৯. পাতিমোক্খট্ঠপনক্খন্ধকো

পাতিমোক্খুদ্দেসযাচনকথাৰণ্ণনা

৩৮৩. পাতিমোক্খট্ঠপনক্খন্ধকে পাল়িযং নন্দিমুখিযাতি ওদাতদিসামুখতায তুট্ঠমুখিযা. ‘‘উদ্ধস্তং অরুণ’’ন্তি ৰত্ৰাপি ‘‘উদ্দিসতু, ভন্তে, ভগৰা’’তি পাতিমোক্খুদ্দেসযাচনং অনুপোসথে উপোসথকরণপটিক্খেপস্স সিক্খাপদস্স অপঞ্ঞত্তত্তা থেরেন কতন্তি দট্ঠব্বং. কস্মা পন ভগৰা এৰং তুণ্হীভূতোৰ তিযামরত্তিং ৰীতিনামেসীতি? অপরিসুদ্ধায পরিসায উপোসথাদিসংৰাসকরণস্স সাৰজ্জতং ভিক্খুসঙ্ঘে পাকটং কাতুং, তঞ্চ আযতিং ভিক্খূনং তথাপটিপজ্জনত্থং সিক্খাপদং ঞাপেতুং. কেচি পনেত্থ ‘‘অপরিসুদ্ধম্পি পুগ্গলং তস্স সম্মুখা ‘অপরিসুদ্ধো’তি ৰত্তুং মহাকরুণায অৰিসহন্তো ভগৰা তথা নিসীদী’’তি কারণং ৰদন্তি. তং অকারণং পচ্ছাপি অৰত্তব্বতো, মহামোগ্গল্লানত্থেরেনাপি তং বাহাযং গহেত্ৰা বহি নীহরণস্স অকত্তব্বতাপসঙ্গতো. তস্মা যথাৰুত্তমেৰেত্থ কারণন্তি. তেনেৰ ‘‘অট্ঠানমেতং, ভিক্খৰে, অনৰকাসো, যং তথাগতো অপরিসুদ্ধায পরিসায উপোসথং করেয্য, পাতিমোক্খং উদ্দিসেয্যা’’তি (অ. নি. ৮.২০; চূল়ৰ. ৩৮৬; উদা. ৪৫) ৰত্ৰা ‘‘ন চ, ভিক্খৰে, সাপত্তিকেন পাতিমোক্খং সোতব্ব’’ন্তিআদিনা (চূল়ৰ. ৩৮৬) সাপত্তিকপরিসায কত্তব্বৰিধি দস্সিতো.

সঙ্কস্সরসমাচারন্তি কিঞ্চিদেৰ অসারুপ্পং দিস্ৰা ‘‘ইদং ইমিনা কতং ভৰিস্সতী’’তি পরেহি সঙ্কায সরিতব্বসমাচারং, অত্তনা ৰা ‘‘মম অনাচারং এতে জানন্তী’’তি সঙ্কায সরিতব্বসমাচারং. সমণৰেসধারণেন, সঙ্ঘিকপচ্চযভাগগহণাদিনা চ জীৰিকং কপ্পেন্তো ‘‘অহং সমণো’’তি পটিঞ্ঞং অদেন্তোপি অত্থতো দেন্তো ৰিয হোতীতি ‘‘সমণপটিঞ্ঞং ব্রহ্মচারিপটিঞ্ঞ’’ন্তি ৰুত্তং. অৰস্সুতন্তি কিলেসাৰস্সনেন তিন্তং. সঞ্জাতদুস্সিল্যকচৰরত্তা কসম্বুজাতং, অসারতায ৰা কসম্বু ৰিয জাতং. বহিদ্ৰারকোট্ঠকা নিক্খামেত্ৰাতি দ্ৰারসালতো বহি নিক্খমাপেত্ৰা.

