ৰস্সূপনাযিকক্খন্ধককথাৰণ্ণনা

২৬০৮. ৰস্সূপনাযিকা ৰুত্তাতি সেসো. পচ্ছিমা চাতি এত্থ ইতি-সদ্দো নিদস্সনে. ৰস্সূপনাযিকাতি ৰস্সূপগমনা. আলযো, ৰচীভেদো ৰা কাতব্বো উপগচ্ছতাতি ইমিনা ৰস্সূপগমনপ্পকারো দস্সিতো. উপগচ্ছতা আলযো কত্তব্বো, ৰচীভেদো ৰা কত্তব্বোতি সম্বন্ধো. উপগচ্ছন্তেন চ সেনাসনে অসতি ‘‘ইধ ৰস্সং ৰসিস্সামী’’তি চিত্তুপ্পাদমত্তং ৰা কাতব্বং, সেনাসনে সতি ‘‘ইমস্মিং ৰিহারে ইমং তেমাসং ৰস্সং উপেমী’’তি চ ‘‘ইধ ৰস্সং উপেমী’’তি চ ৰচীভেদো ৰা কাতব্বোতি অত্থো.

২৬০৯. জানং ৰস্সূপগমনং অনুপগচ্ছতো ৰাপীতি যোজনা. তেমাসন্তি এত্থ ‘‘পুরিমং ৰা পচ্ছিমং ৰা’’তি সেসো. চরন্তস্সাপীতি এত্থ ‘‘চারিক’’ন্তি সেসো. পুরিমং ৰা তেমাসং পচ্ছিমং ৰা তেমাসং অৰসিত্ৰাৰ চারিকং চরন্তস্সাপি দুক্কটন্তি যোজনা. তেমাসন্তি অচ্চন্তসংযোগে উপযোগৰচনং. যথাহ – ‘‘ন, ভিক্খৰে, ৰস্সং উপগন্ত্ৰা পুরিমং ৰা তেমাসং পচ্ছিমং ৰা তেমাসং অৰসিত্ৰা চারিকা পক্কমিতব্বা, যো পক্কমেয্য, আপত্তি দুক্কটস্সা’’তি (মহাৰ. ১৮৫).

২৬১০. রুক্খস্স সুসিরেতি এত্থ ‘‘সুদ্ধে’’তি সেসো. যথাহ – ‘‘রুক্খসুসিরেতি এত্থ সুদ্ধে রুক্খসুসিরেযেৰ ন ৰট্টতি, মহন্তস্স পন রুক্খসুসিরস্স অন্তো পদরচ্ছদনং কুটিকং কত্ৰা পৰিসনদ্ৰারং যোজেত্ৰা উপগন্তুং ৰট্টতী’’তি. ‘‘রুক্খস্স সুসিরে’’তি ইমিনা রুক্খেকদেসো ৰিটপোপি সঙ্গহিতো, সোপি সুদ্ধোৰ ন ৰট্টতি. যথাহ – ‘‘রুক্খৰিটভিযাতি এত্থাপি সুদ্ধে ৰিটপমত্তে ন ৰট্টতি, মহাৰিটপে পন অট্টকং বন্ধিত্ৰা তত্থ পদরচ্ছদনং কুটিকং কত্ৰা উপগন্তুং ৰট্টতী’’তি (মহাৰ. অট্ঠ. ২০৩).

‘‘ছত্তেতি এত্থাপি চতূসু থম্ভেসু ছত্তং ঠপেত্ৰা আৰরণং কত্ৰা দ্ৰারং যোজেত্ৰা উপগন্তুং ৰট্টতি, ছত্তকুটিকা নামেসা হোতি. চাটিযাতি এত্থাপি মহন্তেন কপল্লেন ছত্তে ৰুত্তনযেন কুটিং কত্ৰাৰ উপগন্তুং ৰট্টতী’’তি অট্ঠকথাৰচনতো এৰমকতাসু সুদ্ধছত্তচাটীসু নিৰারণং ৰেদিতব্বং. ছৰকুটীতি টঙ্কিতমঞ্চাদযো ৰুত্তা. যথাহ – ‘‘ছৰকুটিকা নাম টঙ্কিতমঞ্চাদিভেদা কুটি, তত্থ উপগন্তুং ন ৰট্টতী’’তি (মহাৰ. অট্ঠ. ২০৩).

