সেদমোচনকথাৰণ্ণনা

৬৭৯. সুণতং সুণন্তানং ভিক্খূনং পটুভাৰকরা ৰিনযৰিনিচ্ছযে পঞ্ঞাকোসল্লসাধিকা ততোযেৰ ৰরা উত্তমা. সেদমোচনগাথাযোতি অত্থপচ্চত্থিকানং, সাসনপচ্চত্থিকানঞ্চ ৰিস্সজ্জেতুমসক্কুণেয্যভাৰেন চিন্তযন্তস্স খিন্নসরীরা সেদে মোচেন্তীতি সেদমোচনা. অত্থানুগতপঞ্হা উপালিত্থেরেন ঠপিতা পঞ্হগাথাযো, তপ্পটিবদ্ধা ৰিস্সজ্জনগাথাযো চ ইতো পরং ৰক্খামীতি যোজনা.

৬৮১. কবন্ধং নাম অসীসং উরসি জাতঅক্খিমুখসরীরং. যথাহ – ‘‘অসীসকং কবন্ধং, যস্স উরে অক্খীনি চেৰ মুখঞ্চ হোতী’’তি (পরি. অট্ঠ. ৪৭৯). মুখেন করণভূতেন. কত্ৰাতি সেৰিত্ৰা.

৬৮২. তস্স ভিক্খুনো কথং পারাজিকো সিযা পারাজিকধম্মো কথং সিযা.

৬৮৪. কিঞ্চীতি পাদং ৰা পাদারহং ৰা পরসন্তকং. পরঞ্চ ন সমাদপেতি ‘‘অমুকস্স ইত্থন্নামং ভণ্ডং অৰহরাহী’’তি পরং ন আণাপেয্য.

৬৮৫. পরস্স কিঞ্চি নাদিযন্তোতি সম্বন্ধো. আণত্তিঞ্চাতি চ-সদ্দেন সংৰিধানং, সঙ্কেতঞ্চ সঙ্গণ্হাতি.

৬৮৬. গরুকং ভণ্ডন্তি পাদগ্ঘনকভাৰেন গরুভণ্ডং. ‘‘পরিক্খার’’ন্তি এতস্স ৰিসেসনং. পরস্স পরিক্খারন্তি পরসন্তকং যং কিঞ্চি পরিক্খারং.

৬৯২. মনুস্সুত্তরিকে ধম্মেতি উত্তরিমনুস্সধম্মৰিসযে. কতিকং কত্ৰানাতি ‘‘এৰং নিসিন্নে এৰং ঠিতে এৰং গমনে অত্থং আৰিকরোতী’’তিআদিং কত্ৰা. সম্ভাৰনাধিপ্পাযোতি ‘‘অরহা’’তি গহেত্ৰা মহাসম্ভাৰনং করোতীতি অধিপ্পাযো হুত্ৰা. অতিক্কমতি চেতি তথা কতং কতিকং অতিক্কমতি চে, তথারূপং নিসজ্জং ৰা ঠানং ৰা গমনং ৰা করোতীতি অত্থো. চুতোতি তথারূপং নিসজ্জাদিং দিস্ৰা কেনচি মনুস্সজাতিকেন ‘‘অরহা’’তি তঙ্খণে ঞাতে সো পুগ্গলো পারাজিকং আপজ্জতি.

৬৯৩. একৰত্থুকা কথং ভৰেয্যুন্তি যোজনা.

৬৯৪. ইত্থিযাতি একিস্সা ইত্থিযা. পটিপজ্জন্তোতি একক্খণে অঞ্ঞেন পুরিসেন ৰুত্তসাসনং ৰত্ৰা, ইমিনা চ ‘‘পটিগ্গণ্হাতি, ৰীমংসতী’’তি অঙ্গদ্ৰযস্স পুরিমসিদ্ধতং দীপেতি ইমস্স পচ্চাহরণকতঞ্চ. কাযসংসগ্গং সমাপজ্জিত্ৰা দুট্ঠুল্লং ৰত্ৰা অত্তকামপারিচরিযায ৰণ্ণং ভণন্তো.

