৬. সুরাপানৰগ্গো

১. সুরাপানসিক্খাপদৰণ্ণনা

৩২৮. ছট্ঠৰগ্গস্স পঠমে পাল়িযং কিণ্ণপক্খিত্তাতি পিট্ঠপূৰাদিং অপক্খিপিত্ৰা কিণ্ণসঙ্খাতং ধঞ্ঞঙ্কুরাদিসুরাবীজং পক্খিপিত্ৰা কতা. সম্ভারসংযুত্তাতি সাসপাদিঅনেকসম্ভারেহি সঞ্ঞুত্তা.

মধুকতালনাল়িকেরাদিপুপ্ফাদিরসো চিরপরিৰাসিতো পুপ্ফাসৰো নাম. তথা পনসাদি ফলাসৰো. মুদ্দিকরসো মধ্ৰাসৰো. উচ্ছুরসো গুল়াসৰো. তিফলতিকটুকাদিনানাসম্ভারানং রসো চিরপরিৰাসিতো সম্ভারসংযুত্তো. বীজতো পট্ঠাযাতি যথাৰুত্তানং পিট্ঠাদীনং মজ্জত্থায ভাজনে পক্খিত্তকালতো পট্ঠায.

৩২৯. লোণসোৰীরকং সুত্তঞ্চ অনেকেহি দব্বসম্ভারেহি অভিসঙ্খতো ভেসজ্জৰিসেসো. উয্যুত্তসিক্খাপদানং অচিত্তকলোকৰজ্জেসু লোকৰজ্জতা পুব্বে ৰুত্তনযাৰাতি তত্থ কিঞ্চিপি অৰত্ৰা ইধ তেহি অসাধারণৰত্থুৰিসেসসিদ্ধায অচিত্তকপক্খেপি অকুসলচিত্ততায তং লোকৰজ্জতাদিৰিসেসং দস্সেতুমেৰ ‘‘ৰত্থুঅজাননতায চেত্থা’’তিআদিনা ৰুত্তন্তি ৰেদিতব্বং. যং পনেত্থ ৰত্তব্বং, তং পঠমপারাজিকৰণ্ণনাযং ৰিত্থারতো সারত্থদীপনিযং ৰিরদ্ধট্ঠানৰিসোধনৰসেন ৰুত্তন্তি তত্থেৰ গহেতব্বং. মজ্জভাৰো, তস্স পানঞ্চাতি ইমানেত্থ দ্ৰে অঙ্গানি.

সুরাপানসিক্খাপদৰণ্ণনা নিট্ঠিতা.

২. অঙ্গুলিপতোদকসিক্খাপদৰণ্ণনা

৩৩০. দুতিযে হসাধিপ্পাযতা, উপসম্পন্নস্স কাযেন কাযামসনন্তি ইমানেত্থ দ্ৰে অঙ্গানি.

অঙ্গুলিপতোদকসিক্খাপদৰণ্ণনা নিট্ঠিতা.

৩. হসধম্মসিক্খাপদৰণ্ণনা

৩৩৮. ততিযে পাল়িযং হসধম্মে হসধম্মসঞ্ঞীতিআদীসু উপ্লৰাদিমত্তং কিং হসধম্মো হোতীতি গহণৰসেন সতি করণীযে করিযমানং হসধম্মং হসধম্মোতি গহণৰসেন অত্থো ৰেদিতব্বো. উস্সারেন্তোতি উদকে ঠিতং নাৰং তীরে আরোপেন্তো.

পতনুপ্পতনৰারেসূতি উদকস্স উপরিতলে মণ্ডূকগতিযা পতনুপ্পতনৰসেন গমনত্থং খিত্তায একিস্সা কথলায ৰসেন ৰুত্তং. উদকস্স উপরিগোপ্ফকতা, হসাধিপ্পাযেন কীল়নন্তি দ্ৰে অঙ্গানি.

হসধম্মসিক্খাপদৰণ্ণনা নিট্ঠিতা.

৪. অনাদরিযসিক্খাপদৰণ্ণনা

৩৪৪. চতুত্থে সুত্তানুলোমন্তি মহাপদেসা. অট্ঠকথাতিপি ৰদন্তি. উপসম্পন্নস্স পঞ্ঞত্তেন ৰচনং, অনাদরিযকরণন্তি দ্ৰে অঙ্গানি.

অনাদরিযসিক্খাপদৰণ্ণনা নিট্ঠিতা.

৫. ভিংসাপনসিক্খাপদৰণ্ণনা

৩৪৫. পঞ্চমে উপসম্পন্নতা, তস্স দস্সনসৰনৰিসযে ভিংসাপেতুকামতায ৰাযমনন্তি দ্ৰে অঙ্গানি.

