১৩. কুলদূসকসিক্খাপদৰণ্ণনা

৪৩১. তেরসমে কীটাগিরীতি তস্স নিগমস্স নামং. তঞ্হি সন্ধায পরতো ‘‘ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্ব’’ন্তি ৰুত্তং, গামনিগমতো চ পব্বাজনং, ন জনপদতো. তেন পন যোগতো জনপদোপি ‘‘কীটাগিরি’’ইচ্চেৰ সঙ্খ্যং গতোতি আহ ‘‘এৰংনামকে জনপদে’’তি.

তত্রাতি সাৰত্থিযং. ধুরট্ঠানেতি অভিমুখট্ঠানে, জেতৰনদ্ৰারসমীপেতি অত্থো. দ্ৰীহি মেঘেহীতি ৰস্সিকেন, হেমন্তিকেন চাতি দ্ৰীহি মেঘেহি. গণাচরিযেহি ছহি অধিকতায ‘‘সমধিক’’ন্তি ৰুত্তং.

উদকস্সাতি অকপ্পিযউদকস্স ‘‘কপ্পিযউদকসিঞ্চন’’ন্তি ৰিসুং ৰক্খমানত্তা, তঞ্চ ‘‘আরামাদিঅত্থায রুক্খরোপনে অকপ্পিযৰোহারেসুপি কপ্পিযউদকসিঞ্চনাদি ৰট্টতী’’তি ৰক্খমানত্তা ইধাপি ৰিভাগং কত্ৰা কপ্পিযউদকসিঞ্চনাদি ৰিসুং দস্সিতং. যথা কোট্টনখণনাদিকাযিককিরিযাপি অকপ্পিযৰোহারে সঙ্গহিতা, এৰং মাতিকাউজুকরণাদিকপ্পিযৰোহারেপীতি আহ ‘‘সুক্খমাতিকায উজুকরণ’’ন্তি. এত্থ পুরাণপণ্ণাদিহরণম্পি সঙ্গয্হতি. মহাপচ্চরিযৰাদোৰ পমাণত্তা পচ্ছা ৰুত্তো. অকপ্পিযৰোহারেপি একচ্চং ৰট্টতীতি দস্সেতুং ‘‘ন কেৰলঞ্চ সেস’’ন্তিআদিমাহ. যংকিঞ্চি মাতিকন্তি সুক্খং ৰা অসুক্খং ৰা. তত্থাতি আরামাদিঅত্থায রুক্খরোপনে. তথাতি কপ্পিযৰোহারপরিযাযাদীহি গন্থাপনং সন্ধায ৰুত্তং. ইমিনা চ কুলসঙ্গহত্থায গন্থাপনাদিপি ন ৰট্টতীতি দস্সেতি.

ৰত্থুপূজনত্থায সযং গন্থনং কস্মা ন ৰট্টতীতি চোদেন্তো ‘‘ননু চা’’তিআদিমাহ. যথা আরামাদিঅত্থং কপ্পিযপথৰিযং সযং রোপেতুম্পি ৰট্টতি, তথা ৰত্থুপূজনত্থায সযং গন্থনম্পি কস্মা ন ৰট্টতীতি চোদকস্স অধিপ্পাযো. ৰুত্তন্তিআদি পরিহারো. অথ ‘‘ন পন মহাঅট্ঠকথায’’ন্তি কস্মা ৰদতি? মহাপচ্চরিআদীসু ৰুত্তম্পি হি পমাণমেৰাতি নাযং ৰিরোধো, মহাঅট্ঠকথাযং অৰুত্তস্স সযং রোপনস্স তত্থেৰ ৰুত্তেন উদকসিঞ্চনেন সহ সংসন্দননযদস্সনমুখেন পমাণমেৰাতি পতিট্ঠাপেতুং ৰুত্তত্তা. ‘‘মঞ্ঞেয্যাসী’’তি পদং ‘‘তং কথ’’ন্তি ইমিনা সম্বন্ধিতব্বং. তত্থাযং অধিপ্পাযো – কিঞ্চাপি মহাঅট্ঠকথাযং সযং রোপনং ন ৰুত্তং, কপ্পিযউদকস্স সযং আসিঞ্চনং ৰুত্তমেৰ, তস্মা যথা আরামাদিঅত্থায কপ্পিযউদকং সযং সিঞ্চিতুম্পি ৰট্টতি, তথা ৰত্থুপূজনত্থায গন্থনম্পি কস্মা ন ৰট্টতীতি. তম্পি ন ৰিরুজ্ঝতীতি যদেতং ৰত্থুপূজনত্থাযপি গন্থনাদিং পটিক্খিপিত্ৰা আরামাদিঅত্থায সযং রোপনসিঞ্চনং ৰুত্তং, তম্পি পাল়িযা সংসন্দনতো পুব্বাপরং ন ৰিরুজ্ঝতি.