সুসানে পন অঞ্ঞং কুটিকং কত্ৰা উপগন্তুং ৰট্টতি. ‘‘ছৰসরীরং ঝাপেত্ৰা ছারিকায, অট্ঠিকানঞ্চ অত্থায কুটিকা করীযতী’’তি অন্ধকট্ঠকথাযং ছৰকুটি ৰুত্তা. ‘‘টঙ্কিতমঞ্চোতি কসিকুটিকাপাসাণঘরন্তি লিখিত’’ন্তি (ৰজির. টী. মহাৰগ্গ ২০৩) ৰজিরবুদ্ধিত্থেরো. চতুন্নং পাসাণানং উপরি পাসাণং অত্থরিত্ৰা কতো গেহোপি ‘‘টঙ্কিতমঞ্চো’’তি ৰুচ্চতি. দীঘে মঞ্চপাদে মজ্ঝে ৰিজ্ঝিত্ৰা অটনিযো পৰেসেত্ৰা মঞ্চং করোন্তীতি তস্স ইদং উপরি, ইদং হেট্ঠাতি নত্থি, পরিৰত্তেত্ৰা অত্থতোপি তাদিসোৰ হোতি, তং সুসানে, দেৰট্ঠানে চ ঠপেন্তি, অযম্পি টঙ্কিতমঞ্চো নাম.

২৬১১. ‘‘সতি পচ্চযৰেকল্লে, সরীরাফাসুতায ৰা’’তি অৰসেসন্তরাযানং ৰক্খমানত্তা ‘‘অন্তরাযো’’তি ইমিনা রাজন্তরাযাদি দসৰিধো গহেতব্বো.

২৬১২-৪. ‘‘অনুজানামি, ভিক্খৰে, সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে ভিক্খুস্স ভিক্খুনিযা সিক্খমানায সামণেরস্স সামণেরিযা মাতুযা চ পিতুস্স চা’’তি (মহাৰ. ১৯৮) ৰুত্তনযং দস্সেতুমাহ ‘‘মাতাপিতূন’’ন্তিআদি.

মাতাপিতূনং দস্সনত্থং, পঞ্চন্নং সহধম্মিকানং দস্সনত্থং ৰা নেসং অত্থে সতি ৰা নেসং অন্তরে গিলানং দট্ঠুং ৰা তদুপট্ঠাকানং ভত্তাদিং পরিযেসনত্থং ৰা নেসং ভত্তাদিং পরিযেসনত্থং ৰা তথা নেসং পঞ্চন্নং সহধম্মিকানং অঞ্ঞতরং অনভিরতং উক্কণ্ঠিতং অহং গন্ত্ৰা ৰূপকাসেস্সং ৰা ৰূপকাসাপেস্সামি ৰা ধম্মকথমস্স করিস্সামীতি ৰা তস্স পঞ্চন্নং সহধম্মিকানং অঞ্ঞতরস্স উট্ঠিতং উপ্পন্নং দিট্ঠিং ৰিৰেচেস্সামি ৰা ৰিৰেচাপেস্সামি ৰা ধম্মকথমস্স করিস্সামীতি ৰা তথা উপ্পন্নং কুক্কুচ্চং ৰিনোদেস্সামীতি ৰা ৰিনোদাপেস্সামীতি ৰা ধম্মকথমস্স করিস্সামীতি ৰা এৰং ৰিনযঞ্ঞুনা ভিক্খুনা সত্তাহকিচ্চেন অপেসিতেপি গন্তব্বং, পগেৰ পহিতেতি যোজনা.

ভত্তাদীতি এত্থ আদি-সদ্দেন ভেসজ্জপরিযেসনাদিং সঙ্গণ্হাতি. যথাহ – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা উপট্ঠহিস্সামি ৰা’’তি. ৰূপকাসেস্সন্তি যত্থ অনভিরতি উপ্পন্না, ততো অঞ্ঞত্থ গহেত্ৰা গমিস্সামীতি অত্থো.

