১০. কোসম্বকক্খন্ধকো
কোসম্বকৰিৰাদকথাৰণ্ণনা
৪৫১. কোসম্বকক্খন্ধকে সচে হোতি, দেসেস্সামীতি ৰিনযধরস্স ৰচনেন আপত্তিদিট্ঠিং পটিলভিত্ৰা এৰমাহ. তেনেৰ পাল়িযং ‘‘সো তস্সা আপত্তিযা অনাপত্তিদিট্ঠি হোতী’’তি ৰুত্তং. নত্থি আপত্তীতি উদকস্স ঠপনভাৰং অজানিত্ৰা ৰা ঠপিতং ছড্ডেত্ৰা ৰিস্সরিত্ৰা ৰা গমনে অসঞ্চিচ্চ অসতিযা অনাপত্তিপক্খোপি সম্ভৰতীতি ৰিনযধরো তত্থ অনাপত্তিদিট্ঠিং পটিলভিত্ৰা এৰমাহ. তেনেৰ পাল়িযং ‘‘অঞ্ঞে ভিক্খূ তস্স আপত্তিযা অনাপত্তিদিট্ঠিনো হোন্তী’’তি ৰুত্তং. পরিসাযপিস্স অনাপত্তিদিট্ঠিযা উপ্পন্নত্তা ‘‘অঞ্ঞে’’তি বহুৰচনং কতং. অনাপত্তিদিট্ঠি অহোসীতি সুত্তন্তিকত্থেরস্স ৰিনযে অপকতঞ্ঞুতায ৰিনযধরস্স ৰচনমত্তেন সো এৰমহোসি, সা পনস্স আপত্তি এৰ উদকাৰসেসস্স ঠপনভাৰং ঞত্ৰা ঠপিতত্তা. ৰত্থুমত্তজাননে এৰ হি সেখিযা সচিত্তকা, ন পণ্ণত্তিৰিজাননে. তেনেৰ পাল়িযং ‘‘তস্সা আপত্তিযা অনাপত্তিদিট্ঠি হোতী’’তি সব্বত্থ আপত্তি ইচ্চেৰ ৰুত্তং. ‘‘আপত্তিং আপজ্জমানো’’তি ইদং ৰিনযধরত্থেরো ‘‘তযা ইদং উদকং ঠপিত’’ন্তি অত্তনা পুট্ঠেন সুত্তন্তিকত্থেরেন ‘‘আমাৰুসো’’তি ৰুত্তৰচনং সরিত্ৰা পণ্ণত্তিঅকোৰিদতায সঞ্চিচ্চেৰ অকাসীতি আপত্তিদিট্ঠি হুত্ৰাৰ অৰোচ. তেনেৰ পাল়িযং ‘‘অঞ্ঞে ভিক্খূ তস্সা আপত্তিযা আপত্তিদিট্ঠিনো হোন্তী’’তি ৰুত্তং.
৪৫৩. ‘‘ন তাৰ ভিন্নো’’তি ইদং উক্খিপনতদনুৰত্তনমত্তেন সঙ্ঘো ভিন্নো নাম ন হোতি, তং নিস্সায পন উভযপক্খিকানং পক্খং পরিযেসিত্ৰা অঞ্ঞমঞ্ঞং কোধৰসেন কাযৰচীকলহৰড্ঢনেনেৰ হোতীতি ইমমত্থং সন্ধায ৰুত্তং. তেনাহ ‘‘সো চ খো কলহৰসেনা’’তি. সম্ভমঅত্থৰসেনাতি তুরিতত্থৰসেন.
৪৫৪. অকারণেতিআদি অনুক্খিপিত্ৰাৰ উপাযেন সঞ্ঞাপেত্ৰা হিতেসিতায আপত্তিতো মোচেতুং যুত্তট্ঠানে কোধচিত্তৰসেন ৰিহেঠনত্থায কতভাৰং সন্ধায ৰুত্তং, ন পন কম্মঙ্গস্স অভাৰং সন্ধায. তেনেৰ পাল়িযং ‘‘আপত্তি এসা, ভিক্খৰে, নেসা অনাপত্তি…পে… উক্খিত্তো এসো ভিক্খূ’’তিআদি ৰুত্তং.
