সব্বসঙ্কলননযকথাৰণ্ণনা

৮৭৩. পরিৰারে মুখাগতা কত্থপঞ্ঞত্তিৰারাদযো অট্ঠ ৰারা, তেযেৰ পচ্চয-সদ্দেন যোজেত্ৰা ৰুত্তা অট্ঠপচ্চযৰারাতি ৰিভঙ্গদ্ৰযে ৰিসুং ৰিসুং দস্সিতা সোল়স পরিৰারা অস্সাতি সোল়সপরিৰারো, তস্স সোল়সপরিৰারস্স. সব্বং সঙ্কলনং নযন্তি সব্বেসং ৰুত্তানং সঙ্কলননযানং সঙ্গহেতব্বতো সব্বং সঙ্কলভেদনং নযং.

৮৭৫. কাযিকা ছব্বিধাতি পঠমপারাজিকাপত্তি, কুটিকরণে পযোগে দুক্কটাপত্তি, একং পিণ্ডং অনাগতে থুল্লচ্চযাপত্তি, তস্মিং আগতে সঙ্ঘাদিসেসাপত্তি, ৰিকালভোজনে পাচিত্তিযাপত্তি, পঠমপাটিদেসনীযাপত্তীতি ছব্বিধা.

তথা ৰাচসিকাপি চাতি চতুত্থপারাজিকা, কুটিযা কারাপনে পুব্বগতিযো, পদসোধম্মপাচিত্তিযং, দৰকম্যতায হীনেন খুংসনং, তস্স দুব্ভাসিতন্তি তথা ছব্বিধা.

ছাদেন্তস্স চ তিস্সোতি ভিক্খুনিযা ৰজ্জপটিচ্ছাদিকায পারাজিকং, ভিক্খুনো সঙ্ঘাদিসেসছাদনে পাচিত্তিযং, অত্তনো দুট্ঠুল্লচ্ছাদনে দুক্কটন্তি তিস্সো চ.

পঞ্চ সংসগ্গপচ্চযাতি কাযসংসগ্গে ভিক্খুনিযা পারাজিকং, ভিক্খুনো সঙ্ঘাদিসেসো, কাযেন কাযপটিবদ্ধে থুল্লচ্চযং, নিস্সগ্গিযেন কাযপটিবদ্ধে দুক্কটং, অঙ্গুলিপতোদকে পাচিত্তিযন্তি কাযসংসগ্গপচ্চযা পঞ্চ আপত্তিযো.

৮৭৭. ভিক্খুনিযা ৰজ্জপটিচ্ছাদিকায পারাজিকং, ভিক্খুস্স সঙ্ঘাদিসেসপটিচ্ছাদকস্স পাচিত্তিযন্তি দুট্ঠুল্লচ্ছাদনে দুৰে.

৮৭৯. ‘‘গামন্তরে চতস্সোৰা’’তিআদি পটিনিদ্দেসতো চ ৰিঞ্ঞাযতি.

৮৮১. ৰজন্তিযাতি গচ্ছন্তিযা.

৮৮৫. যা পন ভিক্খুনী রত্তন্ধকারে অপ্পদীপে হত্থপাসে পুরিসেন সদ্ধিং যদি সল্লপেয্য, তস্সা পাচিত্তি. দূরে ঠিতা হত্থপাসং ৰিজহিত্ৰা ঠিতা ৰদেয্য চে, দুক্কটমেৰাতি যোজনা.

৮৮৬. যা পন ভিক্খুনী ছন্নে পটিচ্ছন্নট্ঠানে দিৰা পুরিসেন সদ্ধিং অস্স পুরিসস্স হত্থপাসে ঠিতা ৰদেয্য সল্লপেয্য, তস্সা পাচিত্তি. হত্থপাসং ৰিজহিত্ৰা ৰদেয্য চে, দুক্কটমেৰাতি যোজনা.

৮৯১. সনিস্সগ্গা চ পাচিত্তীতি নিস্সজ্জনৰিনযকম্মসহিতাযেৰ পাচিত্তি.

৮৯৩. ইধ ইমস্মিং সাসনে.

