সরণগমনসংকিলেসভেদকথা

তত্থ চ লোকিযসরণগমনং তীসু ৰত্থূসু অঞ্ঞাণসংসযমিচ্ছাঞাণাদীহি সংকিলিস্সতি, ন মহাজুতিকং, ন উজ্জলং অপরিসুদ্ধং অপরিযোদাতং হোতি, ন মহাৰিপ্ফারং অনুল়ারং. এত্থ চ অঞ্ঞাণং নাম ৰত্থুত্তযস্স গুণানং অজাননং তত্থ সম্মোহো. ‘‘বুদ্ধো নু খো, ন নু খো’’তিআদিনা ৰিচিকিচ্ছা সংসযো. মিচ্ছাঞাণং নাম তস্স গুণানং অগুণভাৰপরিকপ্পনেন ৰিপরীতগ্গাহোতি ৰেদিতব্বং. লোকুত্তরস্স পন সরণগমনস্স নত্থি সংকিলেসো. লোকিযস্স চ সরণগমনস্স দুৰিধো ভেদো সাৰজ্জো অনৰজ্জো চ. তত্থ সাৰজ্জো অঞ্ঞসত্থারাদীসু অত্তনিয্যাতনাদীহি হোতি, সো অনিট্ঠফলো. অনৰজ্জো পন কালকিরিযায হোতি. লোকিযঞ্হি সরণগমনং সিক্খাপদসমাদানং ৰিয অগ্গহিতকালপরিচ্ছেদকং জীৰিতপরিযন্তমেৰ হোতি, তস্মা তস্স খন্ধভেদেন ভেদো, সো অৰিপাকত্তা অফলো. লোকুত্তরস্স পন নেৰত্থি ভেদো. ভৰন্তরেপি হি অরিযসাৰকো অঞ্ঞং সত্থারং ন উদ্দিসতীতি. এৰং সরণগমনস্স সংকিলেসো চ ভেদো চ ৰেদিতব্বো.

কস্মা পনেত্থ ৰোদানং ন গহিতং, ননু ৰোদানৰিভাৰনাপি তত্থ কোসল্লায হোতীতি? সচ্চমেতং, তং পন সংকিলেসগ্গহণেন অত্থতো দীপিতং হোতীতি ন গহিতং. যানি হি তেসং সংকিলেসকারণানি অঞ্ঞাণাদীনি, তেসং সব্বেন সব্বং অনুপ্পাদনেন উপ্পন্নানঞ্চ পহানেন ৰোদানং হোতীতি. এৰমেত্থ ‘‘সরণং সরণগমন’’ন্তিআদীনং পপঞ্চো ৰেদিতব্বো. ইমস্স পন যথাৰুত্তপপঞ্চস্স ইধ অৰচনে কারণং দস্সেন্তো আহ ‘‘সো পন ইধ ৰুচ্চমানো’’তিআদি. তত্থ সরণৰণ্ণনতোতি সামঞ্ঞফলসুত্তে ৰুত্তসরণৰণ্ণনতো.

সরণগমনসংকিলেসভেদকথা নিট্ঠিতা.