৩. অনিযতকণ্ডো

১. পঠমঅনিযতসিক্খাপদৰণ্ণনা

৪৪৩. পুত্তসদ্দেন সামঞ্ঞনিদ্দেসতো, একসেসনযেন ৰা পুত্তীপি গহিতাতি আহ ‘‘বহূ ধীতরো চা’’তি. তদনন্তরন্তি ভিক্খূনং ভোজনানন্তরং.

৪৪৪-৫. তং কম্মন্তি তং মেথুনাদিঅজ্ঝাচারকম্মং. পাল়িযং ‘‘সোতস্স রহো’’তি ইদং অত্থুদ্ধারৰসেন ৰুত্তং, উপরি সিক্খাপদে ‘‘ন হেৰ খো পন পটিচ্ছন্ন’’ন্তিআদিনা (পারা. ৪৫৪) এতস্স সিক্খাপদস্স ৰিসযং পটিক্খিপিত্ৰা ‘‘অলঞ্চ খো হোতি মাতুগামং দুট্ঠুল্লাহি ৰাচাহি ওভাসিতু’’ন্তি ৰিসযন্তরভূতসোতরহস্স ৰিসুং ৰক্খমানত্তা, ইধ পন চক্খুরহোৰ অধিপ্পেতো ‘‘পটিচ্ছন্নে আসনে’’তিআদিৰচনতো, ‘‘সক্কা হোতি মেথুনং ধম্মং পটিসেৰিতু’’ন্তি ৰুত্তত্তা চ. তেনাহ ‘‘কিঞ্চাপী’’তিআদি. পরিচ্ছেদোতি রহোনিসজ্জাপত্তিযা ৰৰত্থানং.

ইদানি চক্খুরহেনেৰ আপত্তিং পরিচ্ছিন্দিত্ৰা দস্সেন্তো ‘‘সচেপি হী’’তিআদিমাহ. ‘‘পিহিতকৰাটস্সা’’তি ইমিনা পটিচ্ছন্নভাৰতো চক্খুস্স রহোৰ অধিপ্পেতো, ন সোতস্স রহোতি দস্সেতি. তেনাহ ‘‘অপিহিতকৰাটস্স…পে… অনাপত্তি’’ন্তি. ন হি কৰাটপিদহনেন সোতস্স রহো ৰিগচ্ছতি, চক্খুস্স রহো এৰ পন ৰিগচ্ছতি. ‘‘অন্তোদ্ৰাদসহত্থেপী’’তি ইদং দুতিযসিক্খাপদে আগতসোতস্স রহেন আপজ্জিতব্বদুট্ঠুল্লৰাচাপত্তিযা সব্বথা অনাপত্তিভাৰং দস্সেতুং ৰুত্তং. দ্ৰাদসহত্থতো বহি নিসিন্নো হি তত্থ সোতস্স রহসব্ভাৰতো দুট্ঠুল্লৰাচাপত্তিযা অনাপত্তিং ন করোতি, তথা চ ‘‘অনাপত্তিং ন করোতী’’তি সামঞ্ঞতো ন ৰত্তব্বং সিযা, ‘‘মেথুনকাযসংসগ্গাপত্তীহি অনাপত্তিং করোতী’’তি ৰিসেসেত্ৰা ৰত্তব্বং ভৰেয্য. তস্মা তথা তং অৰত্ৰা সব্বথা অনাপত্তিং দস্সেতুমেৰ ‘‘দ্ৰাদসহত্থে’’তি ৰুত্তন্তি গহেতব্বং. যদি হি চক্খুস্সেৰ রহভাৰং সন্ধায ৰদেয্য, ‘‘অন্তোদ্ৰাদসহত্থে’’তি ন ৰদেয্য অপ্পটিচ্ছন্নে ততো দূরে নিসিন্নেপি চক্খুস্স রহাসম্ভৰতো. যস্মা নিসীদিত্ৰা নিদ্দাযন্তো কপিমিদ্ধপরেতো কিঞ্চি কালং চক্খূনি উম্মীলেতি, কিঞ্চি কালং নিম্মীলেতি. তস্মা ‘‘নিদ্দাযন্তোপি অনাপত্তিং করোতী’’তি ৰুত্তং.

পটিলদ্ধসোতাপত্তিফলাতি অন্তিমপরিচ্ছেদতো ৰুত্তং. নিসজ্জং পটিজানমানোতি মেথুনকাযসংসগ্গাদিৰসেন রহো নিসজ্জং পটিজানমানোতি অত্থো. তেনাহ ‘‘পারাজিকেন ৰা’’তিআদি. ন অপ্পটিজানমানোতি অলজ্জীপি অপ্পটিজানমানো আপত্তিযা ন কারেতব্বোৰ. সো হি যাৰ দোসং ন পটিজানাতি, তাৰ ‘‘নেৰ সুদ্ধো, নাসুদ্ধো’’তি ৰা ৰত্তব্বো, ৰত্তানুসন্ধিনা পন কারেতব্বো. ৰুত্তঞ্হেতং –

‘‘পটিঞ্ঞা লজ্জীসু কতা, অলজ্জীসু এৰং ন ৰিজ্জতি;

বহুম্পি অলজ্জী ভাসেয্য, ৰত্তানুসন্ধিতেন কারযে’’তি. (পরি. ৩৫৯);

নিসজ্জাদীসু…পে… পটিজানমানোৰ তেন সো ভিক্খু কারেতব্বোতি এত্থ পটিজানমানোতি পাল়িযং অনাগতম্পি অধিকারতো আগতমেৰাতি কত্ৰা ৰুত্তং.

