৩. ৰস্সূপনাযিকক্খন্ধকো

ৰস্সূপনাযিকঅনুজাননকথাদিৰণ্ণনা

১৮৪. ৰস্সূপনাযিকক্খন্ধকে অপরস্মিং দিৰসেতি দুতিযে পাটিপদদিৰসে.

১৮৫. অঞ্ঞত্থ অরুণং উট্ঠাপনেন ৰাতি সাপেক্খস্স অকরণীযেন গন্ত্ৰা অঞ্ঞত্থ অরুণং উট্ঠাপনেন ৰা. পরিহানীতি গুণপরিহানি.

১৮৭. পাল়িযং সত্তাহং সন্নিৰত্তো কাতব্বোতি সকলং সত্তাহং বহি এৰ অৰীতিনামেত্ৰা সত্তাহপরিযোসানভূতং অরুণুট্ঠানকালং পুন ৰিহারেৰ সম্বন্ধৰসেন সত্তাহং ৰিহারে সন্নিৰত্তং কাতব্বং. সত্তাহপরিযোসানকালো হি ইধ সত্তাহ-সদ্দেন ৰুত্তো, তদপেক্খায চ ‘‘সন্নিৰত্তো’’তি পুল্লিঙ্গেন ৰুত্তং. তীণি পরিহীনানীতি ভিক্খুনীনং ৰচ্চকুটিআদীনং পটিক্খিত্তত্তা পরিহীনানি.

১৮৯. ন পলুজ্জতীতি অঞ্ঞেসং অপ্পগুণত্তা, মম চ মরণেন ন ৰিনস্সতি.

ৰস্সূপনাযিকঅনুজাননকথাদিৰণ্ণনা নিট্ঠিতা.

পহিতেযেৰঅনুজাননকথাৰণ্ণনা

১৯৯. ভিক্খূহি সদ্ধিং ৰসনকপুরিসোতি অনঞ্ঞগতিকোতি দস্সেতি. গন্তব্বন্তি সঙ্ঘকরণীযেন অপ্পহিতেপি গন্তব্বং. এত্থ চ অনুপাসকেহিপি সাসনভাৰং ঞাতুকামেহি পহিতে তেসং পসাদৰড্ঢিং সম্পস্সন্তেহিপি সত্তাহকরণীযেন গন্তুং ৰট্টতীতি গহেতব্বং.

রত্তিচ্ছেদৰিনিচ্ছযোতি সত্তাহকরণীযেন গন্ত্ৰা বহিদ্ধা অরুণুট্ঠাপনসঙ্খাতস্স রত্তিচ্ছেদস্স ৰিনিচ্ছযো. গন্তুং ৰট্টতীতি অন্তোউপচারসীমাযং ঠিতেনেৰ সত্তাহকরণীযনিমিত্তং সল্লক্খেত্ৰা ইমিনা নিমিত্তেন গন্ত্ৰা ‘‘অন্তোসত্তাহে আগচ্ছিস্সামী’’তি আভোগং কত্ৰা গন্তুং ৰট্টতি. পুরিমক্খণে আভোগং কত্ৰা গমনক্খণে ৰিস্সরিত্ৰা গতেপি দোসো নত্থি ‘‘সকরণীযো পক্কমতী’’তি (মহাৰ. ২০৭) ৰুত্তত্তা. সব্বথা পন আভোগং অকত্ৰা গতস্স ৰস্সচ্ছেদোতি ৰদন্তি. যো পন সত্তাহকরণীযনিমিত্তাভাৰেপি ‘‘সত্তাহব্ভন্তরে আগমিস্সামী’’তি আভোগং কত্ৰা গন্ত্ৰা সত্তাহব্ভন্তরে আগচ্ছতি, তস্স আপত্তিযেৰ, ৰস্সচ্ছেদো নত্থি সত্তাহস্স সন্নিৰত্তত্তাতি ৰদন্তি. ৰীমংসিত্ৰা গহেতব্বং. ভণ্ডকন্তি চীৰরভণ্ডং. সম্পাপুণিতুং ন সক্কোতি, ৰট্টতীতি তদহেৰ আগমনে সউস্সাহত্তা ৰস্সচ্ছেদো ৰা আপত্তি ৰা ন হোতীতি অধিপ্পাযো. আচরিযন্তি অগিলানম্পি নিস্সযাচরিযঞ্চ ধম্মাচরিযঞ্চ, পগেৰ উপসম্পদাচরিযউপজ্ঝাযেসু. ৰদতি, ৰট্টতীতি সত্তাহাতিক্কমে আপত্তিঅভাৰং সন্ধায ৰুত্তং, ৰস্সচ্ছেদো পন হোতি এৰ.

