আপত্তিসমুট্ঠানকথাৰণ্ণনা

৪০৫. আদিনাতি পঠমেন কাযসঙ্খাতেন সমুট্ঠানেন.

৪০৬-৭. দুক্কটাদযোতি আদি-সদ্দেন থুল্লচ্চযসঙ্ঘাদিসেসা গহিতা. যথাহ – ‘‘পযোগে দুক্কটং. একং পিণ্ডং অনাগতে আপত্তি থুল্লচ্চযস্স. তস্মিং পিণ্ডে আগতে আপত্তি সঙ্ঘাদিসেসস্সা’’তি (পরি. ২৭৭). ৰিকালে পন পাচিত্তীতি ৰিকালভোজনপাচিত্তি. অঞ্ঞাতিহত্থতোতি অঞ্ঞাতিকায ভিক্খুনিযা অন্তরঘরং পৰিট্ঠায হত্থতো. গহেত্ৰাতি খাদনীযং ৰা ভোজনীযং ৰা সহত্থা পটিগ্গহেত্ৰা. ‘‘পঞ্চ ইমা আপত্তিযো’’তি পদচ্ছেদো.

৪০৮. দুতিযেনাতি ৰাচাসঙ্খাতেন সমুট্ঠানেন.

৪০৯-১০. সমাদিসতি কথেতি চে. সব্বথা ৰিপন্নন্তি অদেসিতৰত্থুকতাদিনা সব্বপ্পকারেন ৰিপন্নপ্পদেসং. কুটিন্তি সঞ্ঞাচিকায কুটিং. যথাহ পরিৰারে ‘‘তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমন’’ন্তি (পরি. ২৭৮). পদসোধম্মং মূলং সমুট্ঠানং যস্স পাচিত্তিযস্সাতি তথা ৰুত্তং, তেন পদসোধম্মমূলেন, সহত্থে চেতং করণৰচনং.

৪১১. ততিযেন সমুট্ঠানেনাতি কাযৰাচাসঙ্খাতেন সমুট্ঠানেন.

৪১২. সংৰিদহিত্ৰানাতি সদ্ধিং ৰিদহিত্ৰা, ‘‘কুটিং করোমা’’তি অঞ্ঞেহি সদ্ধিং মন্তেত্ৰাতি অত্থো.

৪১৩. ৰত্ৰাতি অত্তনো অত্থায ৰিঞ্ঞাপেত্ৰা. ভিক্খুনিন্তি ভিক্খূনং ভুঞ্জনট্ঠানে ঠত্ৰা ‘‘ইধ সূপং দেথ, ইধ ওদনং দেথা’’তি ৰোসাসমানং উপাসকানং ৰত্ৰা দাপেন্তিং ভিক্খুনিং. ন নিৰারেত্ৰাতি ‘‘অপসক্ক তাৰ, ভগিনি, যাৰ ভিক্খূ ভুঞ্জন্তী’’তি অনপসাদেত্ৰা ভুঞ্জতোতি যোজনা.

৪১৪. চতুত্থেন কাযচিত্তসমুট্ঠানেন কতি আপত্তিযো সিযুন্তি যোজনা.

৪১৭. পঞ্চমেনাতি ৰাচাচিত্তসমুট্ঠানেন. ৰদন্তি ৰদন্তো সমুদাচরন্তো.

৪১৮. কুটিন্তি নিদস্সনমত্তং, অদেসিতৰত্থুকং পমাণাতিক্কন্তং সারম্ভং অপরিক্কমনং সেনাসনম্পি গহণং ৰেদিতব্বং.

৪১৯. ৰাচেতি পদসো ধম্মন্তি এত্থ ‘‘অনুপসম্পন্ন’’ন্তি সেসো. যথাহ – ‘‘ভিক্খু অকপ্পিযসঞ্ঞী অনুপসম্পন্নং পদসো ধম্মং ৰাচেতী’’তি (পরি. ২৮১). দৰকম্যতা ৰদন্তস্সাতি জাতিআদীহি অক্কোসৰত্থূহি কীল়াধিপ্পাযেন ৰদন্তস্স. দৰকম্যতাতি চ ‘‘পটিসঙ্খা যোনিসো’’তিআদীসু (ম. নি. ১.২২, ২৪, ৪২২; অ. নি. ৬.৫৮; ৮.৯; মহানি. ১৯৯, ২০৬; ধ. স. ১৩৫৫; ৰিভ. ৫১৮) ৰিয য-কারলোপেন নিদ্দেসো.