৩৮৪. মহাসমুদ্দে অভিরমন্তীতি বহুসো দস্সনপৰিসনাদিনা মহাসমুদ্দে অভিরতিং ৰিন্দন্তি. ন আযতকেনেৰ পপাতোতি ছিন্নতটমহাসোব্ভো ৰিয ন আদিতোৰ নিন্নোতি অত্থো. ঠিতধম্মোতি অৰট্ঠিতসভাৰো. পূরত্তন্তি পুণ্ণত্তং. নাগাতি সপ্পজাতিকা.

পাতিমোক্খুদ্দেসযাচনকথাৰণ্ণনা নিট্ঠিতা.

পাতিমোক্খসৰনারহকথাদিৰণ্ণনা

৩৮৬. উদাহরিতব্বন্তি পাল়িযা অৰত্ৰা তমত্থং যায কাযচি ভাসায উদাহটম্পি উদাহটমেৰাতি দট্ঠব্বং.

পুরে ৰা পচ্ছা ৰাতি ঞত্তিআরম্ভতো পুব্বে ৰা ঞত্তিনিট্ঠানতো পচ্ছা ৰা.

৩৮৭. কতঞ্চ অকতঞ্চ উভযং গহেত্ৰাতি যস্স কতাপি অত্থি অকতাপি. তস্স তদুভযং গহেত্ৰা. ধম্মিকং সামগ্গিন্তি ধম্মিকং সমগ্গকম্মং. পচ্চাদিযতীতি উক্কোটনাধিপ্পাযেন পুন কাতুং আদিযতি.

৩৮৮. আকারাদিসঞ্ঞা ৰেদিতব্বাতি আকারলিঙ্গনিমিত্তনামানি ৰুত্তানীতি ৰেদিতব্বানি.

পাতিমোক্খসৰনারহকথাদিৰণ্ণনা নিট্ঠিতা.

অত্তাদানঅঙ্গকথাদিৰণ্ণনা

৩৯৮. পুন চোদেতুং অত্তনা আদাতব্বং গহেতব্বং অধিকরণং অত্তাদানন্তি আহ ‘‘সাসনং সোধেতুকামো’’তিআদি. ৰস্সারত্তোতি ৰস্সকালো. সোপি হি দুব্ভিক্খাদিকালো ৰিয অধিকরণৰূপসমত্থং লজ্জিপরিসায দূরতো আনযনস্স, আগতানঞ্চ পিণ্ডায চরণাদিসমাচারস্স দুক্করত্তা অকালো এৰ.

সমনুস্সরণকরণন্তি অনুস্সরিতানুস্সরিতক্খণে পীতিপামোজ্জজননতো অনুস্সরণুপ্পাদকং. ৰিগতূপক্কিলেস…পে… সংৰত্ততীতি এত্থ যথা অব্ভহিমাদিউপক্কিলেসৰিরহিতানং চন্দিমসূরিযানং সস্সিরীকতা হোতি, এৰমস্সাপি চোদকস্স পাপপুগ্গলূপক্কিলেসৰিগমেন সস্সিরীকতা হোতীতি অধিপ্পাযো.

৩৯৯. অধিগতং মেত্তচিত্তন্তি অপ্পনাপ্পত্তং মেত্তঝানং.

৪০০-১. ‘‘দোসন্তরো’’তি এত্থ অন্তর-সদ্দো চিত্তপরিযাযোতি আহ ‘‘ন দুট্ঠচিত্তো হুত্ৰা’’তি.

কারুঞ্ঞং নাম করুণা এৰাতি আহ ‘‘কারুঞ্ঞতাতি করুণাভাৰো’’তি. করুণন্তি অপ্পনাপ্পত্তং ৰদতি. তথা মেত্তন্তি.

অত্তাদানঅঙ্গকথাদিৰণ্ণনা নিট্ঠিতা.

পাতিমোক্খট্ঠপনক্খন্ধকৰণ্ণনানযো নিট্ঠিতো.