চীৰরনিক্খেপকথা

৬২. চীৰরনিক্খেপকথাযং সংহরীযতেতি সঙ্ঘাটি, তস্সা সঙ্ঘাটিযা, ভাৰযোগে কম্মত্থে ছট্ঠী. নিক্খেপাযাতি ঠপনায, সঙ্ঘাটিং অগ্গহেত্ৰা ৰিহারে ঠপেত্ৰা গমনায পঞ্চ কারণানি হোন্তীতি অত্থো. গিলানো ৰা হোতীতি গহেত্ৰা গন্তুং অসমত্থো গিলানো ৰা হোতি. ৰস্সিকসঙ্কেতং ৰা হোতীতি ‘‘ৰস্সিককালো অয’’ন্তি সঙ্কেতং ৰা কতং হোতি. নদীপারগতং ৰা হোতীতি নদিযা পারং গন্ত্ৰা ভুঞ্জিতব্বং হোতি. অগ্গল়গুত্তিৰিহারো ৰা হোতীতি অগ্গল়ং দত্ৰাপি দাতব্বো সুগুত্তৰিহারো ৰা হোতি. অত্থতকথিনং ৰা হোতীতি তস্মিং ৰিহারে কথিনং অত্থতং ৰা হোতি অত্থতকথিনানং অসমাদানচারসম্ভৰতো. সেসং সুৰিঞ্ঞেয্যমেৰ. আরঞ্ঞিকস্স পন ৰিহারো ন সুগুত্তো হোতীতি অপ্পভিক্খুকত্তা চোরাদীনং গমনট্ঠানতো চ. ভণ্ডুক্খলিকাযাতি চীৰরাদিট্ঠপনভণ্ডুক্খলিকায. সেসং সুৰিঞ্ঞেয্যং.