৮. চীৰরক্খন্ধকো

জীৰকৰত্থুকথাদিৰণ্ণনা

৩২৯. চীৰরক্খন্ধকে কম্মৰিপাকন্তি কম্মপচ্চযউতুচিত্তাহারসমুট্ঠিতং অপ্পটিবাহিযরোগং সন্ধায ৰুত্তং কম্মজস্স রোগস্স অভাৰা.

৩৩০. পাল়িযং সংযমস্সাতি সঙ্গহণস্স. অৰিসজ্জনস্সাতি অত্থো ‘‘যো সংযমো সো ৰিনাসো’’তিআদীসু (পে. ৰ. ২৩৭) ৰিয. এতস্স সংযমস্স ফলং উপজানামাতি যোজনা. তমেৰ ফলং দস্সেন্তী আহ ‘‘ৰরমেতং…পে… আসিত্ত’’ন্তি. কেচি পন ‘‘সংযমস্সাতি আনিসংসস্স, উপযোগত্থে চেতং সামিৰচন’’ন্তি (সারত্থ. টী. মহাৰগ্গ ৩.৩২৯-৩৩০) অত্থং ৰদন্তি.

৩৩৬. উস্সন্নদোসোতি সঞ্জাতপিত্তাদিদোসো. সব্বত্থাতি সকলসরীরে.

৩৩৭. মহাপিট্ঠিযকোজৰন্তি হত্থিপিট্ঠিযং অত্থরিতব্বতায ‘‘মহাপিট্ঠিয’’ন্তি লদ্ধসমঞ্ঞং উণ্ণামযত্থরণং.

৩৩৮-৯. উপড্ঢকাসিনং খমমানন্তি অড্ঢকাসিঅগ্ঘনকং. পাল়িযং কিং নু খোতি কতমং নু খো.

৩৪০-৩৪২. উপচারেতি সুসানস্স আসন্নে পদেসে. ছড্ডেত্ৰা গতাতি কিঞ্চি অৰত্ৰা এৰ ছড্ডেত্ৰা গতা, এতেন ‘‘ভিক্খূ গণ্হন্তূ’’তি ছড্ডিতে এৰ অকামা ভাগদানং ৰিহিতং, কেৰলং ছড্ডিতে পন কতিকায অসতি একতো বহূসু পৰিট্ঠেসু যেন গহিতং, তেন অকামভাগো ন দাতব্বোতি দস্সেতি. সমানা দিসা পুরত্থিমাদিভেদা এতেসন্তি সদিসাতি আহ ‘‘একদিসায ৰা ওক্কমিংসূ’’তি. ধুরৰিহারট্ঠানেতি ৰিহারস্স সম্মুখট্ঠানে.

জীৰকৰত্থুকথাদিৰণ্ণনা নিট্ঠিতা.

ভণ্ডাগারসম্মুতিআদিকথাৰণ্ণনা

৩৪৩. ৰিহারমজ্ঝেতি সব্বেসং জাননত্থায ৰুত্তং. ৰণ্ণাৰণ্ণং কত্ৰাতি পটিৰীসপ্পহোনকতাজাননত্থং হলিদ্দিযাদীহি খুদ্দকমহন্তৰণ্ণেহি যুত্তে সমে কোট্ঠাসে কত্ৰা. তেনাহ ‘‘সমে পটিৰীসে ঠপেত্ৰা’’তি. ইদন্তি সামণেরানং উপড্ঢপটিৰীসদানং. ফাতিকম্মন্তি পহোনককম্মং. যত্তকেন ৰিনযাগতেন সম্মুঞ্জনীবন্ধনাদিহত্থকম্মেন ৰিহারস্স ঊনকতা ন হোতি, তত্তকং কত্ৰাতি অত্থো. সব্বেসন্তি তত্রুপ্পাদৰস্সাৰাসিকং গণ্হন্তানং সব্বেসং ভিক্খূনং, সামণেরানঞ্চ. ভণ্ডাগারিকচীৰরেপীতি অকালচীৰরং সন্ধায ৰুত্তং. এতন্তি উক্কুট্ঠিযা কতায সমভাগদানং. ৰিরজ্ঝিত্ৰা করোন্তীতি কত্তব্বকালেসু অকত্ৰা যথারুচিতক্খণে করোন্তি.

এত্তকেন মম চীৰরং পহোতীতি দ্ৰাদসগ্ঘনকেনেৰ মম চীৰরং পরিপুণ্ণং হোতি, ন ততো ঊনেনাতি সব্বং গহেতুকামোতি অত্থো.