৮৯৬. দুৰিন্নন্তি দ্ৰিন্নং.

৮৯৮. সমানসংৰাসকভূমি নাম পকতত্তস্স ভিক্খুনো সমানলদ্ধিকস্স একসীমাযং ঠিতভাৰো. নানাপদং পুব্বং এতিস্সাতি নানাপদপুব্বিকা, নানাসংৰাসকভূমীতি অত্থো. উক্খিত্তনানালদ্ধিকনানাসীমগতা নানাসংৰাসকভূমি. ইমা দ্ৰেযেৰ সংৰাসকভূমিযো হি মহেসিনা কারুণিকেন ৰুত্তাতি যোজনা.

৮৯৯. দুৰিন্নন্তি পারিৰাসিকমানত্তচারীনং দ্ৰিন্নং পুগ্গলানং. দ্ৰযাতীতেনাতি কামসুখল্লিকানুযোগঅত্তকিলমথানুযোগসঙ্খাতং অন্তদ্ৰযং অতিক্কম্ম মজ্ঝিমায পটিপদায ঠিতেন. অথ ৰা সস্সতুচ্ছেদদ্ৰযং অতিক্কন্তেন.

৯০০. ‘‘দ্ৰঙ্গুলপব্বপরমং আদাতব্ব’’ন্তি চ তথেৰ ‘‘দ্ৰঙ্গুলং ৰা দুমাসং ৰা’’তি চ দ্ৰঙ্গুলা দুৰে পঞ্ঞত্তাতি যোজনা.

৯০৫. আণত্তিযা মনুস্সমারণং, আণত্তিযা অদিন্নাদানম্পীতি যোজনা.

৯০৭. তিস্সো ওভাসনাযিমাতি ইমা তিস্সো মেথুনাধিপ্পাযপ্পকাসনা.

৯০৮. সঙ্ঘাদিসেসো এৰ সঙ্ঘাদিসেসতা.

৯১০. ৰনপ্পতি নাম পুপ্ফং ৰিনা ফলন্তী নিগ্রোধউদুম্বরঅস্সত্থপিলক্খকাদিরুক্খজাতি, ইধ পন ৰনজেট্ঠো রক্খিতগোপিতচেতিযরুক্খো ৰনপ্পতীতি অধিপ্পাযো. থুল্লতাতি থুল্লচ্চযং.

৯১২. ৰিস্সট্ঠীতি ৰিস্সজ্জি সম্ভৰধাতু. ছড্ডনেতি উপক্কমিত্ৰা মোচনে. ‘‘হরিতে উচ্চারং পস্সাৰং ছড্ডনে’’তি পদচ্ছেদো.

৯১৩. কিং পমাণমেতাসন্তি কিত্তকা.

৯১৫. ভিক্খু ভিক্খুনিযা সদ্ধিন্তি এত্থ ভিক্খূতি সামিৰচনপ্পসঙ্গে পচ্চত্তং, ভিক্খুনোতি অত্থো. গাথাবন্ধৰসেন ৰা ৰণ্ণলোপো.

৯১৮. দুতিযায হত্থপাসকং.

৯২২. ‘‘যাৰততিযকে তিস্সো আপত্তিযো’’তি (পরি. অট্ঠ. ৪৭৬ অত্থতো সমানং) পদস্স নিদ্দেসে ‘‘থুল্লচ্চযং সিযা সঙ্ঘ-ভেদকস্সানুৰত্তিনো’’তি পঠন্তি. ‘‘তিণ্ণং সঙ্ঘভেদানুৰত্তাকানং কোকালিকাদীনং সঙ্ঘাদিসেসো’’তি অট্ঠকথাযং ৰুত্তত্তা তথা পাঠো ন গহেতব্বো.

৯২৩. যাৰততিযকেতি তিণ্ণং পূরণী ততিযা, কম্মৰাচা, যাৰততিযায কম্মৰাচায পরিযোসানে আপজ্জিতব্বা আপত্তি যাৰততিযকা নাম.