ৰিনোদেস্সামহন্তি ৰাতি এত্থ ৰা-সদ্দেন ‘‘ইধ পন, ভিক্খৰে, ভিক্খু গরুধম্মং অজ্ঝাপন্নো হোতি পরিৰাসারহো, সো চে ভিক্খূনং সন্তিকে দূতং পহিণেয্য ‘অহঞ্হি গরুধম্মং অজ্ঝাপন্নো পরিৰাসারহো, আগচ্ছন্তু ভিক্খূ, ইচ্ছামি ভিক্খূনং আগত’ন্তি. গন্তব্বং, ভিক্খৰে, সত্তাহকরণীযেন অপ্পহিতেপি, পগেৰ পহিতে ‘পরিৰাসদানং উস্সুক্কং করিস্সামি ৰা অনুস্সাৰেস্সামি ৰা গণপূরকো ৰা ভৰিস্সামী’’তিআদিনযং (মহাৰ. ১৯৩) সঙ্গণ্হাতি. এৰং সত্তাহকিচ্চেন গচ্ছন্তেন অন্তোউপচারসীমায ঠিতেনেৰ ‘‘অন্তোসত্তাহে আগচ্ছিস্সামী’’তি আভোগং কত্ৰা গন্তব্বং. সচে আভোগং অকত্ৰা উপচারসীমং অতিক্কমতি, ছিন্নৰস্সো হোতীতি ৰদন্তি.

২৬১৫. ‘‘অযং পনেত্থ পাল়িমুত্তকরত্তিচ্ছেদৰিনিচ্ছযো’’তি অট্ঠকথাগতং রত্তিচ্ছেদৰিনিচ্ছযং দস্সেতুমাহ ‘‘ৰস্সং উপগতেনেত্থা’’তিআদি. এত্থাতি ইমস্মিং সত্তাহকিচ্চাধিকারে. অযং পাল়িমুত্তকৰিনিচ্ছযো দট্ঠব্বোতি অত্থো.

২৬১৬. ‘‘অসুকং নাম দিৰস’’ন্তিআদিনা নিমন্তনাকারং ৰক্খতি. পুব্বন্তি পঠমং. ৰট্টতীতি সত্তাহকিচ্চেন গন্তুং ৰট্টতি. যথাহ – ‘‘সচে একস্মিং মহাৰাসে পঠমংযেৰ কতিকা কতা হোতি ‘অসুকদিৰসং নাম সন্নিপতিতব্ব’ন্তি, নিমন্তিতোযেৰ নাম হোতি, গন্তুং ৰট্টতী’’তি (মহাৰ. অট্ঠ. ১৯৯). ‘‘উপাসকেহি ‘ইমস্মিং নাম দিৰসে দানাদীনি করোম, সব্বে এৰ সন্নিপতন্তূ’তি কতিকাযপি কতায গন্তুং ৰট্টতি, নিমন্তিতোযেৰ নাম হোতী’’তি কেচি.

২৬১৭. ভণ্ডকন্তি অত্তনো চীৰরভণ্ডং. ন ৰট্টতীতি সত্তাহকিচ্চেন গন্তুং ন ৰট্টতি. পহিণন্তীতি চীৰরধোৰনাদিকম্মেন পহিণন্তি. আচরিযুপজ্ঝাযানং আণত্তিযেন কেনচি অনৰজ্জকিচ্চেন সত্তাহকরণীযেন গন্তুং ৰট্টতীতি ইমিনাৰ দীপিতং হোতি.

২৬১৮. উদ্দেসাদীনমত্থাযাতি পাল়িৰাচনানি সন্ধায. আদি-সদ্দেন পরিপুচ্ছাদিং সঙ্গণ্হাতি. গরূনন্তি অগিলানানম্পি আচরিযুপজ্ঝাযানং. গন্তুং লভতীতি সত্তাহকরণীযেন গন্তুং লভতি. পুগ্গলোতি পকরণতো ভিক্খুংযেৰ গণ্হাতি.

