৫. অচেলকৰগ্গো

১. অচেলকসিক্খাপদৰণ্ণনা

২৭৩. পঞ্চমৰগ্গস্স পঠমে ময্হং নামাতি ভিক্খুনা ভূমিযং ঠপেত্ৰা দিন্নম্পি সন্ধায ৰদতি. অঞ্ঞতিত্থিযতা, অননুঞ্ঞাততা, অজ্ঝোহরণীযতা, অজ্ঝোহরণত্থায সহত্থা অনিক্খিত্তভাজনে দানন্তি ইমানেত্থ চত্তারি অঙ্গানি.

অচেলকসিক্খাপদৰণ্ণনা নিট্ঠিতা.

২. উয্যোজনসিক্খাপদৰণ্ণনা

২৭৪. দুতিযে অনাচারং আচরিতুকামতা, তদত্থমেৰ উপসম্পন্নস্স উয্যোজনা, তস্স উপচারাতিক্কমোতি ইমানেত্থ তীণি অঙ্গানি.

উয্যোজনসিক্খাপদৰণ্ণনা নিট্ঠিতা.

৩. সভোজনসিক্খাপদৰণ্ণনা

২৮১. ততিযে পাল়িযং খুদ্দকে ঘরেতি এত্থ খুদ্দকং ঘরং নাম পঞ্চহত্থতো ঊনকৰিত্থারং অধিপ্পেতং. তত্থ চ পিট্ঠসঙ্ঘাটতো হত্থপাসে অৰিজহিতেপি পিট্ঠিৰংসাতিক্কমো হোতীতি আহ ‘‘পিট্ঠিৰংসং অতিক্কমিত্ৰা’’তি. যথা তথা ৰা কতস্সাতি পিট্ঠিৰংসং আরোপেত্ৰা ৰা অনারোপেত্ৰা ৰা কতস্স.

২৮৩. পাল়িযং ৰীতরাগাতি অপরিযুট্ঠিতরাগানং, অনাগামীনঞ্চ সঙ্গহো. সচিত্তকন্তি অনুপৰিসিত্ৰা নিসীদনচিত্তেন সচিত্তকং. পরিযুট্ঠিতরাগজাযম্পতিকানং সন্নিহিততা, সযনিঘরতা, দুতিযস্স ভিক্খুনো অভাৰো, অনুপখজ্জ নিসীদনন্তি ইমানেত্থ চত্তারি অঙ্গানি.

সভোজনসিক্খাপদৰণ্ণনা নিট্ঠিতা.

২৮৪-২৮৯. চতুত্থপঞ্চমানি ৰুত্তত্থানি.

৬. চারিত্তসিক্খাপদৰণ্ণনা

২৯৮. ছট্ঠে ‘‘পরিযেসিত্ৰা আরোচনকিচ্চং নাম নত্থী’’তি ৰুত্তত্তা যো অপরিযেসিতব্বো উপসঙ্কমিতুং যুত্তট্ঠানে দিস্সতি, সো সচেপি পকতিৰচনস্স সৰনূপচারং অতিক্কম্ম ঠিতো উপগন্ত্ৰা আপুচ্ছিতব্বো. তেনাহ ‘‘অপি চ…পে… যং পস্সতি, সো আপুচ্ছিতব্বো’’তিআদি.

৩০২. অনাপত্তিৰারে চেত্থ অন্তরারামাদীনঞ্ঞেৰ ৰুত্তত্তা ৰিহারতো গামৰীথিং অনুঞ্ঞাতকারণং ৰিনা অতিক্কমন্তস্সাপি আপত্তি হোতি, ন পন ঘরূপচারং অতিক্কমন্তস্সেৰ.

