযো ধম্মো উপাদিন্নুপাদানিযস্স ধম্মস্স অত্থিপচ্চযেন পচ্চযো’’তি ৰুত্তং, এৰং যথাৰুত্তআহারস্সপি ৰসেন ৰত্তব্বন্তি অত্থো. এত্থ চ যস্মিং কলাপে কম্মজা ওজা কদাচি তস্সেৰ উপত্থম্ভনপচ্চযো হোতীতি অযমত্থো অট্ঠকথাযং দস্সিতো. যদি কম্মজা ওজা একংসতো সকলাপরূপূপত্থম্ভনৰসেনেৰ পৰত্ততি, তথা সতি ইমায পাল়িযা ৰিরোধো সিযাতি দস্সেন্তো ‘‘যদি চ…পে… হোতী’’তি অট্ঠকথাৰচনং উদ্ধরিত্ৰা তত্থ দোসং ৰিভাৰেন্তো ‘‘এৰং সতী’’তি আহ. তত্থ তন্তি তং ৰচনং. অনজ্ঝোহটায অত্তনো পচ্চযতো নিব্বত্তায, পচ্চযো চেত্থ কম্মংযেৰ. তেনাহ ‘‘সসন্তানগতায উপাদিন্নোজাযা’’তি.

অযম্পি পঞ্হো, ন কেৰলং পুব্বে ৰুত্তআহারোযেৰাতি অধিপ্পাযো. উদ্ধরিতব্বো সিযা, ন চ উদ্ধটো. তস্মাতি এতস্স ‘‘ৰাদো বলৰতরো’’তি এতেন সম্বন্ধো. কস্মা পন যথাৰুত্তেসু দ্ৰীসু পঞ্হেসু আহারো ন উদ্ধটোতি আহ ‘‘অজ্ঝোহটস্সা’’তিআদি. তত্থ দুতিযপঞ্হোতি দুকমূলকে দুতিযপঞ্হোতি যোজনা. দুতিযপঞ্হো চ ন উদ্ধটোতি এত্থাপি ‘‘অজ্ঝোহটস্স…পে… অভাৰতো’’তি ইদং আনেত্ৰা সম্বন্ধিতব্বং. ইতরস্সাতি অনজ্ঝোহটস্স. অজ্ঝোহটমেৰ ন অনজ্ঝোহটং, যথাৰুত্তোজন্তি অধিপ্পাযো. ‘‘বলৰতরো’’তি ৰত্ৰা তস্স বলৰতরভাৰং দস্সেন্তো ‘‘ন হী’’তিআদিমাহ. কতিপযালোপে অজ্ঝোহরিত্ৰা ৰসিত্ৰা ঠিতস্স ৰিয অজ্ঝোহটমত্তাহি মণ্ডূকাদীহি অজ্ঝোহারকস্স সরীরে ৰিসেসাধানং ৰেদিতব্বং.

ইধ ৰুত্তেহীতি ইমস্মিং উপাদিন্নত্তিকে ৰুত্তেহি. একমূলকদুকতিকাৰসানপঞ্হৰিস্সজ্জনেহীতি একপদমূলকেহি দুকাৰসানেহি তিকাৰসানেহি চ পঞ্হৰিস্সজ্জনেহি. তে পন ‘‘অনুপাদিন্নুপাদানিযো ধম্মো উপাদিন্নুপাদানিযস্স অনুপাদিন্নুপাদানিযস্স চ ধম্মস্স অত্থিপচ্চযেন পচ্চযো, অনুপাদিন্নঅনুপাদানিযো ধম্মো উপাদিন্নুপাদানিযস্স অনুপাদিন্নুপাদানিযস্স অনুপাদিন্নঅনুপাদানিযস্স চ ধম্মস্স অত্থিপচ্চযেন পচ্চযো’’তি এৰং ৰেদিতব্বো. ইধাতি ইমস্মিং উপাদিন্নত্তিকে. দুতিযদুকাৰসানে ৰিযাতি দুতিযদুকাৰসানে পঞ্হৰিস্সজ্জনে ৰিয, ‘‘অনুপাদিন্নুপাদানিযো ধম্মো উপাদিন্নুপাদানিযস্স অনুপাদিন্নুপাদানিযস্স চ ধম্মস্স অত্থিপচ্চযেন পচ্চযো, সহজাতং পচ্ছাজাত’’ন্তি এতস্স ৰিস্সজ্জনে ৰিযাতি অত্থো. অযঞ্চ অত্থো ততিযপদমূলকেসু দুকতিকাৰসানপঞ্হেসুপি লব্ভতেৰ. যদি পন তে পঞ্হা কুসলত্তিকেপি লব্ভন্তি, অথ কস্মা তত্থ ন উদ্ধটাতি আহ ‘‘সুখাৰবোধনত্থং পন তত্থ সহজাতৰসেনেৰ ৰিস্সজ্জনং কত’’ন্তি. সহজাতৰসেনেৰাতি সহজাতঅত্থিপচ্চযৰসেনেৰ. একমূলকদুকাৰসানাতি ‘‘কুসলো ধম্মো কুসলস্স চ অব্যাকতস্স চা’’তি এৰংপকারা পঞ্হা. তত্থ কুসলত্তিকে উদ্ধটা. ইধ পন ইমস্মিং উপাদিন্নত্তিকে. এতেহি যথাৰুত্তেহি ৰিস্সজ্জনেহি. একো ধম্মোতি একো ৰেদনাদিকো পচ্চযধম্মো. অনেকেহীতি সহজাতপচ্ছাজাতাদীহি অনেকেহি অত্থিপচ্চযৰিসেসেহি. অনেকেসং ধম্মানন্তি অনেকেসং পচ্চযুপ্পন্নধম্মানং. একো অত্থিপচ্চযোতি ইদং অত্থিপচ্চযতাসামঞ্ঞতো ৰুত্তং.