তং কথং ন ৰিরুজ্ঝতীতি আহ ‘‘তত্র হী’’তিআদি. তত্রাতি রোপনসিঞ্চনৰিসযে. পুপ্ফাদীহি কুলসঙ্গহপ্পসঙ্গে ‘‘মালাৰচ্ছ’’ন্তি ৰিসেসিতত্তা কুলসঙ্গহত্থমেৰ রোপনং অধিপ্পেতন্তি ৰিঞ্ঞাযতীতি আহ ‘‘মালাৰচ্ছন্তি ৰদন্তো’’তিআদি. এতং ৰুত্তন্তি ‘‘মালাৰচ্ছং রোপেন্তিপি রোপাপেন্তিপি, সিঞ্চন্তিপি সিঞ্চাপেন্তিপী’’তি এতং ৰুত্তং. অঞ্ঞত্র পনাতি আরামাদিঅত্থায মালাৰচ্ছাদীনং রোপনে পন. পরিযাযোতি সযংকরণকারাপনসঙ্খাতো পরিযাযো ৰোহারো অত্থৰিসেসোতি অত্থো অত্থি উপলব্ভতি, কুলসঙ্গহত্থত্তাভাৰাতি অধিপ্পাযো. এৰমেত্থ পরিযাযসদ্দস্স করণকারাপনৰসেন অত্থে গয্হমানে ‘‘গন্থেন্তিপি গন্থাপেন্তিপী’’তি পাল়িযং পটিক্খিত্তগন্থনগন্থাপনং ঠপেত্ৰা যং পরতো ‘‘এৰং জান, এৰং কতে সোভেয্যা’’তিআদিকপ্পিযৰচনেহি গন্থাপনং ৰুত্তং, তত্থ দোসাভাৰো সমত্থিতো হোতি, ‘‘গন্থেহী’’তি আণত্তিযা কারাপনস্সেৰ গন্থাপনন্তি অধিপ্পেতত্তা. তত্থ পরিযাযং ইধ চ পরিযাযাভাৰং ঞত্ৰাতি তত্থ ‘‘মালাৰচ্ছং রোপেন্তী’’তিআদীসু ‘‘মালাৰচ্ছ’’ন্তি কুলসঙ্গহত্থতাসূচনকস্স ৰিসেসনস্স সব্ভাৰতো করণকারাপনসঙ্খাতপরিযাযসব্ভাৰং. ইধ ‘‘গন্থেন্তী’’তিআদীসু তথাৰিধৰিসেসৰচনাভাৰতো তস্স পরিযাযস্স অভাৰঞ্চ ঞত্ৰা. তং সুৰুত্তমেৰাতি ৰেদিতব্বন্তি যোজনা.

সব্বং ৰুত্তনযেনেৰ ৰেদিতব্বন্তি অট্ঠকথাসু আগতনযেনেৰ রোপনাদি, গন্থাপনাদি চ সব্বং ৰেদিতব্বং. ন হেত্থ সন্দেহো কাতব্বোতি নিগমেতি.

হরণাদীসূতি ৰত্থুপূজনত্থায হরণাদীসু. কুলিত্থিআদীনং অত্থায হরণতোতি কুলিত্থিআদীনং হরণস্সেৰ ৰিসেসেত্ৰা পটিক্খিত্তত্তাতি অধিপ্পাযো. তেনাহ ‘‘হরণাধিকারে হী’’তিআদি. মঞ্জরীতি পুপ্ফগোচ্ছং. ৰটংসকোতি কণ্ণস্স উপরি পিল়ন্ধনত্থং কতপুপ্ফৰিকতি, সো চ ‘‘ৰটংসো’’তি ৰুচ্চতি. কণ্ণিকাতি বহূনং পুপ্ফানং ৰা মালানং ৰা একতো বন্ধিতস্স নামং, ‘‘কণ্ণাভরণ’’ন্তিপি ৰদন্তি. হারসদিসন্তি মুত্তাহারসদিসং.