পহিতেযেৰঅনুজাননকথাৰণ্ণনা নিট্ঠিতা.

অন্তরাযেঅনাপত্তিৰস্সচ্ছেদকথাৰণ্ণনা

২০০. পাল়িযং গণ্হিংসূতি গহেত্ৰা খাদিংসু. পরিপাতিংসূতি পলাপেসুং, অনুবন্ধিংসূতি অত্থো.

২০১. সত্তাহৰারেন অরুণো উট্ঠাপেতব্বোতি এত্থ ছদিৰসানি বহিদ্ধা ৰীতিনামেত্ৰা সত্তমে দিৰসে পুরারুণা এৰ অন্তোউপচারসীমায পৰিসিত্ৰা অরুণং উট্ঠাপেত্ৰা পুনদিৰসে সত্তাহং অধিট্ঠায গন্তব্বন্তি অধিপ্পাযো. কেচি পন ‘‘সত্তমে দিৰসে আগন্ত্ৰা অরুণং অনুট্ঠাপেত্ৰা তদহেৰ দিৰসভাগেপি গন্তুং ৰট্টতী’’তি ৰদন্তি, তং ন গহেতব্বং ‘‘অরুণো উট্ঠাপেতব্বো’’তি ৰুত্তত্তা. সত্তমে দিৰসে তত্থ অরুণুট্ঠাপনমেৰ হি সন্ধায পাল়িযম্পি ‘‘সত্তাহং সন্নিৰত্তো কাতব্বো’’তি ৰুত্তং. অরুণং অনুট্ঠাপেত্ৰা গচ্ছন্তো অন্তো অপ্পৰিসিত্ৰা বহিদ্ধাৰ সত্তাহং ৰীতিনামেন্তেন সমুচ্ছিন্নৰস্সো এৰ ভৰিস্সতি অরুণস্স বহি এৰ উট্ঠাপিতত্তা. ইতরথা ‘‘অরুণো উট্ঠাপেতব্বো’’তি ৰচনং নিরত্থকং সিযা ‘‘সত্তাহৰারেন অন্তোৰিহারে পৰিসিত্ৰা অরুণং অনুট্ঠাপেত্ৰাপি গন্তব্ব’’ন্তি ৰত্তব্বতো. অঞ্ঞেসু চ ঠানেসু অরুণুট্ঠাপনমেৰ ৰুচ্চতি. ৰক্খতি হি চীৰরক্খন্ধকে ‘‘একস্মিং ৰিহারে ৰসন্তো ইতরস্মিং সত্তাহৰারেন অরুণমেৰ উট্ঠাপেতী’’তি (মহাৰ. অট্ঠ. ৩৬৪).

