৭. কথিনক্খন্ধকো

কথিনানুজাননকথাৰণ্ণনা

৩০৬. কথিনক্খন্ধকে সীসৰসেনাতি পধানৰসেন. কথিনন্তি পঞ্চানিসংসে অন্তোকরণসমত্থতায থিরন্তি অত্থো. সো নেসং ভৰিস্সতীতি যুজ্জতীতি ‘‘সো তুম্হাক’’ন্তি অৰত্ৰা ‘‘নেস’’ন্তি ৰচনং যুজ্জতি. যে অত্থতকথিনাতি ন কেৰলং তুম্হাকমেৰ, যে অঞ্ঞেপি অত্থতকথিনা, তেসং ভৰিস্সতীতি অত্থো. অথ ৰা ৰোতি তদা সম্মুখীভূতেহি সদ্ধিং অসম্মুখীভূতে চ অনাগতে চ ভিক্খূ সব্বে একতো সম্পিণ্ডেত্ৰা ৰুত্তং, তুম্হাকন্তি অত্থো. সো নেসন্তি এত্থ সো তেসন্তি যোজেতব্বং. তেনাহ ‘‘অত্থতকথিনানং ৰো, ভিক্খৰে, ইমানি পঞ্চ কপ্পিস্সন্তী’’তি. মতকচীৰরন্তি মতস্স চীৰরং. ‘‘ৰুত্থৰস্সৰসেনা’’তি ইদং পচ্ছিমৰস্সংৰুত্থানম্পি সাধারণন্তি আহ ‘‘পুরিমিকায ৰস্সং উপগন্ত্ৰা পঠমপৰারণায পৰারিতা লভন্তী’’তি. উপগতা ৰা ন লভন্তীতি পচ্ছিমিকায ৰুত্থৰস্সেপি সন্ধায ৰুত্তং.

খলিমক্খিতসাটকোতি অহতৰত্থং সন্ধায ৰুত্তং. ‘‘অকাতুং ন লব্ভতী’’তি ইমিনা অনাদরিযে সতি দুক্কটন্তি দীপেতি.

‘‘অপলোকেত্ৰা’’তি ইদং অঞ্ঞেসং ৰস্সংৰুত্থভিক্খূনং অদত্ৰা দাতুকামেহি কত্তব্বৰিধিদস্সনং. যদি এৰং কম্মৰাচায এৰ দানং অৰুত্তন্তি আহ ‘‘কম্মৰাচা পনা’’তিআদি. কথিনচীৰরং ৰিয কম্মৰাচায দাতুং ন ৰট্টতীতি অপলোকেত্ৰাৰ দাতব্বন্তি অধিপ্পাযো.

৩০৮. মহাভূমিকন্তি মহাৰিসযং, চতুৰীসতিআকারৰন্ততায মহাৰিত্থারিকন্তি ৰুত্তং হোতি. পঞ্চকন্তি পঞ্চখণ্ডং. এসেৰ নযো সেসেসুপি. পঠমচিমিলিকাতি কথিনৰত্থতো অঞ্ঞা অত্তনো পকতিচিমিলিকা. কুচ্ছিচিমিলিকং কত্ৰা সিব্বিতমত্তেনাতি থিরজিণ্ণানং চিমিলিকানং একতো কত্ৰা সিব্বনস্সেতং অধিৰচনন্তি ৰদন্তি. মহাপচ্চরিযং, কুরুন্দিযঞ্চ ৰুত্তৰচনন্তি দস্সনং, ব্যঞ্জনতো এৰ ভেদো, ন অত্থতোতি দস্সনত্থং কতন্তিপি ৰদন্তি. পিট্ঠিঅনুৰাতারোপনমত্তেনাতি দীঘতো অনুৰাতস্স আরোপনমত্তেন. কুচ্ছিঅনুৰাতারোপনমত্তেনাতি পুথুলতো অনুৰাতস্স আরোপনমত্তেন. রত্তিনিস্সগ্গিযেনাতি রত্তিঅতিক্কন্তেন.

৩০৯. হতৰত্থকসাটকেনাতি অতিজিণ্ণসাটকো. ন হি তেনাতিআদীসু তেন পরিৰারাগতপাঠেন ইধ আনেত্ৰা অৰুচ্চমানেন কথিনত্থারকস্স জানিতব্বেসু ন কিঞ্চি পরিহাযতি, তস্স সব্বস্স ইধেৰ ৰুত্তত্তাতি অধিপ্পাযো.