৪২০. ছট্ঠেন কাযৰাচাচিত্তসমুট্ঠানেন. সংৰিদহিত্ৰানাতি সংৰিধায, ‘‘ত্ৰঞ্চ অহঞ্চ একতো অৰহরিস্সামা’’তি সম্মন্তনং কত্ৰা. ভণ্ডং হরতীতি ‘‘ভারিযং ত্ৰং একং পস্সং গণ্হ, অহং ইম’’ন্তি ৰত্ৰা তেন সহ ঠানা চাৰেতি চে.

৪২৩. ইধ ইমস্মিং সাসনে. ৰিমতূপরমং পরমন্তি এত্থ ‘‘কপ্পিযং নু খো, অকপ্পিয’’ন্তি ৰা ‘‘আপত্তি নু খো, অনাপত্তী’’তি ৰা ‘‘ধম্মো নু খো, অধম্মো’’তি ৰা এৰমাদিনা নযেন ৰিৰিধেনাকারেন পৰত্তা ৰিমতি ৰিচিকিচ্ছা ৰিমতি. ৰিমতিং উপরমেতি ৰিনাসেতীতি ৰিমতূপরমং. পরমং উত্তমং. উত্তরন্তি ৰিভঙ্গখন্ধকাগতানং নিদানাদিৰিনিচ্ছযানং পঞ্হউত্তরভাৰেন ঠিতত্তা উত্তরং. ইমং উত্তরং নাম পকরণং যো উত্তরতি পঞ্ঞায ওগাহেত্ৰা পরিযোসাপেতি. ইধ ‘‘উত্তরং উত্তর’’ন্তি পদদ্ৰযে একং গুণনিদস্সনং, একং সত্থনিদস্সনন্তি গহেতব্বং. সুনযেন যুতো সো পুগ্গলো ৰিনযং পিটকং উত্তরতীতি সম্বন্ধো. কিং ৰিসিট্ঠন্তি আহ ‘‘সুনয’’ন্তিআদি. সুট্ঠু চারিত্তৰারিত্তদল়্হীকরণসিথিলকরণভেদা পঞ্ঞত্তিঅনউপঞ্ঞত্তাদিনযা এত্থাতি সুনযো, তং. সুট্ঠু নীযতি ৰিনিচ্ছযো এতেনাতি সুনযো, উত্তরৰিনিচ্ছযো, তেন. ৰিনিচ্ছযাৰবোধেন সংযুত্তো সমন্নাগতো. দুক্খেন উত্তরীযতীতি দুত্তরং. পাতিমোক্খসংৰরসীলদীপকত্তেন সমাধিপঞ্ঞানিব্বানসঙ্খাতউত্তরপ্পত্তিযা পতিট্ঠাভাৰতো উত্তরং উত্তরতি ওগাহেত্ৰা পরিযোসানং পাপুণাতীতি অত্থো.

ইধ যো ৰিমতূপরমং পরমং উত্তরং উত্তরং নাম পকরণং উত্তরতি, সুনযেন যুতো সো পুগ্গলো সুনযং দুত্তরং উত্তরং ৰিনযং উত্তরতীতি যোজনা. চ-সদ্দেন সত্থন্তরসমুচ্চযত্থেন ইমমত্থং দীপেতি. সেয্যথিদং, ইধ যো সুনযং দুত্তরং উত্তরং ৰিনযং উত্তরতি, সুনযেন যুতো সো পুগ্গলো ৰিমতূপরমং পরমং উত্তরং উত্তরং নাম পকরণং উত্তরতীতি. ইমিনা যো উত্তরং জানাতি, সো ৰিনযং জানাতি. যো ৰিনযং জানাতি, সো উত্তরং জানাতীতি উত্তরপকরণস্স ৰিনযপিটকজাননে অচ্চন্তূপকারিতা ৰিভাৰিতাতি দট্ঠব্বং.

ইতি উত্তরে লীনত্থপকাসনিযা

আপত্তিসমুট্ঠানকথাৰণ্ণনা নিট্ঠিতা.