২৬১৯. আচরিযোতি নিদস্সনমত্তং, উপজ্ঝাযেন নিৰারিতেপি এসেৰ নযো. ‘‘সচে পন নং আচরিযো ‘অজ্জ মা গচ্ছা’তি ৰদতি, ৰট্টতী’’তি (মহাৰ. অট্ঠ. ১৯৯) অট্ঠকথানযং দস্সেতুমাহ ‘‘রত্তিচ্ছেদে অনাপত্তি, হোতীতি পরিদীপিতা’’তি. রত্তিচ্ছেদেতি ৰস্সচ্ছেদনিমিত্তং. ‘‘রত্তিচ্ছেদে’’তি সব্বত্থ ৰস্সচ্ছেদোতি সন্নিট্ঠানং কত্ৰা ৰদন্তি, এৰং সত্তাহকরণীযেন গতং নং অন্তোসত্তাহেযেৰ পুন আগচ্ছন্তং সচে আচরিযো ৰা উপজ্ঝাযো ৰা ‘‘অজ্জ মা গচ্ছা’’তি ৰদতি, সত্তাহাতিক্কমেপি অনাপত্তীতি অধিপ্পাযো, ৰস্সচ্ছেদো পন হোতিযেৰাতি দট্ঠব্বং সত্তাহস্স বহিদ্ধা ৰীতিনামিতত্তা.

২৬২০. যস্স কস্সচি ঞাতিস্সাতি মাতাপিতূহি অঞ্ঞস্স ঞাতিজনস্স. ‘‘গচ্ছতো দস্সনত্থাযা’’তি ইমিনা সেসঞাতিকেহি ‘‘মযং গিলানা ভদন্তানং আগমনং ইচ্ছামা’’তি চ ‘‘উপট্ঠাককুলেহি দানং দস্সাম, ধম্মং সোস্সাম, ভিক্খূনং দস্সনং ইচ্ছামা’’তি চ এৰং কত্তব্বং নিদ্দিসিত্ৰা দূতে ৰা পেসিতে সত্তাহকরণীযেন গচ্ছতো রত্তিচ্ছেদো চ দুক্কটঞ্চ ন হোতীতি ৰুত্তং হোতি. যথাহ ‘‘ইধ পন, ভিক্খৰে, ভিক্খুস্স ঞাতকো গিলানো হোতি…পে… গন্তব্বং, ভিক্খৰে, সত্তাহকরণীযেন পহিতে, ন ত্ৰেৰ অপ্পহিতে’’তি (মহাৰ. ১৯৯) চ ‘‘ইধ পন, ভিক্খৰে, উপাসকেন সঙ্ঘং উদ্দিস্স ৰিহারো কারাপিতো হোতি…পে… ইচ্ছামি দানঞ্চ দাতুং ধম্মঞ্চ সোতুং ভিক্খূ চ পস্সিতুন্তি. গন্তব্বং, ভিক্খৰে, সত্তাহকরণীযেন পহিতে, ন ত্ৰেৰ অপ্পহিতে’’তি (মহাৰ. ১৮৮) চ.

২৬২১. ‘‘অহং গামকং গন্ত্ৰা অজ্জেৰ আগমিস্সামী’’তি আগচ্ছং আগচ্ছন্তো সচে পাপুণিতুং ন সক্কোতেৰ, ৰট্টতীতি যোজনা. ৰট্টতীতি এত্থ ‘‘অজ্জেৰ আগমিস্সামী’’তি গন্ত্ৰা আগচ্ছন্তস্স অন্তরামগ্গে সচে অরুণুগ্গমনং হোতি, ৰস্সচ্ছেদোপি ন হোতি, রত্তিচ্ছেদদুক্কটঞ্চ নত্থীতি অধিপ্পাযো.