৩১০. মাতা ৰিযাতি মাতিকা, ইৰত্থে ক-পচ্চযো দট্ঠব্বো. তেন সিদ্ধমত্থং দস্সেন্তো আহ ‘‘মাতিকাতি মাতরো’’তিআদি. অস্সাতি এতিস্সা মাতিকায. পক্কমনন্তিকো কথিনুব্ভারো এৰ হি সযং অত্তনো উপ্পজ্জতীতি এৰমভেদূপচারেন ‘‘মাতিকা’’তি ৰুত্তো উব্ভারস্সেৰ পক্কমনন্তে সমুপ্পত্তিতো, তব্বিনিমুত্তায চ মাতিকায অভাৰা, তপ্পকাসিকাপি চেত্থ পাল়ি ‘‘মাতিকা’’তি ৰত্তুং যুজ্জতি. সাপি হি পক্কমনন্তিকুব্ভারপ্পকাসনেন ‘‘পক্কমনন্তিকা’’তি ৰুত্তা. এসেৰ নযো সেসুব্ভারেসুপি. পক্কমনন্তি চেত্থ উপচারসীমাতিক্কমনং দট্ঠব্বং.

কথিনানুজাননকথাৰণ্ণনা নিট্ঠিতা.

আদাযসত্তককথাৰণ্ণনা

৩১১. ‘‘ন পুন আগমিস্স’’ন্তি ইদং আৰাসপলিবোধুপচ্ছেদকারণদস্সনং. পঞ্চসু হি চীৰরমাসেসু যদা কদাচি ন পচ্চেস্সন্তি চিত্তেন উপচারসীমাতিক্কমেন আৰাসপলিবোধো ছিজ্জতি. পচ্চেস্সন্তি বহিউপচারগতস্স পন যত্থ কত্থচি ন পচ্চেস্সন্তি চিত্তে উপ্পন্নমত্তে ছিজ্জতি. পঠমং চীৰরপলিবোধো ছিজ্জতীতি ন পচ্চেস্সন্তি পক্কমনতো পুরেতরমেৰ চীৰরস্স নিট্ঠিতত্তা ৰুত্তং. ‘‘কতচীৰরমাদাযা’’তি হি ৰুত্তং. অত্থতকথিনস্স হি ভিক্খুনো যাৰ ‘‘সঙ্ঘতো ৰা দাযককুলাদিতো ৰা চীৰরং লভিস্সামী’’তি চীৰরাসা ৰা লদ্ধৰত্থানং সহাযসম্পদাদিযোগং লভিত্ৰা সঙ্ঘাটিআদিভাৰেন ‘‘ছিন্দিত্ৰা করিস্সামী’’তি করণিচ্ছা ৰা পৰত্ততি, তাৰ চীৰরপলিবোধো অনুপচ্ছিন্নো এৰ. যদা পন যথাপত্থিতট্ঠানতো চীৰরাদীনং সব্বথা অলাভেন ৰা চীৰরাসা চেৰ লদ্ধানং কত্ৰা নিট্ঠানেন ৰা নট্ঠৰিনট্ঠাদিভাৰেন ৰা চীৰরে নিরপেক্খতায ৰা করণিচ্ছা চ ৰিগচ্ছতি, তদা চীৰরপলিবোধো উপচ্ছিন্নো হোতি.

সো চ ইধ ‘‘কতচীৰরং আদাযা’’তি ৰচনেন পকাসিতো. এৰং উপরি সব্বত্থ পাল়িৰচনক্কমং নিস্সায নেসং পঠমং, পচ্ছা চ উপচ্ছিজ্জনং ৰুত্তন্তি দট্ঠব্বং. সব্বথাপি চ ইমেসং উভিন্নং পলিবোধানং উপচ্ছেদেনেৰ কথিনুব্ভারো, ন একস্স. তেসঞ্চ পুব্বাপরিযেন, একক্খণে চ উপচ্ছিজ্জনং দস্সেতুং ইমা অট্ঠ মাতিকা ঠপিতাতি ৰেদিতব্বা. অন্তোসীমাযন্তি চীৰরনিট্ঠানক্খণেযেৰ ছিন্নত্তা ৰুত্তং. নেৰিমং চীৰরং কারেস্সন্তি চীৰরে অপেক্খায ৰিগতত্তা করণপলিবোধস্সাপি উপচ্ছিন্নতং দস্সেতি. যো পন অপ্পিচ্ছতায ৰা অনত্থিকতায ৰা সব্বথা চীৰরং ন সম্পটিচ্ছতি, তস্স বহিসীমাগতস্স সব্বথাপি চীৰরপলিবোধাভাৰেন ন পচ্চেস্সন্তি সন্নিট্ঠানমত্তেন সন্নিট্ঠানন্তিকো কথিনুব্ভারো ৰেদিতব্বো. সো পনাতি পলিবোধুপচ্ছেদো. অযং পনাতি আসাৰচ্ছেদকো কথিনুব্ভারো ৰিসুং ৰিত্থারেত্ৰা ৰুত্তো, ইধ ন ৰুত্তোতি সম্বন্ধো.

