দসভাগকথা

৬৫. দসভাগকথাযং সঙ্ঘিকানীতি সঙ্ঘসন্তকানি বীজানি. পুগ্গলিকাযাতি পুগ্গলস্স সন্তকায ভূমিযা. ভাগং দত্ৰাতি মূলভাগসঙ্খাতং দসমভাগং ভূমিসামিকানং দত্ৰা. পরিভুঞ্জিতব্বানীতি তেসং বীজানং ফলানি রোপকেহি পরিভুঞ্জিতব্বানীতি অত্থো. সেসং সুৰিঞ্ঞেয্যমেৰ. ইদং কির জম্বুদীপে পোরাণকচারিত্তন্তি আদিকপ্পকালে পঠমকপ্পিকা মনুস্সা বোধিসত্তং মহাসম্মতং নাম রাজানং কত্ৰা সব্বেপি অত্তনো অত্তনো তণ্ডুলফলসালিখেত্ততো পৰত্ততণ্ডুলফলানি দস কোট্ঠাসে কত্ৰা একং কোট্ঠাসং ভূমিসামিকভূতস্স মহাসম্মতরাজিনো দত্ৰা পরিভুঞ্জিংসু. ততো পট্ঠায জম্বুদীপিকানং মনুস্সানং চারিতত্তা ৰুত্তং. তেনেৰ সারত্থদীপনীনামিকাযম্পি ৰিনযটীকাযং (ৰজির. টী. মহাৰগ্গ ৩০৪) ‘‘দসভাগং দত্ৰাতি দসমভাগং দত্ৰা. তেনেৰাহ ‘দস কোট্ঠাসে কত্ৰা একো কোট্ঠাসো ভূমিসামিকানং দাতব্বো’তি’’ ৰুত্তং.