ইদানি যথাৰুত্তং অৰুত্তঞ্চ অত্থিপচ্চযে লব্ভমানং ৰিসেসং ৰিত্থারতো দস্সেন্তো ‘‘একো হী’’তিআদিমাহ. তত্থ একোতি অত্থিপচ্চযৰিসেসেসু একো. একস্সাতি তাদিসস্সেৰ একস্স. অঞ্ঞথা হি একো ধম্মো একস্স ধম্মস্স পচ্চযো নাম নত্থি. একেনেৰাতি সহজাতঅত্থিপচ্চযেনেৰ যথা ওক্কন্তিক্খণে ৰত্থু. তঞ্হি অত্তনা সহজাতস্স নামস্স সহজাতঅত্থিপচ্চযেনেৰ পচ্চযো হোতি, ন পুরেজাতাদিনা. একো সহজাতঅরূপক্খন্ধো অনেকেসং অত্তনা সহজাতানং অরূপক্খন্ধানং একেন সহজাতঅত্থিপচ্চযেন, অনেকেহি সহজাতপচ্ছাজাতঅত্থিপচ্চযেহি যথাক্কমং অত্তনা সহজাতানং চিত্তসমুট্ঠানরূপানং পুরেজাতানং তেসমুট্ঠানিকরূপানং. অনেকো পুরেজাতৰত্থুরূপঞ্চেৰ সহজাতঅরূপক্খন্ধা চ একস্স অরূপক্খন্ধস্স যথাক্কমং পুরেজাতসহজাতঅত্থিপচ্চযেহি. অনেকো অরূপধম্মো অনেকেসং সহজাতঅরূপধম্মানং পুরেজাতরূপধম্মানঞ্চ সহজাতপচ্ছাজাতঅত্থিপচ্চযেহি. অনেকো ৰা আহারিন্দ্রিযপ্পকারো অনেকেসং রূপধম্মানং যথারহং সহজাতপুরেজাতপচ্ছাজাতাহারিন্দ্রিযৰসেন অত্থিপচ্চযেন পচ্চযো হোতি. এৰং পচ্চযুপ্পন্নানং অসমানত্তেপি অযমত্থো সম্ভৰতি, সমানত্তে পন ৰত্তব্বমেৰ নত্থি. তেনাহ ‘‘সমানত্তে পচ্চযুপ্পন্নধম্মান’’ন্তি. সহজাতং পুরেজাতেনেৰ সহ অত্থিপচ্চযো হোতীতি সহজাতঅত্থিপচ্চযধম্মো পুরেজাতঅত্থিপচ্চযধম্মেন সহেৰ অত্থিপচ্চযো হোতি. যথা ৰত্থুনা পুরেজাতঅত্থিপচ্চযং লভন্তা এৰ কুসলাদিধম্মা সহজাতানং খন্ধানং চিত্তসমুট্ঠানানঞ্চ রূপানং সহজাতঅত্থিপচ্চযো হোন্তি, তথা তে পুরেজাতস্স কাযস্স পচ্ছাজাতপচ্চযোপি হোন্তিযেৰ. তেনাহ ‘‘পচ্ছাজাতেন চা’’তি. অত্থিপচ্চযো হোতীতি সম্বন্ধো. অযং সহজাতপচ্ছাজাতানং অত্থিপচ্চযভাৰো পচ্চযধম্মানং অভেদে এৰ ইচ্ছিতো, ন ভেদে. তেনাহ ‘‘অনঞ্ঞধম্মত্তেন…পে… নানাধম্মত্তে’’তি.