অথাপি যং তে ৰদেয্যুং ‘‘সত্তমে দিৰসে যদা কদাচি পৰিট্ঠেন তংদিৰসনিস্সিতো অতীতঅরুণো উট্ঠাপিতো নাম হোতীতি ইমমত্থং সন্ধায অট্ঠকথাযং ৰুত্ত’’ন্তি, তং সদ্দগতিযাপি ন সমেতি. ন হি উট্ঠিতে অরুণে পচ্ছা পৰিট্ঠো তস্স পযোজকো উট্ঠাপকো ভৰিতুমরহতি. যদি ভৰেয্য, ৰস্সং উপগন্ত্ৰা পনস্স অরুণং অনুট্ঠাপেত্ৰা তদহেৰ সত্তাহকরণীযেন পক্কন্তস্সাপীতি এত্থ ‘‘অরুণং অনুট্ঠাপেত্ৰা’’তি ৰচনং ৰিরুজ্ঝেয্য, তেনপি তংদিৰসসন্নিস্সিতস্স অরুণস্স উট্ঠাপিতত্তা. আরঞ্ঞকস্সাপি হি ভিক্খুনো সাযন্হসমযে অঙ্গযুত্তং অরঞ্ঞট্ঠানং গন্ত্ৰা তদা এৰ নিৰত্তন্তস্স অরুণো উট্ঠাপিতো ধুতঙ্গঞ্চ ৰিসোধিতং সিযা, ন চেতং যুত্তং অরুণুগ্গমনকালে এৰ অরুণুট্ঠাপনস্স ৰুত্তত্তা. ৰুত্তঞ্হি ‘‘কালস্সেৰ পন নিক্খমিত্ৰা অঙ্গযুত্তে ঠানে অরুণং উট্ঠাপেতব্বং. সচে অরুণুট্ঠানৰেলাযং তেসং আবাধো ৰড্ঢতি, তেসং এৰ কিচ্চং কাতব্বং, ন ধুতঙ্গৰিসুদ্ধিকেন ভৰিতব্ব’’ন্তি (ৰিসুদ্ধি. ১.৩১). তথা পারিৰাসিকাদীনম্পি অরুণং অনুট্ঠাপেত্ৰা ৰত্তং নিক্খিপন্তানং রত্তিচ্ছেদো ৰুত্তো. ‘‘উগ্গতে অরুণে নিক্খিপিতব্ব’’ন্তি (চূল়ৰ. ৯৭) হি ৰুত্তং. সহসেয্যসিক্খাপদেপি অনুপসম্পন্নেহি সহ নিৰুত্থভাৰপরিমোচনত্থং ‘‘পুরারুণা নিক্খমিত্ৰা’’তিআদি ৰুত্তং. এৰং চীৰরৰিপ্পৰাসাদীসু চ সব্বত্থ রত্তিপরিযোসানে আগামিঅরুণৰসেনেৰ অরুণুট্ঠাপনং দস্সিতং, ন অতীতারুণৰসেন. তস্মা ৰুত্তনযেনেৰেত্থ অরুণুট্ঠাপনং ৰেদিতব্বং অঞ্ঞথা ৰস্সচ্ছেদত্তা.

যং পন ৰস্সং উপগতস্স তদহেৰ অরুণং অনুট্ঠাপেত্ৰা সকরণীযস্স পক্কমনৰচনং, তং ৰস্সং উপগতকালতো পট্ঠায যদা কদাচি নিমিত্তে সতি গমনস্স অনুঞ্ঞাতত্তা যুত্তং, ন পন সত্তাহৰারেন গতস্স অরুণং অনুট্ঠাপেত্ৰা তদহেৰ গমনং ‘‘অরুণো উট্ঠাপেতব্বো’’তি ৰুত্তত্তা এৰ. যথা ৰা ‘‘সত্তাহং অনাগতায পৰারণায সকরণীযো পক্কমতি, আগচ্ছেয্য ৰা সো, ভিক্খৰে, ভিক্খু তং আৰাসং, ন ৰা আগচ্ছেয্যা’’তিআদিনা (মহাৰ. ২০৭) পচ্ছিমসত্তাহে অনাগমনে অনুঞ্ঞাতেপি অঞ্ঞসত্তাহেসু ন ৰট্টতি. এৰং পঠমসত্তাহে অরুণং অনুট্ঠাপেত্ৰা গমনে অনুঞ্ঞাতেপি ততো পরেসু সত্তাহেসু আগতস্স অরুণং অনুট্ঠাপেত্ৰা গমনং ন ৰট্টতীতি নিট্ঠমেত্থ গন্তব্বং. ইধ আহটন্তি ৰিহারতো বহি আগতট্ঠানে আনীতং.