ভণ্ডাগারসম্মুতিআদিকথাৰণ্ণনা নিট্ঠিতা.

চীৰররজনকথাদিৰণ্ণনা

৩৪৪. এৰঞ্হি কতেতি ৰট্টাধারস্স অন্তো রজনোদকং, বহি ছল্লিকঞ্চ কত্ৰা ৰিযোজনে কতে. ন উত্তরতীতি কেৰলং উদকতো ফেণুট্ঠানাভাৰা ন উত্তরতি. রজনকুণ্ডন্তি পক্করজনট্ঠপনকং মহাঘটং.

৩৪৫. অনুৰাতাদীনং দীঘপত্তানন্তি আযামতো, ৰিত্থারতো চ অনুৰাতং. আদি-সদ্দেন দ্ৰিন্নং খন্ধানং অন্তরা মাতিকাকারেন ঠপিতপত্তঞ্চ ‘‘দীঘপত্ত’’ন্তি দট্ঠব্বং. আগন্তুকপত্তন্তি দিগুণচীৰরস্স উপরি অঞ্ঞং পট্টং অপ্পেন্তি, তং সন্ধায ৰুত্তং. তং কির ইদানি ন করোন্তি.

৩৪৬. পাল়িযং নন্দিমুখিযাতি তুট্ঠিমুখিযা, পসন্নদিসামুখাযাতি অত্থো.

৩৪৮. অচ্ছুপেয্যন্তি পতিট্ঠপেয্যং. হতৰত্থকানন্তি পুরাণৰত্থানং. অনুদ্ধরিত্ৰাৰাতি অগ্গল়ে ৰিয দুব্বলট্ঠানং অনপনেত্ৰাৰ.

৩৪৯-৩৫১. ৰিসাখৰত্থুম্হি কল্লকাযাতি অকিলন্তকাযা. গতীতি ঞাণগতি অধিগমো. অভিসম্পরাযোতি ‘‘সকিদেৰ ইমং লোকং আগন্ত্ৰা দুক্খস্সন্তং করোতী’’তিআদিনা (সং. নি. ৫.১০৪৮) ৰুত্তো ঞাণাভিসম্পরাযো, মগ্গঞাণযুত্তেহি গন্তব্বগতিৰিসেসোতি অত্থো. তং ভগৰা ব্যাকরিস্সতি. ‘‘দদাতি দান’’ন্তি ইদং অন্নপানৰিরহিতানং সেসপচ্চযানং দানৰসেন ৰুত্তং. সোৰগ্গিকন্তি সগ্গসংৰত্তনিকং.

৩৫৯. অট্ঠপদকচ্ছন্নেনাতি অট্ঠপদকসঙ্খাতজূতফলকলেখাসণ্ঠানেন.

৩৬২. পাল়িযং নদীপারং গন্তুন্তি ভিক্খুনো নদীপারগমনং হোতীতি অত্থো. অগ্গল়গুত্তিযেৰ পমাণন্তি ইমেহি চতূহি নিক্খেপকারণেহি ঠপেন্তেনপি অগ্গল়গুত্তিৰিহারে এৰ ঠপেতুং ৰট্টতীতি অধিপ্পাযো. নিস্সীমাগতন্তি ৰস্সানসঙ্খাতং কালসীমং অতিক্কন্তং, তং ৰস্সিকসাটিকচীৰরং ন হোতীতি অত্থো.

চীৰররজনকথাদিৰণ্ণনা নিট্ঠিতা.

