১১. দুতিযসঙ্ঘভেদসিক্খাপদৰণ্ণনা

৪১৭-৪১৮. একাদসমে যং ৰচনং সমগ্গেপি ৰগ্গে অৰযৰভূতে করোতি ভিন্দতি, তং কলহকারকৰচনং ইধ ৰগ্গন্তি ৰুচ্চতীতি আহ ‘‘ৰগ্গং অসামগ্গিপক্খিযৰচনং ৰদন্তী’’তি. অসামগ্গিপক্খে ভৰা অসামগ্গিপক্খিযা, কলহকা. তেসং ৰচনং অসামগ্গিপক্খিযৰচনং, অসামগ্গিপক্খে ৰা ভৰং ৰচনং অসামগ্গিপক্খিযৰচনং. যস্মা উব্বাহিকাদিকম্মং বহূনম্পি কাতুং ৰট্টতি, তস্মা ‘‘ন হি সঙ্ঘো সঙ্ঘস্স কম্মং করোতী’’তি ইদং নিগ্গহৰসেন কত্তব্বকম্মং সন্ধায ৰুত্তন্তি ৰেদিতব্বং. অঙ্গানি পনেত্থ ভেদায পরক্কমনং পহায অনুৰত্তনং পক্খিপিত্ৰা হেট্ঠা ৰুত্তসদিসানেৰ.

দুতিযসঙ্ঘভেদসিক্খাপদৰণ্ণনা নিট্ঠিতা.