ৰদাপেথাতি তস্স ইদ্ধিযা ৰিগতাসঙ্কোপি তং ওৰদন্তো আহ, অনুপপরিক্খিত্ৰা অদেসে নিসিন্না ‘‘মাতুগামেন সদ্ধিং একাসনে থেরো রহো নিসিন্নো’’তি এৰং মাদিসেহিপি তুম্হে তুম্হাকং অৰণ্ণং ৰদাপেথ কথাপযিত্থ, মা পুন এৰং করিত্থাতি অধিপ্পাযো. এৰমকাসিন্তি নিগূহিতব্বম্পি ইমং ৰিসেসাধিগমং পকাসেন্তো তং সদ্ধাপেতুমেৰ এৰমকাসিন্তি অত্থো. রক্খেয্যাসিমন্তি ইমং উত্তরিমনুস্সধম্মং অঞ্ঞেসং মা পকাসযি.

৪৫১. নিসজ্জায পাচিত্তিযন্তি রহোনিসজ্জস্সাদে ৰত্তমানে পাচিত্তিযং. সচে পন সো রহোনিসজ্জস্সাদং পটিৰিনোদেত্ৰা কম্মট্ঠানমনসিকারাদিনা অঞ্ঞৰিহিতো, নিদ্দূপগতো ৰা অনাপত্তি এৰ. তেনাহ ‘‘অস্সাদে উপ্পন্নে’’তি. ‘‘নিসিন্নায ইত্থিযা’’তি ইমিনা নিসীদনক্খণে অস্সাদাভাৰং দস্সেতি. যদি হি নিসীদনক্খণে অস্সাদো উপ্পজ্জেয্য, তেন উট্ঠাতব্বং. ইতরথা আপত্তি এৰ ইত্থিযা উট্ঠাযুট্ঠায পুনপ্পুনং নিসীদনে ৰিয, তত্থাপি ভিক্খুস্স উট্ঠহতো অনাপত্তি, তেন রহোনিসজ্জাপত্তি অকিরিযসমুট্ঠানাপি হোতীতি ৰদন্তি. ইদং পন অনিযতসিক্খাপদং, অনন্তরঞ্চাতি দ্ৰেপি ৰিসুং আপত্তিপঞ্ঞাপনৰসেন পঞ্ঞত্তানি ন হোন্তি রহোনিসজ্জাদীসু আপত্তিযা সিক্খাপদন্তরেসু পঞ্ঞত্তত্তা. পারাজিকাদিআপত্তীহি পন কেনচি চোদিতস্স অনুৰিজ্জকেহি ৰিনিচ্ছযকারণনযদস্সনত্থং এৰং ৰত্থুৰসেন দ্ৰিধা ৰিভজিত্ৰা পঞ্ঞত্তানি, ইমানেৰ চ যস্মা ভিক্খুনীনম্পি ৰিনিচ্ছযনযগ্গহণায অলং, তস্মা তাসং ৰিসুং ন ৰুত্তানীতি ৰেদিতব্বং. যং পন আপত্তিং পটিজানাতি, তস্স ৰসেনেত্থ অঙ্গভেদো ৰেদিতব্বো. তেনেৰ ‘‘অযং ধম্মো অনিযতো’’তি ৰুত্তং.

ইধ অনিযতৰসেন ৰুত্তানং পারাজিকসঙ্ঘাদিসেসপাচিত্তিযানং তিণ্ণম্পি অঞ্ঞমঞ্ঞং সদিসসমুট্ঠানাদিতায ৰুত্তং ‘‘সমুট্ঠানাদীনি পঠমপারাজিকসদিসানেৰা’’তি.

পঠমঅনিযতসিক্খাপদৰণ্ণনা নিট্ঠিতা.

২. দুতিযঅনিযতসিক্খাপদৰণ্ণনা

৪৫২. ‘‘ন লভতি মাতুগামেন সদ্ধিং একো একায…পে… নিসজ্জং কপ্পেতু’’ন্তি অৰত্ৰা ‘‘পটিক্খিত্তং মাতুগামেনা’’তিআদিনা ৰুত্তত্তা ‘‘একো’’তি পচ্চত্তপদং পটিক্খিত্তপদেন ন সমেতি, ‘‘একস্সা’’তি ৰত্তব্বোতি সাধেন্তো আহ ‘‘ইতরথা হী’’তিআদি.

