ছচীৰরকথা

ছচীৰরকথাযং ‘‘অনুজানামি, ভিক্খৰে, ছ চীৰরানি খোমং কপ্পাসিকং কোসেয্যং কম্বলং সাণং ভঙ্গ’’ন্তি (মহাৰ. ৩৩৯) ৰচনতো খোমাদীনি ছ চীৰরানি দুকূলাদীনি ছ অনুলোমচীৰরানি চ ৰট্টন্তি. তত্থ ‘‘খোমন্তি খোমসুত্তেহি ৰাযিতং খোমপট্টচীৰরং. কপ্পাসিকন্তি কপ্পাসতো নিব্বত্তসুত্তেহি ৰাযিতং. কোসেয্যন্তি কোসকারকপাণকেহি নিব্বত্তসুত্তেহি ৰাযিতং. কম্বলন্তি উণ্ণামযচীৰরং. সাণন্তি সাণসুত্তেহি কতচীৰরং. ভঙ্গন্তি খোমসুত্তাদীনি সব্বানি, একচ্চানি ৰা মিস্সেত্ৰা কতচীৰরং. ভঙ্গম্পি ৰাকমযমেৰাতি কেচি. দুকূলং পট্টুণ্ণং সোমারপটং চীনপটং ইদ্ধিজং দেৰদিন্নন্তি ইমানি পন ছ চীৰরানি এতেসংযেৰ অনুলোমানীতি ৰিসুং ন ৰুত্তানি. দুকূলঞ্হি সাণস্স অনুলোমং ৰাকমযত্তা. পট্টুণ্ণদেসে সঞ্জাতৰত্থং পট্টুণ্ণং. ‘পট্টুণ্ণকোসেয্যৰিসেসো’তি হি অভিধানকোসে ৰুত্তং. সোমারদেসে চীনদেসে চ জাতৰত্থানি সোমারচীনপটানি. পট্টুণ্ণাদীনি তীণি কোসেয্যস্স অনুলোমানি পাণকেহি কতসুত্তমযত্তা. ইদ্ধিজং এহিভিক্খূনং পুঞ্ঞিদ্ধিযা নিব্বত্তচীৰরং, তং খোমাদীনং অঞ্ঞতরং হোতীতি তেসং এৰ অনুলোমং. দেৰতাহি দিন্নং চীৰরং দেৰদিন্নং. কপ্পরুক্খে নিব্বত্তং জালিনিযা দেৰকঞ্ঞায অনুরুদ্ধত্থেরস্স দিন্নৰত্থসদিসং, তম্পি খোমাদীনংযেৰ অনুলোমং হোতি তেসু অঞ্ঞতরভাৰতো’’তি সারত্থদীপনিযং (সারত্থ. টী. ২.৪৬২-৪৬৩) ৰুত্তং.

ৰিমতিৰিনোদনিযং (ৰি. ৰি. টী. ১.৪৬৩) পন ‘‘খোমন্তি খোমসুত্তেহি ৰাযিতং খোমপটচীৰরং, তং ৰাকমযন্তি ৰদন্তি. কপ্পাসসুত্তেহি ৰাযিতং কপ্পাসিকং. এৰং সেসানিপি. কম্বলন্তি এল়কাদীনং লোমমযসুত্তেন ৰাযিতং পটং. ভঙ্গন্তি খোমসুত্তাদীনি সব্বানি, একচ্চানি ৰা মিস্সেত্ৰা ৰাযিতং চীৰরং, ভঙ্গম্পি ৰাকমযমেৰাতি কেচি. দুকূলং পট্টুণ্ণং সোমারপটং চীনপটং ইদ্ধিজং দেৰদিন্নন্তি ইমানি ছ চীৰরানি এতেসঞ্ঞেৰ অনুলোমানীতি ৰিসুং ন ৰুত্তানি. দুকূলঞ্হি সাণস্স অনুলোমং ৰাকমযত্তা. ‘পট্টুণ্ণং কোসেয্যৰিসেসো’তি অভিধানকোসে ৰুত্তং. সোমারদেসে চীনদেসে চ জাতৰত্থানি সোমারচীনপটানি. পট্টুণ্ণাদীনি তীণি কোসেয্যস্স অনুলোমানি পাণকেহি কতসুত্তমযত্তা. ইদ্ধিজন্তি এহিভিক্খূনং পুঞ্ঞিদ্ধিযা নিব্বত্তচীৰরং, কপ্পরুক্খেহি নিব্বত্তং, দেৰদিন্নঞ্চ খোমাদীনং অঞ্ঞতরং হোতীতি তেসং সব্বেসং অনুলোমানী’’তি ৰুত্তং.