ভিংসাপনসিক্খাপদৰণ্ণনা নিট্ঠিতা.

৬. জোতিসিক্খাপদৰণ্ণনা

৩৫৪. ছট্ঠে অলাতং পতিতন্তি অগ্গিকপালতো বহি পতিতং. ৰিজ্ঝাতন্তি ৰিজ্ঝাতং অলাতং কপালগ্গিম্হি পক্খিপিত্ৰা জালেন্তস্স পাচিত্তিযং, তথা কেৰলং ইন্ধনং পাতেন্তস্সপি ৰিজ্ঝাতং কপালগ্গিং মুখৰাতাদিনা উজ্জালেন্তস্সপি. গিলানতাদিকারণাভাৰো, ৰিসিব্বেতুকামতা, সমাদহনন্তি তীণি অঙ্গানি.

জোতিসিক্খাপদৰণ্ণনা নিট্ঠিতা.

৭. নহানসিক্খাপদৰণ্ণনা

৩৫৭. সত্তমে পাল়িযং নগরে থকিতেতি এত্থ রঞ্ঞা চিরং নহাযিতুকামেন ‘‘অহং বহি উয্যানে কতারক্খো ৰসিস্সামি, নগরং থকেত্ৰা গোপেথা’’তি অনুঞ্ঞাতা, তে থকিংসূতি দট্ঠব্বং. অসম্ভিন্নেনাতি অনট্ঠেন, তং দিৰসং পুন অগ্গহিতালঙ্কারেন পবুদ্ধমত্তেনাতি অধিপ্পাযো. মজ্ঝিমদেসে ঊনকদ্ধমাসনহানং, সমযাদীনং অভাৰোতি দ্ৰে অঙ্গানি.

নহানসিক্খাপদৰণ্ণনা নিট্ঠিতা.

৮. দুব্বণ্ণকরণসিক্খাপদৰণ্ণনা

৩৬৮. অট্ঠমে পটিলদ্ধনৰচীৰরেনাতি এত্থ পুব্বে অকতকপ্পং কতিপাহং নিৰাসনত্থায তাৰকালিকৰসেন লদ্ধম্পি সঙ্গয্হতীতি ৰদন্তি.

৩৬৯. ‘‘নৰং নাম অকতকপ্প’’ন্তি সামঞ্ঞতো ৰুত্তত্তা অঞ্ঞেন ভিক্খুনা কপ্পবিন্দুং দত্ৰা পরিভুত্তং চীৰরং, তেন ৰা, ততো লভিত্ৰা অঞ্ঞেন ৰা কেনচি দিন্নম্পি কতকপ্পমেৰ নৰং নাম ন হোতীতি দট্ঠব্বং. ‘‘নিৰাসেতুং ৰা পারুপিতুং ৰা’’তি ৰুত্তত্তা অংসবদ্ধকাসাৰম্পি পারুপিতব্বতো কপ্পং কাতব্বন্তি ৰদন্তি. চম্মকারনীলং নাম চম্মং নীলৰণ্ণং কাতুং যোজিযমানং নীলং. পকতিনীলমেৰাতি কেচি. যথাৰুত্তচীৰরস্স অকতকপ্পতা, অনট্ঠচীৰরাদিতা, নিৰাসনাদিতাতি তীণি অঙ্গানি.

দুব্বণ্ণকরণসিক্খাপদৰণ্ণনা নিট্ঠিতা.

৯. ৰিকপ্পনসিক্খাপদৰণ্ণনা

৩৭৪. নৰমে যেনাতি যেন সদ্ধিং, যস্স সন্তিকেতি অত্থো. সামং ৰিকপ্পিতস্স অপচ্চুদ্ধারো, ৰিকপ্পনুপগচীৰরতা, অৰিস্সাসেন পরিভোগোতি তীণি অঙ্গানি.

ৰিকপ্পনসিক্খাপদৰণ্ণনা নিট্ঠিতা.

১০. চীৰরঅপনিধানসিক্খাপদৰণ্ণনা

৩৭৮. দসমে পাল়িযং অন্তমসো হসাপেক্খোপীতি অপি-সদ্দেন অথেয্যচিত্তং কোধেন দুক্খাপেতুকামং, অৰণ্ণং পকাসেতুকামঞ্চ সঙ্গয্হতি. তেনেৰ ‘‘তিৰেদন’’ন্তি ৰুত্তং. উপসম্পন্নস্স পত্তাদীনং অপনিধানং, ৰিহেসেতুকামতাদীতি দ্ৰে অঙ্গানি.

চীৰরঅপনিধানসিক্খাপদৰণ্ণনা নিট্ঠিতা.

নিট্ঠিতো সুরাপানৰগ্গো ছট্ঠো.