২৬২২. ৰজেতি (মহাৰ. অট্ঠ. ২০৩) গোপালকানং নিৰাসনট্ঠানে. সত্থেতি জঙ্ঘসত্থসকটসত্থানং সন্নিৰিট্ঠোকাসে. তীসু ঠানেসু ভিক্খুনো, ৰস্সচ্ছেদে অনাপত্তীতি তেহি সদ্ধিং গচ্ছন্তস্সেৰ নত্থি আপত্তি, তেহি ৰিযুঞ্জিত্ৰা গমনে পন আপত্তিযেৰ, পৰারেতুঞ্চ ন লভতি.

ৰজাদীসু ৰস্সং উপগচ্ছন্তেন ৰস্সূপনাযিকদিৰসে তেন ভিক্খুনা উপাসকা ৰত্তব্বা ‘‘কুটিকা লদ্ধুং ৰট্টতী’’তি. সচে করিত্ৰা দেন্তি, তত্থ পৰিসিত্ৰা ‘‘ইধ ৰস্সং উপেমী’’তি তিক্খত্তুং ৰত্তব্বং. নো চে দেন্তি, সালাসঙ্খেপেন ঠিতসকটস্স হেট্ঠা উপগন্তব্বং. তম্পি অলভন্তেন আলযো কাতব্বো. সত্থে পন কুটিকাদীনং অভাৰে ‘‘ইধ ৰস্সং উপেমী’’তি ৰচীভেদং কত্ৰা উপগন্তুং ন ৰট্টতি, আলযকরণমত্তমেৰ ৰট্টতি. আলযো নাম ‘‘ইধ ৰস্সং ৰসিস্সামী’’তি চিত্তুপ্পাদমত্তং.

সচে মগ্গপ্পটিপন্নেযেৰ সত্থে পৰারণদিৰসো হোতি, তত্থেৰ পৰারেতব্বং. অথ সত্থো অন্তোৰস্সেযেৰ ভিক্খুনা পত্থিতট্ঠানং পত্ৰা অতিক্কমতি. পত্থিতট্ঠানে ৰসিত্ৰা তত্থ ভিক্খূহি সদ্ধিং পৰারেতব্বং. অথাপি সত্থো অন্তোৰস্সেযেৰ অন্তরা একস্মিং গামে তিট্ঠতি ৰা ৰিপ্পকিরতি ৰা, তস্মিংযেৰ গামে ভিক্খূহি সদ্ধিং ৰসিত্ৰা পৰারেতব্বং, অপ্পৰারেত্ৰা ততো পরং গন্তুং ন ৰট্টতি.

নাৰায ৰস্সং উপগচ্ছন্তেনাপি কুটিযংযেৰ উপগন্তব্বং. পরিযেসিত্ৰা অলভন্তে আলযো কাতব্বো. সচে অন্তোতেমাসং নাৰা সমুদ্দেযেৰ হোতি, তত্থেৰ পৰারেতব্বং. অথ নাৰা কূলং লভতি, সযঞ্চ পরতো গন্তুকামো হোতি, গন্তুং ন ৰট্টতি. নাৰায লদ্ধগামেযেৰ ৰসিত্ৰা ভিক্খূহি সদ্ধিং পৰারেতব্বং. সচেপি নাৰা অনুতীরমেৰ অঞ্ঞত্থ গচ্ছতি, ভিক্খু চ পঠমং লদ্ধগামেযেৰ ৰসিতুকামো, নাৰা গচ্ছতু, ভিক্খুনা তত্থেৰ ৰসিত্ৰা ভিক্খূহি সদ্ধিং পৰারেতব্বং.

ইতি ৰজে, সত্থে, নাৰাযন্তি তীসু ঠানেসু নত্থি ৰস্সচ্ছেদে আপত্তি, পৰারেতুঞ্চ লভতি.

২৬২৩. সতি পচ্চযৰেকল্লেতি পিণ্ডপাতাদীনং পচ্চযানং ঊনত্তে সতি. সরীরাফাসুতায ৰাতি সরীরস্স অফাসুতায আবাধে ৰা সতি. ৰস্সং ছেত্ৰাপি পক্কমেতি ৰস্সচ্ছেদং কত্ৰাপি যথাফাসুকট্ঠানং গচ্ছেয্য. অপি-সদ্দেন ৰস্সং অছেত্ৰা ৰস্সচ্ছেদকারণে সতি সত্তাহকরণীযেন গন্তুম্পি ৰট্টতীতি দীপেতি.