কপ্পিযেনাতি কপ্পিযউদকেন. তেসংযেৰ দ্ৰিন্নন্তি কুলদূসনপরিভোগানং দ্ৰিন্নং. দুক্কটন্তি কুলসঙ্গহত্থায সযং সিঞ্চনে, কপ্পিযৰোহারেন ৰা অকপ্পিযৰোহারেন ৰা সিঞ্চাপনে চ দুক্কটং, পরিভোগত্থায পন সযং সিঞ্চনে, অকপ্পিযৰোহারেন সিঞ্চাপনে চ দুক্কটং. পযোগবহুলতাযাতি সযং করণে, কাযপযোগস্স কারাপনে চ ৰচীপযোগস্স চ বহুত্তেন.

গন্থেন নিব্বত্তং দামং গন্থিমং. এসেৰ নযো সেসেসুপি. ন ৰট্টতীতি ৰত্থুপূজনত্থাযপি ন ৰট্টতি, দুক্কটন্তি অত্থো. ৰট্টতীতি ৰত্থুপূজনত্থায ৰট্টতি, কুলসঙ্গহত্থায পন কপ্পিযৰোহারেন কারাপেন্তস্সাপি দুক্কটমেৰ.

নীপপুপ্ফং নাম কদম্বপুপ্ফং. পুরিমনযেনেৰাতি ‘‘ভিক্খুস্স ৰা’’তিআদিনা ৰুত্তনযেন.

কদলিক্খন্ধম্হীতিআদিনা ৰুত্তং সব্বমেৰ সন্ধায ‘‘তং অতিওল়ারিকমেৰা’’তি ৰুত্তং, সব্বত্থ করণে, অকপ্পিযৰচনেন কারাপনে চ দুক্কটমেৰাতি অত্থো. ‘‘পুপ্ফৰিজ্ঝনত্থং কণ্টকং বন্ধিতুম্পি ন ৰট্টতী’’তি ইমস্স উপলক্খণত্তা পুপ্ফদামোলম্বনাদিঅত্থায রজ্জুবন্ধনাদিপি ন ৰট্টতীতি কেচি ৰদন্তি, অঞ্ঞে পন ‘‘পুপ্ফৰিজ্ঝনত্থং কণ্টকন্তি ৰিসেসিতত্তা তদত্থং কণ্টকমেৰ বন্ধিতুং ন ৰট্টতি, তঞ্চ অট্ঠকথাপমাণেনা’’তি ৰদন্তি, ৰীমংসিত্ৰা গহেতব্বং. পুপ্ফপটিচ্ছকং নাম দণ্ডাদীহি কতং পুপ্ফাধানং, এতম্পি নাগদন্তকম্পি সছিদ্দকমেৰ গহেতব্বং. অসোকপিণ্ডিযাতি অসোকসাখানং, পুপ্ফানং ৰা সমূহে. ধম্মরজ্জু নাম চেতিযাদীনি পরিক্খিপিত্ৰা তেসঞ্চ রজ্জুযা চ অন্তরা পুপ্ফপ্পৰেসনত্থায বন্ধরজ্জু. ‘‘সিথিলৰট্টিতা ৰা রজ্জুৰট্টিঅন্তরে পুপ্ফপ্পৰেসনত্থায এৰং বন্ধা’’তিপি ৰদন্তি.

