তেলপাককথা

তেলপাককথাযং ‘‘অনুজানামি, ভিক্খৰে, তেলপাক’’ন্তি (মহাৰ. ২৬৭) ৰচনতো ৰাতাবাধে সতি তেলপাকো ৰট্টতি. তত্থ অনুজানামি, ভিক্খৰে, তেলপাকন্তি যং কিঞ্চি ভেসজ্জপক্খিত্তং সব্বং অনুঞ্ঞাতমেৰ হোতি. ‘‘ন, ভিক্খৰে, অতিপক্খিত্তমজ্জং তেলং পাতব্বং, যো পিৰেয্য, যথাধম্মো কারেতব্বো. অনুজানামি, ভিক্খৰে, যস্মিং তেলপাকে মজ্জস্স ন ৰণ্ণো ন গন্ধো ন রসো পঞ্ঞাযতি, এৰরূপং মজ্জপক্খিত্তং তেলং পাতু’’ন্তি (মহাৰ. ২৬৭) ৰচনতো যস্মিং তেলপাকে পক্খিত্তস্স মজ্জস্স ৰণ্ণো ৰা গন্ধো ৰা রসো ৰা ন পঞ্ঞাযতি, তাদিসং তেলং পিৰিতব্বং. তত্থ অতিপক্খিত্তমজ্জানীতি অতিৰিয খিত্তমজ্জানি, বহুং মজ্জং পক্খিপিত্ৰা যোজিতানীতি অত্থো. ‘‘অনুজানামি, ভিক্খৰে, অব্ভঞ্জনং অধিট্ঠাতু’’ন্তি (মহাৰ. ২৬৭) ৰচনতো অতিপক্খিত্তমজ্জত্তা অপিৰিতব্বে তেলে সতি অব্ভঞ্জনং অধিট্ঠাতুং ৰট্টতি. ‘‘অনুজানামি, ভিক্খৰে, তীণি তুম্বানি লোহতুম্বং কট্ঠতুম্বং ফলতুম্ব’’ন্তি (মহাৰ. ২৬৭) ৰচনতো তেলপক্কভাজনানি ইমানি তীণি তুম্বানি ৰট্টন্তি.