যং পন পাল়িযং ‘‘অঞ্ঞস্স ঘরূপচারং ওক্কমন্তস্স…পে… পঠমং পাদং উম্মারং অতিক্কামেতী’’তিআদি ৰুত্তং. তং গামে পৰিট্ঠং সন্ধায ৰুত্তং, তথাপি অঞ্ঞস্স ঘরূপচারং অনোক্কমিত্ৰা ৰীথিমজ্ঝেনেৰ গন্ত্ৰা ইচ্ছিতিচ্ছিতঘরদ্ৰারাভিমুখে ঠত্ৰা মনুস্সে ওলোকেত্ৰা গচ্ছন্তস্সাপি পাচিত্তিযমেৰ. তত্থ কেচি ‘‘ৰীথিযং অতিক্কমন্তস্স ঘরূপচারগণনায আপত্তিযো’’তি ৰদন্তি. অঞ্ঞে পন ‘‘যানি কুলানি উদ্দিস্স গতো, তেসং গণনাযা’’তি. পঞ্চন্নং ভোজনানং অঞ্ঞতরেন নিমন্তনসাদিযনং, সন্তং ভিক্খুং অনাপুচ্ছনা, ভত্তিযঘরতো অঞ্ঞঘরূপসঙ্কমনং, মজ্ঝন্হিকানতিক্কমো, সমযাপদানং অভাৰোতি ইমানেত্থ পঞ্চ অঙ্গানি.

চারিত্তসিক্খাপদৰণ্ণনা নিট্ঠিতা.

৭. মহানামসিক্খাপদৰণ্ণনা

৩০৩. সত্তমে মহানামোতি সুক্কোদনস্স পুত্তো অনুরুদ্ধত্থেরস্স, সত্থু চ জেট্ঠভাতা. আনন্দত্থেরো অমিতোদনস্স পুত্তো, নন্দত্থেরো পন সুদ্ধোদনস্সেৰ.

৩০৫. পাল়িযং কালং আহরিস্সথাতি অজ্জতনং কালং ৰীতিনামেস্সথ, স্ৰে ভেসজ্জং হরিস্সথাতি ৰা অত্থো. ‘‘অত্থি পৰারণা ভেসজ্জপরিযন্তা চ রত্তিপরিযন্তা চা’’তি ততিযকোট্ঠাসে নিযমিতমেৰ ভেসজ্জং নিযমিতকালন্তরেযেৰ গহেতব্বং, ন ততো বহি. ইতরথা ৰিসুং পযোজনং নত্থীতি দট্ঠব্বং. সপরিযন্তা সঙ্ঘপৰারণা, তদুত্তরি ভেসজ্জৰিঞ্ঞত্তি, অগিলানতাতি ইমানেত্থ তীণি অঙ্গানি.

মহানামসিক্খাপদৰণ্ণনা নিট্ঠিতা.

৮. উয্যুত্তসেনাসিক্খাপদৰণ্ণনা

৩১৫. অট্ঠমে একমেকন্তি এত্থ দুৰঙ্গিনীপি তিৰঙ্গিনীপি সেনা সঙ্গয্হতি. উয্যুত্তচতুরঙ্গসেনাদস্সনায তথারূপপচ্চযাদিং ৰিনা গমনং, অননুঞ্ঞাতোকাসে দস্সনন্তি ইমানেত্থ দ্ৰে অঙ্গানি.

উয্যুত্তসেনাসিক্খাপদৰণ্ণনা নিট্ঠিতা.

৯. সেনাৰাসসিক্খাপদৰণ্ণনা

৩১৯. নৰমে সেনায চতুত্থো সূরিযত্থঙ্গমো, অগিলানতাতি ইমানেত্থ দ্ৰে অঙ্গানি.

সেনাৰাসসিক্খাপদৰণ্ণনা নিট্ঠিতা.

১০. উয্যোধিকসিক্খাপদৰণ্ণনা

৩২২. দসমে পাল়িযং কতি তে লক্খানি লদ্ধানীতি কিত্তকা তযা লদ্ধাতি অত্থো. উয্যোধিকাদিদস্সনায তথারূপপচ্চযং ৰিনা গমনং, অননুঞ্ঞাতোকাসে দস্সনন্তি ইমানেত্থ দ্ৰে অঙ্গানি.

উয্যোধিকসিক্খাপদৰণ্ণনা নিট্ঠিতা.

নিট্ঠিতো অচেলকৰগ্গো পঞ্চমো.