সন্তরুত্তরকথা

৬১. সন্তরুত্তরকথাযং অন্তর-সদ্দো মজ্ঝৰাচকো. ৰসতি সীলেনাতি ৰাসকো, ‘‘অন্তরে ৰাসকো অন্তরৰাসকো’’তি ৰত্তব্বে ‘‘রূপভৰো রূপ’’ন্তিআদীসু ৰিয উত্তরপদলোপীসমাসৰসেন ‘‘অন্তরো’’তি ৰুত্তো. উত্তরসদ্দো উপরিৰাচকো, আভুসো সজ্জতীতি আসঙ্গো, ‘‘উত্তরে আসঙ্গো উত্তরাসঙ্গো’’তি ৰত্তব্বে ৰুত্তনযেন ‘‘উত্তরো’’তি ৰুত্তো, অন্তরো চ উত্তরো চ অন্তরুত্তরা, সহ অন্তরুত্তরেহি যো ৰত্ততীতি সন্তরুত্তরো, সহপুব্বপদভিন্নাধিকরণদ্ৰিপদবহুব্বীহিসমাসো. অথ ৰা সহ অন্তরেন চ উত্তরেন চ যো ৰত্ততীতি সন্তরুত্তরো, তিপদবহুব্বীহিসমাসো. সঙ্ঘাটিং ঠপেত্ৰা অন্তরৰাসকউত্তরাসঙ্গমত্তধরো হুত্ৰা গামো ন পৰিসিতব্বোতি অত্থো. ‘‘পরিব্বাজকমদক্খি তিদণ্ডকেনা’’তিআদীসু ৰিয ইত্থম্ভূতলক্খণে চেতং করণৰচনং, তস্মা অন্তরৰাসকং তিমণ্ডলং পটিচ্ছাদেন্তেন পরিমণ্ডলং নিৰাসেত্ৰা কাযবন্ধনং বন্ধিত্ৰা সঙ্ঘাটিঞ্চ উত্তরাসঙ্গঞ্চ দিগুণং কত্ৰা পারুপিত্ৰা গামো পৰিসিতব্বো.