৯২৬. ‘‘অৰস্সুতস্স…পে… কিঞ্চী’’তি ইদং গরুকাপত্তিযা ৰত্থুদস্সনং. ‘‘সব্বং মংসং অকপ্পিয’’ন্তি ইদং থুল্লচ্চযদুক্কটানং ৰত্থুদস্সনং.

৯২৭. ‘‘ৰিঞ্ঞাপেত্ৰান…পে… ভোজনম্পি চা’’তি ইদং পাটিদেসনীযৰত্থুদস্সনং. ‘‘লসুণম্পি চা’’তি ইদং পাচিত্তিযৰত্থুদস্সনং. ‘‘একতো অজ্ঝোহরন্তিযা’’তি পদচ্ছেদো.

৯৩০. রত্তচিত্তেন ইত্থিযা অঙ্গজাতং ওলোকেন্তস্স দুক্কটং ৰুত্তন্তি যোজনা.

৯৩১. সম্মাৰত্তনাৰ সম্মাৰত্তনকা. তেচত্তালীস ৰত্তনা দ্ৰাসীতিক্খন্ধকৰত্তানং পরিপূরণট্ঠানে দস্সিতা.

৯৩২. অদস্সনঅপটিকম্মে আপন্নাপত্তিযা দুৰে পুগ্গলা, পাপিকায দিট্ঠিযা অপ্পটিনিস্সগ্গে আপন্নাপত্তিযা একোতি ইমে তযো উক্খিত্তপুগ্গলা.

৯৩৪. দূসকোতি ভিক্খুনিদূসকো. কণ্টকোতি কণ্টকসামণেরো.

৯৩৭. দদেয্যচ্চেৰমাদিকাতি ঞত্তিকালে ‘‘সঙ্ঘো দদেয্যা’’তিআদিভেদা ঞত্তিকপ্পনা, ঞত্তিকিরিযাতি অত্থো. দেতি সঙ্ঘো করোতীতিআদীতি কম্মৰাচাকালে ‘‘সঙ্ঘো দেতী’’তি ৰা ‘‘করোতী’’তি ৰা আদিভেদা ৰচনকম্মস্স অনিট্ঠিতত্তা ৰিপ্পকতপচ্চুপ্পন্নং নাম সিযা.

৯৩৮. দিন্নং কতং পনিচ্চাদীতি কম্মৰাচায নিট্ঠিতায ‘‘দিন্নং সঙ্ঘেনা’’তি ৰা ‘‘কতং সঙ্ঘেনা’’তি ৰাতিআদিৰচনং অতীতকরণং নাম সিযা.

৯৩৯. সঙ্ঘেতি সঙ্ঘমজ্ঝে.

‘‘কারণেহি পন দ্ৰীহি, সঙ্ঘো ভিজ্জতি নঞ্ঞথা’’তি কস্মা ৰুত্তং, ননু ‘‘পঞ্চহুপালি, আকারেহি সঙ্ঘো ভিজ্জতি. কতমেহি পঞ্চহি? কম্মেন, উদ্দেসেন, ৰোহরন্তো, অনুস্সাৰনেন, সলাকগ্গাহেনা’’তি (পরি. ৪৫৮) ৰুত্তত্তা, অট্ঠকথাযঞ্চ (পরি. অট্ঠ. ৪৫৮) ‘‘পঞ্চহি কারণেহী’’তি ৰচনতো চ ইধ ইমেহি দ্ৰীহেৰ কারণেহি সঙ্ঘভেদকথনং অযুত্তন্তি? ৰুচ্চতে – নাযুত্তং পুব্বপযোগকারকৰসেন ৰুত্তত্তা. তথা হি অট্ঠকথাযং –

