৩. সমুচ্চযক্খন্ধকো

সুক্কৰিস্সট্ঠিকথাৰণ্ণনা

৯৭. সমুচ্চযক্খন্ধকে ৰেদযামহন্তি জানাপেমি অহং, আরোচেমীতিঅত্থো. অনুভৰামীতিপিস্স অত্থং ৰদন্তি. পুরিমং পন পসংসন্তি আরোপনৰচনত্তা. আরোচেত্ৰা নিক্খিপিতব্বন্তি দুক্কটপরিমোচনত্থং ৰুত্তং. কেচি পন ‘‘তদহেৰ পুন ৰত্তং সমাদিযিত্ৰা অরুণং উট্ঠাপেতুকামস্স রত্তিচ্ছেদপরিহারত্থম্পী’’তি ৰদন্তি.

‘‘সভাগা ভিক্খূ ৰসন্তী’’তি ৰুত্তত্তা ৰিসভাগানং ৰসনট্ঠানে ৰত্তং অসমাদিযিত্ৰা বহি এৰ কাতুম্পি ৰট্টতীতি দট্ঠব্বং. ‘‘দ্ৰে লেড্ডুপাতে অতিক্কমিত্ৰা’’তি ইদং ৰিহারে ভিক্খূনং সজ্ঝাযাদিসদ্দসৰনূপচারৰিজহনত্থং ৰুত্তং. ‘‘মহামগ্গতো ওক্কম্মা’’তি ইদং মগ্গপটিপন্নানং ভিক্খূনং উপচারাতিক্কমনত্থং ৰুত্তং. গুম্বেন ৰাতিআদি দস্সনূপচারৰিজহনত্থং.

‘‘সোপি কেনচি কম্মেন পুরে অরুণে এৰ গচ্ছতী’’তি ইমিনা আরোচনায কতায সব্বেসুপি ভিক্খূসু ৰিহারগতেসু ঊনে গণে চরণদোসো ৰা ৰিপ্পৰাসদোসো ৰা ন হোতি আরোচিতত্তা সহৰাসস্সাতি দস্সেতি. তেনাহ ‘‘অযঞ্চা’’ তিআদি. অব্ভানং কাতুং ন ৰট্টতীতি কতম্পি অকতমেৰ হোতীতি অত্থো.

সুক্কৰিস্সট্ঠিকথাৰণ্ণনা নিট্ঠিতা.

পটিচ্ছন্নপরিৰাসকথাৰণ্ণনা

১০২. সুদ্ধস্সাতি সভাগসঙ্ঘাদিসেসং অনাপন্নস্স, ততো ৰুট্ঠিতস্স ৰা. অঞ্ঞস্মিন্তি সুদ্ধন্তপরিৰাসৰসেন আপত্তিৰুট্ঠানতো অঞ্ঞস্মিং আপত্তিৰুট্ঠানে. পাল়িযং ‘‘পটিকস্সিতো সঙ্ঘেন উদাযি ভিক্খু অন্তরা একিস্সা আপত্তিযা…পে… মূলাযপটিকস্সনা’’তি ইদং করণৰসেন ৰিপরিণামেত্ৰা মূলাযপটিকস্সনায পটিকস্সিতোতি যোজেতব্বং. অথ ৰা ‘‘মূলায পটিকস্সনা খমতি সঙ্ঘস্সা’’তি উত্তরপদেন সহ পচ্চত্তৰসেনেৰ যোজেতুম্পি ৰট্টতি.

‘‘উদাযিং ভিক্খুং অন্তরা একিস্সা আপত্তিযা…পে… মূলায পটিকস্সিত্ৰা’’তি এত্থ অন্তরা একিস্সা আপত্তিযা হেতুভূতায উদাযিং ভিক্খুং মূলায পটিকস্সিত্ৰা মূলদিৰসে আকড্ঢিত্ৰা তস্সা অন্তরাপত্তিযা সমোধানপরিৰাসং দেতূতি যোজনা. আৰিকারাপেত্ৰা ৰিস্সজ্জেতব্বোতি তস্স অতেকিচ্ছভাৰং তেনেৰ সঙ্ঘস্স পাকটং কারেত্ৰা লজ্জিগণতো ৰিযোজনৰসেন ৰিস্সজ্জেতব্বো.

সতং আপত্তিযোতি কাযসংসগ্গাদিৰসেন একদিৰসে আপন্না সতং আপত্তিযো. দসসতন্তি সহস্সা আপত্তিযো. রত্তিসতং ছাদযিত্ৰানাতি যোজেতব্বো. সব্বপরিৰাসকম্মৰাচাৰসানেতি হেট্ঠা দস্সিতানং দ্ৰিন্নং সুদ্ধন্তপরিৰাসানং, তিণ্ণং সমোধানপরিৰাসানঞ্চাতি ইমেসং সব্বেসং পরিৰাসানং কম্মৰাচাপরিযোসানে. পুরিমনযেনেৰাতি পটিচ্ছন্নপরিৰাসে ৰুত্তনযেন.

ৰিহারূপচারতোপীতি বহিগামে ভিক্খূনং ৰিহারূপচারতোপি. ‘‘দ্ৰে লেড্ডুপাতা অতিক্কমিতব্বা’’তি ইদং ভিক্খূনং সৰনূপচারাতিক্কমনং ৰুত্তং. গামস্সাতি ন ৰুত্তন্তি গামস্স উপচারং মুঞ্চিতুং ৰট্টতীতি ন ৰুত্তং. তেন গামূপচারে ঠিতাপি তত্থ দস্সনসৰনূপচারে অতিক্কমিত্ৰা ঠিতা ভিক্খূ চ ভিক্খুনিযো চ তস্সা রত্তিচ্ছেদং ন করোন্তীতি দীপেতি.

