সাধারণাসাধারণকথাৰণ্ণনা

৭৭৯-৮০. সব্বসিক্খাপদানন্তি উভতোৰিভঙ্গাগতানং সব্বসিক্খাপদানং. ভিক্খূহি ভিক্খুনীহীতি উভযত্থ সহত্থে করণৰচনং. ভিক্খূহি ভিক্খুনীনঞ্চ, ভিক্খুনীহি ভিক্খূনঞ্চাতি উভযত্থ অসাধারণপঞ্ঞত্তঞ্চ, তথা ভিক্খূহি ভিক্খুনীনঞ্চ, ভিক্খুনীহি ভিক্খূনঞ্চাতি উভযত্থ সাধারণসিক্খাপদঞ্চ অহং ৰক্খামীতি যোজনা. সমাহিতাতি একগ্গচিত্তা. তং মযা ৰুচ্চমানং নিদানাদিনযং. সুণাথাতি সোতুজনং সক্কচ্চসৰনে নিযোজেতি.

৭৮১. ‘‘নিদান’’ন্তিআদিগাথা ৰুত্তত্থাৰ.

৭৮২-৩. ‘‘কতি ৰেসালিযা’’তিআদি পুচ্ছাগাথা উত্তানত্থাযেৰ.

৭৮৬. ‘‘দস ৰেসালিযা’’তিআদিৰিস্সজ্জনগাথানং ‘‘মেথুন’’ন্তিআদযো নিদ্দেসৰসেন ৰুত্তা. ৰিগ্গহোতি মনুস্সৰিগ্গহং পারাজিকং. চতুত্থন্তিমৰত্থুকন্তি উত্তরিমনুস্সধম্মপারাজিকং. অতিরেকচীৰরন্তি পঠমকথিনং. সুদ্ধকাল়কেল়কলোমকন্তি এল়কলোমৰগ্গে দুতিযং.

৭৮৭. ভূতন্তি পঠমে মুসাৰাদৰগ্গে অট্ঠমং. পরম্পরঞ্চেৰাতি পরম্পরভোজনসিক্খাপদং. মুখদ্ৰারন্তি চতুত্থে ভোজনৰগ্গে দসমং. ভিক্খুনীসু চ অক্কোসোতি ভিক্খুনিপাতিমোক্খে ছট্ঠে আরামৰগ্গে দুতিযং.

৭৮৮. দ্ৰে অনুদ্ধংসনানীতি অট্ঠমনৰমসঙ্ঘাদিসেসা. চীৰরস্স পটিগ্গহোতি চীৰরৰগ্গে পঞ্চমং.

৭৮৯. রূপিযন্তি এল়কলোমৰগ্গে অট্ঠমং. সুত্তৰিঞ্ঞত্তীতি পত্তৰগ্গে ছট্ঠং. উজ্ঝাপনন্তি দুতিযে ভূতগামৰগ্গে ততিযং. পরিপাচিতপিণ্ডোতি ততিযে ওৰাদৰগ্গে নৰমং. তথেৰ গণভোজনন্তি চতুত্থে ভোজনৰগ্গে দুতিযং.

৭৯০. ৰিকালে ভোজনঞ্চেৰাতি তত্থেৰ সত্তমং. চারিত্তন্তি অচেলকৰগ্গে পঞ্চমে ছট্ঠং. ন্হানন্তি সুরাপানৰগ্গে ছট্ঠে সত্তমং. ঊনৰীসতিৰস্সন্তি সত্তমে সপ্পাণকৰগ্গে পঞ্চমং. দত্ৰা সঙ্ঘেন চীৰরন্তি অট্ঠমে সহধম্মিকৰগ্গে নৰমং.

৭৯১. ৰোসাসন্তীতি দুতিযং ভিক্খুপাটিদেসনীযং. নচ্চং ৰা গীতং ৰাতি পঠমে লসুণৰগ্গে দসমং. চারিকদ্ৰযন্তি চতুত্থে তুৰট্টৰগ্গে সত্তমট্ঠমানি. ছন্দদানেনাতি অট্ঠমে কুমারিভূতৰগ্গে একাদসমং. ‘‘ছন্দদানেতী’’তি ৰা পাঠো. ‘‘ছন্দদানং ইতি ইমে’’তি পদচ্ছেদো.

