৪. পৰারণাক্খন্ধকো

অফাসুৰিহারকথাদিৰণ্ণনা

২০৯. পৰারণাক্খন্ধকে পাল়িযং পিণ্ডায পটিক্কমেয্যাতি পিণ্ডায চরিত্ৰা পটিক্কমেয্য. অৰক্কারপাতিন্তি অতিরেকপিণ্ডপাতঠপনকং একং ভাজনং. অৰিসয্হন্তি উক্খিপিতুং অসক্কুণেয্যং. ৰিলঙ্ঘনং উক্খিপনং ৰিলঙ্ঘো, সো এৰ ৰিলঙ্ঘকো, হত্থেহি ৰিলঙ্ঘকো হত্থৰিলঙ্ঘকোতি আহ ‘‘হত্থুক্খেপকেনা’’তি. অথ ৰা ৰিলঙ্ঘকেন উক্খেপকেন হত্থেনাতিপি অত্থো, অঞ্ঞমঞ্ঞং সংসিব্বিতহত্থেহীতি ৰুত্তং হোতি.

২১৩. সচে পন ৰুড্ঢতরো হোতীতি পৰারণাদাযকো ভিক্খু ৰুড্ঢতরো হোতি. এৰঞ্হি তেন তস্সত্থায পৰারিতং হোতীতি এত্থ এৰং তেন অপ্পৰারিতোপি তস্স সঙ্ঘপ্পত্তিমত্তেন সঙ্ঘপৰারণাকম্মং সমগ্গকম্মমেৰ হোতীতি দট্ঠব্বং. তেন চ ভিক্খুনাতি পৰারণাদাযকেন ভিক্খুনা.

২৩৪. বহূপি সমানৰস্সা একতো পৰারেতুং লভন্তীতি একস্মিং সংৰচ্ছরে লদ্ধূপসম্পদতায সমানুপসম্পন্নৰস্সা সব্বে একতো পৰারেতুং লভন্তীতি অত্থো.

২৩৭. পাল়িযং মিচ্ছাদিট্ঠীতি ‘‘নত্থি দিন্ন’’ন্তিআদি (দী. নি. ১.১৭১; ম. নি. ১.৪৪৫; ২.৯৪, ৯৫, ২২৫; ৩.৯১, ১১৬, ১৩৬; সং. নি. ৩.২১০; ধ. স. ১২২১) নযপ্পৰত্তা. অন্তগ্গাহিকাতি সস্সতুচ্ছেদসঙ্খাতস্স অন্তস্স গাহিকা. যং খো ত্ৰন্তিআদীসু যং পৰারণং ঠপেসি, তং দিট্ঠেন ঠপেসীতি তং-সদ্দং অজ্ঝাহরিত্ৰা যোজেতব্বং.

২৩৯. ৰত্থুং পকাসেন্তোতি পুগ্গলে পরিসঙ্কুপ্পত্তিযা নিমিত্তভূতং ৰত্থুমত্তংযেৰ সন্ধায ৰুত্তং. যং পন ৰত্থুং সন্ধায ‘‘পুগ্গলো পঞ্ঞাযতি, ন ৰত্থূ’’তি আহ, ন তং সন্ধাযেতং ৰুত্তং. যদি পন তস্স ভিক্খুনো ৰসনট্ঠানে পোক্খরণিতো মচ্ছগ্গহণাদি দিস্সেয্য, তদা ‘‘ৰত্থু চ পুগ্গলো চ পঞ্ঞাযতী’’তি ৰত্তব্বং ভৰেয্য. তেনাহ ‘‘পুরিমনযেনেৰ চোরেহী’’তিআদি. ভিক্খুনো সরীরে মালাগন্ধঞ্চ অরিট্ঠগন্ধঞ্চ দিস্ৰা এৰং ‘‘ৰত্থু চ পুগ্গলো চ পঞ্ঞাযতী’’তি ৰুত্তন্তি ৰেদিতব্বং.

অফাসুৰিহারকথাদিৰণ্ণনা নিট্ঠিতা.

ভণ্ডনকারকৰত্থুকথাৰণ্ণনা

২৪০. দ্ৰে চাতুদ্দসিকা হোন্তীতি ততিযপক্খে চাতুদ্দসিযা সদ্ধিং দ্ৰে চাতুদ্দসিকা হোন্তি. ‘‘ভণ্ডনকারকানং তেরসে ৰা চাতুদ্দসে ৰা ইমে পন্নরসীপৰারণং পৰারেস্সন্তী’’তি ইমিনা যথাসকং উপোসথকরণদিৰসতো পট্ঠায ভিক্খূনং চাতুদ্দসীপন্নরসীৰোহারো, ন চন্দগতিসিদ্ধিযা তিথিযা ৰসেনাতি দস্সেতি. কিঞ্চাপি এৰং ‘‘অনুজানামি, ভিক্খৰে, রাজূনং অনুৰত্তিতু’’ন্তি (মহাৰ. ১৮৬) ৰচনতো পনেত্থ লোকিযানং তিথিং অনুৰত্তন্তেহিপি অত্তনো উপোসথক্কমেন চাতুদ্দসিং পন্নরসিং ৰা, পন্নরসিং চাতুদ্দসিং ৰা করোন্তেহেৰ অনুৰত্তিতব্বং, ন পন সোল়সমদিৰসং ৰা তেরসমদিৰসং ৰা উপোসথদিৰসং করোন্তেহি. তেনেৰ পাল়িযম্পি ‘‘দ্ৰে তযো উপোসথে চাতুদ্দসিকে কাতু’’ন্তি ৰুত্তং. অঞ্ঞথা দ্ৰাদসিযং, তেরসিযং ৰা উপোসথো কাতব্বোতি ৰত্তব্বতো. ‘‘সকিং পক্খস্স চাতুদ্দসে, পন্নরসে ৰা’’তিআদিৰচনম্পি উপৰুত্থক্কমেনেৰ ৰুত্তং, ন তিথিক্কমেনাতি গহেতব্বং.

ভণ্ডনকারকৰত্থুকথাৰণ্ণনা নিট্ঠিতা.

পৰারণাসঙ্গহকথাৰণ্ণনা

২৪১. ‘‘পৰারেত্ৰা পন অন্তরাপি চারিকং পক্কমিতুং লভন্তী’’তি ইমিনা পৰারণাসঙ্গহে কতে অন্তরা পক্কমিতুকামা সঙ্ঘং সন্নিপাতাপেত্ৰা পৰারেতুং লভন্তীতি দস্সেতি.

পৰারণাসঙ্গহকথাৰণ্ণনা নিট্ঠিতা.

পৰারণাক্খন্ধকৰণ্ণনানযো নিট্ঠিতো.