২৬২৪. যেন কেনন্তরাযেনাতি রাজন্তরাযাদীসু যেন কেনচি অন্তরাযেন. যো ভিক্খু ৰস্সং নোপগতো, তেনাপি ছিন্নৰস্সেন ৰাপি দুতিযা ৰস্সূপনাযিকা উপগন্তব্বাতি যোজনা.

২৬২৫-৬. সত্তাহন্তি অচ্চন্তসংযোগে উপযোগৰচনং. ‘‘ৰীতিনামেতী’’তি ইমিনা সম্বন্ধো. উপগন্ত্ৰাপি ৰা বহিদ্ধা এৰ সত্তাহং ৰীতিনামেতি চে. যো গচ্ছতি, যো চ ৰীতিনামেতি, তস্স ভিক্খুস্স. পুরিমাপি ন ৰিজ্জতীতি অনুপগতত্তা, ছিন্নৰস্সত্তা চ পুরিমাপি ৰস্সূপনাযিকা ন ৰিজ্জতি ন লভতি. ইমেসং দ্ৰিন্নং যথাক্কমং উপচারাতিক্কমে, সত্তাহাতিক্কমে চ আপত্তি ৰেদিতব্বা.

পটিস্সৰে চ ভিক্খুস্স, হোতি আপত্তি দুক্কটন্তি ‘‘ইধ ৰস্সং ৰসথা’’তি ৰুত্তে ‘‘সাধূ’’তি পটিস্সুণিত্ৰা তস্স ৰিসংৰাদে অসচ্চাপনে আপত্তি হোতি. কতমাতি আহ ‘‘দুক্কট’’ন্তি. ন কেৰলং এতস্সেৰ ৰিসংৰাদে আপত্তি হোতি, অথ খো ইতরেসম্পি পটিস্সৰানং ৰিসংৰাদে আপত্তি ৰেদিতব্বা. যথাহ – ‘‘পটিস্সৰে চ আপত্তি দুক্কটস্সাতি এত্থ ন কেৰলং ‘ইমং তেমাসং ইধ ৰস্সং ৰসথা’তি এতস্সেৰ পটিস্সৰস্স ৰিসংৰাদে আপত্তি, ‘ইমং তেমাসং ভিক্খং গণ্হথ, উভোপি মযং ইধ ৰস্সং ৰসিস্সাম, একতোৰ উদ্দিসাপেস্সামা’তি এৰমাদিনাপি তস্স তস্স পটিস্সৰস্স ৰিসংৰাদে দুক্কট’’ন্তি (মহাৰ. অট্ঠ. ২০৭). তঞ্চ খো পটিস্সৰকালে সুদ্ধচিত্তস্স পচ্ছা ৰিসংৰাদনপচ্চযা হোতি. পঠমং অসুদ্ধচিত্তস্স পন পটিস্সৰে পাচিত্তিযং, ৰিসংৰাদেন দুক্কটন্তি পাচিত্তিযেন সদ্ধিং দুক্কটং যুজ্জতি.

২৬২৭. ‘‘ৰস্সং উপগন্ত্ৰা পন অরুণং অনুট্ঠাপেত্ৰা তদহেৰ সত্তাহকরণীযেন পক্কমন্তস্সাপি অন্তোসত্তাহে নিৰত্তন্তস্স অনাপত্তী’’তি (মহাৰ. অট্ঠ. ২০৭) অট্ঠকথাৰচনতো, ‘‘কো ৰাদো ৰসিত্ৰা বহি গচ্ছতো’’তি ৰক্খমানত্তা চ ‘‘নুট্ঠাপেত্ৰা পনারুণ’’ন্তি পাঠো গহেতব্বো. কত্থচি পোত্থকেসু ‘‘উট্ঠাপেত্ৰা পনারুণ’’ন্তি পাঠো দিস্সতি, সো ন গহেতব্বো.