৬৯৫. যথাৰুত্তং ৰত্তং অচরিত্ৰাতি ভগৰতা ৰুত্তং পরিৰাসাদিৰত্তং অচরিত্ৰা.

৬৯৬. ভিক্খুনীহি অসাধারণসিক্খাপদত্তা আহ ‘‘নত্থি সঙ্ঘাদিসেসতা’’তি.

৬৯৭. যেন কুদ্ধো পসংসিতোতি এত্থ ‘‘নিন্দিতো চা’’তি সেসো.

৬৯৮. তিত্থিযানং ৰণ্ণম্হি ভঞ্ঞমানে যো কুজ্ঝতি, সো আরাধকোতি যোজনা, পরিতোসিতো পসংসিতোতি অধিপ্পাযো. তিত্থিযপুব্বো ইমস্মিং সাসনে পব্বজ্জং লভিত্ৰা তিত্থিযানং ৰণ্ণস্মিং ভঞ্ঞমানে সুত্ৰা সচে কুপ্পতি অনত্তমনং করোতি, আরাধকো সঙ্ঘারাধকো সঙ্ঘং পরিতোসেন্তো হোতি, সম্বুদ্ধস্স ৰণ্ণস্মিং ভঞ্ঞমানে যদি কুজ্ঝতি, নিন্দিতোতি যোজনা. এত্থ সম্বুদ্ধস্সাতি উপলক্খণং.

৭০১. গহেত্ৰাতি পটিগ্গহেত্ৰা.

৭৫১. ‘‘ন রত্তচিত্তো’’তিআদিনা পুরিমানং তিণ্ণং পারাজিকানং ৰীতিক্কমচিত্তুপ্পাদমত্তস্সাপি অভাৰং দীপেতি. মরণাযাতি এত্থ ‘‘মনুস্সজাতিকস্সা’’তি ইদং পারাজিকপকরণতোৰ লব্ভতি. তস্সাতি কিঞ্চি দেন্তস্স. তন্তি তথা দীযমানং.

৭৫২. ‘‘পরাজযো’’তি ইদং অভব্বপুগ্গলেসু সঙ্ঘভেদকস্স অন্তোগধত্তা ৰুত্তং. সলাকগ্গাহেনাপি সঙ্ঘং ভিন্দন্তো সঙ্ঘভেদকোৰ হোতি.

৭৫৩. অদ্ধযোজনে যং তিণ্ণং চীৰরানং অঞ্ঞতরং একং চীৰরং নিক্খিপিত্ৰানাতি যোজনা.

৭৫৪. সুপ্পতিট্ঠিতনিগ্রোধসদিসে রুক্খমূলকে তিচীৰরং নিক্খিপিত্ৰা অদ্ধযোজনে অরুণং উট্ঠাপেন্তস্সাতি যোজনা.

৭৫৫. কাযিকা নানাৰত্থুকাযো সম্বহুলা আপত্তিযো অপুব্বং অচরিমং একক্খণে কথং ফুসেতি যোজনা.

৭৫৭. ৰাচসিকা ন কাযিকা নানাৰত্থুকাযো সম্বহুলা আপত্তিযো অপুব্বং অচরিমং একক্খণে কথং ফুসেতি যোজনা.

৭৫৮. ৰিনযনসত্থেতি ৰিনযপিটকে. তস্স ভিক্খুস্স.

৭৫৯. ‘‘ইত্থিযা’’তিআদীসু সহত্থে করণৰচনং. ইত্থিযা ৰা পুরিসেন ৰা পণ্ডকেন ৰা নিমিত্তকে মেথুনং ন সেৰন্তো ন পটিসেৰন্তো মেথুনপচ্চযা চুতোতি যোজনা.

৭৬০. কাযসংসগ্গোযেৰ কাযসংসগ্গতা, তং আপন্না. অট্ঠৰত্থুকং ছেজ্জন্তি এৰংনামকং পারাজিকং.

