ভিক্খুনিক্খন্ধককথাৰণ্ণনা

২৯৫২. ৰিৰরিত্ৰান চীৰরং অপনেত্ৰা.

২৯৫৩. যং কিঞ্চি সম্পযোজেন্তিযাতি যং কিঞ্চি অনাচারং করোন্তিযা. ততোতি তেন অনাচারসঙ্খাতেন অসদ্ধম্মেন. ভাসন্তিযাতি ৰাচায ভাসন্তিযা.

২৯৫৪-৬. দীঘন্তি একপরিক্খেপতো দীঘং. ৰিলীৰেন চ পট্টেনাতি সণ্হেহিপি ৰিলীৰেহি কতপট্টেন. চম্মপট্টেনাতি চম্মমযপট্টেন. দুস্সপট্টেনাতি সেতৰত্থেন. দুস্সৰেণিযাতি দুস্সেন গণ্ঠিতৰেণিযা. দুস্সৰট্টিযাতি দুস্সেন কতৰট্টিযা. ন ফাসুকা নমেতব্বাতি মজ্ঝিমস্স তনুভাৰত্থায গামদারিকা ৰিয ফাসুলিকা ন নামেতব্বা. জঘনন্তি মুত্তকরণপ্পদেসং. অট্ঠিকাদিনাতি গোজাণুট্ঠিকাদিনা. ন ঘংসাপেয্যাতি ন ঘট্টাপেয্য. ‘‘অট্ঠিকাদিনা’’তি ইদং ‘‘ন ঘংসাপেয্যা’’তি ইমিনা চ ‘‘কোট্টাপেতী’’তি ইমিনা কিরিযাপদেন চ সম্বন্ধিতব্বং.

২৯৫৭. ‘‘কোট্টাপেতী’’তি ইদং ‘‘হত্থং ৰা’’তিআদীহি উপযোগন্তপদেহি পচ্চেকং যোজেতব্বং. হত্থন্তি অগ্গবাহং. হত্থকোচ্ছন্তি পিট্ঠিহত্থং. পাদন্তি জঙ্ঘং.

২৯৫৮. ন মুখং লিম্পিতব্বন্তি ছৰিপসাদকরেন তিলসাসপকক্কাদিনা অনেকৰিধেন লিম্পনেন ন লিম্পিতব্বং. ন চুণ্ণেতব্বন্তি মুখচুণ্ণলেপনং ন কাতব্বং. মনোসিলায মুখং লঞ্জন্তিযা আপত্তি সিযাতি যোজনা.

২৯৫৯. অঙ্গরাগো ন কাতব্বোতি হলিদ্দিকুঙ্কুমাদীহি সরীরচ্ছৰিরাগো ন কাতব্বো. অৰঙ্গং ন চ কাতব্বন্তি অঞ্জনং বহি অক্খিকোটিযা লেখং ঠপেত্ৰা ন অঞ্জিতব্বং. ন কাতব্বং ৰিসেসকন্তি গণ্ডপদেসে ৰিচিত্রসণ্ঠানং ৰিসেসকং ৰত্তভঙ্গং ন কাতব্বং.

২৯৬০. ওলোকনকতোতি ৰাতপানতো. রাগাতি কামরাগেন. ওলোকেতুন্তি অন্তরৰীথিং ৰিলোকেতুং, সালোকে ন চ ঠাতব্বন্তি যোজনা. সালোকে দ্ৰারং ৰিৰরিত্ৰা উপড্ঢকাযং দস্সেন্তীহি ন ঠাতব্বং. সনচ্চন্তি নটসমজ্জং.

২৯৬১. গণিকং ৰুট্ঠাপেন্তিযা ৰেসিং ৰুট্ঠাপেন্তিযা. ‘‘ৰিক্কিণন্তিযা’’তি ইদং ‘‘সুর’’ন্তিআদীহি উপযোগন্তপদেহি পচ্চেকং যোজেতব্বং.

২৯৬৩. ন চেৰুপট্ঠাপেতব্বোতি অত্তনো ৰেয্যাৰচ্চং নেৰ কারাপেতব্বো. তিরচ্ছানগতোপি দাসো ৰা দাসী ৰা তিরচ্ছানগতোপি কম্মকরো ৰা ন চেৰ উপট্ঠাপেতব্বো নেৰ অত্তনো ৰেয্যাৰচ্চং কারাপেতব্বো. অপি-সদ্দেন পগেৰ মনুস্সভূতোতি দীপেতি.

২৯৬৪. ‘‘সব্বনীলাদি’’ন্তি ইমিনা –

‘‘সব্বনীলকমঞ্জেট্ঠ-কণ্হলোহিতপীতকে;

মহানামমহারঙ্গ-রত্তেসূ’’তি. (ৰি. ৰি. ৫৯৮) –

ৰুত্তানি অকপ্পিযচীৰরানি সঙ্গহিতানি. ‘‘নমতকং নাম এল়কলোমেহি কতং অৰাযিমং চম্মখণ্ডপরিভোগেন পরিভুঞ্জিতব্ব’’ন্তি (চূল়ৰ. অট্ঠ. ২৬৪) অট্ঠকথায ৰুত্তত্তা, গণ্ঠিপদে চ ‘‘সন্থরণসদিসো পিলোতিকাহি কতো পরিক্খারৰিসেসো’’তি ৰুত্তত্তা চ নিপজ্জায পরিভুঞ্জিতব্বো পরিক্খারৰিসেসো নমতকং নাম.

