৯. দুতিযদুট্ঠদোসসিক্খাপদৰণ্ণনা

৩৯১. নৰমে মেত্তিযং ভিক্খুনিন্তি লিঙ্গনাসনায নাসিতাযপি তস্সা ভূতপুব্বৰোহারং গহেত্ৰা ৰুত্তং. অঞ্ঞভাগস্সাতি থেরস্স মনুস্সজাতিভিক্খুভাৰতো অঞ্ঞস্স তিরচ্ছানজাতিছগলকভাৰসঙ্খাতস্স কোট্ঠাসস্স. ইদন্তি সামঞ্ঞতো নপুংসকলিঙ্গেন ৰুত্তং, অযং ছগলকোতি অত্থো. অঞ্ঞভাগোতি যথাৰুত্ততিরচ্ছানজাতিছগলকভাৰসঙ্খাতো অঞ্ঞো কোট্ঠাসো, অঞ্ঞভাগস্স ইদন্তি অঞ্ঞভাগিযন্তি পঠমৰিগ্গহস্স অত্থো, অঞ্ঞভাগমত্থীতি দুতিযৰিগ্গহস্স, দ্ৰীহিপি ছগলকোৰ ৰুত্তো. ইদানি দ্ৰীহিপি ৰিগ্গহেহি ৰুত্তমেৰত্থং ৰিত্থারতো দস্সেন্তো ‘‘যো হি সো’’তিআদিমাহ. তত্থ যো হি সো ছগলকো ৰুত্তো, সো অঞ্ঞস্স ভাগস্স হোতীতি চ অঞ্ঞভাগিযসঙ্খ্যং লভতীতি চ যোজনা. দুতিযৰিগ্গহস্স অত্থং দস্সেতুং ‘‘সো ৰা’’তিআদি ৰুত্তং. অধিকরণন্তি ৰেদিতব্বোতি এত্থাপি যো হি সো ‘‘দব্বো মল্লপুত্তো নামা’’তি ছগলকো ৰুত্তো, সোতি আনেত্ৰা সম্বন্ধিতব্বং. তঞ্হি সন্ধাযাতি ‘‘দব্বো’’তি নামকরণস্স অধিট্ঠানভূতং ছগলকং সন্ধায. তে ভিক্খূতি তে অনুযুঞ্জন্তা ভিক্খূ. আপত্তিযাপি পুগ্গলাধিট্ঠানত্তা ‘‘পুগ্গলানংযেৰ লেসা’’তি ৰুত্তং.

৩৯৩. যা চ সা অৰসানে…পে… চোদনা ৰুত্তাতি ‘‘ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি সঙ্ঘাদিসেসে সঙ্ঘাদিসেসদিট্ঠি হোতি, তঞ্চে পারাজিকেন চোদেতী’’তিআদিং (পারা. ৪০৭) চোদনাভেদং সন্ধায ৰদতি. সত্তন্নম্পি আপত্তীনং পচ্চেকং পারাজিকত্তাদিসামঞ্ঞেপি মেথুনাদিন্নাদানাদিৰত্থুতো, রাগদোসত্তাদিসভাৰতো চ ৰিসভাগতাপি অত্থীতি আহ ‘‘যস্মা পন…পে… ন হোতী’’তি.

ৰুত্তনযেনেৰাতি ‘‘সভাগৰিসভাগৰত্থুতো’’তিআদিনা (পারা. অট্ঠ. ২.৩৯৩) ৰুত্তনযেন. কম্মলক্খণং, তংমনসিকারো চ অৰিপন্নকম্মস্স নিমিত্ততো ফলূপচারেন কম্মন্তি ৰুচ্চতীতি আহ ‘‘তং নিস্সায উপ্পজ্জনতো’’তি. পরিৰাসাদিং নিস্সায মানত্তাদীনং উপ্পজ্জনতো ‘‘পুরিমং পুরিম’’ন্তিআদি ৰুত্তং.

৩৯৫. সৰত্থুকং কত্ৰাতি পুগ্গলাধিট্ঠানং কত্ৰা. দীঘাদিনোতি দীঘরস্সাদিলিঙ্গস্স. দিট্ঠাদিনোতি দিট্ঠপুব্বাদিনো.

৪০৮. এৰং তথাসঞ্ঞীতি অঞ্ঞস্স মেথুনাদিকিরিযং দিস্ৰা ‘‘অযং সো’’তি এৰং তথাসঞ্ঞী. অঙ্গানি পঠমদুট্ঠদোসে ৰুত্তসদিসানি, ইধ পন কিঞ্চিদেসং লেসমত্তং উপাদিযনা অধিকা.

দুতিযদুট্ঠদোসসিক্খাপদৰণ্ণনা নিট্ঠিতা.