মত্থকদামন্তি ধম্মাসনাদিমত্থকলম্বকদামং. তেসংযেৰাতি উপ্পলাদীনং এৰ. ৰাকেন ৰা দণ্ডকেন ৰাতি পুপ্ফনাল়ং ফালেত্ৰা পুপ্ফেন একাবদ্ধং ঠিতৰাকেন, দণ্ডকেন চ একবন্ধনেনেৰ, এতেন পুপ্ফং বীজগামে সঙ্গহং ন গচ্ছতি পঞ্চসু বীজেসু অপ্পৰিট্ঠত্তা পণ্ণং ৰিয, তস্মা কপ্পিযং অকারাপেত্ৰাপি কোপনে দোসো নত্থি. যঞ্চ ছিন্নস্সাপি মকুল়স্স ৰিকসনং, তম্পি অতিতরুণস্স অভাৰা ৰুড্ঢিলক্খণং ন হোতি, পরিণতস্স পন মকুল়স্স পত্তানং সিনেহে পরিযাদানং গতে ৰিসুংভাৰো এৰ ৰিকাসো, তেনেৰ ছিন্নমকুল়ৰিকাসো অচ্ছিন্নমকুল়ৰিকাসতো পরিহীনো, মিলাতযুত্তো ৰা দিস্সতি. যঞ্চ মিলাতস্স উদকসঞ্ঞোগে অমিলানতাপজ্জনং, তম্পি তম্বুলপণ্ণাদীসু সমানন্তি ৰুড্ঢিলক্খণং ন হোতি, পাল়িঅট্ঠকথাদীসু চ ন কত্থচি পুপ্ফানং কপ্পিযকরণং আগতং, তস্মা পুপ্ফং সব্বথা অবীজমেৰাতি ৰিঞ্ঞাযতি, ৰীমংসিত্ৰা গহেতব্বং. ‘‘পসিব্বকে ৰিযা’’তি ৰুত্তত্তা পুপ্ফপসিব্বকে ৰা পসিব্বকসদিসবন্ধে ৰা যত্থ কত্থচি চীৰরে ৰা পক্খিপিতুং ৰট্টতীতি সিদ্ধং. বন্ধিতুং ন ৰট্টতীতি রজ্জুআদীহি বন্ধনং সন্ধায ৰুত্তং, পুপ্ফস্সেৰ পন অচ্ছিন্নদণ্ডৰাকেহি বন্ধিতুং ৰট্টতি এৰ.

পুপ্ফপটে চ দট্ঠব্বন্তি পুপ্ফপটং করোন্তস্স দীঘতো পুপ্ফদামস্স হরণপচ্চাহরণৰসেন পূরণং সন্ধায ৰুত্তং, তিরিযতো হরণং পন ৰাযিমং নাম হোতি, ন পূরিমং. ‘‘পুরিমট্ঠানং অতিক্কামেতী’’তি সামঞ্ঞতো ৰুত্তত্তা পুরিমং পুপ্ফকোটিং ফুসাপেত্ৰা ৰা অফুসাপেত্ৰা ৰা পরিক্খিপনৰসেন পন অতিক্কমন্তস্স আপত্তিযেৰ. বন্ধিতুং ৰট্টতীতি পুপ্ফরহিতায সুত্তৰাককোটিযা বন্ধিতুং ৰট্টতি. ‘‘একৰারং হরিত্ৰা ৰা পরিক্খিপিত্ৰা ৰা’’তি ইদং পুব্বে ৰুত্তচেতিযাদিপরিক্খেপং, পুপ্ফপটকরণঞ্চ সন্ধায ৰুত্তং.

পরেহি পূরিতন্তি দীঘতো পসারিতং. ৰাযিতুন্তি তিরিযতো হরিতুং, তং পন একৰারম্পি ন লব্ভতি. পুপ্ফানি ঠপেন্তেনাতি অগন্থিতপুপ্ফানি অঞ্ঞমঞ্ঞং ফুসাপেত্ৰাপি ঠপেন্তেন. ঘটিকদামওলম্বকোতি হেট্ঠাভাগে ঘটিকাকারযুত্তো, দারুঘটিকাকারো ৰা ওলম্বকো. সুত্তমযং গেণ্ডুকং নাম. সব্বত্থাতি গন্থিমাদীসু সব্বত্থ.

রেচকন্তি অভিনযং, ‘‘এৰং নচ্চাহী’’তি নটনাকারদস্সনন্তি অত্থো, ‘‘চক্কং ৰিয অত্তানং ভমাপন’’ন্তিপি কেচি. আকাসেযেৰ কীল়ন্তীতি ‘‘অযং সারী অসুকপদং মযা নীতা’’তি এৰং মুখেনেৰ উভোপি ৰদন্তা কীল়ন্তি. জূতফলকেতি জূতমণ্ডলে. পাসককীল়াযাতি দ্ৰিন্নং তিৰঙ্গুলপ্পমাণানং দারুদন্তাদিমযানং পাসকানং চতূসু পস্সেসু এককাদিৰসেন বিন্দূনি কত্ৰা ফলকে খিপিত্ৰা উপরিভাগে দিট্ঠবিন্দূনং ৰসেন সারিযো অপনেত্ৰা কীল়নকজূতকীল়ায.