৭৯২. কুটীতি ছট্ঠো সঙ্ঘাদিসেসো. কোসিযন্তি নিস্সগ্গিযেসু দুতিযে এল়কলোমৰগ্গে পঠমং. সেয্যন্তি মুসাৰাদৰগ্গে পঞ্চমং. পথৰীতি মুসাৰাদৰগ্গে দসমং. ভূতগামকন্তি ভূতগামৰগ্গে দুতিযে পঠমং. সপ্পাণকঞ্চ সিঞ্চন্তীতি ভূতগামৰগ্গে দসমং.

৮০০. ছঊনানি তীণেৰ সতানীতি ছহি ঊনানি তীণেৰ সতানি, চতুনৰুতাধিকানি দ্ৰিসতানীতি অত্থো. সমচেতসাতি –

‘‘ৰধকে দেৰদত্তম্হি, চোরে অঙ্গুলিমালকে;

ধনপালে রাহুলে চ, সব্বত্থ সমমানসো’’তি. (মি. প. ৬.৬.৫; ধ. প. অট্ঠ. ১.১৬ দেৰদত্তৰত্থু; ইতিৰু. অট্ঠ. ১০০) –

ৰচনতো সব্বেসু হিতাহিতেসু, লাভালাভাদীসু চ অট্ঠসু লোকধম্মেসু নিব্বিকারতায চ সমানচিত্তেন তথাগতেন.

ৰুত্তাৰসেসাতি ৰেসালিযাদীসু ছসু নগরেসু ৰুত্তেহি অৰসিট্ঠানি. ইমে সব্বে ইমানি সব্বানি সিক্খাপদানি সাৰত্থিযং কতানি ভৰন্তি, পঞ্ঞত্তানি হোন্তীতি অত্থো.

৮০১. পারাজিকানি চত্তারীতি ৰেসালিযং ৰুত্তং মেথুনমনুস্সৰিগ্গহউত্তরিমনুস্সধম্মং, রাজগহে অদিন্নাদানন্তি চত্তারি. সত্ত সঙ্ঘাদিসেসকাতি রাজগহে ৰুত্তা দ্ৰে অনুদ্ধংসনা, দ্ৰে চ ভেদা, আল়ৰিযং কুটিকারো, কোসম্বিযং মহল্লকৰিহারো, দোৰচস্সন্তি সত্ত. নিস্সগ্গিযানি অট্ঠেৰাতি ৰেসালিযং অতিরেকচীৰরং, কাল়কএল়কলোমং, রাজগহে চীৰরপটিগ্গহণং, রূপিযপটিগ্গহণং, সুত্তৰিঞ্ঞত্তি, আল়ৰিযং কোসিযমিস্সকং, কপিলৰত্থুম্হি এল়কলোমধোৰনং, ঊনপঞ্চবন্ধনন্তি অট্ঠ.

দ্ৰত্তিংসেৰ চ খুদ্দকাতি ৰেসালিযং ভূতারোচনং, পরম্পরভোজনং, অপ্পটিগ্গহণং, অচেলকং, ‘‘যা পন ভিক্খুনী ভিক্খুং অক্কোসেয্যা’’তি পঞ্চ, রাজগহে উজ্ঝাপনকং, ভিক্খুনিপরিপাচিতপিণ্ডো, গণভোজনং, ৰিকালভোজনং, ‘‘যো পন ভিক্খু নিমন্তিতো’’তিআদি চ, ‘‘ওরেনড্ঢমাসং নহাযেয্যা’’তি, ঊনৰীসতিৰস্সং, ‘‘সমগ্গেন সঙ্ঘেন চীৰরং দত্ৰা’’তি ভিক্খূনং অট্ঠ, ভিক্খুনীনং পন ‘‘নচ্চং ৰা গীতং ৰা’’তিআদি চ, ‘‘যা পন ভিক্খুনী অন্তোৰস্স’’ন্তিআদি চ, ‘‘যা পন ভিক্খুনী ৰস্সংৰুত্থা’’তিআদি চাতি দ্ৰযং, ‘‘যা পন ভিক্খুনী পারিৰাসিকছন্দদানেনা’’তিআদি চাতি চত্তারি, আল়ৰিযং অনুপসম্পন্নেন উত্তরি দিরত্ততিরত্তং, ‘‘পথৰিং খণেয্য ৰা’’তিআদি, ভূতগামপাতব্যতায, ‘‘জানং সপ্পাণকং উদক’’ন্তি চত্তারি, কোসম্বিযং অঞ্ঞৰাদকে ৰিহেসকে, যাৰদ্ৰারকোসা অগ্গল়ট্ঠপনায, সুরামেরযপানে, অনাদরিযে, ‘‘যো পন ভিক্খু ভিক্খূহি সহধম্মিক’’ন্তিআদি চাতি পঞ্চ, কপিলৰত্থুম্হি ‘‘ভিক্খুনুপস্সযং গন্ত্ৰা’’তিআদি, ‘‘অগিলানেন ভিক্খুনা চাতুমাস’’ন্তিআদি, ‘‘অট্ঠিমযং ৰা দন্তমযং ৰা’’তিআদি তীণি ভিক্খূনং, ভিক্খুনীনং পন ‘‘উদকসুদ্ধিকং পনা’’তিআদি, ‘‘ওৰাদায ৰা’’তিআদীতি দ্ৰে, ভগ্গেসু ‘‘অগিলানো ৰিসিব্বনাপেক্খো’’তিআদি একন্তি এতানি বাত্তিংসেৰ পাচিত্তিযানি.