৭৬২. সমযে পিট্ঠিসঞ্ঞিতেতি গিম্হানং পচ্ছিমমাসস্স পঠমদিৰসতো যাৰ হেমন্তস্স পঠমদিৰসো, এত্থন্তরে সত্তমাসমত্তে পিট্ঠিসঞ্ঞিতে সমযে. ‘‘মাতুযাপি চা’’তি ৰত্তব্বে ‘‘মাতরম্পি চা’’তি ৰুত্তং. সোযেৰ ৰা পাঠো.

৭৬৪. ‘‘অৰস্সুতহত্থতো হি পিণ্ডং গহেত্ৰা’’তি ইমিনা সঙ্ঘাদিসেসস্স ৰত্থুমাহ, লসুণন্তি পাচিত্তিযস্স ৰত্থুং, মনুস্সমংসন্তি থুল্লচ্চযৰত্থুং, অকপ্পমঞ্ঞন্তি দুক্কটৰত্থুং. অকপ্পমঞ্ঞন্তি এত্থ ‘‘মংস’’ন্তি সেসো. ‘‘সব্বে একতো’’তি পদচ্ছেদো. একতোতি এত্থ ‘‘মদ্দিত্ৰা’’তি সেসো, অকপ্পিযমংসেহি সদ্ধিং একতো মদ্দিত্ৰা খাদতীতি অত্থো. সব্বমেতং ‘‘গহেত্ৰা, মদ্দিত্ৰা, খাদতী’’তি কিরিযানং কম্মৰচনং. মনুস্সমংসঞ্চাতি এত্থ চ-সদ্দো পচ্চেকং যোজেতব্বো হোতি. তস্সাতি ভিক্খুনিযা. সঙ্ঘাদিসেসপাচিত্তিযদুক্কটপাটিদেসনীযথুল্লচ্চযানি একক্খণে হোন্তি.

৭৬৫. ‘‘পুগ্গলো একো’’তি পদচ্ছেদো. দ্ৰেপি চ পুণ্ণৰস্সাতি পরিপুণ্ণৰীসতিৰস্সা চ দ্ৰে সামণেরা. একাৰ তেসং পন কম্মৰাচাতি তেসং উভিন্নং সামণেরানং একেন আচরিযেন একাৰ উপসম্পদকম্মৰাচা কতা. একস্সাতি একস্সাপি সামণেরস্স. কম্মন্তি উপসম্পদকম্মং. ন রূহতেতি ন সম্পজ্জতি, কিমেত্থ কারণং, ৰদ ভদ্দমুখাতি অধিপ্পাযো.

৭৬৬. মহিদ্ধিকেসূতি দ্ৰীসু সামণেরেসু. সচে পন একো কেসগ্গমত্তম্পি আকাসগো আকাসট্ঠো হোতি, আকাসগতস্সেৰ কতং তং উপসম্পদকম্মং নেৰ রূহতি নেৰ সম্পজ্জতি, ভূমিগতস্স রূহতীতি যোজনা.

৭৬৭. ইদ্ধিযা আকাসে ঠিতেন সঙ্ঘেন ভূমিগতস্স সামণেরস্স উপসম্পদকম্মং ন কাতব্বং. যদি করোতি, কুপ্পতীতি যোজনা. ইদঞ্চ সব্বকম্মানং সাধারণলক্খণং. যথাহ – ‘‘সঙ্ঘেনাপি আকাসে নিসীদিত্ৰা ভূমিগতস্স কম্মং ন কাতব্বং. সচে করোতি, কুপ্পতী’’তি (পরি. অট্ঠ. ৪৮১).

৭৬৮. ৰত্থং কপ্পকতঞ্চ ন হোতি, রত্তঞ্চ ন হোতি, কেসকম্বলাদি অকপ্পিযঞ্চ হোতি, নিৰত্থস্স পনাপত্তি তং পন নিৰত্থস্স ভিক্খুনো আপত্তি হোতি. অনাপত্তি কথং সিযা, ৰদ ভদ্দমুখাতি যোজনা.