সঙ্ঘিকচীৰরুপ্পাদকথাৰণ্ণনা

৩৬৩. পঞ্চ মাসেতি অচ্চন্তসংযোগে উপযোগৰচনং. ৰড্ঢিং পযোজেত্ৰা ঠপিতউপনিক্খেপতোতি ৰস্সাৰাসিকস্সত্থায দাযকেহি ৰড্ঢিং পযোজেত্ৰা ঠপিতউপনিক্খেপতো. ‘‘ইধ ৰস্সংৰুত্থসঙ্ঘস্সা’’তি ইদং অভিলাপমত্তং. ইধ-সদ্দং পন ৰিনা ‘‘ৰস্সংৰুত্থসঙ্ঘস্স দেমা’’তি ৰুত্তেপি সো এৰ নযো. অনত্থতকথিনস্সাপি পঞ্চ মাসে পাপুণাতীতি ৰস্সাৰাসিকলাভৰসেন উপ্পন্নত্তা অনত্থতকথিনস্সাপি ৰুত্থৰস্সস্স পঞ্চ মাসে পাপুণাতি. ৰক্খতি হি ‘‘চীৰরমাসতো পট্ঠায যাৰ হেমন্তস্স পচ্ছিমো দিৰসো, তাৰ ৰস্সাৰাসিকং দেমাতি ৰুত্তে কথিনং অত্থতং ৰা হোতু অনত্থতং ৰা, অতীতৰস্সংৰুত্থানমেৰ পাপুণাতী’’তি (মহাৰ. অট্ঠ. ৩৭৯). ততো পরন্তি পঞ্চমাসতো পরং, গিম্হানস্স পঠমদিৰসতো পট্ঠাযাতি অত্থো. ‘‘কস্মা? পিট্ঠিসমযে উপ্পন্নত্তা’’তি ইদং ‘‘উদাহু অনাগতৰস্সে’’তি ইমস্সানন্তরং দট্ঠব্বং. পোত্থকেসু পন ‘‘অনত্থতকথিনস্সাপি পঞ্চ মাসে পাপুণাতী’’তি ইমস্সানন্তরং ‘‘কস্মা পিট্ঠিসমযে উপ্পন্নত্তা’’তি ইদং লিখন্তি, তং পমাদলিখিতং পিট্ঠিসমযে উপ্পন্নং সন্ধায ‘‘অনত্থতকথিনস্সাপী’’তি ৰত্তব্বতো. ৰুত্থৰস্সে হি সন্ধায ‘‘অনত্থতকথিনস্সাপী’’তি ৰুত্তং, ন চ পিট্ঠিসমযে উপ্পন্নং ৰুত্থৰস্সস্সেৰ পাপুণাতীতি সম্মুখীভূতানং সব্বেসম্পি পাপুণনতো. তেনেৰ ৰক্খতি ‘‘সচে পন গিম্হানং পঠমদিৰসতো পট্ঠায এৰং ৰদতি, তত্র সম্মুখীভূতানং সব্বেসং পাপুণাতি. কস্মা? পিট্ঠিসমযে উপ্পন্নত্তা’’তি (মহাৰ. অট্ঠ. ১৭৯).

দুগ্গহিতানীতি অগ্গহিতানি. সঙ্ঘিকানেৰাতি অত্থো. ইতোৰাতি থেরানং দাতব্বতোৰ, ইদানেৰাতি ৰা অত্থো.

সঙ্ঘিকচীৰরুপ্পাদকথাৰণ্ণনা নিট্ঠিতা.

উপনন্দসক্যপুত্তৰত্থুকথাৰণ্ণনা

৩৬৪. ‘‘সত্তাহৰারেন অরুণমেৰ উট্ঠাপেতী’’তি ইদং নানাসীমাৰিহারেসু কত্তব্বনযেন একস্মিম্পি ৰিহারে দ্ৰীসু সেনাসনেসু নিৰুত্থভাৰদস্সনত্থং ৰুত্তং, অরুণুট্ঠাপনেনেৰ তত্থ ৰুত্থো হোতি, ন পন ৰস্সচ্ছেদপরিহারায. অন্তোউপচারসীমাযপি যত্থ কত্থচি অরুণং উট্ঠাপেন্তো অত্তনা গহিতসেনাসনং অপ্পৰিট্ঠোপি ৰুত্থৰস্সো এৰ হোতি, গহিতসেনাসনে পন নিৰুত্থো নাম ন হোতি, তত্থ চ অরুণুট্ঠাপনে পন সতি হোতি. তেনাহ ‘‘পুরিমস্মিং বহুতরং নিৰসতি নামা’’তি, এতেন চ ইতরস্মিং সত্তাহৰারেনাপি অরুণুট্ঠাপনে সতি এৰ অপ্পকতরং নিৰসতি নাম হোতি, নাসতীতি দীপিতং হোতি. নানালাভেহীতি ৰিসুং ৰিসুং নিবদ্ধৰস্সাৰাসিকলাভেহি. নানূপচারেহীতি নানাপরিক্খেপনানাদ্ৰারেহি. একসীমাৰিহারেহীতি দ্ৰিন্নং ৰিহারানং একেন পাকারেন পরিক্খিত্তত্তা একায উপচারসীমায অন্তোগতেহি দ্ৰীহি ৰিহারেহি. সেনাসনগ্গাহো পটিপ্পস্সম্ভতীতি পঠমং গহিতো পটিপ্পস্সম্ভতি. তত্থাতি যত্থ সেনাসনগ্গাহো পটিপ্পস্সদ্ধো, তত্থ.

