১১. পঞ্চসতিকক্খন্ধকো

খুদ্দানুখুদ্দকসিক্খাপদকথাৰণ্ণনা

৪৩৭. পঞ্চসতিকক্খন্ধকে পাল়িযং ‘‘অপাৰুসো, অম্হাকং সত্থারং জানাসী’’তি ইদং থেরো সযং ভগৰতো পরিনিব্বুতভাৰং জানন্তোপি অত্তনা সহগতভিক্খুপরিসায ঞাপনত্থমেৰ, সুভদ্দস্স ৰুড্ঢপব্বজিতস্স সাসনস্স পটিপক্খৰচনং ভিক্খূনং ৰিঞ্ঞাপনত্থঞ্চ এৰং পুচ্ছি. সুভদ্দো হি কুসিনারাযং ভগৰতি অভিপ্পসন্নায খত্তিযাদিগহট্ঠপরিসায মজ্ঝে ভগৰতো পরিনিব্বানং সুত্ৰা হট্ঠপহট্ঠোপি ভযেন পহট্ঠাকারং ৰাচায পকাসেতুং ন সক্খিস্সতি, ইধেৰ পন ৰিজনপদেসে সুত্ৰা যথাজ্ঝাসযং অত্তনো পাপলদ্ধিং পকাসেস্সতি, ততো তমেৰ পচ্চযং দস্সেত্ৰা ভিক্খূ সমুস্সাহেত্ৰা ধম্মৰিনযসঙ্গহং কারেত্ৰা এতস্স পাপভিক্খুস্স, অঞ্ঞেসঞ্চ ঈদিসানং মনোরথৰিঘাতং, সাসনট্ঠিতিঞ্চ করিস্সামীতি জানন্তোৰ তং পুচ্ছীতি ৰেদিতব্বং. তেনেৰ থেরো ‘‘একমিদাহং, আৰুসো, সময’’ন্তিআদিনা সুভদ্দৰচনমেৰ দস্সেত্ৰা ধম্মৰিনযং সঙ্গাযাপেসি. নানাভাৰোতি সরীরেন নানাদেসভাৰো, ৰিপ্পৰাসোতি অত্থো. ৰিনাভাৰোতি মরণেন ৰিযুজ্জনং. অঞ্ঞথাভাৰোতি ভৰন্তরূপগমনেন অঞ্ঞাকারপ্পত্তি.

৪৪১. ‘‘আকঙ্খমানো…পে… সমূহনেয্যা’’তি ইদং ভগৰা মযা ‘‘আকঙ্খমানো’’তি ৰুত্তত্তা একসিক্খাপদম্পি সমূহনিতব্বং অপস্সন্তা, সমূহনে চ দোসং দিস্ৰা ধম্মসঙ্গহকা ভিক্খূ ‘‘অপঞ্ঞত্তং ন পঞ্ঞাপেস্সাম, পঞ্ঞত্তং ন সমুচ্ছিন্দিস্সামা’’তিআদিনা পুন ‘‘পঞ্ঞত্তিসদিসায অকুপ্পায কম্মৰাচায সাৰেত্ৰা সমাদায ৰত্তিস্সন্তি, ততো যাৰ সাসনন্তরধানা অপ্পটিবাহিযানি সিক্খাপদানি ভৰিস্সন্তী’’তি ইমিনা অধিপ্পাযেন অৰোচাতি দট্ঠব্বং. তেনেৰ মহাথেরাপি তথেৰ পটিপজ্জিংসু.

গিহিগতানীতি গিহীসু গতানি. খত্তিযমহাসারাদিগিহীহি ঞাতানীতি অত্থো. চিতকধূমকালো অত্তনো পৰত্তিপরিযোসানভূতো এতস্সাতি ধূমকালিকং.

৪৪৩. ওল়ারিকে নিমিত্তে করিযমানেপীতি ‘‘আকঙ্খমানো, আনন্দ, তথাগতো কপ্পং ৰা তিট্ঠেয্য কপ্পাৰসেসং ৰা’’তি এৰং থূলতরে ‘‘তিট্ঠতু, ভগৰা, কপ্প’’ন্তি যাচনহেতুভূতে ওকাসনিমিত্তে কম্মে করিযমানে. মারেন পরিযুট্ঠিতচিত্তোতি মারেন আৰিট্ঠচিত্তো.

৪৪৫. উজ্জৰনিকাযাতি পটিসোতগামিনিযা. কুচ্ছিতো লৰো ছেদো ৰিনাসো কুলৰো, নিরত্থকৰিনিযোগো. তং ন গচ্ছন্তীতি ন কুলৰং গমেন্তি.

খুদ্দানুখুদ্দকসিক্খাপদকথাৰণ্ণনা নিট্ঠিতা.

পঞ্চসতিকক্খন্ধকৰণ্ণনানযো নিট্ঠিতো.