সেদকম্মকথা

সেদকম্মকথাযং ‘‘অনুজানামি, ভিক্খৰে, সেদকম্ম’’ন্তি (মহাৰ. ২৬৭) ৰচনতো অঙ্গৰাতে সতি সেদকম্মং কাতুং ৰট্টতি. তত্থ অঙ্গৰাতোতি হত্থপাদে ৰাতো. নক্খমনীযো হোতি, ‘‘অনুজানামি, ভিক্খৰে, সম্ভারসেদ’’ন্তি (মহাৰ. ২৬৭) ৰচনতো সেদকম্মেন নক্খমনীযে সতি সম্ভারসেদং কাতুং ৰট্টতি. তত্থ সম্ভারসেদন্তি নানাৰিধপণ্ণসম্ভারসেদং. নক্খমনীযো হোতি, ‘‘অনুজানামি, ভিক্খৰে, মহাসেদ’’ন্তি (মহাৰ. ২৬৭) ৰচনতো সম্ভারসেদনক্খমনীযে সতি মহাসেদং কাতুং ৰট্টতি. তত্থ মহাসেদন্তি মহন্তং সেদং, পোরিসপ্পমাণং আৰাটং অঙ্গারানং পূরেত্ৰা পংসুৰালিকাদীহি পিদহিত্ৰা তত্থ নানাৰিধানি ৰাতহরণপণ্ণানি সন্থরিত্ৰা তেলমক্খিতেন গত্তেন তত্থ নিপজ্জিত্ৰা সম্পরিৰত্তন্তেন সরীরং সেদেতুং অনুজানামীতি অত্থো. নক্খমনীযো হোতি, ‘‘অনুজানামি, ভিক্খৰে, ভঙ্গোদক’’ন্তি (মহাৰ. ২৬৭) ৰচনতো মহাসেদেন নক্খমনীযে সতি ভঙ্গোদকং কাতুং ৰট্টতি. তত্থ ভঙ্গোদকন্তি নানাপণ্ণভঙ্গকুথিতং উদকং, তেহি পণ্ণেহি চ উদকেন চ সিঞ্চিত্ৰা সিঞ্চিত্ৰা সেদেতব্বো. নক্খমনীযো হোতি, ‘‘অনুজানামি, ভিক্খৰে, উদককোট্ঠক’’ন্তি (মহাৰ. ২৬৭) ৰচনতো ভঙ্গোদকেন নক্খমনীযে সতি উদককোট্ঠকং কাতুং ৰট্টতি. তত্থ উদককোট্ঠকন্তি উদককোট্ঠে চাটিং ৰা দোণিং ৰা উণ্হোদকস্স পূরেত্ৰা তত্থ পৰিসিত্ৰা সেদকম্মকরণং অনুজানামীতি অত্থো.