উপনন্দসক্যপুত্তৰত্থুকথাৰণ্ণনা নিট্ঠিতা.

গিলানৰত্থুকথাৰণ্ণনা

৩৬৫-৬. ভূমিযং পরিভণ্ডং অকাসীতি গিলানেন নিপন্নভূমিযং কিলিট্ঠট্ঠানং ধোৰিত্ৰা হরিতূপলিত্তং কারেসীতি অত্থো. ভেসজ্জং যোজেতুং অসমত্থোতি পরেহি ৰুত্তৰিধিম্পি কাতুং অসমত্থো. পাল়িযং গিলানুপট্ঠাকানং চীৰরদানে সামণেরানং তিচীৰরাধিট্ঠানাভাৰা ‘‘চীৰরঞ্চ পত্তঞ্চা’’তিআদি সব্বত্থ ৰুত্তং. সচেপি সহস্সং অগ্ঘতি, গিলানুপট্ঠাকানঞ্ঞেৰ দাতব্বন্তি সম্বন্ধো.

গিলানৰত্থুকথাৰণ্ণনা নিট্ঠিতা.

মতসন্তককথাদিৰণ্ণনা

৩৬৯. অঞ্ঞন্তি চীৰরপত্ততো অঞ্ঞং. অপ্পগ্ঘন্তি অতিজিণ্ণাদিভাৰেন নিহীনং. ততোতি অৰসেসপরিক্খারতো. সব্বন্তি পত্তং, তিচীৰরঞ্চ.

তত্থ তত্থ সঙ্ঘস্সেৰাতি তস্মিং তস্মিং ৰিহারে সঙ্ঘস্সেৰ. পাল়িযং অৰিস্সজ্জিকং অৰেভঙ্গিকন্তি আগতানাগতস্স চাতুদ্দিসস্স সঙ্ঘস্সেৰ সন্তকং হুত্ৰা কস্সচি অৰিস্সজ্জিকং অৰেভঙ্গিকং ভৰিতুং অনুজানামীতি অত্থো.

৩৭১-২. অক্কনাল়মযন্তি অক্কদণ্ডমযং. অক্কদুস্সানীতি অক্কৰাকেন কতদুস্সানি, পোত্থকগতিকানি দুক্কটৰত্থুকানীতি অত্থো. দুপট্টচীৰরস্স ৰা মজ্ঝেতি যং নিট্ঠিতে তিপট্টচীৰরং হোতি, তস্স মজ্ঝে পটলং কত্ৰা দাতব্বানীতি অত্থো.

৩৭৪. ‘‘সন্তে পতিরূপে গাহকে’’তি ৰুত্তত্তা গাহকে অসতি অদত্ৰা ভাজিতেপি সুভাজিতমেৰাতি দট্ঠব্বং.

৩৭৬. দক্খিণোদকং পমাণন্তি ‘‘এত্তকানি চীৰরানি দস্সামী’’তি পঠমং উদকং পাতেত্ৰা পচ্ছা দেন্তি. তং যেহি গহিতং, তে ভাগিনোৰ হোন্তীতি অধিপ্পাযো. পরসমুদ্দেতি জম্বুদীপে. তম্বপণ্ণিদীপঞ্হি উপাদাযেস এৰং ৰুত্তো.

মতসন্তককথাদিৰণ্ণনা নিট্ঠিতা.

