নিগমনকথাৰণ্ণনা

নিগমগাথাসু পঠমগাথাযং সদ্ধম্মট্ঠিতিকামেন সাসনুজ্জোতকারিনা পরক্কমবাহুনা নরিন্দেন অজ্ঝেসিতো সো অহং ৰিনযসঙ্গহং অকাসিন্তি যোজনা.

দুতিযততিযগাথাযং তেনেৰ পরক্কমবাহুনরিন্দেনেৰ কারিতে রম্মে রমণীযে পাসাদসতমণ্ডিতে পাসাদানং সতেন পটিমণ্ডিতে নানাদুমগণাকিণ্ণে ভাৰনাভিরতালযে ভাৰনায অভিরতানং ভিক্খূনং আলযভূতে সীতলূদকসম্পন্নে জেতৰনে জেতৰননামকে ৰিহারে ৰসং ৰসন্তো হুত্ৰা, অথ ৰা ৰসং ৰসন্তো সোহং সো অহং যোগীনং হিতং হিতভূতং সারং সারৰন্তং ইমং ঈদিসং ৰিনযসঙ্গহং অকাসিন্তি যোজনা.

সেসগাথাসু ইমিনা গন্থকরণেন যং পুঞ্ঞং ময্হং সিদ্ধং, অঞ্ঞং ইতো গন্থকরণতো অঞ্ঞভূতং যং পুঞ্ঞং মযা পসুতং হোতি, এতেন পুঞ্ঞকম্মেন দুতিযে অত্তসম্ভৰে তাৰতিংসে পমোদেন্তো সীলাচারগুণে রতো পঞ্চকামেসু অলগ্গো দেৰপুত্তো হুত্ৰা পঠমং পঠমভূতং ফলং সোতাপত্তিফলং পত্ৰান অন্তিমে অত্তভাৰম্হি লোকগ্গপুগ্গলং নাথং নাথভূতং সব্বসত্তহিতে রতং মেত্তেয্যং মেত্তেয্যনামকং মুনিপুঙ্গৰং মুনিসেট্ঠং দিস্ৰান তস্স ধীরস্স সদ্ধম্মদেসনং সুত্ৰা অগ্গং ফলং অরহত্তফলং অধিগন্ত্ৰা লভিত্ৰা জিনসাসনং সোভেয্যং সোভাপেয্যন্তি অযং পাকটযোজনা.

এতিস্সায পন যোজনায সতি আচরিযৰরস্স ৰচনং ন সম্পটিচ্ছন্তি পণ্ডিতা. কথং? এত্থ হি ইতো দুতিযভৰে তাৰতিংসভৰনে দেৰপুত্তো হুত্ৰা সোতাপত্তিফলং পত্ৰা অন্তিমভৰে মেত্তেয্যস্স ভগৰতো ধম্মদেসনং সুত্ৰা অরহত্তফলং লভেয্যন্তি আচরিযস্স পত্থনা, সা অযুত্তরূপা হোতি. সোতাপন্নস্স হি সত্তভৰতো উদ্ধং পটিসন্ধি নত্থি, তাৰতিংসানঞ্চ দেৰানং ভৰসতেনপি ভৰসহস্সেনপি ভৰসতসহস্সেনপি মেত্তেয্যস্স ভগৰতো উপ্পজ্জনকালো অপ্পত্তব্বো হোতি. অথাপি ৰদেয্য ‘‘অন্তরা ব্রহ্মলোকে নিব্বত্তিত্ৰা মেত্তেয্যস্স ভগৰতো কালে মনুস্সো ভৰেয্যা’’তি, এৰম্পি ন যুজ্জতি. ন হি ব্রহ্মলোকগতানং অরিযানং পুন কামভৰূপপত্তি অত্থি. ৰুত্তঞ্হি অভিধম্মে যমকপ্পকরণে (যম. ২.অনুসযযমক. ৩১২) ‘‘রূপধাতুযা চুতস্স কামধাতুং উপপজ্জন্তস্স সত্তেৰ অনুসযা অনুসেন্তী’’তি. অথাপি ৰদেয্য ‘‘ব্রহ্মলোকেযেৰ ঠত্ৰা অগ্গফলং লভেয্যা’’তি, তথা চ আচরিযস্স ৰচনে ন দিস্সতি, ‘‘সোভেয্যং জিনসাসন’’ন্তি ৰুত্তত্তা ভিক্খুভূতত্তমেৰ দিস্সতি. ন হি ভিক্খুভূতো সাসনং সোভাপেতুং সক্কোতি. অভিধম্মত্থৰিভাৰনিযঞ্চ –

‘‘জোতযন্তং তদা তস্স, সাসনং সুদ্ধমানসং;

পস্সেয্যং সক্করেয্যঞ্চ, গরুং মে সারিসম্ভৰ’’ন্তি. –

ভিক্খুভূতমেৰ ৰুত্তং. অথাপি ৰদেয্য ‘‘অন্তরা দীঘাযুকো ভুম্মদেৰো হুত্ৰা তদা মনুস্সো ভৰেয্যা’’তি, এৰম্পি একস্স বুদ্ধস্স সাৰকভূতো অরিযপুগ্গলো পুন অঞ্ঞস্স বুদ্ধস্স সাৰকো ন ভৰেয্যাতি, আচরিযো পন সব্বপরিযত্তিধরো অনেকগন্থকারকো অনেকেসং গন্থকারকানং থেরানং আচরিযপাচরিযভূতো, তেন ন কেৰলং ইধেৰ ইমা গাথাযো ঠপিতা, অথ খো সারত্থদীপনীনামিকায ৰিনযটীকায অৰসানে চ ঠপিতা, তস্মা ভৰিতব্বমেত্থ কারণেনাতি ৰীমংসিতব্বমেতং.

অথ ৰা ইমিনা…পে… দেৰপুত্তো হুত্ৰা পঠমং তাৰ ফলং যথাৰুত্তং তাৰতিংসে পমোদনসীলাচারগুণে রতং পঞ্চকামেসু অলগ্গভাৰসঙ্খাতং আনিসংসং পত্ৰান অন্তিমে অত্তভাৰম্হি…পে… সোভেয্যন্তি যোজনা. অথ ৰা ইমিনা…পে… পঞ্চকামেসু অলগ্গো হুত্ৰা অন্তিমে অত্তভাৰম্হি…পে… সদ্ধম্মদেসনং সুত্ৰা পঠমং ফলং সোতাপত্তিফলং পত্ৰা ততো পরং অগ্গফলং অরহত্তফলং অধিগন্ত্ৰা জিনসাসনং সোভেয্যন্তি যোজনা. যথা অম্হাকং ভগৰতো ধম্মচক্কপ্পৰত্তনসুত্তন্তধম্মদেসনং সুত্ৰা অঞ্ঞাতকোণ্ডঞ্ঞত্থেরো সোতাপত্তিফলং পত্ৰা পচ্ছা অরহত্তফলং অধিগন্ত্ৰা জিনসাসনং সোভেসি, এৰন্তি অত্থো. ইতো অঞ্ঞানিপি নযানি যথা থেরস্স ৰচনানুকূলানি, তানি পণ্ডিতেহি চিন্তেতব্বানি.

নিগমনকথাৰণ্ণনা নিট্ঠিতা.