‘‘কম্মেনাতি অপলোকনাদীসু চতূসু কম্মেসু অঞ্ঞতরেন কম্মেন. উদ্দেসেনাতি পঞ্চসু পাতিমোক্খুদ্দেসেসু অঞ্ঞতরেন উদ্দেসেন. ৰোহরন্তোতি কথযন্তো, তাহি তাহি উপপত্তীহি ‘অধম্মং ধম্মো’তিআদীনি অট্ঠারস ভেদকরৰত্থূনি দীপেন্তো. অনুস্সাৰনেনাতি ‘ননু তুম্হে জানাথ ময্হং উচ্চাকুলা পব্বজিতভাৰং, বহুস্সুতভাৰঞ্চ, মাদিসো নাম উদ্ধম্মং উব্বিনযং সত্থুসাসনং করেয্যাতি চিত্তে উপ্পাদেতুং তুম্হাকং যুত্তং, কিং ময্হং অৰীচি নীলুপ্পলৰনমিৰ সীতলো, কিমহং অপাযতো ন ভাযামী’তিআদিনা নযেন কণ্ণমূলে ৰচীভেদং কত্ৰা অনুস্সাৰনেন. সলাকগ্গাহেনাতি এৰং অনুস্সাৰেত্ৰা তেসং চিত্তং উপত্থম্ভেত্ৰা অনিৰত্তিধম্মে কত্ৰা ‘গণ্হথ ইমং সলাক’ন্তি সলাকগ্গাহেন.

‘‘এত্থ চ কম্মমেৰ, উদ্দেসো ৰা পমাণং, ৰোহারানুস্সাৰনসলাকগ্গাহা পন পুব্বভাগা. অট্ঠারসৰত্থুদীপনৰসেন হি ৰোহরন্তে তত্থ রুচিজননত্থং অনুস্সাৰেত্ৰা সলাকায গহিতাযপি অভিন্নোৰ হোতি সঙ্ঘো. যদা পন এৰং চত্তারো ৰা অতিরেকে ৰা সলাকং গাহেত্ৰা আৰেণিকং কম্মং ৰা উদ্দেসং ৰা করোতি, তদা সঙ্ঘো ভিন্নো নাম হোতী’’তি (পরি. অট্ঠ. ৪৫৮) –

ৰুত্তত্তা সলাকগ্গাহকম্মানি দ্ৰে পধানকারণানীতি ইধ তানেৰ দস্সিতানি.

ননু চ সলাকগ্গাহোপি সঙ্ঘভেদস্স পুব্বভাগো ৰুত্তো, উদ্দেসকম্মানেৰ পধানভাৰেন ৰুত্তানি, তস্মা কথমস্স সলাকগ্গাহস্স পধানকারণভাৰোতি? ৰুচ্চতে – উদ্দেসকম্মানিপি সলাকগ্গাহে সিদ্ধে অৰস্সম্ভৰনতো অত্থসাধনপযোগেন ৰিনা অসিদ্ধানেৰ হোন্তীতি সো পধানভাৰেন ইধ গহিতো, উদ্দেসো পন পঞ্ঞত্তকম্মপুব্বঙ্গমত্তা কম্মেনেৰ সঙ্গহিতোতি ইধ ৰিসুং ন ৰুত্তোতি দট্ঠব্বং.

৯৪১. পযুত্তাযুত্তৰাচাযাতি পচ্চযুপ্পাদনত্থায পযুত্তা চ সা সক্যপুত্তিযভাৰস্স অযুত্তা অননুরূপা চাতি পযুত্তাযুত্তা, সাযেৰ ৰাচাতি পযুত্তাযুত্তৰাচা, তায.

৯৪৪. যা ভিক্খুনী ৰিঞ্ঞাপেত্ৰা ভুঞ্জতি, তস্সা চ পাটিদেসনীযং সিযাতি যোজনা.

৯৪৫. অনামযোতি অগিলানো.

৯৪৬. ‘‘দসসতানী’’তিআদিগাথায রত্তীনন্তি এত্থ ‘‘সত’’ন্তি সেসো. ছাদনকিরিযায অচ্চন্তসংযোগে উপযোগৰচনং. দসসতানি আপত্তিযো রত্তীনং সতং ছাদেত্ৰাতি যোজনা. এৰং কত্তব্বযোজনাযং –

‘‘দস সতং রত্তিসতং, আপত্তিযো ছাদযিত্ৰান;