অট্ঠচীৰরমাতিকাকথাৰণ্ণনা

৩৭৯. পুগ্গলাধিট্ঠাননযেন ৰুত্তন্তি ‘‘সীমায দান’’ন্তিআদিনা ৰত্তব্বে ‘‘সীমায দেতী’’তিআদি পুগ্গলাধিট্ঠানেন ৰুত্তং. ‘‘অপিচা’’তিআদিনা পঠমলেড্ডুপাতভূতপরিক্খেপারহট্ঠানতো বহি দুতিযলেড্ডুপাতোপি উপচারসীমা এৰাতি দস্সেতি. ধুৰসন্নিপাতট্ঠানাদিকম্পি পরিযন্তে ঠিতমেৰ গহেতব্বং. লোকে গামসীমাদযো ৰিয লাভসীমা নাম ৰিসুং পসিদ্ধা নাম নত্থি, কেনাযং অনুঞ্ঞাতাতি আহ ‘‘নেৰ সম্মাসম্বুদ্ধেনা’’তিআদি. এতেন নাযং সাসনৰোহারসিদ্ধা, লোকৰোহারসিদ্ধা এৰাতি দস্সেতি. ‘‘জনপদপরিচ্ছেদো’’তি ইদং লোকপসিদ্ধসীমাসদ্দত্থৰসেন ৰুত্তং. পরিচ্ছেদব্ভন্তরং পন সব্বং জনপদসীমাতি গহেতব্বং, জনপদো এৰ জনপদসীমা. এৰং রট্ঠসীমাদীসুপি. তেনাহ ‘‘আণাপৰত্তিট্ঠান’’ন্তিআদি.

পথৰীৰেমজ্ঝে গতস্সাতি যাৰ উদকপরিযন্তা খণ্ডসীমত্তা ৰুত্তং, উপচারসীমাদীসু পন অবদ্ধসীমাসু হেট্ঠাপথৰিযং সব্বত্থ ঠিতানং ন পাপুণাতি, কূপাদিপৰেসারহট্ঠানে ঠিতানঞ্ঞেৰ পাপুণাতীতি হেট্ঠা সীমাকথাযং ৰুত্তনযেন তংতংসীমট্ঠভাৰো ৰেদিতব্বো. চক্কৰাল়সীমায পন দিন্নং পথৰীসন্ধারকউদকট্ঠানেপি ঠিতানং পাপুণাতি সব্বত্থ চক্কৰাল়ৰোহারত্তা.

বুদ্ধাধিৰুত্থোতি বুদ্ধেন ভগৰতা নিৰুত্থো. পাকৰট্টন্তি নিবদ্ধদানং. ৰত্ততীতি পৰত্ততি. তেহীতি যেসং সম্মুখে এস দেতি, তেহি ভিক্খূহি. দুতিযভাগে পন থেরাসনং আরুল়্হেতি যাৰ সঙ্ঘনৰকা একৰারং সব্বেসং ভাগং দত্ৰা চীৰরে অপরিক্খীণে পুন সব্বেসং দাতুং দুতিযভাগে থেরস্স দিন্নেতি অত্থো. পংসুকূলিকানম্পি ৰট্টতীতি এত্থ ‘‘তুয্হং দেমা’’তি অৰুত্তত্তাতি কারণং ৰদন্তি. যদি এৰং ‘‘সঙ্ঘস্স দেমা’’তি ৰুত্তেপি ৰট্টেয্য, ‘‘ভিক্খূনং দেম, থেরানং দেম, সঙ্ঘস্স দেমা’’তি (মহাৰ. অট্ঠ. ৩৭৯) ৰচনতো ভেদো ন দিস্সতি. ৰীমংসিতব্বমেত্থ কারণং.

