৮. ৰত্তক্খন্ধকো

আগন্তুকৰত্তকথাৰণ্ণনা

৩৫৭. ৰত্তক্খন্ধকে পত্থরিতব্বন্তি আতপে পত্থরিতব্বং. পাল়িযং অভিৰাদাপেতব্বোতি ৰন্দনত্থায ৰস্সং পুচ্ছনেন নৰকো সযমেৰ ৰন্দতীতি ৰুত্তং. নিল্লোকেতব্বোতি ওলোকেতব্বো.

আগন্তুকৰত্তকথাৰণ্ণনা নিট্ঠিতা.

আৰাসিকৰত্তকথাৰণ্ণনা

৩৫৯. ‘‘যথাভাগ’’ন্তি ঠপিতট্ঠানং অনতিক্কমিত্ৰা মঞ্চপীঠাদিং পপ্ফোটেত্ৰা পত্থরিত্ৰা উপরি পচ্চত্থরণং দত্ৰা দানম্পি সেনাসনপঞ্ঞাপনমেৰাতি দস্সেন্তো আহ ‘‘পপ্ফোটেত্ৰা হি পত্থরিতুং পন ৰট্টতিযেৰা’’তি.

আৰাসিকৰত্তকথাৰণ্ণনা নিট্ঠিতা.

অনুমোদনৰত্তকথাৰণ্ণনা

৩৬২. পঞ্চমে নিসিন্নেতি অনুমোদনত্থায নিসিন্নে. ন মহাথেরস্স ভারো হোতীতি অনুমোদকং আগমেতুং ন ভারো. অজ্ঝিট্ঠোৰ আগমেতব্বোতি অত্তনা অজ্ঝিট্ঠেহি ভিক্খূহি অনুমোদন্তেযেৰ নিসীদিতব্বন্তি অত্থো.

অনুমোদনৰত্তকথাৰণ্ণনা নিট্ঠিতা.

ভত্তগ্গৰত্তকথাৰণ্ণনা

৩৬৪. মনুস্সানং পরিৰিসনট্ঠানন্তি যত্থ অন্তোৰিহারেপি মনুস্সা সপুত্তদারা আৰসিত্ৰা ভিক্খূ নেত্ৰা ভোজেন্তি. আসনেসু সতীতি নিসীদনট্ঠানেসু সন্তেসু. ইদং, ভন্তে, আসনং উচ্চন্তি আসন্নে সমভূমিভাগে পঞ্ঞত্তং থেরাসনেন সমকং আসনং সন্ধায ৰুত্তং, থেরাসনতো পন উচ্চতরে আপুচ্ছিত্ৰাপি নিসীদিতুং ন ৰট্টতি. যদি তং আসন্নম্পি নীচতরং হোতি, অনাপুচ্ছাপি নিসীদিতুং ৰট্টতি. মহাথেরস্সেৰ আপত্তীতি আসনেন পটিবাহনাপত্তিযা আপত্তি. অৰত্থরিত্ৰাতি পারুতসঙ্ঘাটিং অৰত্থরিত্ৰা, অনুক্খিপিত্ৰাতি অত্থো.

পাল়িযং ‘‘উভোহি হত্থেহি…পে… ওদনো পটিগ্গহেতব্বো’’তি ইদং হত্থতলে ৰা পচ্ছিপিট্ঠিআদিদুস্সণ্ঠিতাধারে ৰা পত্তং ঠপেত্ৰা ওদনস্স গহণকালে পত্তস্স অপতনত্থায ৰুত্তং, সুসজ্জিতে পন আধারে পত্তং ঠপেত্ৰা একেন হত্থেন তং পরামসিত্ৰাপি ওদনং পটিগ্গহেতুং ৰট্টতি এৰ. উভোহি হত্থেহি…পে… উদকং পটিগ্গহেতব্বন্তি এত্থাপি এসেৰ নযো.

হত্থধোৰনউদকন্তি ভোজনাৰসানে উদকং. তেনাহ ‘‘পানীযং পিৰিত্ৰা হত্থা ধোৰিতব্বা’’তি. তেন পরিযোসানে ধোৰনমেৰ পটিক্খিত্তং, ভোজনন্তরে পন পানীযপিৰনাদিনা নযেন হত্থং ধোৰিত্ৰা পুন ভুঞ্জিতুং ৰট্টতীতি দস্সেতি. পোত্থকেসু পন ‘‘পানীযং পিৰিত্ৰা হত্থা ন ধোৰিতব্বা’’তি লিখন্তি, তং পুরিমৰচনেন ন সমেতি পরিযোসানে উদকস্সেৰ ‘‘হত্থধোৰনউদক’’ন্তি ৰুত্তত্তা. সচে মনুস্সা ধোৰথ, ভন্তেতিআদি নিট্ঠিতভত্তং নিসিন্নং থেরং সন্ধায ৰুত্তং. ধুরে দ্ৰারসমীপে.

ভত্তগ্গৰত্তকথাৰণ্ণনা নিট্ঠিতা.

পিণ্ডচারিকৰত্তকথাদিৰণ্ণনা

৩৬৬. পাল়িযং ঠাপেতি ৰাতি তিট্ঠ ভন্তেতি ৰদন্তি.

৩৬৭. অত্থি, ভন্তে, নক্খত্তপদানীতি নক্খত্তপদৰিসযানি ঞাতানি অত্থি, অস্সযুজাদিনক্খত্তং জানাথাতি অধিপ্পাযো. তেনাহ ‘‘ন জানাম, আৰুসো’’তি. অত্থি, ভন্তে, দিসাভাগন্তি এত্থাপি এসেৰ নযো. কেনজ্জ, ভন্তে, যুত্তন্তি কেন নক্খত্তেন চন্দো যুত্তোতি অত্থো.

৩৬৯. অঙ্গণেতি অব্ভোকাসে. এৰমেৰ পটিপজ্জিতব্বন্তি উদ্দেসদানাদি আপুচ্ছিতব্বন্তি দস্সেতি.

৩৭৪. নিবদ্ধগমনত্থাযাতি অত্তনোৰ নিরন্তরগমনত্থায. ঊহদিতাতি এত্থ হদ-ধাতুস্স ৰচ্চৰিস্সজ্জনত্থতাযাহ ‘‘বহি ৰচ্চমক্খিতা’’তি.

পিণ্ডচারিকৰত্তকথাদিৰণ্ণনা নিট্ঠিতা.

ৰত্তক্খন্ধকৰণ্ণনানযো নিট্ঠিতো.