খিপিতকথা

৪৮. খিপিতকথাযং খিপীযিত্থাতি খিপিতো. খিপি অব্যত্তসদ্দেতি ধাতু. ভাৰেনভাৰলক্খণত্তা তস্মিং খিপিতেতি ৰিভত্যন্তং. ‘‘যস্মিং কিস্মিঞ্চি পুগ্গলে’’তি লক্খণৰন্তকত্তা অজ্ঝাহরিতব্বো. জীৰাতি জীৰ পাণধারণেতি ধাতু, ৰিভত্তিলোপো. যস্মিং কিস্মিঞ্চি পুগ্গলে খিপিতে ভিক্খুনা ‘‘জীৰা’’তি ৰচনং ন ৰত্তব্বং, ভিক্খুস্মিং খিপিতে গিহিনা ‘‘জীৰথ ভন্তে’’তি ৰুচ্চমানে সতি ‘‘চিরং জীৰা’’তি ভিক্খুনা ৰত্তুং ৰট্টতীতি যোজনা. ‘‘ৰুচ্চমানে’’তি এত্থ পন লক্খণস্স কম্মৰাচকত্তা তেন সমানাধিকরণং কম্মভূতং ‘‘ভিক্খুস্মি’’ন্তি লক্খণৰন্তকম্মং অজ্ঝাহরিতব্বং যথা কিং ‘‘গোসু দুয্হমানাসু পুরিসো আগতো’’তি. অপরে পন আচরিযা ঈদিসেসু ঠানেসু ‘‘সন্তেসূ’’তি পদং অজ্ঝাহরিত্ৰা ইদমেৰ লক্খণপদং, ‘‘গোসু দুয্হমানাসূ’’তি পদদ্ৰযং পন ‘‘সন্তেসূ’’তি এত্থ পকতিৰিকতিৰসেন কত্তা এৰাতি ৰদন্তি, ৰীমংসিত্ৰা গহেতব্বং.