৯. চম্পেয্যক্খন্ধকো

কস্সপগোত্তভিক্খুৰত্থুকথাদিৰণ্ণনা

৩৮০. চম্পেয্যক্খন্ধকে তন্তিবদ্ধোতি তন্তি ৰুচ্চতি ব্যাপারো, তত্থ বদ্ধো, উস্সুক্কং আপন্নোতি অত্থো. তেনাহ ‘‘তস্মিং আৰাসে’’তিআদি.

৩৮৭-৮. হাপনং ৰা অঞ্ঞথা করণং ৰা নত্থীতি ঞত্তিকম্মস্স ঞত্তিযা একত্তা হাপনং ন সম্ভৰতি, তস্সা একত্তা এৰ পচ্ছা ঞত্তিঠপনৰসেন, দ্ৰিক্খত্তুং ঠপনৰসেন চ অঞ্ঞথা করণং নত্থি. পরতোতি পরিৰারে. তন্তি পব্বাজনীযকম্মং, তস্সাতি অত্থো.

কস্সপগোত্তভিক্খুৰত্থুকথাদিৰণ্ণনা নিট্ঠিতা.

দ্ৰেনিস্সরণাদিকথাৰণ্ণনা

৩৯৫. এসাতি ‘‘বালো’’তিআদিনা নিদ্দিট্ঠপুগ্গলো, অপ্পত্তোতি সম্বন্ধো. তত্থ কারণমাহ ‘‘যস্মা’’তিআদি. তত্থ আৰেণিকেন লক্খণেনাতি পব্বাজনীযকম্মস্স নিমিত্তভাৰেন পাল়িযং ৰুত্তত্তা অসাধারণভূতেন কুলদূসকভাৰেন. যদি হেস তং কম্মং অপ্পত্তো, কথং পন সুনিস্সারিতোতি আহ ‘‘যস্মা পনস্স আকঙ্খমানো সঙ্ঘো পব্বাজনীযকম্মং করেয্যাতি ৰুত্তং, তস্মা সুনিস্সারিতো’’তি. তত্থ ৰুত্তন্তি কম্মক্খন্ধকে (চূল়ৰ. ২৭) ৰুত্তং.

এত্থ পন কুলদূসককম্মং কত্ৰা পব্বাজনীযকম্মকতস্স তেরসককণ্ডকট্ঠকথাযং ‘‘যস্মিং ৰিহারে ৰসন্তেন যস্মিং গামে কুলদূসককম্মং কতং হোতি, তস্মিং ৰিহারে ৰা তস্মিং গামে ৰা ন ৰসিতব্ব’’ন্তিআদিনা (পারা. অট্ঠ. ২.৪৩৩) যা সম্মাৰত্তনা ৰুত্তা, সা ইতরেনাপি পূরেতব্বা. যং পন পটিপ্পস্সদ্ধকম্মস্স কুলদূসকস্স তত্থেৰ অট্ঠকথাযং ‘‘যেসু কুলেসু কুলদূসককম্মং কতং, ততো পচ্চযা ন গহেতব্বা’’তিআদি ৰুত্তং, তং ন পূরেতব্বং কুলসঙ্গহস্স অকতত্তা. এৰং সেসকম্মেসুপি. যদি এৰং ‘‘তজ্জনীযকম্মারহস্স নিযসকম্মং করোতি…পে… এৰং খো, উপালি, অধম্মকম্মং হোতী’’তিআদিৰচনং (মহাৰ. ৪০২) ৰিরুজ্ঝতীতি? ন ৰিরুজ্ঝতি সঙ্ঘসন্নিট্ঠানৰসেন তজ্জনীযাদিকম্মারহত্তস্স সিজ্ঝনতো. যস্স হি সঙ্ঘো ‘‘তজ্জনীযকম্মং করোমা’’তি সন্নিট্ঠানং কত্ৰা কম্মৰাচং সাৰেন্তো পব্বাজনীযকম্মৰাচং সাৰেতি, তস্স কম্মং অধম্মকম্মং হোতি. সচে পন ‘‘তস্সেৰ পব্বাজনীযকম্মমেৰ করোমা’’তি সন্নিট্ঠানং কত্ৰা তদেৰ করোতি, তস্স তং কম্মং ধম্মকম্মন্তি ৰেদিতব্বং.

এৰমিধ ‘‘নিস্সারণ’’ন্তি অধিপ্পেতস্স পব্বাজনীযকম্মস্স ৰসেন অত্থং দস্সেত্ৰা ইদানি তদঞ্ঞেসং তজ্জনীযাদীনং ৰসেন নিস্সারণে অধিপ্পেতে ‘‘অপ্পত্তো নিস্সারণ’’ন্তি ইমস্স পটিপক্খৰসেন সম্পত্তো নিস্সারণং, ‘‘তঞ্চে সঙ্ঘো নিস্সারেতি. সুনিস্সারিতো’’তি অত্থসম্ভৰং দস্সেতুং পুন ‘‘তঞ্চে সঙ্ঘো নিস্সারেতীতি সচে সঙ্ঘো’’তিআদি ৰুত্তং. তত্থ তত্থাতি তজ্জনীযাদিকম্মৰিসযে, একেনাপি অঙ্গেন নিস্সারণা অনুঞ্ঞাতাতি যোজনা. পাল়িযং অপ্পত্তো নিস্সারণন্তি এত্থ আপন্নো আৰেণিকৰসেন তজ্জনীযাদিসঙ্খাতং নিস্সারণং পত্তোতি অত্থো গহেতব্বো.

দ্ৰেনিস্সরণাদিকথাৰণ্ণনা নিট্ঠিতা.

চম্পেয্যক্খন্ধকৰণ্ণনানযো নিট্ঠিতো.