ইদানি তস্স নানাধম্মত্তে অভাৰং পাল়িযা ৰিভাৰেন্তো ‘‘যদি সিযা’’তিআদিমাহ. তত্থ একো অত্থিপচ্চযভাৰো নত্থীতি একস্সেৰ পচ্চযধম্মস্স ৰসেন লব্ভমানো একো অত্থিপচ্চযভাৰো নত্থি. কস্মা? ৰিরোধতো. তেন ৰুত্তং ‘‘সহজাত…পে… ন ৰুত্ত’’ন্তি. এৰঞ্চ কত্ৰাতি সহজাতপচ্ছাজাতানং একধম্মৰসেন সহ অলাভতো এৰ. একধম্মৰসেনাতি একস্সেৰ পচ্চযধম্মস্স ৰসেন. তেনাহ ‘‘নানাধম্মানং ৰিরুদ্ধসভাৰত্তা’’তি. ৰিরুদ্ধসভাৰতা চ সহজাতপচ্ছাজাতৰসেন ৰেদিতব্বা, ইধ পন লোকিযলোকুত্তরাদিভাৰতোতি. অঞ্ঞথাতি তেসং সহজাতপচ্ছাজাতানং একজ্ঝং লাভে. ইন্দ্রিযপটিক্খেপেপীতি ইন্দ্রিযপচ্চযে পচ্চনীকতো ঠিতেপি. তস্স পঞ্হস্স লাভতোতি ‘‘উপাদিন্নুপাদানিযো চ অনুপাদিন্নুপাদানিযো চ ধম্মা উপাদিন্নুপাদানিযস্স ধম্মস্স অত্থিপচ্চযেন পচ্চযো’’তি এতস্স পঞ্হস্স লাভতো. বাৰীসাতি একমূলকাৰসানা নৰ, একমূলকদুকাৰসানা পঞ্চ, একমূলকতিকাৰসানমেকং, দুকমূলকেকাৰসানা চত্তারো, দুকমূলকাৰসানা দ্ৰে, দুকমূলকতিকাৰসানমেকন্তি এৰং বাৰীসতি. যথা পুব্বে সহজাতং পুরেজাতেন সহেৰ অত্থিপচ্চযো হোতীতি ৰুত্তং, এৰং পুরেজাতম্পি তেনাতি দস্সেন্তো আহ ‘‘পুরেজাতং সহজাতেনেৰ সহ অত্থিপচ্চযো হোতী’’তি. তত্থ সহজাতেনেৰ সহাতি সহজাতেন সহেৰ. অট্ঠানপ্পযুত্তো হি অযং এৰ-সদ্দো, সহজাতেন ন ৰিনা পুরেজাতঅত্থিপচ্চযোতি অত্থো. ইতরেসু পন অত্থিপচ্চযধম্মেসু নিযমো নত্থি তেহি সহাপি ৰিনাপি ভাৰতো. তেনাহ ‘‘ন ইতরেহী’’তি. তম্পি ৰত্থু তংসহিতপুরেজাতমেৰাতি যং ‘‘পুরেজাতং সহজাতেনেৰ সহ অত্থিপচ্চযো হোতী’’তি ৰুত্তং, তম্পি ৰত্থুপুরেজাতঞ্চেৰ তংসহিতারম্মণপুরেজাতমেৰ চ, ন কেৰলং আরম্মণপুরেজাতং. তেনাহ ‘‘ন ইতর’’ন্তি.