দস রত্তিযো ৰসিত্ৰান, মুচ্চেয্য পারিৰাসিকো’’তি. (পরি. ৪৭৭) –

অযং পরিৰারগাথাপমাণং. একদিৰসং সতংসঙ্ঘাদিসেসাপত্তিযো আপজ্জিত্ৰা দসদিৰসে ছাদনৰসেন সতংদিৰসে সহস্সসঙ্ঘাদিসেসাপত্তিযো ছাদযিত্ৰাতি অত্থো. অযমেত্থ সঙ্খেপত্থো – যো দসদিৰসে সতং সঙ্ঘাদিসেসা আপত্তিযো আপজ্জিত্ৰা দসদিৰসে পটিচ্ছাদেতি, তেন রত্তিসতং আপত্তিসহস্সং পটিচ্ছাদিতং হোতীতি. দস রত্তিযো ৰসিত্ৰানাতি ‘‘সব্বাৰ তা আপত্তিযো দসাহপটিচ্ছন্না’’তি পরিৰাসং যাচিত্ৰা দস রত্তিযো ৰসিত্ৰাতি অত্থো. মুচ্চেয্য পারিৰাসিকোতি পরিৰাসং ৰসন্তো ভিক্খু অত্তনা ৰসিতব্বপরিৰাসতো মুচ্চেয্য, মুত্তো ভৰেয্যাতি অত্থো.

৯৪৭. পারাজিকানি অট্ঠেৰাতি অগ্গহিতগ্গহণেন. তেৰীস গরুকাতি ভিক্খূহি অসাধারণা ভিক্খুনীনং দস, ভিক্খুনীহি অসাধারণা ভিক্খূনং ছ, উভিন্নং সাধারণা সত্তাতি এৰং তেৰীস সঙ্ঘাদিসেসা.

৯৪৮. ৰুত্তানীতি যথাৰুত্তানি নিস্সগ্গিযানি. দ্ৰেচত্তালীস হোন্তীতি ভিক্খুৰিভঙ্গাগতা তিংস, ভিক্খূহি অসাধারণা ভিক্খুনীনং আদিতো দ্ৰাদস চাতি দ্ৰাচত্তালীস নিস্সগ্গিযানি হোন্তি. অট্ঠাসীতিসতং পাচিত্তিযা পুব্বে দস্সিতাৰ.

৯৪৯. সুসিক্খেনাতি সুট্ঠু সিক্খিতঅধিসীলাদিতিৰিধসিক্খেন ভগৰতা.

৯৫০. সুপঞ্ঞেনাতি সোভণা দসবলচতুৰেসারজ্জছঅসাধারণাদযো পঞ্ঞা যস্স সো সুপঞ্ঞো, তেন. যসস্সিনাতি অট্ঠঅরিযপুগ্গলসমূহসঙ্খাতপরিৰারযসা চ সব্বলোকব্যাপকগুণঘোসসঙ্খাতকিত্তিযসা চ তেন সমন্নাগতত্তা যসস্সিনা. অড্ঢুড্ঢানি সতানি ভৰন্তীতি যথাদস্সিতগণনায পিণ্ডৰসেন পঞ্ঞাসাধিকানি তীণি সতানি ভৰন্তীতি অত্থো. সুপঞ্ঞেন যসস্সিনা গোতমেন পঞ্ঞত্তানি সব্বানি সিক্খাপদানি অড্ঢুড্ঢানি সতানি ভৰন্তীতি যোজনা.

৯৫১. এতেসু সিক্খাপদেসু যো সারভূতো ৰিনিচ্ছযো ৰত্তব্বো, সো সকলো মযা সমাসেন সব্বথা সব্বাকারেন ৰুত্তোতি যোজনা.

৯৫২. ইদং উত্তরং নাম পকরণং.