পারুপিতুং ৰট্টতীতি পংসুকূলিকানং ৰট্টতি. ভিক্খুসঙ্ঘস্স চ ভিক্খুনীনঞ্চ দম্মীতি ৰুত্তে পন ন মজ্ঝে ভিন্দিত্ৰা দাতব্বন্তি এত্থ যস্মা ভিক্খুনিপক্খে সঙ্ঘস্স পচ্চেকং অপরামট্ঠত্তা ভিক্খুনীনং গণনায ভাগো দাতব্বোতি দাযকস্স অধিপ্পাযোতি সিজ্ঝতি, তথা দানঞ্চ ভিক্খূপি গণেত্ৰা দিন্নে এৰ যুজ্জতি. ইতরথা হি কিত্তকং ভিক্খূনং দাতব্বং, কিত্তকং ভিক্খুনীনন্তি ন ৰিঞ্ঞাযতি, তস্মা ‘‘ভিক্খুসঙ্ঘস্সা’’তি ৰুত্তৰচনম্পি ‘‘ভিক্খূন’’ন্তি ৰুত্তৰচনসদিসমেৰাতি আহ ‘‘ভিক্খূ চ ভিক্খুনিযো চ গণেত্ৰা দাতব্ব’’ন্তি. তেনাহ ‘‘পুগ্গলো …পে… ভিক্খুসঙ্ঘগ্গহণেন অগ্গহিতত্তা’’তি. ভিক্খুসঙ্ঘ-সদ্দেন ভিক্খূনঞ্ঞেৰ গহিতত্তা, পুগ্গলস্স পন ‘‘তুয্হঞ্চা’’তি ৰিসুং গহিতত্তা চ তত্থস্স অগ্গহিততা দট্ঠব্বা, ‘‘ভিক্খূনঞ্চ ভিক্খুনীনঞ্চ তুয্হঞ্চা’’তি ৰুত্তট্ঠানসদিসত্তাতি অধিপ্পাযো. পুগ্গলপ্পধানো হেত্থ সঙ্ঘ-সদ্দো দট্ঠব্বো. কেচি পন ‘‘ভিক্খুসঙ্ঘগ্গহণেন গহিতত্তা’’তি (সারত্থ. টী. মহাৰগ্গ ৩.৩৭৯) পাঠং লিখন্তি, তং ন সুন্দরং তস্স ৰিসুং লাভগ্গহণে কারণৰচনত্তা. তথা হি ৰিসুং সঙ্ঘগ্গহণেন গহিতত্তাতি ৰিসুং পুগ্গলস্সপি ভাগগ্গহণে কারণং ৰুত্তং. যথা চেত্থ পুগ্গলস্স অগ্গহণং, এৰং উপরি ‘‘ভিক্খুসঙ্ঘস্স চ তুয্হঞ্চা’’তিআদীসুপি সঙ্ঘাদি-সদ্দেহি পুগ্গলস্স অগ্গহণং দট্ঠব্বং. যদি হি গহণং সিযা, সঙ্ঘতোপি, ৰিসুম্পীতি ভাগদ্ৰযং লভেয্য উভযত্থ গহিতত্তা.

পূজেতব্বন্তিআদি গিহিকম্মং ন হোতীতি দস্সনত্থং ৰুত্তং. ‘‘ভিক্খুসঙ্ঘস্স হরা’’তি ইদং পিণ্ডপাতহরণং সন্ধায ৰুত্তং. তেনাহ ‘‘ভুঞ্জিতুং ৰট্টতী’’তি. ‘‘অন্তোহেমন্তে’’তি ইমিনা অনত্থতে কথিনে ৰস্সানং পচ্ছিমে মাসে দিন্নং পুরিমৰস্সংৰুত্থানঞ্ঞেৰ পাপুণাতি, ততো পরং হেমন্তে দিন্নং পচ্ছিমৰস্সংৰুত্থানম্পি ৰুত্থৰস্সত্তা পাপুণাতি. হেমন্ততো পন পরং পিট্ঠিসমযে ‘‘ৰস্সংৰুত্থসঙ্ঘস্সা’’তি এৰং ৰত্ৰা দিন্নং অনন্তরে ৰস্সে ৰা ততো পরেসু ৰা যত্থ কত্থচি তস্মিং ৰুত্থৰস্সানং সব্বেসং পাপুণাতি. যে পন সব্বথা অৰুত্থৰস্সা, তেসং ন পাপুণাতীতি দস্সেতি. সব্বেসম্পীতি হি তস্মিং ভিক্খুভাৰে ৰুত্থৰস্সানং সব্বেসম্পীতি অত্থো দট্ঠব্বো. ‘‘ৰস্সংৰুত্থসঙ্ঘস্সা’’তি ৰুত্তত্তা সম্মুখীভূতানং সব্বেসন্তি এত্থাপি এসেৰ নযো. অতীতৰস্সন্তি অনন্তরাতীতৰস্সং.

উদ্দেসং গহেতুং আগতোতি উদ্দেসে অগ্গহিতেপি অন্তেৰাসিকোৰাতি ৰুত্তং. গহেত্ৰা গচ্ছন্তোতি পরিনিট্ঠিতউদ্দেসো হুত্ৰা গচ্ছন্তো. ‘‘ৰত্তং কত্ৰা উদ্দেসপরিপুচ্ছাদীনি গহেত্ৰা ৰিচরন্তান’’ন্তি ইদং ‘‘উদ্দেসন্তেৰাসিকান’’ন্তি ইমস্সেৰ ৰিসেসনং, তেন উদ্দেসকালে আগন্ত্ৰা উদ্দেসং গহেত্ৰা গন্ত্ৰা অঞ্ঞত্থ নিৰসন্তে অনিবদ্ধচারিকে নিৰত্তেতি.

অট্ঠচীৰরমাতিকাকথাৰণ্ণনা নিট্ঠিতা.

চীৰরক্খন্ধকৰণ্ণনানযো নিট্ঠিতো.