ইদানি যথাৰুত্তমত্থং পাঠন্তরেন ৰিভাৰেতুং ‘‘কুসলত্তিকে হী’’তিআদি ৰুত্তং. যদি পুরেজাতং তংসহজাতেন ৰিনাপি অত্থিপচ্চযো সিযা, ‘‘নৰিপ্পযুত্তপচ্চযা অত্থিযা পঞ্চা’’তি ৰত্তুং ন সক্কা, ৰুত্তঞ্চেতং, তস্মা ৰিঞ্ঞাযতি ‘‘পুরেজাতং সহজাতেন সহেৰ অত্থিপচ্চযো হোতী’’তি. নৰিপ্পযুত্তে বাৰীসাতি এত্থাপি এসেৰ নযো. তত্থাতি সনিদস্সনত্তিকে. অত্থিৰিভঙ্গেতি অত্থিপচ্চযস্স ৰিভজনে. তিকমূলকেকাৰসানন্তি ‘‘সনিদস্সনসপ্পটিঘো চ অনিদস্সনসপ্পটিঘো চ অনিদস্সনঅপ্পটিঘো চ ধম্মা অনিদস্সনসপ্পটিঘস্স ধম্মস্স অত্থিপচ্চযেন পচ্চযো’’তি এৰং তিকমূলকো একাৰসানো পঞ্হো উদ্ধটো. পচ্চযুদ্ধারেতি চ তত্থেৰ পচ্চযুদ্ধারে. তথা চ সো পঞ্হো উদ্ধটো. তযিদং কথং, যদি পুরেজাতং সহজাতেনেৰ সহ অত্থিপচ্চযো হোতীতি চোদনাযং আহ ‘‘তং ৰত্থুসহিতস্স…পে… পচ্চযভাৰতো’’তি. তস্সত্থো – যদিপি তত্থ সনিদস্সনসপ্পটিঘগ্গহণেন আরম্মণপুরেজাতস্স অত্থিপচ্চযভাৰো ৰুত্তো, তথাপি অনিদস্সনঅপ্পটিঘগ্গহণতো ৰত্থুম্পি গহিতন্তি ৰত্থুসহিতস্স আরম্মণপুরেজাতস্স সহজাতেন সহেৰ অত্থিপচ্চযভাৰো ৰুত্তোতি. পচ্ছাজাতং আহারিন্দ্রিযেহেৰ সহ অত্থিপচ্চযো হোতি, ন পুরেজাতেনাতি অধিপ্পাযো. অনঞ্ঞধম্মত্তেতি পচ্চযধম্মস্স অনঞ্ঞত্তে. সহজাতেন সহ অত্থিপচ্চযো হোতীতি যোজনা. সেসপদদ্ৰযেপি এসেৰ নযো. তত্থাপি পটিযোগিপুরেজাতংযেৰ দট্ঠব্বং. ‘‘অত্থিপচ্চযৰিসেসেসু পনা’’তিআদিনা অত্তনা দস্সিতং ৰিচারং ‘‘এৰমেত’’ন্তি নিগমনৰসেন পচ্চামসতি.

উপাদিন্নত্তিকৰণ্ণনা নিট্ঠিতা.

৬. ৰিতক্কত্তিকৰণ্ণনা

২২. ৰিতক্কত্তিকে সত্তসু মূলকেসূতি ‘‘সৰিতক্কসৰিচারং ধম্মং পটিচ্চা’’তিআদিনা আগতানি তীণি এককানি, তীণি দুকানি, একং তিকন্তি এৰং একমূলকানি যানি সত্তমূলকানি, তেসু. যথাক্কমন্তি পাল়িযং আগতানুক্কমেন. সত্তাতি পঠমে এককে সত্ত. পঞ্চাতি দুতিযে পঞ্চ. তানিমানি হেতুপচ্চযে ৰুত্তনযেন ৰেদিতব্বানি. ইধ পন পৰত্তিৰসেনেৰ যোজেতব্বং. তীণীতিআদীসু ততিযে তীণি, চতুত্থে একং, পঞ্চমে তীণি, ছট্ঠেপি তীণি, সত্তমে একং. তানি পন যথাক্কমং ততিযপদং পটিচ্চ ততিযপদদুতিযপদতদুভযৰসেন, পঠমপদততিযপদানি পটিচ্চ ততিযপদৰসেন, পঠমপদদুতিযপদানি পটিচ্চ পঠমপদততিযপদতদুভযৰসেন, দুতিযপদততিযপদানি পটিচ্চ পঠমপদততিযপদতদুভযৰসেন, পঠমদুতিযততিযপদানি পটিচ্চ ততিযপদৰসেনেৰ ৰেদিতব্বানি. অঞ্ঞমঞ্ঞে অট্ঠৰীসাতিআদীসুপি ইমিনাৰ নযেন গণনা ৰেদিতব্বা. এৰন্তি যথাৰুত্তং গণনং পচ্চামসতি. দুতিযততিযমূলকেসু একং একন্তি দুতিযমূলকে একং, ততিযমূলকে একন্তি যোজেতব্বং. তথা আসেৰনেতি যথা পুরেজাতে একাদস, তথা আসেৰনেতি অত্থো. অঞ্ঞানীতি অধিপতিঅঞ্ঞমঞ্ঞপুরেজাতাসেৰনতো অঞ্ঞেসু পচ্চযেসু গণনানি. হেতুআরম্মণসদিসানীতি হেতুআরম্মণপচ্চযেসু গণনাসদিসানি.

