আনিসংসকথা

৬৮. আনিসংসকথাযং ৰিনযং ধারেতীতি ৰিনযধরো, সিক্খনৰাচনমনসিকারৰিনিচ্ছযনতদনুলোমকরণাদিনা ৰিনযপরিযত্তিকুসলো ভিক্খু. ৰিনযপরিযত্তিমূলং এতেসন্তি ৰিনযপরিযত্তিমূলকা. কে তে? পঞ্চানিসংসা. ৰিনযপরিযত্তিযেৰ মূলং কারণং কত্ৰা লভিতব্বআনিসংসা, ন অঞ্ঞপরিযত্তিং ৰা পটিপত্তিআদযো ৰা মূলং কত্ৰাতি অত্থো. অথ ৰা পরিযাপুণনং পরিযত্তি, ৰিনযস্স পরিযত্তি ৰিনযপরিযত্তি, সা মূলং এতেসন্তি ৰিনযপরিযত্তিমূলকা, ৰিনযপরিযাপুণনহেতুভৰা আনিসংসাতি অত্থো. ‘‘কতমে’’তিআদিনা তেসং পঞ্চানিসংসাদীনং সরূপং পুচ্ছিত্ৰা ‘‘অত্তনো’’তিআদিনা ৰিস্সজ্জেত্ৰা তং ৰচনং পাল়িযা সমত্থেতুং ‘‘ৰুত্তঞ্হেত’’ন্তিআদিমাহ.

এৰং পঞ্চানিসংসানং সরূপং দস্সেত্ৰা ইদানি তেযেৰ ৰিত্থারতো দস্সেতুং ‘‘কথমস্সা’’তিআদিনা পুচ্ছিত্ৰা ‘‘ইধেকচ্চো’’তিআদিনা ৰিস্সজ্জেতি. তত্থ অত্তনো সীলক্খন্ধসুগুত্তভাৰো নাম আপত্তিঅনাপজ্জনভাৰেনেৰ হোতি, নো অঞ্ঞথাতি আপত্তিআপজ্জনকারণং দস্সেত্ৰা তদভাৰেন অনাপজ্জনং দস্সেতুং ‘‘আপত্তিং আপজ্জন্তো ছহাকারেহি আপজ্জতী’’তিআদিমাহ. তত্থ –

‘‘সঞ্চিচ্চ আপত্তিং আপজ্জতি;

আপত্তিং পরিগূহতি;

অগতিগমনঞ্চ গচ্ছতি;

এদিসো ৰুচ্চতি অলজ্জিপুগ্গলো’’তি. (পরি. ৩৫৯) –

ৰুত্তেন অলজ্জীলক্খণেন ন লজ্জতি ন হিরীযতীতি অলজ্জী, তস্স ভাৰো অলজ্জিতা. নত্থি ঞাণং এতস্সাতি অঞ্ঞাণং, তস্স ভাৰো অঞ্ঞাণতা. কুকতস্স ভাৰো কুক্কুচ্চং, তেন পকতো কুক্কুচ্চপকতো, তস্স ভাৰো কুক্কুচ্চপকততা. কপ্পতীতি কপ্পিযং, ন কপ্পিযং অকপ্পিযং, তস্মিং অকপ্পিযে, কপ্পিযং ইতি সঞ্ঞা যস্স সো কপ্পিযসঞ্ঞী, তস্স ভাৰো কপ্পিযসঞ্ঞিতা. ইতরং তপ্পটিপক্খতো কাতব্বং, ইমেসু পঞ্চসু পদেসু যকারলোপো, তস্মা ‘‘অলজ্জিতায আপত্তিং আপজ্জতী’’তিআদিনা যোজেতব্বানি. হেত্ৰত্থে চেতং নিস্সক্কৰচনং. সরতীতি সতি, সমুস্সনং সম্মোসো. সতিযা সম্মোসো সতিসম্মোসো, তস্মা সতিসম্মোসা. হেত্ৰত্থে চেতং করণৰচনং. ইদানি তানি কারণানি ৰিত্থারতো দস্সেতুং ‘‘কথ’’ন্ত্যাদিমাহ. তং নযানুযোগেন ৰিঞ্ঞেয্যমেৰ.

অরিট্ঠো ইতি ভিক্খু অরিট্ঠভিক্খু, কণ্টকো ইতি সামণেরো কণ্টকসামণেরো, ৰেসালিযা জাতা ৰেসালিকা, ৰজ্জীনং পুত্তা ৰজ্জিপুত্তা, ৰেসালিকা চ তে ৰজ্জিপুত্তা চাতি ৰেসালিকৰজ্জিপুত্তা, অরিট্ঠভিক্খু চ কণ্টকসামণেরো চ ৰেসালিকৰজ্জিপুত্তা চ অরিট্ঠভিক্খুকণ্টকসামণেরৰেসালিকৰজ্জিপুত্তকা. পরূপহারো চ অঞ্ঞাণঞ্চ কঙ্খাৰিতরণঞ্চ পরূপহারঅঞ্ঞাণকঙ্খাৰিতরণা. কে তে? ৰাদা. তে আদি যেসং তেতি পরূপহারঅঞ্ঞাণকঙ্খাৰিতরণাদযো. ৰদন্তি এতেহীতি ৰাদা, পরূপহারঅঞ্ঞাণকঙ্খাৰিতরণাদযো ৰাদা এতেসন্তি পরূ…পে… ৰাদা. কে তে? মিচ্ছাৰাদিনো. অরিট্ঠ…পে… পুত্তা চ পরূপহার…পে… ৰাদা চ মহাসঙ্ঘিকাদযো চ সাসনপচ্চত্থিকা নামাতি সমুচ্চযদ্ৰন্দৰসেন যোজনা কাতব্বা. সেসং সুৰিঞ্ঞেয্যমেৰ.

আনিসংসকথা নিট্ঠিতা.

ইতি ৰিনযসঙ্গহসংৰণ্ণনাভূতে ৰিনযালঙ্কারে

পকিণ্ণকৰিনিচ্ছযকথালঙ্কারো নাম

চতুত্তিংসতিমো পরিচ্ছেদো.