অনিক্খিত্তৰত্তভিক্খূনং ৰুত্তনযেনেৰাতি উপচারসীমায পৰিট্ঠানং ৰসেন রত্তিচ্ছেদং সন্ধায ৰুত্তং. তস্মিং গামেতি ভিক্খুনীনং নিৰাসনগামে. অত্তানং দস্সেত্ৰাতি যথা আরোচেতুং সক্কা, তথা দস্সেত্ৰা. ‘‘সম্মন্নিত্ৰা দাতব্বা’’তি ইমিনা সম্মতায সহৰাসেপি রত্তিচ্ছেদো ন হোতীতি দস্সেতি.

মূলাযপটিকস্সিতস্সাতি মূলাযপটিকস্সিতস্স পুন পরিৰুত্থপরিৰাসস্সাতি অত্থো. তিস্সন্নন্তি মূলাপত্তিযা সহ দ্ৰিন্নং অন্তরাপত্তীনঞ্চ.

১০৮. সচে পটিচ্ছন্নাতি নিক্খিত্তৰত্তেনাপন্নাপত্তিং সন্ধায ৰুত্তং. পাল়িযং পঞ্চাহপ্পটিচ্ছন্নৰারে অন্তরাপত্তিকথাযং ‘‘এৰঞ্চ পন, ভিক্খৰে, ছারত্তং মানত্তং দাতব্ব’’ন্তি ইদং মূলাযপটিকস্সনাকম্মৰাচানন্তরমেৰ দাতুং ৰুত্তং ন হোতি. মূলাযপটিকস্সিতস্স পন পঞ্চদিৰসানি পরিৰসিত্ৰা যাচিতস্স মানত্তচরণকালে আপন্নায ততিযায অন্তরাপত্তিযা অপ্পটিচ্ছন্নায মানত্তদানং সন্ধায ৰুত্তং. এৰঞ্চ দিন্নমানত্তস্স একেন ছারত্তেন পুব্বে দিন্নমানত্তাহি তীহি আপত্তীহি সহ চতস্সন্নম্পি আপত্তীনং মানত্তং চিণ্ণমেৰ হোতি. ইমিনা পন নযেন অব্ভানারহকালে আপন্নায অন্তরাপত্তিযা, পক্খপ্পটিচ্ছন্নৰারে অন্তরাপত্তীসু চ পটিপজ্জনং ৰেদিতব্বং. ‘‘একাহপ্পটিচ্ছন্নাদিৰসেন পঞ্চা’’তি ইদং একাহপ্পটিচ্ছন্নাদীনং চতুন্নং পচ্চেকপরিৰাসদানমানত্তদানঅব্ভানানি একেকং কত্ৰা ৰুত্তং. ‘‘অন্তরাপত্তিৰসেন চতস্সো’’তি ইদম্পি মানত্তদানঅব্ভানানি তস্মিং তস্মিং মূলাযপটিকস্সনে একত্তং আরোপেত্ৰা ৰুত্তং.

পটিচ্ছন্নপরিৰাসকথাৰণ্ণনা নিট্ঠিতা.

সমোধানপরিৰাসকথাৰণ্ণনা

১২৫. ‘‘যস্মা পটিচ্ছন্না অন্তরাপত্তী’’তি ইদং সমোধানপরিৰাসদানস্স কারণৰচনং, ন পন চিণ্ণপরিৰুত্থদিৰসানং মক্খিতভাৰস্স, অপ্পটিচ্ছন্নায অন্তরাপত্তিযা মূলাযপটিকস্সনে কতেপি তেসং মক্খিতভাৰসম্ভৰতো. তস্মা ‘‘মানত্তচিণ্ণদিৰসাপি পরিৰুত্থদিৰসাপি সব্বে মক্খিতাৰ হোন্তী’’তি ইমস্সানন্তরং ‘‘সমোধানপরিৰাসো চস্স দাতব্বো’’তি এৰমেত্থ যোজনা কাতব্বা. তেনাহ ‘‘তেনেৰা’’তিআদি.

সমোধানপরিৰাসকথাৰণ্ণনা নিট্ঠিতা.

অগ্ঘসমোধানপরিৰাসকথাৰণ্ণনা

১৩৪. ‘‘একাপত্তিমূলকঞ্চা’’তি ইমিনা ‘‘একা আপত্তি একাহপ্পটিচ্ছন্না, একা আপত্তি দ্ৰীহপ্পটিচ্ছন্না’’তিআদিনযং দস্সেতি. অপ্পটিচ্ছন্নভাৰং দস্সেতুন্তি অজাননাদিনা পটিচ্ছন্নাযপি আপত্তিযা মানত্তারহতাৰচনেন অপ্পটিচ্ছন্নভাৰং দস্সেতুং. ‘‘একস্স, আৰুসো, মাসস্স ভিক্খু মানত্তারহো’’তি (চূল়ৰ. ১৫৩) হি ৰুত্তং. এত্থ একস্স অজাননপটিচ্ছন্নমাসস্স পরিৰাসারহো ন হোতি, কেৰলং আপত্তিযা অপ্পটিচ্ছন্নত্তা মানত্তারহো হোতীতি অধিপ্পাযো. পাল়িযং মক্খধম্মোতি মদ্দিতুকামতা. সঙ্ঘাদিসেসানং পরিৰাসদানাদিসব্বৰিনিচ্ছযস্স সমুচ্চযত্তা পনেস সমুচ্চযক্খন্ধকোতি ৰুত্তোতি ৰেদিতব্বো.

অগ্ঘসমোধানপরিৰাসকথাৰণ্ণনা নিট্ঠিতা.

সমুচ্চযক্খন্ধকৰণ্ণনানযো নিট্ঠিতো.