২৬২৮. ৰসিত্ৰাতি দ্ৰীহতীহং ৰসিত্ৰা. যথা ৰস্সং ৰসিত্ৰা অরুণং অনুট্ঠাপেত্ৰাৰ সত্তাহকরণীযেন গচ্ছতো অনাপত্তি, তথা গতট্ঠানতো অন্তোসত্তাহে আগন্ত্ৰা পুনপি অরুণং অনুট্ঠাপেত্ৰাৰ সত্তাহকরণীযেন গচ্ছতো অনাপত্তি. ‘‘সত্তাহৰারেন অরুণো উট্ঠাপেতব্বো’’তি (মহাৰ. অট্ঠ. ২০১) অট্ঠকথাৰচনং সত্তমারুণেন পটিবদ্ধদিৰসং সত্তমেন অরুণেনেৰ সঙ্গহেত্ৰা সত্তমঅরুণব্ভন্তরে অনাগন্ত্ৰা অট্ঠমং অরুণং বহি উট্ঠাপেন্তস্স রত্তিচ্ছেদদস্সনপরং, ন সত্তমঅরুণস্সেৰ তত্থ উট্ঠাপেতব্বভাৰদস্সনপরন্তি গহেতব্বং সিক্খাভাজনঅট্ঠকথায, সীহল়গণ্ঠিপদেসু চ তথা ৰিনিচ্ছিতত্তা.

২৬২৯. ‘‘নোপেতি অসতিযা’’তি পদচ্ছেদো, নোপেতীতি ‘‘ইমস্মিং ৰিহারে ইমং তেমাসং ৰস্সং উপেমী’’তি ৰচীভেদেন ন উপগচ্ছতি.

২৬৩০. ৰুত্তমেৰত্থং সমত্থেতুমাহ ‘‘ন দোসো কোচি ৰিজ্জতী’’তি.

২৬৩১. ‘‘ইমস্মিং ৰিহারে ইমং তেমাসং ৰস্সং উপেমী’’তি তিক্খত্তুং ৰচনে নিচ্ছারিতে এৰ ৰস্সং উপগতো সিযাতি যোজনা. ‘‘নিচ্ছারিতেৰ তিক্খত্তু’’ন্তি ইদং উক্কংসৰসেন ৰুত্তং, সকিং, দ্ৰিক্খত্তুং ৰা নিচ্ছারিতেপি ৰস্সূপগতো নাম হোতীতি. যথাহ – ‘‘ইমস্মিং ৰিহারে ইমং তেমাসং ৰস্সং উপেমীতি সকিং ৰা দ্ৰত্তিক্খত্তুং ৰা ৰাচং নিচ্ছারেত্ৰাৰ ৰস্সং উপগন্তব্ব’’ন্তি (মহাৰ. অট্ঠ. ১৮৪).

২৬৩২. নৰমিতো পট্ঠায গন্তুং ৰট্টতি, আগচ্ছতু ৰা মা ৰা, অনাপত্তী’’তি (মহাৰ. অট্ঠ. ২০৭) অট্ঠকথানযং দস্সেতুমাহ ‘‘আদিং তু নৰমিং কত্ৰা’’তিআদি. নৰমিং পভুতি আদিং কত্ৰা, নৰমিতো পট্ঠাযাতি ৰুত্তং হোতি. গন্তুং ৰট্টতীতি সত্তাহকরণীযেনেৰ গন্তুং ৰট্টতি, তস্মা পৰারণদিৰসেপি তদহেৰ আগন্তুং অসক্কুণেয্যট্ঠানং পৰারণত্থায গচ্ছন্তেন লব্ভমানেন সত্তাহকরণীযেন গন্তুং ৰট্টতি. ‘‘পৰারেত্ৰা পন গন্তুং ৰট্টতি পৰারণায তংদিৰসসন্নিস্সিতত্তা’’তি (ৰজির. টী. মহাৰগ্গ ২০৭) হি ৰজিরবুদ্ধিত্থেরো. সো পচ্ছা আগচ্ছতু ৰা মা ৰা, দোসো ন ৰিজ্জতীতি যোজনা.

ৰস্সূপনাযিকক্খন্ধককথাৰণ্ণনা.