৯৫৩. তস্মাতি মযা ৰিচারেত্ৰা ৰুত্তত্তাৰ. অত্থেতি ৰচনত্থভাৰত্থাদিভেদে অত্থে ৰা. অক্খরবন্ধে ৰাতি অক্খরসঙ্খাতপদবন্ধে ৰা. ৰিঞ্ঞাসস্স কমেপি ৰাতি উদ্দেসৰসেন গন্থনিক্খেপস্স কমেপি. কঙ্খা ন কাতব্বাতি ‘‘যথাঅধিপ্পেতস্স ইদং ৰাচকং নু খো, অৰাচক’’ন্তি ৰা ‘‘ইদমযুত্তং নু খো, যুত্ত’’ন্তি ৰা ‘‘ইদমধিকং নু খো, ঊন’’ন্তি ৰা ‘‘ইদমঘট্টিতক্কমং নু খো, ঘট্টিতক্কম’’ন্তি ৰা ‘‘ইদং ৰিরুদ্ধসমযং নু খো, অৰিরুদ্ধসময’’ন্তি ৰা ‘‘ইদং দুরুত্তং নু খো, সুৰুত্ত’’ন্তি ৰা ‘‘ইদং সত্থকং নু খো, নিরত্থক’’ন্তি ৰা কঙ্খা ৰিমতি যেন কেনচি ন কাতব্বা. বহুমানতাতি ‘‘ৰিনযো সংৰরত্থাযা’’তিআদিনা (পরি. ৩৬৬) নিদ্দিট্ঠপযোজনপরম্পরায মূলকারণত্তা মহতী সম্মানা কাতব্বাতি অত্থো.

৯৫৪. যো ভিক্খু সউত্তরং উত্তরপকরণেন সহিতং ৰিনযস্সৰিনিচ্ছযং নাম পকরণং জানাতি ধম্মতো চেৰ অত্থতো চ ৰিনিচ্ছযতো চ সব্বথা অৰবুজ্ঝতি, সো ভিক্খু অত্তনা সিক্খিতব্বায সিক্খায সব্বসো ৰিঞ্ঞাতত্তা সিক্খাপকেন আচরিযেন ৰিনাপি সিক্খিতুং সমত্থোতি. নিস্সযং ৰিমুঞ্চিত্ৰাতি আচরিযুপজ্ঝাযে নিস্সায ৰাসং মুঞ্চিত্ৰা. যথাকামঙ্গতো সিযাতি যাদিসা যাদিসা অত্তনা গামিতা, তত্থ তত্থ গমনারহো ভৰেয্যাতি অত্থো.

৯৫৫. নিস্সযং দাতুকামেন. সহ ৰিভঙ্গেন সৰিভঙ্গং. সহ মাতিকায সমাতিকং. ইদং সউত্তরং ৰিনযৰিনিচ্ছযপকরণং সুট্ঠু ৰাচুগ্গতং কত্ৰা গন্থতো সুট্ঠু পগুণং ৰাচুগ্গতং কত্ৰা অত্থতো, ৰিনিচ্ছযতো চ সম্মা জানিত্ৰা এৰং দাতব্বন্তি যোজনা.

৯৫৬-৭. যো ভিক্খু ইমং সউত্তরং ৰিনযৰিনিচ্ছযপকরণং ৰাচায পঠতি, মনসা চিন্তেতি, অঞ্ঞেহি ৰুচ্চমানং সুণাতি, অত্থং পরিপুচ্ছতি, পরং ৰাচেতি, নিচ্চং অত্থং উপপরিক্খতি যথাপরিপুচ্ছিতমত্থং হেতুউদাহরণপৰত্তিৰসেন উপগন্ত্ৰা সমন্ততো ইক্খতি পঞ্ঞায নিযমেতি ৰৰত্থপেতি, তস্স পন ভিক্খুস্স ৰিনযনিস্সিতা সব্বেৰ অত্থা আপত্তানাপত্তিকপ্পিযাকপ্পিযাদিপভেদা সব্বে অত্থা হত্থে আমলকং ৰিয করতলে অমলমণিরতনং ৰিয উপট্ঠহন্তি পাকটা ভৰন্তীতি যোজনা. নত্থি এতস্স মলন্তি অমলং, অমলমেৰ আমলকন্তি মণিরতনং ৰুচ্চতি.