২৯৬৫. ছন্নম্পি পুরিসব্যঞ্জনং ‘‘এত্থা’’তি চিন্তেত্ৰা রাগচিত্তেন ওলোকেন্তিযা দুক্কটং হোতি. সব্বন্তি ৰুত্তপ্পকারং সব্বং.

২৯৬৬. ভিক্খুং দূরতোৰ পস্সিত্ৰা তস্স ভিক্খুনো দূরতো ওক্কমিত্ৰান মগ্গো দাতব্বোতি যোজনা.

২৯৬৭. ভিক্খং চরন্তিযা ভিক্খুনিযা ভিক্খুং পস্সিত্ৰা পন যেন ভিক্খায চরতি, তং পত্তং নীহরিত্ৰা উপরি ছাদেত্ৰা ঠিতং সঙ্ঘাটিচীৰরং অপনেত্ৰা উক্কুজ্জং উদ্ধংমুখং কত্ৰা ভিক্খুনো দস্সেতব্বন্তি যোজনা.

২৯৬৮. উতুনীনং ভিক্খুনীনং উতুকালে সঞ্জাতপুপ্ফে কালে সংৰেল্লিকং কাতুং কচ্ছং বন্ধিতুং মহেসিনা কটিসুত্তকং অনুঞ্ঞাতন্তি যোজনা, ইমিনা অঞ্ঞস্মিং কালে কটিসুত্তকং বন্ধিতুং ন ৰট্টতীতি দীপেতি. যথাহ – ‘‘ন, ভিক্খৰে, ভিক্খুনিযা সব্বকালং কটিসুত্তকং ধারেতব্বং, যা ধারেয্য, আপত্তি দুক্কটস্স. অনুজানামি, ভিক্খৰে, উতুনিযা কটিসুত্তক’’ন্তি (চূল়ৰ. ৪২২).

২৯৬৯. ইত্থিপোসযুতন্তি ইত্থীহি ৰা পুরিসেহি ৰা ইত্থিপুরিসেহি ৰা যুত্তং. ইত্থিপোসযুত্তং হত্থৰট্টকমেৰ ৰা. পাটঙ্কীতি পটপোট্টলিকং.

২৯৭০. গরুধম্মেতি সঙ্ঘাদিসেসে. মানত্তন্তি পক্খমানত্তং. সম্মন্নিত্ৰাতি ঞত্তিদুতিযায কম্মৰাচায সম্মন্নিত্ৰা.

২৯৭১. যস্সা ইত্থিযা পব্বজিতকালে গব্ভো ৰুট্ঠাতি ৰিজাযতি যদি, পুত্তো চে, তস্সাপি দারকমাতু যাৰ সো দারকো ৰিঞ্ঞুতং পাপুণাতি, যাৰ খাদিতুং, ভুঞ্জিতুং, নহাযিতুঞ্চ অত্তনো ধম্মতায সক্কোতি, তাৰ দুতিযা ভিক্খুনী তথা সম্মন্নিত্ৰা দাতব্বাতি যোজনা.

২৯৭২. সা পন মাতা ভিক্খুনী অত্তনো পুত্তং পাযেতুং, ভোজেতুং, মণ্ডেতুং, উরে কত্ৰা সযিতুঞ্চ লভতীতি যোজনা.

২৯৭৩. দুতিযিকায ভিক্খুনিযা দারকেন সহসেয্যং ঠপেত্ৰা যথা অঞ্ঞেসু পুরিসেসু ৰত্তিতব্বং পটিপজ্জিতব্বং, তথা এৰ তস্মিং দারকে ৰত্তিতব্বন্তি যোজনা.

২৯৭৪. ৰিব্ভমেনেৰাতি অত্তনো রুচিযা সেতৰত্থানং গহণেনেৰ. যথাহ – ‘‘যস্মা সা ৰিব্ভন্তা অত্তনো রুচিযা খন্তিযা ওদাতানি ৰত্থানি নিৰত্থা, তস্মাযেৰ সা অভিক্খুনী, ন সিক্খাপচ্চক্খানেনা’’তি (চূল়ৰ. অট্ঠ. ৪৩৪). ইধাতি ইমস্মিং সাসনে.

২৯৭৫. গতাযাতি এত্থ ‘‘সকাৰাসা’’তি সেসো. যথাহ – ‘‘যা সা, ভিক্খৰে, ভিক্খুনী সকাৰাসা তিত্থাযতনং সঙ্কন্তা, সা আগতা ন উপসম্পাদেতব্বা’’তি. ন কেৰলং ন উপসম্পাদেতব্বা, পব্বজ্জম্পি ন লভতি. ওদাতানি গহেত্ৰা ৰিব্ভন্তা পন পব্বজ্জামত্তং লভতি.