৭৬৯. এত্থ এতস্মিং অকপ্পিযৰত্থুধারণে তন্নিমিত্তং. অচ্ছিন্নচীৰরস্স ভিক্খুনো অনাপত্তি সিযাতি যোজনা. ‘‘কিঞ্চিপী’’তিআদিনা ৰুত্তমেৰত্থং সমত্থেতি. অস্স অচ্ছিন্নচীৰরস্স ভিক্খুস্স অকপ্পিযং নাম কিঞ্চিপি চীৰরং ন ৰিজ্জতি, তস্মা অনাপত্তীতি অধিপ্পাযো.

৭৭০. কুতোপি চ পুরিসস্স হত্থতো ভোজনস্স কিঞ্চি ন গণ্হতি, ভোজনতো কিঞ্চিপি সযম্পি কস্সচি পুরিসস্স ন দেতি, তথাপি গরুকং ৰজ্জং সঙ্ঘাদিসেসাপত্তিং উপেতি আপজ্জতি, তং কথমাপজ্জতি, ত্ৰং যদি ৰিনযে কুসলো অসি, মে ময্হং ৰদ এতং কারণং কথেহীতি যোজনা. হৰেতি নিপাতমত্তং.

৭৭১. যা পন ভিক্খুনী অঞ্ঞায ভিক্খুনিযা ‘‘ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা’’তিআদিনা (পাচি. ৭০৫) সঙ্ঘাদিসেসমাতিকায ৰুত্তনযেন উয্যোজিতা অৰস্সুতম্হা পুরিসপুগ্গলা যং কিঞ্চি ভোজনং আদায পটিগ্গহেত্ৰা সচে ভুঞ্জতি, সা তথা ভুঞ্জন্তী যায উয্যোজিতা ভুঞ্জতি, তস্সা উয্যোজিকায ধীরা ৰিনযধরা পণ্ডিতা সঙ্ঘাদিসেসং কথযন্তি তস্সা উয্যোজিতায ভোজনপরিযোসানে উয্যোজিকায সঙ্ঘাদিসেসং ৰদন্তীতি যোজনা. যথাহ – ‘‘তস্সা হি ভোজনপরিযোসানে উয্যোজিকায সঙ্ঘাদিসেসো হোতী’’তি (পরি. অট্ঠ. ৪৮১).

৭৭২. তং কথং যদি বুজ্ঝসি জানাসি, সাধুকং ব্রূহি কথেহীতি যোজনা.

৭৭৩. নিসেৰিতেতি তায উয্যোজিতায ভিক্খুনিযা তস্স পুরিসপুগ্গলস্স হত্থতো পটিগ্গহিতে তস্মিং দন্তপোনে পরিভুত্তে উয্যোজিকা লহুৰজ্জং আপজ্জতীতি অত্থো.

৭৭৫. ‘‘উক্খিত্তকো’’তি ইমিনা আপত্তিৰজ্জমাহ. যথাহ – ‘‘তেন হি সদ্ধিং ৰিনযকম্মং নত্থি, তস্মা সো সঙ্ঘাদিসেসং আপজ্জিত্ৰা ছাদেন্তো ৰজ্জং ন ফুসতী’’তি.

৭৭৬. সপ্পাণপ্পাণজন্তি সপ্পাণকে চ অপ্পাণকে চ জাতং. নেৰ জঙ্গমন্তি পাদেহি ভূমিযং নেৰ চরন্তং. ন ৰিহঙ্গমন্তি আকাসে পক্খং পসারেত্ৰা ন চরন্তং. দ্ৰিজন্তি দ্ৰীহি পচ্চযেহি, দ্ৰিক্খত্তুং ৰা জাতত্তা দ্ৰিজং. কন্তন্তি মনোহরং. অকন্তন্তি অমনোহরং.

৭৭৭. সপ্পাণজো সদ্দো চিত্তজো ৰুত্তো, অপ্পাণজো উতুজো সদ্দো ৰুত্তো, সো পন দ্ৰীহেৰ পচ্চযেহি জাতত্তা ‘‘দ্ৰিজো’’তি মতোতি যোজনা.

৭৭৮. ‘‘ৰিনযে’’তিআদিগাথা ৰণ্ণিতত্থাযেৰ.

ইতি উত্তরে লীনত্থপকাসনিযা

সেদমোচনকথাৰণ্ণনা নিট্ঠিতা.