৪৫৫. ‘‘অধম্মৰাদীনং পক্খে নিসিন্নো’’তি ইদং উপলক্খণমত্তং, ধম্মৰাদীনং পক্খে নিসীদিত্ৰা অধম্মৰাদীনং লদ্ধিং গণ্হন্তোপি ধম্মৰাদীনং নানাসংৰাসকো হোতি এৰ. কম্মং কোপেতীতি তং ৰিনা গণস্স অপূরণপক্খং সন্ধায ৰুত্তং. যত্থ ৰা তত্থ ৰাতি ধম্মৰাদীনং পক্খে ৰা অধম্মৰাদীনং পক্খে ৰাতি অত্থো. ইমে ধম্মৰাদিনোতি গণ্হাতীতি তংতংপক্খগতে ভিক্খূ যাথাৰতো ৰা অযাথাৰতো ৰা ‘‘ইমে ধম্মৰাদিনো’’তি গণ্হাতি, অযং তংতংপক্খগতানং অত্তানং সমানসংৰাসকং করোতি.
৪৫৬. উপদংসেন্তীতি পৰত্তেন্তি. পাল়িযং এত্তাৰতাতি ‘‘এত্তকপদেসং মুঞ্চিত্ৰা নিসিন্না মযং কোধচিত্তে উপ্পন্নেপি অঞ্ঞমঞ্ঞং অননুলোমিকং কাযকম্মাদিং পৰত্তেতুং ন সক্খিস্সামা’’তি সল্লেক্খেত্ৰা দূরে নিসীদিতব্বন্তি অধিপ্পাযো. তেনাহ ‘‘উপচারং মুঞ্চিত্ৰা’’তি.
৪৫৭. পাল়িযং ভণ্ডনজাতাতিআদীসু কলহস্স পুব্বভাগো ভণ্ডনং নাম. হত্থপরামাসাদি কলহো নাম. ৰিরুদ্ধৰাদো ৰিৰাদো নাম.
৪৫৮. পরিপুণ্ণকোসকোট্ঠাগারোতি এত্থ কোসো নাম সুৰণ্ণমণিআদিভণ্ডাগারসারগব্ভো. কোট্ঠং ৰুচ্চতি ধঞ্ঞস্স আৰসনট্ঠানং, কোট্ঠভূতং অগারং কোট্ঠাগারং, ধঞ্ঞসঙ্গহট্ঠানং. অব্ভুয্যাসীতি যুদ্ধায অভিমুখো নিক্খমীতি অত্থো. একসঙ্ঘাতম্পীতি একযুদ্ধম্পি. ধোৰনন্তি ধোৰনুদকং.
৪৬৩. পরিযাদিন্নরূপাতি কোধচিত্তেন পরিগ্গহিতসভাৰা.
৪৬৪. তং ন জানন্তীতি তং কলহং ন জানন্তি. যে উপনয্হন্তীতি যথাৰুত্তং কোধাকারং চিত্তে বন্ধন্তি. পাকটপরিস্সযেতি সীহাদিকে. পটিচ্ছন্নপরিস্সযেতি রাগাদিকে. পাল়িযং নত্থি বালে ৯৭ সহাযতাতি বালং নিস্সায সীলাদিগুণসঙ্খাতা সহাযতা নত্থি, ন সক্কা লদ্ধুন্তি অত্থো.
৪৬৬. অত্তকামরূপাতি অত্তনো হিতকামযমানসভাৰা. অনুরুদ্ধাতি একসেসনযেন তিণ্ণম্পি কুলপুত্তানং আলপনং, তেনেৰ বহুৰচননিদ্দেসো কতো. খমনীযং সরীরং যাপনীযং জীৰিতং ‘‘কচ্চি ৰো সরীরঞ্চ ধারেতুং, জীৰিতঞ্চ যাপেতুং সক্কা’’তি পুচ্ছতি. তগ্ঘাতি একংসত্থে নিপাতো, একংসেন মযং ভন্তেতি অত্থো. যথা কথন্তি এত্থ যথাতি নিপাতমত্তং, যথাকথন্তি ৰা একো নিপাতো কারণপুচ্ছনত্থো, কেন পকারেনাতি অত্থো. একঞ্চ পন মঞ্ঞে চিত্তন্তি একস্স চিত্তৰসেন ইতরেসম্পি পৰত্তনতো সব্বেসং নো একং ৰিয চিত্তন্তি অত্থো. কচ্চি পন ৰো অনুরুদ্ধাতি এত্থ ৰোতি নিপাতমত্তং, পচ্চত্তৰচনং ৰা, কচ্চি তুম্হেতি অত্থো. অম্হাকন্তি নিদ্ধারণে সামিৰচনং, অম্হেসু তীসু যো পঠমং পটিক্কমতীতি অত্থো.