মঞ্জট্ঠি নাম মঞ্জট্ঠরুক্খসারকসাৰং. সলাকহত্থন্তি নাল়িকেরহীরাদীনং কলাপস্সেতং নামং. পাল়িযং থরুস্মিন্তি খগ্গে. উস্সেল়েন্তীতি মুখেন উস্সেল়নসদ্দং পমুঞ্চন্তি, মহন্তং অব্যত্তসদ্দং পৰত্তেন্তীতি অত্থো. অপ্ফোটেন্তীতি দ্ৰিগুণিতৰামহত্থে দক্খিণহত্থেন তাল়েত্ৰা সদ্দং করোন্তি. মুখডিণ্ডিমন্তি মুখভেরী.

৪৩২. তেসন্তি সমাসে গুণীভূতানি পব্বানিপি পরামসতি. বোন্দোতি লোলো, মন্দধাতুকোতি অত্থো. ভকুটিং কত্ৰাতি ভমুকভেদং কত্ৰা. নেলাতি নিদ্দোসা.

৪৩৩. পাল়িযং ‘‘সারিপুত্তা’’তি ইদং একসেসনযেন সারিপুত্তমোগ্গল্লানানং উভিন্নং আলপনং, তেনেৰ বহুৰচননিদ্দেসো কতো.

৪৩৫. অট্ঠারস ৰত্তানীতি ‘‘ন উপসম্পাদেতব্ব’’ন্তিআদীনি ‘‘ন ভিক্খূহি সম্পযোজেতব্ব’’ন্তি পরিযোসানানি কম্মক্খন্ধকে (চূল়ৰ. ৭) আগতানি অট্ঠারস ৰত্তানি. ন পন্নলোমাতি ন পতিতমানলোমা, অননুকূলৰত্তিনোতি অত্থো.

৪৩৭. পরসন্তকং দেতি দুক্কটমেৰাতি ৰিস্সাসগাহেন দানং সন্ধায ৰুত্তং. থুল্লচ্চযন্তি এত্থ ভণ্ডদেয্যম্পি হোতি এৰ.

তঞ্চ খো ৰত্থুপূজনত্থাযাতি মাতাপিতূনম্পি পুপ্ফং দেন্তেন ৰত্থুপূজনত্থাযেৰ দাতব্বন্তি দস্সেতি. মণ্ডনত্থায পন সিৰলিঙ্গাদিপূজনত্থাযাতি এত্তকমেৰ ৰুত্তত্তা ‘‘ইমং ৰিক্কিণিত্ৰা জীৰিস্সন্তী’’তি মাতাপিতূনং দাতুং ৰট্টতি, সেসঞাতীনং পন তাৰকালিকমেৰ দাতুং ৰট্টতি. ঞাতিসামণেরেহেৰাতি তেসং গিহিকম্মপরিমোচনত্থং ৰুত্তং. ইতরেতি অঞ্ঞাতকা, তেহিপি সামণেরেহি আচরিযুপজ্ঝাযানং ৰত্তসীসেন হরিতব্বং. চূল়কন্তি উপড্ঢভাগতোপি উপড্ঢং.

সামণেরা…পে… ঠপেন্তীতি অরক্খিতাগোপিতং সন্ধায ৰুত্তং. তত্থ তত্থাতি মগ্গে ৰা চেতিযঙ্গণে ৰা. ‘‘সামণেরেহি দাপেতুং ন লভন্তী’’তি ইদং সামণেরেহি গিহীনং কম্মং কারিতং ৰিয হোতীতি ৰুত্তং, ন পন পুপ্ফদানং হোতীতি সামণেরানম্পি ন ৰট্টনতো. ৰুত্তঞ্চ ‘‘সযমেৰা’’তিআদি. ‘‘অৰিসেসেন ৰুত্ত’’ন্তি ইমিনা সব্বেসম্পি ন ৰট্টতীতি দস্সেতি.