৩১. অৰিসেসেনাতি ‘‘ৰিপাক’’ন্তি ৰিসেসনং অকত্ৰা ন পন ৰিস্সজ্জনং কতন্তি যোজনা. তত্থ কারণং ৰত্তুং ‘‘কস্মা’’তিআদিমাহ. ইতরেসন্তি লোকিযৰিপাকানং. তে ৰিসুং নিদ্ধারেত্ৰা ৰুত্তাতি তে যথাৰুত্তলোকিযৰিপাকা অৰিতক্কৰিচারমত্তসামঞ্ঞতো ৰিসুং নীহরিত্ৰা ৰুত্তা. ‘‘অৰিতক্কৰিচারমত্তে খন্ধে পটিচ্চ অৰিতক্কৰিচারমত্তা অধিপতী’’তি ৰুত্তরাসি পুরিমকোট্ঠাসো.

৩৮. এতন্তি ‘‘অৰিতক্কৰিচারমত্তং অৰিতক্ক…পে… সহ গচ্ছন্তেনা’’তি আগতপাল়িপদং. তস্স অত্থং দস্সেতুং ‘‘মূলং…পে… ৰুত্তং হোতী’’তি আহ. তত্থ অৰিতক্ক…পে… যোজেন্তেনাতি অৰিতক্কেহি অৰিতক্কপরিযাযেন ৰুত্তেহি অৰিতক্কৰিচারমত্তঅৰিতক্কঅৰিচারপদেহি সহ মূলপদং, আসেৰনমূলকমেৰ ৰা গচ্ছন্তেন যোজেন্তেন নপুরেজাতসদিসং নাসেৰনে পাল়িগমনং কাতব্বং, পঠিতব্বন্তি অত্থো. পোত্থকেসু পন ‘‘অৰিতক্কৰিচারমত্তং ৰিপাকেন সহ গচ্ছন্তেনা’’তি দিস্সতি, ৰিপাকেন ৰিসেসনভূতেন সহ যোজেন্তেনাতি অত্থো. তেনেৰাহ ‘‘ৰিপাকং অৰিতক্কৰিচারমত্তন্তিআদি যোজেতব্ব’’ন্তি.

একমূলকে পাল়িযং যোজিতমেৰাতি ‘‘দুমূলকেসু পঠমে’’তি ৰুত্তং.

৪৯. মূলপদমেৰ অৰসানভাৰেনাতি ‘‘সৰিতক্কসৰিচারং ধম্মং পচ্চযা সৰিতক্কসৰিচারো ধম্মো উপ্পজ্জতি নহেতুপচ্চযা’’তিআদিনা মূলপদমেৰ অৰসানভাৰেন যোজিতং. সত্ত মোহা উদ্ধরিতব্বাতি ইদং নহেতুপচ্চযং সন্ধায ৰুত্তং. পটিচ্চৰারে হি অহেতুকমোহো তিক্খত্তুমেৰ আগতো. ইধ পন ‘‘ৰত্থুং পচ্চযা’’তিআদিনা চতূসুপি মূলকেসু আগতো, তস্মা সত্তক্খত্তুং আগমনং সন্ধায ‘‘সত্ত মোহা’’তি ৰুত্তন্তি ৰেদিতব্বং.

উপনিস্সযেন সঙ্গহিতত্তাতি উপনিস্সযপচ্চযেনেৰ কম্মপচ্চযস্স সঙ্গহিতত্তা. সব্বস্সপি রূপারূপাৰচরকম্মস্স বলৰভাৰতো উপনিস্সযত্তাভাৰো নত্থি, যতো তং ‘‘গরূ’’তি ৰুচ্চতি, কম্মক্খযকরস্স পন কম্মস্স বলৰভাৰে ৰত্তব্বমেৰ নত্থীতি ইমমত্থং পাল়িযা এৰ ৰিভাৰেতুং ৰুত্তং ‘‘উপাদিন্নত্তিকপঞ্হাৰারপচ্চনীযে হি…পে… ৰিঞ্ঞাযতী’’তি.

ৰিতক্কত্তিকৰণ্ণনা নিট্ঠিতা.