৯৫৮. নত্থি এতেসং বুদ্ধীতি অবুদ্ধী, অবুদ্ধী চ তে জনা চাতি অবুদ্ধিজনা, অবুদ্ধিজনানং সারং অৰসারং ওসীদনং দদাতি আদদাতি করোতীতি অবুদ্ধিজনসারদং, বুদ্ধিৰিরহিতানং অগাধং গম্ভীরং. তেহি অলদ্ধপতিট্ঠং অমতসাগরং সদ্দত্থরসামতস্স, নিব্বানামতস্স ৰা পটিলাভকারণত্তা সাগরসদিসং পরমং উত্তমং ইমং উত্তরং সাগরং আসন্নপচ্চক্খং উত্তরপকরণসঙ্খাতং সমুদ্দসাগরং সারদো হুত্ৰা উত্তরং উত্তরন্তো পরিযোসাপেন্তো নরো ভিক্খু হি যস্মা ৰিনযপারগো ৰিনযপিটকস্স পরিযন্তং গতো হুত্ৰা পারগো পারং সংসারস্স পারসঙ্খাতং নিব্বানং গচ্ছন্তো সিযা ভৰেয্যাতি যোজনা.

৯৫৯. অতোতি তস্মাদেৰ কারণা অৰপূরতোরতো পাপপূরতো নিরাসঙ্কতায ওরতো নিৰত্তো পাপভীরুকো নরো তমং ৰিধূয পাপভীরুকতায এৰ চিত্তপরিযুট্ঠানৰসেন উপ্পজ্জনকং মোহন্ধকারং তদঙ্গপহানৰসেন ৰিধমেত্ৰা. সব্বঙ্গণকম্মদং সব্বেসং রাগাদীনং অঙ্গণানং কম্মং তদঙ্গাদিপহানং দদাতি আৰহতীতি ‘‘সব্বঙ্গণকম্মদ’’ন্তি লদ্ধনামং সুখস্স পদং লোকিযলোকুত্তরস্স সুখস্স কারণং গুণসংহিতং সীলাদীহি অত্থভূতেহি গুণেহি সংহিতং যুত্তং গুণপ্পকাসকং হিতং অমতোসধং ৰিয সব্বদোসসব্বব্যাধিরহিততায অজরাঅমতাদিগুণাৰহত্তা হিতং ইমং উত্তরং নাম পকরণং সক্কচ্চং আদরো হুত্ৰা নিচ্চং সততং সিক্খে ‘‘এৰং পরিচযন্তং করোমী’’তি চিন্তেত্ৰা একন্তেন যথাৰুত্তপযোজনসাধনযোগ্গং কত্ৰা অজ্ঝেনাদিৰসেন সিক্খেয্য এৰ, ন অজ্ঝুপেক্খকো ভৰেয্যাতি যোজনা.

৯৬০. পটুভাৰকরে পাতিমোক্খসংৰরসীলপূরণে, সাসনপচ্চত্থিকাভিভৰনে চ পটুভাৰং ছেকত্তং ৰেসারজ্জং করোতি অত্তানং ধারেন্তানং লজ্জিপুগ্গলানন্তি পটুভাৰকরে পরমে ততোযেৰ উত্তমে পিটকে ৰিনযপিটকে পটুতং পাটৰং পঞ্ঞাকোসল্লং অভিপত্থযন্তেন পটুনা যতিনা নিম্মলপ্পৰত্তিকেন পটুনা ৰিধিনা ছেকেন সারেন ৰিধানেন ইদং সউত্তরং ৰিনযৰিনিচ্ছযপকরণং সততং নিরন্তরং পরিযাপুণিতব্বং উগ্গহণধারণপরিপুচ্ছাচিন্তনাদিৰসেন সিক্খিতব্বন্তি যোজনা.

ইতি উত্তরে লীনত্থপকাসনিযা

সব্বসঙ্কলননযকথাৰণ্ণনা নিট্ঠিতা.

নিগমনকথাৰণ্ণনা

৯৬১-৩. মহেসিনো তিৰিধস্সাপি সাসনস্স সুচিরট্ঠিতিকামেন অতিচিরকালপ্পৰত্তিং ইচ্ছন্তেন ধীমতা পসত্থতরঞাণেন সুদ্ধচিত্তেন লাভসক্কারনিরপেক্খতায পরিসুদ্ধজ্ঝাসযেন বুদ্ধদত্তেন বুদ্ধদত্তাভিধানেন আচরিযৰরেন রচিতো.