অনাসায লভতীতি ‘‘যস্মিং কুলে চীৰরং লভিস্সামা’’তি আসা অনুপ্পন্নপুব্বা, তত্থ চীৰরাসায অনুপ্পন্নট্ঠানে যত্থ কত্থচি লভতীতি অত্থো. আসায ন লভতীতি আসীসিতট্ঠানে ন লভতীতি অত্থো. ইধ ন ৰুত্তোতি ইধ সৰনন্তিকানন্তরে ন ৰুত্তো. তত্থাতি তস্মিং সীমাতিক্কন্তিকে. সীমাতিক্কন্তিকো নাম চীৰরমাসানং পরিযন্তদিৰসসঙ্খাতায সীমায অতিক্কমনতো সঞ্জাতো. কেচি ‘‘বহিসীমায কালাতিক্কমো সীমাতিক্কমো’’তি মঞ্ঞন্তি, তেসং অন্তোউপচারে চীৰরকালাতিক্কমেপি কথিনুব্ভারো অসম্মতো নাম সিযাতি ন চেতং যুত্তং. তস্মা যত্থ কত্থচি কালাতিক্কমো সীমাতিক্কমোতি ৰেদিতব্বো. এত্থ চ পাল়িযং ‘‘কতচীৰরো’’তি ইদং উপলক্খণমত্তং, অকতচীৰরস্সপি কালাতিক্কমেন সীমাতিক্কন্তিকো হোতি, দ্ৰে চ পলিবোধা একতো ছিজ্জন্তি. এৰং অঞ্ঞত্থাপি যথাসম্ভৰং তংতং ৰিসেসনাভাৰেপি কথিনুব্ভারতা, পলিবোধুপচ্ছেদপ্পকারো চ ৰেদিতব্বো. ‘‘সহুব্ভারে দ্ৰেপি পলিবোধা অপুব্বং অচরিমং ছিজ্জন্তী’’তি ইদং অকতচীৰরস্স পচ্চেস্সন্তি অধিট্ঠানসম্ভৰপক্খং সন্ধায ৰুত্তং, তেসু অঞ্ঞতরাভাৰেপি সহুব্ভারোৰ হোতি.

৩১২-৩২৫. সমাদাযৰারো আদাযৰারসদিসোৰ. উপসগ্গমেৰেত্থ ৰিসেসো. তেনাহ ‘‘পুন সমাদাযৰারেপি…পে… তেযেৰ দস্সিতা’’তি. ৰিপ্পকতচীৰরে পক্কমনন্তিকস্স অভাৰতো ‘‘যথাসম্ভৰ’’ন্তি ৰুত্তং. তেনেৰ ৰিপ্পকতচীৰরৰারে ছল়েৰ উব্ভারা ৰুত্তা, চীৰরে হত্থগতে চ আসাৰচ্ছেদিকস্স অসম্ভৰা, সো এতেসু ৰারেসু যত্থ কত্থচি ন ৰুত্তো, ৰিসুঞ্ঞেৰ ৰুত্তো. ৰিপ্পকতৰারে চেত্থ আদাযৰারসমাদাযৰারৰসেন দ্ৰে ছক্কৰারা ৰুত্তা.

ততো পরং নিট্ঠানসন্নিট্ঠাননাসনন্তিকানং ৰসেন তীণি তিকানি দস্সিতানি. তত্থ ততিযত্তিকে অনধিট্ঠিতেনাতি ‘‘পচ্চেস্সং, ন পচ্চেস্স’’ন্তি এৰং অনধিট্ঠিতেন, ন এৰং মনসিকত্ৰাতি অত্থো. ততিযত্তিকতো পন পরং একং ছক্কং দস্সিতং. এৰং তীণি তিকানি, একং ছক্কঞ্চাতি পঠমং পন্নরসকং ৰুত্তং, ইমিনা নযেন দুতিযপন্নরসকাদীনি ৰেদিতব্বানি.

পাল়িযং আসাদ্ৰাদসকে বহিসীমাগতস্স কথিনুদ্ধারেসু তেসম্পি চীৰরাসাদিৰসেন চীৰরপলিবোধো যাৰ চীৰরনিট্ঠানা তিট্ঠতীতি আহ ‘‘সো বহিসীমাগতো সুণাতি ‘উব্ভতং কির তস্মিং আৰাসে কথিনন্তি…পে… সৰনন্তিকো কথিনুদ্ধারো’’’তি. এত্থ চ সৰনক্খণে আৰাসপলিবোধো পঠমং ছিজ্জতি, নিট্ঠিতে চীৰরপলিবোধোতি ৰেদিতব্বো.

দিসংগমিকনৰকে দিসংগমিকো পক্কমতীতি ন পচ্চেস্সন্তি পক্কমতি, ইমিনা আৰাসপলিবোধাভাৰো দস্সিতো হোতি. তেনেৰ ৰস্সংৰুত্থাৰাসে পুন গন্ত্ৰা চীৰরনিট্ঠাপিতমত্তে নিট্ঠানন্তিকো কথিনুদ্ধারো ৰুত্তো. ‘‘চীৰরপটিৰিসং অপৰিলাযমানো’’তি ইমিনা চীৰরপলিবোধসমঙ্গিকত্তমস্স দস্সেতি, অপৰিলাযমানোতি আকঙ্খমানো. সেসং সুৰিঞ্ঞেয্যমেৰ.

আদাযসত্তককথাৰণ্ণনা নিট্ঠিতা.

কথিনক্খন্ধকৰণ্ণনানযো নিট্ঠিতো.