২৯৭৬. ৰন্দনন্তি পাদে সম্বাহেত্ৰা ৰন্দনং. সাদিতুং ৰট্টতীতি ‘‘অনুজানামি, ভিক্খৰে, সাদিতু’’ন্তি (চূল়ৰ. ৪৩৪) অনুঞ্ঞাতত্তা ৰট্টতি. তত্রেকে আচরিযা ‘‘সচে একতো ৰা উভতো ৰা অৰস্সুতা হোন্তি সারত্তা, যথাৰত্থুকমেৰা’’তি ৰদন্তি. একে আচরিযা ‘‘নত্থি এত্থ আপত্তী’’তি ৰদন্তীতি এৰং আচরিযৰাদং দস্সেত্ৰা ‘‘ইদং ওদিস্স অনুঞ্ঞাতং ৰট্টতী’’তি অট্ঠকথাসু ৰুত্তং, তং পমাণং. ‘‘অনুজানামি, ভিক্খৰে, সাদিতু’’ন্তি (চূল়ৰ. ৪৩৪) হি ৰচনেনেৰ কপ্পিযং.

২৯৭৭. যায কাযচি ৰচ্চকুটিযা ৰচ্চো ন কাতব্বো, হেট্ঠা ৰিৰটে উদ্ধং পটিচ্ছন্নে পন ৰচ্চং কাতুং ৰট্টতি. হেট্ঠা ৰিৰটে উপরি পটিচ্ছন্নেতি অট্ঠকথাযং ‘‘সচে কূপো খতো হোতি, উপরি পন পদরমত্তমেৰ সব্বদিসাসু পঞ্ঞাযতি, এৰরূপেপি ৰট্টতী’’তি (চূল়ৰ. অট্ঠ. ৪৩৫) ৰুত্তং.

২৯৭৮. সব্বত্থাতি ভিক্খুনিউপস্সযঅন্তরঘরাদিসব্বট্ঠানেসু. গিলানাযাতি যস্সা ৰিনা পল্লঙ্কং ন ফাসু হোতি. অড্ঢপল্লঙ্কন্তি একপাদং আভুজিত্ৰা কতপল্লঙ্কং. সো একং পণ্হিং ঊরুমূলাসন্নং কত্ৰা ইতরং দূরে কত্ৰা আভুজিতপল্লঙ্কো নাম.

২৯৭৯. নরতিত্থেতি পুরিসানং নহানতিত্থে. যথাহ – ‘‘ন, ভিক্খৰে, ভিক্খুনিযা পুরিসতিত্থে নহাযিতব্বং, যা নহাযেয্য, আপত্তি দুক্কটস্স. অনুজানামি, ভিক্খৰে, মহিলাতিত্থে নহাযিতু’’ন্তি (চূল়ৰ. ৪৩৬).

২৯৮০. যা সমণী গন্ধচুণ্ণেন ৰা ৰাসিতমত্তিযা ৰাসিতকায মত্তিকায ৰা পটিসোতে ৰা ন্হাযেয্য, তস্সা আপত্তি দুক্কটন্তি যোজনা. ৰাসিতৰিসেসনেন অৰাসিতা ৰট্টতীতি দীপেতি. যথাহ – ‘‘অনুজানামি, ভিক্খৰে, পকতিমত্তিক’’ন্তি (চূল়ৰ. ৪৩৬).

২৯৮১. অভুত্ৰাতি এত্থ আমিসঅগ্গং গহণমত্তম্পি অকত্ৰা, পত্তচীৰরং কতিপযদিৰসানিপি অপরিভুঞ্জিত্ৰাতি অত্থো. সচে অসপ্পাযং, সব্বম্পি অপনেতুং ৰট্টতি.

২৯৮২. অনুপসম্পন্নে অসন্তে সব্বং ভিক্খূহি পটিগ্গহিতং ৰা অপ্পটিগ্গহিতং ৰা সন্নিধিকতং ৰা সব্বং অজ্ঝোহরণীযং ভিক্খূহি পটিগ্গহাপেত্ৰা পরিভুঞ্জিতুং ভিক্খুনীনং ৰট্টতীতি যোজনা. ‘‘ভিক্খুনীনং ৰট্টতী’’তি ইদং পকরণৰসেন ৰুত্তং. ভিক্খুনীহিপি পটিগ্গহাপেত্ৰা ভিক্খূনম্পি তথাৰিধং পরিভুঞ্জিতুং ৰট্টতি. যথাহ – ‘‘অনুজানামি, ভিক্খৰে, ভিক্খূনং সন্নিধিং ভিক্খুনীহি পটিগ্গাহাপেত্ৰা পরিভুঞ্জিতু’’ন্তি (চূল়ৰ. ৪২১).

ভিক্খুনিক্খন্ধককথাৰণ্ণনা.

ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায

খন্ধককথাৰণ্ণনা নিট্ঠিতা.