অন্তোৰুত্থাদিকথা

অন্তোৰুত্থাদিকথাযং ‘‘তেন খো পন সমযেন ভগৰতো উদরৰাতাবাধো হোতি, অথ খো আযস্মা আনন্দো ‘পুব্বেপি ভগৰতো উদরৰাতাবাধো তেকটুলযাগুযা ফাসু হোতী’তি সামং তিলম্পি তণ্ডুলম্পি মুগ্গম্পি ৰিঞ্ঞাপেত্ৰা অন্তো ৰাসেত্ৰা অন্তো সামং পচিত্ৰা ভগৰতো উপনামেসি ‘পিৰতু ভগৰা তেকটুলযাগু’ন্তি. জানন্তাপি তথাগতা পুচ্ছন্তি, জানন্তাপি ন পুচ্ছন্তি, কালং ৰিদিত্ৰা পুচ্ছন্তি, কালং ৰিদিত্ৰা ন পুচ্ছন্তি, অত্থসঞ্হিতং তথাগতা পুচ্ছন্তি, নো অনত্থসঞ্হিতং, অনত্থসঞ্হিতে সেতুঘাতো তথাগতানং. দ্ৰীহি আকারেহি বুদ্ধা ভগৰন্তো ভিক্খূ পটিপুচ্ছন্তি ‘ধম্মং ৰা দেসেস্সাম, সাৰকানং ৰা সিক্খাপদং পঞ্ঞপেস্সামা’তি.

অথ খো ভগৰা আযস্মন্তং আনন্দং আমন্তেসি ‘কুতাযং, আনন্দ, যাগূ’তি. অথ খো আযস্মা আনন্দো ভগৰতো এতমত্থং আরোচেসি. ৰিগরহি বুদ্ধো ভগৰা অননুচ্ছৰিকং, আনন্দ, অননুলোমিকং অপ্পতিরূপং অস্সমণকং অকপ্পিযং অকরণীযং, কথঞ্হি নাম ত্ৰং, আনন্দ, এৰরূপায বাহুল্লায চেতেস্সসি, যদপি, আনন্দ, অন্তো ৰুত্থং, তদপি অকপ্পিযং. যদপি অন্তো পক্কং, তদপি অকপ্পিযং. যদপি সামং পক্কং, তদপি অকপ্পিযং. নেতং, আনন্দ, অপ্পসন্নানং ৰা পসাদায…পে… ৰিগরহিত্ৰা ধম্মিং কথং কত্ৰা ভিক্খূ আমন্তেসি – ন, ভিক্খৰে, অন্তো ৰুত্থং অন্তো পক্কং সামং পক্কং পরিভুঞ্জিতব্বং, যো পরিভুঞ্জেয্য, আপত্তি দুক্কটস্স. অন্তো চে, ভিক্খৰে, ৰুত্থং অন্তো পক্কং সামং পক্কং, তঞ্চে পরিভুঞ্জেয্য, আপত্তি তিণ্ণং দুক্কটানং. অন্তো চে, ভিক্খৰে, ৰুত্থং অন্তো পক্কং অঞ্ঞেহি পক্কং, তঞ্চে পরিভুঞ্জেয্য, আপত্তি দ্ৰিন্নং দুক্কটানং. অন্তো চে, ভিক্খৰে, ৰুত্থং বহি পক্কং সামং পক্কং, তঞ্চে পরিভুঞ্জেয্য, আপত্তি দ্ৰিন্নং দুক্কটানং. বহি চে, ভিক্খৰে, ৰুত্থং অন্তো পক্কং সামং পক্কং, তঞ্চে পরিভুঞ্জেয্য, আপত্তি দ্ৰিন্নং দুক্কটানং. অন্তো চে, ভিক্খৰে, ৰুত্থং বহি পক্কং অঞ্ঞেহি পক্কং, তঞ্চে পরিভুঞ্জেয্য, আপত্তি দুক্কটস্স. বহি চে, ভিক্খৰে, ৰুত্থং অন্তো পক্কং অঞ্ঞেহি পক্কং, তঞ্চে পরিভুঞ্জেয্য, আপত্তি দুক্কটস্স. বহি চে, ভিক্খৰে, ৰুত্থং বহি পক্কং সামং পক্কং, তঞ্চে পরিভুঞ্জেয্য, আপত্তি দুক্কটস্স. বহি চে, ভিক্খৰে, ৰুত্থং বহি পক্কং অঞ্ঞেহি পক্কং, তঞ্চে পরিভুঞ্জেয্য, অনাপত্তী’’তি (মহাৰ. ২৭৪) ৰচনতো সহসেয্যপ্পহোনকে ঠানে ৰুত্থতা, তত্থ পক্কতা, উপসম্পন্নেন সামং পক্কতাতি ইমেসং তিণ্ণং অঙ্গানং সম্ভৰে সতি তিস্সো আপত্তিযো, দ্ৰিন্নং সম্ভৰে দ্ৰে আপত্তিযো, একস্স অঙ্গস্স সম্ভৰে একা আপত্তীতি ৰেদিতব্বং.

অন্তো ৰুত্থন্তি অকপ্পিযকুটিযং ৰুত্থং. সামং পক্কন্তি এত্থ যং কিঞ্চি আমিসং ভিক্খুনো পচিতুং ন ৰট্টতি. সচেপিস্স উণ্হযাগুযা সুলসিপণ্ণানি ৰা সিঙ্গিৰেরং ৰা লোণং ৰা পক্খিপন্তি, তম্পি চালেতুং ন ৰট্টতি. ‘‘যাগুং নিব্বাপেমী’’তি পন চালেতুং ৰট্টতি. উত্তণ্ডুভত্তং লভিত্ৰাপি পিদহিতুং ন ৰট্টতি. সচে পন মনুস্সা পিদহিত্ৰাৰ দেন্তি, ৰট্টতি. ‘‘ভত্তং ৰা মা নিব্বাযতূ’’তি পিদহিতুং ৰট্টতি. ‘‘অনুজানামি, ভিক্খৰে, পুন পাকং পচিতু’’ন্তি (মহাৰ. ২৭৪) ৰচনতো পুব্বে অনুপসম্পন্নেহি পক্কং পুন পচিতুং ৰট্টতি. ৰুত্তঞ্হি অট্ঠকথাযং (মহাৰ. অট্ঠ. ২৭৪) ‘‘খীরতক্কাদীসু পন সকিং কুথিতেসু অগ্গিং দাতুং ৰট্টতি পুনপাকস্স অনুঞ্ঞাতত্তা’’তি. ‘‘অনুজানামি, ভিক্খৰে, অন্তো ৰাসেতু’’ন্তি (মহাৰ. ২৭৪) ৰচনতো দুব্ভিক্খসমযে তণ্ডুলাদীনি অন্তো ৰাসেতুং ৰট্টতি. ‘‘অনুজানামি, ভিক্খৰে, অন্তো পচিতু’’ন্তি (মহাৰ. ২৭৪) ৰচনতো দুব্ভিক্খসমযে অন্তো পচিতুং ৰট্টতি. ‘‘অনুজানামি, ভিক্খৰে, সামং পচিতু’’ন্তি (মহাৰ. ২৭৪) ৰচনতো দুব্ভিক্খসমযে সামম্পি পচিতুং ৰট্টতি. ‘‘অনুজানামি, ভিক্খৰে, অন্তো ৰুত্থং অন্তো পক্কং সামং পক্ক’’ন্তি (মহাৰ. ২৭৪) ৰচনতো দুব্ভিক্খসমযে তীণিপি ৰট্টন্তি.