গহপতিচীৰরাদিকথা

গহপতিচীৰরাদিকথাযং ‘‘অনুজানামি, ভিক্খৰে, গহপতিচীৰরং, যো ইচ্ছতি, পংসুকূলিকো হোতু, যো ইচ্ছতি, গহপতিচীৰরং সাদিযতু, ইতরীতরেনপাহং, ভিক্খৰে, সন্তুট্ঠিং ৰণ্ণেমী’’তি (মহাৰ. ৩৩৭) ৰচনতো অসমাদিন্নধুতঙ্গো যো ভিক্খু পংসুকূলং ধারেতুং ইচ্ছতি, তেন পংসুকূলিকেন ভৰিতব্বং. যো পন গিহীহি দিন্নং গহপতিচীৰরং সাদিযিতুং ইচ্ছতি, তেন গহপতিচীৰরসাদিযকেন ভৰিতব্বং. সমাদিন্নধুতঙ্গো পন ভিক্খু ‘‘গহপতিচীৰরং পটিক্খিপামি, পংসুকূলিকঙ্গং সমাদিযামী’’তি অধিট্ঠহনতো গহপতিচীৰরং সাদিযিতুং ন ৰট্টতি. গহপতিচীৰরন্তি গহপতীহি দিন্নং চীৰরং. ইতরীতরেনপীতি অপ্পগ্ঘেনপি মহগ্ঘেনপি যেন কেনচীতি অত্থো.

‘‘ইতরীতরেনাতি ইতরেন ইতরেন. ইতর-সদ্দো পন অনিযমৰচনো দ্ৰিক্খত্তুং ৰুচ্চমানো যংকিঞ্চি-সদ্দেহি সমানত্থো হোতীতি ৰুত্তং অপ্পগ্ঘেনপি মহগ্ঘেনপি যেন কেনচী’’তি সারত্থদীপনিযং (সারত্থ. টী. মহাৰগ্গ ৩.৩৩৭), ‘‘অনুজানামি, ভিক্খৰে, পাৰারং, অনুজানামি, ভিক্খৰে, কোসেয্যপাৰারং, অনুজানামি, ভিক্খৰে, কোজৰ’’ন্তি (মহাৰ. ৩৩৭) ৰচনতো পাৰারাদীনিপি সম্পটিচ্ছিতুং ৰট্টতি. তত্থ পাৰারোতি সলোমকো কপ্পাসাদিভেদো. অনুজানামি, ভিক্খৰে, কোজৰন্তি এত্থ পকতিকোজৰমেৰ ৰট্টতি, মহাপিট্ঠিযকোজৰং ন ৰট্টতি. কোজৰন্তি উণ্ণামযো পাৰারসদিসো. ‘‘মহাপিট্ঠি কোজৰন্তি হত্থিপিট্ঠীসু অত্থরিতব্বতায ‘মহাপিট্ঠিয’ন্তি লদ্ধসমঞ্ঞং চতুরঙ্গুলপুপ্ফং কোজৰ’’ন্তি সারত্থদীপনিযং (সারত্থ. টী. মহাৰগ্গ ৩.৩৩৭) ৰুত্তং. ৰিমতিৰিনোদনিযম্পি (ৰি. ৰি. টী. মহাৰগ্গ ২.৩৩৭) ‘‘মহাপিট্ঠিযকোজৰন্তি হত্থিপিট্ঠিযং অত্থরিতব্বতায ‘মহাপিট্ঠিয’ন্তি লদ্ধসমঞ্ঞং উণ্ণামযত্থরণ’’ন্তি ৰুত্তং. ৰজিরবুদ্ধিটীকাযং (ৰজির. টী. মহাৰগ্গ ৩৩৭) পন ‘‘মহাপিট্ঠিযকোজৰং নাম অতিরেকচতুরঙ্গুলপুপ্ফং কিরা’’তি ৰুত্তং. ‘‘অনুজানামি, ভিক্খৰে, কম্বল’’ন্তি (মহাৰ. ৩৩৮) ৰচনতো অড্ঢকাসিযাদীনি মহগ্ঘানিপি কম্বলানি ৰট্টন্তি. অড্ঢকাসিযন্তি এত্থ কাসীতি সহস্সং ৰুচ্চতি, তংঅগ্ঘনকো কাসিযো. অযং পন পঞ্চ সতানি অগ্ঘতি, তস্মা অড্ঢকাসিযোতি ৰুত্তো.