৮০২. দ্ৰে গারয্হাতি ‘‘ভিক্খু পনেৰ কুলেসূ’’তিআদি, ‘‘যানি খো পন তানি আরঞ্ঞকানী’’তিআদি চাতি দ্ৰে পাটিদেসনীযা. তযো সেখাতি কোসম্বিযং ন সুরুসুরুকারকং, ভগ্গেসু ন সামিসেন হত্থেন পানীযথালকং, ন সসিত্থকং পত্তধোৰনন্তি তীণি সেখিযানি. ছপ্পঞ্ঞাসেৰ সিক্খাপদানি পিণ্ডিতানি ৰেসালিযাদীসু ছসু নগরেসু পঞ্ঞত্তানি ভৰন্তীতি যোজনা.

৮০৩. সত্তসু নগরেসু পঞ্ঞত্তানি এতানি সব্বানেৰ সিক্খাপদানি পন অড্ঢুড্ঢানি সতানেৰ ভৰন্তি. সাৰত্থিযং পঞ্ঞত্তেহি চতুনৰুতাধিকদ্ৰিসতসিক্খাপদেহি সদ্ধিং ছসু নগরেসু পঞ্ঞত্তানি ছপঞ্ঞাস সিক্খাপদানি পঞ্ঞাসাধিকানি তীণি সতানি ভৰন্তীতি অত্থো. অড্ঢেন চতুত্থং যেসং তানি অড্ঢুড্ঢানি.

৮০৪-১০. এৰং নিদানৰসেন নগরং দস্সেত্ৰা ইদানি নিদানমঞ্ঞমসেসেত্ৰা উভতোৰিভঙ্গাগতানং সব্বেসং সিক্খাপদানং কেৰলং পিণ্ডৰসেন গণনং দস্সেতুমাহ ‘‘সিক্খাপদানি ভিক্খূন’’ন্তিআদি.

৮১১. এৰং সব্বসিক্খাপদানং নিদানঞ্চ গণনঞ্চ দস্সেত্ৰা ইদানি অসাধারণানি দস্সেতুমাহ ‘‘ছচত্তালীসা’’তিআদি. ভিক্খূনং ভিক্খুনীহি অসাধারণভাৰং মহেসিনা গমিতানি সিক্খাপদানি ছচত্তালীসেৰ হোন্তীতি যোজনা. ইমিনা উদ্দেসমাহ.

৮১৪. ‘‘ছ চ সঙ্ঘাদিসেসা’’তিআদীহি দ্ৰীহি গাথাহি নিদ্দেসং দস্সেত্ৰা ‘‘ৰিস্সট্ঠী’’তিআদিনা পটিনিদ্দেসমাহ.

৮১৫. ‘‘নিস্সগ্গিযে আদিৰগ্গস্মি’’ন্তি পদচ্ছেদো. ধোৰনন্তি অঞ্ঞাতিকায ভিক্খুনিযা চীৰরধোৰনং. পটিগ্গহোতি তস্সাযেৰ হত্থতো চীৰরপটিগ্গহণং.

৮১৬. আরঞ্ঞন্তি একূনতিংসতিমং সিক্খাপদং.

