লোণসোৰীরককথা

লোণসোৰীরককথাযং ‘‘অনুজানামি, ভিক্খৰে, গিলানস্স লোণসোৰীরকং, অগিলানস্স উদকসম্ভিন্নং পানপরিভোগেন পরিভুঞ্জিতু’’ন্তি (মহাৰ. ২৭৩) ৰচনতো গিলানেন ভিক্খুনা লোণসোৰীরকং পাতব্বং, অগিলানেন উদকসম্ভিন্নং কত্ৰা পরিভুঞ্জিতব্বং, তঞ্চ ‘‘পানপরিভোগেনা’’তি ৰচনতো ৰিকালেপি ৰট্টতি.

তত্থ লোণসোৰীরকং নাম সব্বরসাভিসঙ্খতং একং ভেসজ্জং, তং কির করোন্তো হরীতকামলকৰিভীতককসাৰে সব্বধঞ্ঞানি সব্বঅপরণ্ণানি সত্তন্নম্পি ধঞ্ঞানং ওদনং কদলিফলাদীনি সব্বফলানি ৰেত্তকেতকখজ্জূরিকল়ীরাদযো সব্বকল়ীরে মচ্ছমংসখণ্ডানি অনেকানি চ মধুফাণিতসিন্ধৰলোণতিকটুকাদীনি ভেসজ্জানি পক্খিপিত্ৰা কুম্ভিমুখং লিম্পিত্ৰা একং দ্ৰে তীণি সংৰচ্ছরানি ঠপেন্তি, তং পরিপচ্চিত্ৰা জম্বুরসৰণ্ণং হোতি, ৰাতকাসকুট্ঠপণ্ডুভগণ্ডলাদীনং সিনিদ্ধভোজনভুত্তানঞ্চ উত্তরপানং ভত্তজীরণকভেসজ্জং তাদিসং নত্থি, তং পনেতং ভিক্খূনং পচ্ছাভত্তম্পি ৰট্টতি, গিলানানং পাকতিকমেৰ. অগিলানানং পন উদকসম্ভিন্নং পানপরিভোগেনাতি.

সারত্থদীপনিযং (সারত্থ. টী. ২.১৯১-১৯২) পন ‘‘পানপরিভোগেনাতি ৰুত্তত্তা লোণসোৰীরকং যামকালিক’’ন্তি ৰুত্তং. ৰিমতিৰিনোদনিযং (ৰি. ৰি. টী. ১.১৯২) পন ‘‘পানপরিভোগেন ৰট্টতীতি সম্বন্ধো. এৰং পন ৰুত্তত্তা লোণসোৰীরকং যামকালিকন্তি কেচি ৰদন্তি, কেচি পন ‘গিলানানং পাকতিকমেৰ, অগিলানানং পন উদকসম্ভিন্ন’ন্তি ৰুত্তত্তা গুল়ং ৰিয সত্তাহকালিক’’ন্তি ৰুত্তং. ৰজিরবুদ্ধিটীকাযং (ৰজির. টী. মহাৰগ্গ ২৬৩) পন ‘‘অৰিসেসেন সতিপচ্চযতা ৰুত্তা. ইমস্মিং খন্ধকে ‘অনুজানামি, ভিক্খৰে, গিলানস্স গুল়ং, অগিলানস্স গুল়োদকং, গিলানস্স লোণসোৰীরকং, অগিলানস্স উদকসম্ভিন্ন’ন্তি (মহাৰ. ২৮৪) ৰুত্তং, তস্মা সিদ্ধং ‘সতিপচ্চযতা গিলানাগিলানৰসেন দুৰিধা’তি’’ ৰুত্তং.