কোসম্বকৰিৰাদকথাৰণ্ণনা নিট্ঠিতা.
পালিলেয্যকগমনকথাৰণ্ণনা
৪৬৭. যেন পালিলেয্যকন্তি পচ্চত্তে উপযোগৰচনং, যত্থ পালিলেয্যকো গামো, তত্থ অৰসরীতি অত্থো. দহরপোতকেহীতি ভিঙ্কচ্ছাপেহি. ‘‘ওগাহি’’ন্তিপি পাঠো, নহানপোক্খরণিন্তি অত্থো.
উদানগাথাযং পন – রথঈসসদিসদন্তস্স নাগস্স হত্থিনো এতং ৰিৰেকনিন্নং চিত্তং নাগেন বুদ্ধনাগস্স ৰিৰেকনিন্নচিত্তেন সমেতি. কস্মা? যং যস্মা একোৰ রমতি ৰনে, তস্মা এৰং যোজনা দট্ঠব্বা.
পালিলেয্যকগমনকথাৰণ্ণনা নিট্ঠিতা.
অট্ঠারসৰত্থুকথাৰণ্ণনা
৪৬৮. যথা ধম্মো তথা তিট্ঠাহীতি যথা ধম্মো চ ৰিনযো চ ঠিতো, তথা তিট্ঠ, ধম্মৰাদীপক্খে তিট্ঠাতি অত্থো.
৪৭৩. ‘‘যো পটিবাহেয্য, আপত্তি দুক্কটস্সা’’তি ইদং সামগ্গীভেদস্স অকারকে সন্ধায ৰুত্তং. যে পন ভেদকারকা ৰিরুদ্ধা অলজ্জিনো, তেসং পটিবাহিতুং ৰট্টতি তেসং সন্তকস্সপি সেনাসনস্স ৰিনাসনৰচনতো. ‘‘ৰিৰিত্তং কত্ৰাপি দাতব্ব’’ন্তি ৰুত্তত্তা পন যথাৰুড্ঢং ৰরসেনাসনং অদত্ৰা ৰুড্ঢানম্পি অসঞ্ঞতানং সঞ্ঞতেহি ৰিৰিত্তং কত্ৰা দাতব্বন্তি দট্ঠব্বং.
৪৭৫. কম্মৰাচায ওসারেত্ৰাতি এত্থ উক্খিত্তস্স ভিক্খুনো আপত্তিযাপন্নভাৰং পটিজানিত্ৰা সম্মাৰত্তনেন উক্খেপকানং সমুপ্পন্নওসারণচ্ছন্দস্স পগেৰ ঞাতত্তা পটিপ্পস্সম্ভনকম্মৰাচায উক্খিত্তানুৰত্তকা সযমেৰ নং ওসারেসুন্তি দট্ঠব্বং.
৪৭৬. অত্থতো অপগতাতি সামগ্গীঅত্থৰিরহিতা, তুচ্ছব্যঞ্জনাতি অত্থো.
৪৭৭. অপ্পটিচ্ছন্নাচারোতি অপ্পটিচ্ছাদেতব্বসুন্দরাচারো. অনপগতন্তি কারণতো অনপেতং. আদাতব্বতো গহেতব্বতো আদাযন্তি আচরিযৰাদো ৰুত্তোতি আহ ‘‘আদাযং অত্তনো আচরিযৰাদ’’ন্তি.
অট্ঠহি দূতঙ্গেহীতি ‘‘সোতা চ হোতি সাৰেতা চ উগ্গহেতা চ ধারেতা চ ৰিঞ্ঞাতা চ ৰিঞ্ঞাপেতা চ কুসলো চ সহিতাসহিতস্স নো চ কলহকারকো’’তি (অ. নি. ৮.১৬) এৰং ৰুত্তেহি অট্ঠহি দূতঙ্গেহি. সেসমেত্থ, হেট্ঠা চ সব্বত্থ সুৰিঞ্ঞেয্যমেৰাতি.
অট্ঠারসৰত্থুকথাৰণ্ণনা নিট্ঠিতা.
কোসম্বকক্খন্ধকৰণ্ণনানযো নিট্ঠিতো.
ইতি সমন্তপাসাদিকায ৰিনযট্ঠকথায ৰিমতিৰিনোদনিযং
মহাৰগ্গৰণ্ণনানযো নিট্ঠিতো.
নমো তস্স ভগৰতো অরহতো সম্মাসম্বুদ্ধস্স