৮১৭. ভিক্খূনং, ভিক্খুনীনঞ্চ ৰুত্তানি সব্বানি পাচিত্তিযানি গণনাৰসা অট্ঠাসীতিসতং ভৰন্তীতি যোজনা. অট্ঠাসীতিসতন্তি ভিক্খুনিপাতিমোক্খাগতং ছসট্ঠিসতপাচিত্তিযং ৰক্খমানেহি ভিক্খুনিযতেহি বাৰীসতিপাচিত্তিযেহি সদ্ধিং অট্ঠাসীতিসতং হোতি. ততোতি অট্ঠাসীতাধিকসতপাচিত্তিযতো নিদ্ধারিতানি এতানি দ্ৰাৰীসতি খুদ্দকানি ভিক্খূনং পাতিমোক্খকে ভৰন্তীতি যোজনা.

৮১৮. ভিক্খুনিৰগ্গোতি ভিক্খুনীনং ওৰাদৰগ্গো. পরম্পরভোজনে পঞ্ঞত্তং সিক্খাপদং পরম্পরভোজনং, পরম্পরভোজনেন সহ ৰত্ততীতি সপরম্পরভোজনো.

৮২২. ‘‘একতো পন পঞ্ঞত্তা’’তিআদি নিগমনং. ভিক্খুনীহি অসাধারণতং গতা একতোৰ পঞ্ঞত্তা ইমে ইমানি সিক্খাপদানি পিণ্ডিতানি ছচত্তালীস হোন্তীতি যোজনা.

৮২৩. মহেসিনা ভিক্খূহি অসাধারণভাৰং গমিতানি ভিক্খুনীনং সিক্খাপদানি পরিপিণ্ডিতানি সতং, তিংস চ ভৰন্তীতি যোজনা.

৮২৪. এৰং উদ্দিট্ঠানং নিদ্দেসমাহ ‘‘পারাজিকানী’’তিআদিনা. পারাজিকানি চত্তারীতি উব্ভজাণুমণ্ডলিকৰজ্জপটিচ্ছাদিকউক্খিত্তানুৰত্তিকঅট্ঠৰত্থুকসঙ্খাতানি চত্তারি পারাজিকানি.

৮২৬. দ্ৰীহি গাথাহি নিদ্দিট্ঠানং পটিনিদ্দেসো ‘‘ভিক্খুনীনং তু সঙ্ঘাদিসেসেহী’’তিআদি. চতুন্নং পারাজিকানং উদ্দেসৰসেনেৰ পাকটত্তা পটিনিদ্দেসে অগ্গহণং. আদিতো ছাতি উস্সযৰাদিকাদযো ছ সঙ্ঘাদিসেসা. ‘‘আদিতো’’তি ইদং ‘‘যাৰততিযকা’’তি ইমিনাপি যোজেতব্বং, অট্ঠসু যাৰততিযকেসু পুরিমানি চত্তারি সিক্খাপদানীতি ৰুত্তং হোতি.

৮২৭. সত্তঞ্ঞদত্থিকাদীনীতি আদি-সদ্দেন অঞ্ঞদত্থিকসিক্খাপদতো পচ্ছিমানি চত্তারি, পুরিমানি ‘‘অঞ্ঞং ৰিঞ্ঞাপেয্য, অঞ্ঞং চেতাপেয্যা’’তি দ্ৰে চ গহিতানি. পত্তো চেৰাতি পঠমং পত্তসন্নিচযসিক্খাপদমাহ. দুতিযৰগ্গে পুরিমসিক্খাপদদ্ৰযং ‘‘গরুং লহু’’ন্তি ইমিনা গহিতং.

৮২৮. ইধ ভিক্খুনিপাতিমোক্খে এতানি পন দ্ৰাদসেৰ নিস্সগ্গিযানি সত্থারা ভিক্খুনীনং ৰসেন একতো পঞ্ঞত্তানীতি যোজনা.

৮২৯-৩০. ‘‘সব্বেৰ গণনাৰসা’’তিআদি নিগমনং. ভিক্খূহি অসাধারণতং গতা ভিক্খুনীনং একতো পঞ্ঞত্তা সতং, তিংস ভৰন্তীতি যোজনা.