অন্তরাযেঅনাপত্তিৰস্সচ্ছেদকথাৰণ্ণনা নিট্ঠিতা.

ৰজাদীসু ৰস্সূপগমনকথাৰণ্ণনা

২০৩. উপগন্তুং ৬৮ ন ৰট্টতীতি কুটিকাদীনং অভাৰেন ‘‘ইধ ৰস্সং উপেমী’’তি এৰং ৰচীভেদং কত্ৰা উপগন্তুং ন ৰট্টতি.

২০৪. পাল়িযং পিসাচিল্লিকাতি পিসাচদারকা. পৰিসনদ্ৰারং যোজেত্ৰাতি সকৰাটদ্ৰারং কত্ৰা. রুক্খং ছিন্দিত্ৰাতি সুসিরট্ঠানস্স উপরিভাগং ছিন্দিত্ৰা. খাণুমত্থকেতি সুসিরখাণুমত্থকে. টঙ্কিতমঞ্চো নাম দীঘে মঞ্চপাদে ৰিজ্ঝিত্ৰা অটনিযো পৰেসেত্ৰা কতো, সো হেট্ঠুপরিযৰসেন পঞ্ঞত্তোপি পুরিমসদিসোৰ হোতি, তং সুসানে, দেৰতাঠানে চ ঠপেন্তি. চতুন্নং পাসাণানং উপরি পাসাণফলকে অত্থরিত্ৰা কতগেহম্পি ‘‘টঙ্কিতমঞ্চো’’তি ৰুচ্চতি.

ৰজাদীসুৰস্সূপগমনকথাৰণ্ণনা নিট্ঠিতা.

অধম্মিককতিকাদিকথাৰণ্ণনা

২০৫. মহাৰিভঙ্গেতি চতুত্থপারাজিকৰণ্ণনাযং. পরতো সেনাসনক্খন্ধকেপি অধম্মিকং কতিকৰত্তং আৰি ভৰিস্সতি এৰ.

২০৭. যস্মা নানাসীমাযং দ্ৰীসু আৰাসেসু ৰস্সং উপগচ্ছন্তস্স ‘‘দুতিযে ৰসিস্সামী’’তি উপচারতো নিক্খন্তমত্তে পঠমো সেনাসনগ্গাহো পটিপ্পস্সম্ভতি. তস্মা পাল়িযং ‘‘তস্স, ভিক্খৰে, ভিক্খুনো পুরিমিকা চ ন পঞ্ঞাযতী’’তি পঠমং সেনাসনগ্গাহং সন্ধায ৰুত্তং. দুতিযে সেনাসনগ্গাহে পন পুরিমিকা পঞ্ঞাযতেৰ, তত্থেৰ তেমাসং ৰসন্তো পুরিমৰস্সংৰুত্থো এৰ হোতি, ততো ৰা পন দুতিযদিৰসাদীসু ‘‘পঠমসেনাসনে ৰসিস্সামী’’তি উপচারাতিক্কমে পুরিমিকাপি ন পঞ্ঞাযতীতি দট্ঠব্বং.

২০৮. পাল়িযং ‘‘সো সত্তাহং অনাগতায পৰারণায সকরণীযো পক্কমতী’’তি ৰুত্তত্তা পৰারণাদিৰসেপি সত্তাহকরণীযং ৰিনা গন্তুং ন ৰট্টতীতি ৰেদিতব্বং. কোমুদিযা চাতুমাসিনিযাতি পচ্ছিম-কত্তিকপুণ্ণমায. সা হি তস্মিং কালে কুমুদানং অত্থিতায কোমুদী, চতুন্নং ৰস্সিকমাসানং পরিযোসানত্তা চাতুমাসিনীতি চ ৰুচ্চতি.

অধম্মিককতিকাদিকথাৰণ্ণনা নিট্ঠিতা.

ৰস্সূপনাযিকক্খন্ধকৰণ্ণনানযো নিট্ঠিতো.