পজ্জৰসেন গন্থতো, অত্থতো চেৰ পরমুত্তরো উত্তরো ৰিনিচ্ছযো অন্তরাযং অন্তরেন অজ্ঝত্তিকং, বাহিরং ৰা অন্তরাযং ৰিনা যথা সিদ্ধিং উপাগতো পরিনিট্ঠানং পত্তো, তথা সত্তানং ধম্মসংযুতা কুসলূপসংহিতা সঙ্কপ্পা মনোরথা সিজ্ঝন্তু অন্তরাযং ৰিনা নিপ্পজ্জন্তু, এতেন উত্তরৰিনিচ্ছযরচনামযেন মহতা পুঞ্ঞোদযেন চতূহি সঙ্গহৰত্থূহি জনং রঞ্জেতীতি ‘‘রাজা’’তি সঙ্খং গতো মহীপালো মহিং পথৰিসন্নিস্সিতং জনকাযং সম্মা ঞাযেন দস রাজধম্মে অকোপেন্তো পালেতু. দেৰো পজ্জুন্নো কালে থাৰরজঙ্গমানং উপযোগারহকালে সম্মা পৰস্সতু অৰুট্ঠিঅতিৰুট্ঠিকং অকত্ৰা সম্মা পৰচ্ছতু.

৯৬৪. সেলিন্দো সিনেরুপব্বতরাজা যাৰ তিট্ঠতি যাৰ লোকে পৰত্ততি, চন্দো সকলজনপদনযনসাযনো যাৰ ৰিরোচতি যাৰ অত্তনো সভাৰং জোতেতি, তাৰ যসস্সিনো গোতমস্স অরহতো সম্মাসম্বুদ্ধস্স সদ্ধম্মো পরিযত্তিপটিপত্তিপটিৰেধৰসেন তিৰিধো সদ্ধম্মো তিট্ঠতু পৰত্ততু.

৯৬৫. সীহাদীনং, দাহাদীনঞ্চ বাহিরজ্ঝত্তিকানং পরিস্সযানং খমনং সহনং অভিভৰিত্ৰা পৰত্তনং খন্তি. সোরচ্চন্তি সোভনে রতোতি সুরতো, সুরতস্স ভাৰো সোরচ্চং. সুন্দরং অখণ্ডতাদিগুণসমন্নাগতং সীলং অস্সাতি সুসীলো. সুসীলস্স ভাৰো.

নিগমনকথাৰণ্ণনা নিট্ঠিতা.

উত্তরৰিনিচ্ছযটীকা নিট্ঠিতা.

ইতি ৰিনযত্থসারসন্দীপনী নাম ৰিনযৰিনিচ্ছযৰণ্ণনা,

লীনত্থপকাসনী নাম উত্তরৰিনিচ্ছযৰণ্ণনা চ

সমত্তা.

পচ্ছা ঠপিতগাথাযো

থেরেন থিরচিত্তেন, সাসনুজ্জোতনত্থিনা;

পুঞ্ঞৰা ঞাণৰা সীলী, সুহজ্জো মুদুকো তথা.

যো সীহল়ারিমদ্দেসু, চন্দিমা সূরিযো ৰিয;

পাকটো সীৰলিত্থেরো, মহাতেজো মহাযসো.

তেন নীতা সীহল়া যা, ইধ পত্তা সুধীমতা;

এসা সংৰণ্ণনা সীহ-ল়ক্খরেন সুলিক্খিতা.

রেৰতো ইতি নামেন, থেরেন থিরচেতসা;

অরিমদ্দিকে রক্খন্তেন, পরিৰত্তেত্ৰান সাধুকং.

লিখাপিতা হিতত্থায, ভিক্খূনং অরিমদ্দিকে;

এসা সংৰণ্ণনা সুট্ঠু, সন্নিট্ঠানমুপাগতা;

তথেৰ সব্বসত্তানং, সব্বত্থো চ সমিজ্ঝতূতি.