৮৩১-৩. ‘‘অসাধারণা উভিন্ন’’ন্তি পদচ্ছেদো. উভিন্নং অসাধারণসিক্খাপদানি সতঞ্চ সত্ততি চ ছ চ ভৰন্তি. এৰমুদ্দিট্ঠানং নিদ্দেসো ‘‘পারাজিকানি চত্তারী’’তিআদি. ভিক্খূহি অসাধারণানি ভিক্খুনীনং চত্তারি পারাজিকানি. দসচ্ছ চাতি ভিক্খূহি অসাধারণানি ভিক্খুনীনং সঙ্ঘাদিসেসা দস, ভিক্খুনীহি অসাধারণানি ভিক্খূনং ৰিস্সট্ঠিআদিকা সঙ্ঘাদিসেসা ছ চাতি সঙ্ঘাদিসেসা সোল়স.

অনিযতা দুৰে চেৰাতি ভিক্খুনীহি অসাধারণানি ভিক্খূনং অনিযতা দ্ৰে চ. নিস্সগ্গা চতুৰীসতীতি ভিক্খুনীহি অসাধারণানি ভিক্খূনং দ্ৰাদস, ভিক্খূহি অসাধারণানি ভিক্খুনীনং দ্ৰাদসাতি এৰং নিস্সগ্গিযা চতুৰীসতি চ. সতং অট্ঠারস খুদ্দকাতি ভিক্খুনীহি অসাধারণানি ভিক্খূনং বাৰীসতি, ভিক্খূহি অসাধারণানি ভিক্খুনীনং ছন্নৰুতীতি অট্ঠারসাধিকসতং খুদ্দকানি চ. এত্থাতি ইমস্মিং অসাধারণসঙ্গহে.

দ্ৰাদসেৰ চ গারয্হাতি ভিক্খুনীহি অসাধারণানি ভিক্খূনং চত্তারি, ভিক্খূহি অসাধারণানি ভিক্খুনীনং অট্ঠাতি এতে পাটিদেসনীযা চাতি ইমে ছসত্ততিঅধিকানি সতসিক্খাপদানি উভিন্নম্পি অসাধারণানীতি যোজনা.

৮৩৪. উভিন্নম্পি সাধারণানি সত্থুনা পঞ্ঞত্তানি সিক্খাপদানি সতঞ্চ সত্ততি চ চত্তারি চ ভৰন্তীতি পকাসিতাতি যোজনা.

৮৩৫-৬. পারাজিকানি চত্তারীতি মেথুনঅদিন্নাদানমনুস্সৰিগ্গহউত্তরিমনুস্সধম্মপারাজিকানি চত্তারি চ. সত্ত সঙ্ঘাদিসেসকাতি সঞ্চরিত্তঅমূলকঅঞ্ঞভাগিযা, চত্তারো যাৰততিযকা চাতি সঙ্ঘাদিসেসা সত্ত চ. অট্ঠারস চ নিস্সগ্গাতি নিস্সগ্গিযেসু পঠমে চীৰরৰগ্গে ধোৰনপটিগ্গহণসিক্খাপদদ্ৰযৰজ্জিতানি অট্ঠ, এল়কলোমৰগ্গে অট্ঠমনৰমদসমানীতি তযো, পত্তৰগ্গে পঠমপত্তৰস্সিকসাটিকআরঞ্ঞকসিক্খাপদত্তযস্স ৰজ্জিতানি সত্ত চাতি ইমানি অট্ঠারস নিস্সগ্গিযসিক্খাপদানি চ. সমসত্ততি খুদ্দকাতি –

‘‘সব্বো ভিক্খুনিৰগ্গোপি…পে… দ্ৰাৰীসতি ভৰন্তি হী’’তি. (উ. ৰি. ৮১৮-৮২১) –

ৰুত্তা ভিক্খূনং ভিক্খুনীহি অসাধারণাতি ইমেহি বাৰীসতিপাচিত্তিযেহি ৰজ্জিতানি অৰসেসানি সত্ততি পাচিত্তিযানি চ উভযসাধারণৰসেন পঞ্ঞত্তানি. পঞ্চসত্ততি সেখিযাপি চাতি উভিন্নং ভিক্খুভিক্খুনীনং সমসিক্খতা সাধারণসিক্খাপদানি সব্বসো সতং, সত্ততি, চত্তারি চ হোন্তীতি যোজনা.

ইতি উত্তরে লীনত্থপকাসনিযা

সাধারণাসাধারণকথাৰণ্ণনা নিট্ঠিতা.