খীণপরিব্বযানন্তি আগন্তুকে সন্ধায ৰুত্তং. পরিচ্ছিন্নেসুপি রুক্খেসু ‘‘ইধ ফলানি সুন্দরানী’’তিআদিং ৰদন্তেন কুলসঙ্গহো কতো নাম হোতীতি আহ ‘‘এৰং পন ন ৰত্তব্ব’’ন্তি.

রুক্খচ্ছল্লীতি রুক্খত্তচো. অভাজনীযত্তা গরুভণ্ডং ৰুত্তং. ৰুত্তনযেনাতি পণ্ণদানম্পি পুপ্ফফলাদীসু ৰুত্তনযেন কুলসঙ্গহো হোতীতি দস্সেতি.

পুব্বে ৰুত্তপ্পকারন্তি মম ৰচনেন ভগৰতো পাদে ৰন্দথাতিআদিনা ৰুত্তপ্পকারসিক্খাপদে পঠমং ৰুত্তং. ‘‘পক্কমতাযস্মা’’তি ইদং পব্বাজনীযকম্মৰসেন ৰুত্তং. পুন ‘‘পক্কমতাযস্মা’’তি ইদম্পি পব্বাজনীযকম্মকতস্স ৰত্তৰসেন ৰুত্তং. এত্থ চ অস্সজিপুনব্বসুকেহি আচরিযেসু অনেকৰিধেসু অনাচারেসু পঞ্ঞপেতব্বা আপত্তিযো সিক্খাপদন্তরেসু পঞ্ঞত্তা এৰাতি তা ইধ অপঞ্ঞপেত্ৰা কুলদূসকানং পব্বাজনীযকম্মৰসেন নিগ্গহং কাতুং তত্থেৰ সম্মা অৰত্তিত্ৰা কারকসঙ্ঘং ছন্দগামিতাদীহি পাপেন্তানং সমনুভাসনায সঙ্ঘাদিসেসং আরোপিতঞ্চ ইদং সিক্খাপদং পঞ্ঞত্তন্তি ৰেদিতব্বং. পঠমসঙ্ঘভেদসদিসানেৰাতি এত্থ অঙ্গেসুপি যথা তত্থ পরক্কমনং, এৰমিধ ছন্দাদীহি পাপনং দট্ঠব্বং. সেসং তাদিসমেৰাতি.

কুলদূসকসিক্খাপদৰণ্ণনা নিট্ঠিতা.

নিগমনৰণ্ণনা

৪৪২. ইতরে পন যাৰততিযকাতি ৰেদিতব্বাতি সম্বন্ধো. যো হি জরো একস্মিং দিৰসে আগন্ত্ৰাপি গতো অনন্তরেসু দ্ৰীসু দিৰসেসু অনুপ্পজ্জিত্ৰা ততিযে দিৰসে উপ্পজ্জতি, সো ততিযকো. যো পন ততিযেপি অনুপ্পজ্জিত্ৰা চতুত্থে এৰ দিৰসে উপ্পজ্জতি, সো চতুত্থকো চাতি ৰুচ্চতি. তং সন্ধাযাহ ‘‘যথা ততিযে’’তিআদি. ‘‘অকামেন অৰসেনা’’তি ইমিনা অপ্পটিকম্মকরণং নাম যস্মা অলজ্জিলক্খণং, সগ্গমোক্খাৰরণঞ্চ, তস্মা আপন্নো পুগ্গলো ‘‘পচ্ছা পরিৰসিস্সামী’’তি ৰিক্খিপিতুং ন লভতি, সঙ্ঘেন চ অনিচ্ছন্তস্সেৰ পরিৰাসো দাতব্বোতি দস্সেতি. পাল়িযং চিণ্ণমানত্তো ভিক্খু…পে… অব্ভেতব্বোতি এত্থ যো ভিক্খু চিণ্ণমানত্তো, সো ভিক্খু অব্ভেতব্বোতি এৰং ভিক্খুসদ্দদ্ৰযস্স যোজনা ৰেদিতব্বা. তে চ ভিক্খূ গারয্হাতি ঊনভাৰং ঞত্ৰা অব্ভেন্তি, দুক্কটাপজ্জনেন গরহিতব্বা. সামীচীতি ৰত্তং.

ইতি সমন্তপাসাদিকায ৰিনযট্ঠকথায ৰিমতিৰিনোদনিযং

তেরসকৰণ্ণনানযো নিট্ঠিতো.