৪৫৩. পরিৰেণঙ্গণাদীতি পরিৰেণস্স মাল়কং. আদি-সদ্দেন পাকারাদিপরিক্খিত্তং চেতিযমাল়কাদিং সঙ্গণ্হাতি. অন্তোগধন্তি অপ্পটিচ্ছন্নট্ঠানে এৰ পরিযাপন্নং. ইধ ইত্থীপি অনাপত্তিং করোতীতি সম্বন্ধো. কস্মা পন ইত্থী ইধেৰ অনাপত্তিং করোতি, ন পুরিমসিক্খাপদেতি? ইমস্স সিক্খাপদস্স মেথুনং ৰিনা দুট্ঠুল্লৰাচায ৰসেন আগতত্তা. মেথুনমেৰ হি ইত্থিযো অঞ্ঞমঞ্ঞং পটিচ্ছাদেন্তি মহাৰনে দ্ৰারং ৰিৰরিত্ৰা নিদ্দূপগতম্হি ভিক্খুম্হি ৰিয. দুট্ঠুল্লং পন ন পটিচ্ছাদেন্তি, তেনেৰ দুট্ঠুল্লৰাচাসিক্খাপদে ‘‘যা তা ইত্থিযো হিরিমনা, তা নিক্খমিত্ৰা ভিক্খূ উজ্ঝাপেসু’’ন্তি (পারা. ২৮৩) ৰুত্তং, তস্মা ‘‘ইত্থীপি অনাপত্তিং করোতী’’তি ৰুত্তং, ‘‘অপ্পটিচ্ছন্নট্ঠানত্তা’’তিপি কারণং ৰদন্তি.

কাযেনাপি দুট্ঠুল্লোভাসসম্ভৰতো ইমস্মিং সিক্খাপদে চক্খুস্স রহো, সোতস্স রহো চ অধিপ্পেতোতি আহ ‘‘অনন্ধো অবধিরো’’তিআদি. কেচি পন ৰিভঙ্গে ‘‘নালং কম্মনিযন্তি ন সক্কা হোতি মেথুনং ধম্মং পটিসেৰিতু’ন্তি (পারা. ৪৫৪) এত্তকমেৰ ৰত্ৰা ‘ন সক্কা হোতি কাযসংসগ্গং সমাপজ্জিতু’ন্তি অৰুত্তত্তা অপ্পটিচ্ছন্নেপি ঠানে রহো অঞ্ঞেসং অভাৰং দিস্ৰা একায ইত্থিযা কাযসংসগ্গোপি সক্কা আপজ্জিতুন্তি অন্তোদ্ৰাদসহত্থে সৰনূপচারে ঠিতো অবধিরোপি অন্ধো কাযসংসগ্গস্সাপি সব্ভাৰাভাৰং ন জানাতীতি কাযেন দুট্ঠুল্লোভাসনসব্ভাৰং অমনসিকত্ৰাপি কাযসংসগ্গাপত্তিযাপি পরিহারায অনন্ধো অবধিরোতিআদি ৰুত্ত’’ন্তি ৰদন্তি. যং পন সারত্থদীপনিযং ‘‘কাযসংসগ্গৰসেন অনন্ধো ৰুত্তো’’তি (সারত্থ. টী. ২.৪৫৩) ৰুত্তং, তং পন কাযেন দুট্ঠুল্লোভাসনসম্ভৰং অমনসিকত্ৰা ৰুত্তং, কাযসংসগ্গৰসেনাপীতি গহেতব্বং. তেনেৰ ‘‘ইমস্মিং সিক্খাপদে সোতস্স রহো এৰ অধিপ্পেতো…পে… কেনচি পন ‘দ্ৰেপি রহা ইধ অধিপ্পেতা’তি ৰুত্তং, তং ন গহেতব্ব’’ন্তি ৰুত্তং. যং পন চক্খুস্স রহাভাৰসাধনত্থং ‘‘ন হি অপ্পটিচ্ছন্নে ওকাসে চক্খুস্স রহো সম্ভৰতী’’তিআদি ৰুত্তং, তং ন যুত্তং অতিদূরতরে ঠিতস্স কাযেন ওভাসনম্পি হত্থগ্গাহাদীনিপি সল্লক্খেতুং অসক্কুণেয্যত্তা. তেনেৰ পাল়িযং ‘‘চক্খুস্স রহো’’তি ৰুত্তং, অট্ঠকথাযং অপ্পটিক্খিত্তং. ন কেৰলঞ্চ অপ্পটিক্খিত্তং, অথ খো ‘‘অনন্ধো বধিরোতি চ অন্ধো ৰা অবধিরোপি ন করোতী’’তি চ ৰুত্তং, তস্মা দ্ৰেপি রহা ইধ গহেতব্বা. ‘‘অন্তোদ্ৰাদসহত্থে’’তিইমিনা সোতস্স রহো দ্ৰাদসহত্থেন পরিচ্ছিন্নোতি ইদং দস্সেতি. চক্খুস্স রহো পন যত্থ ঠিতস্স কাযৰিকারাদযো ন পঞ্ঞাযন্তি, তেন পরিচ্ছিন্দিতব্বোতি দট্ঠব্বং. বধিরো পন চক্খুমাপীতি দুট্ঠুল্লৰাচাসঙ্ঘাদিসেসং সন্ধায ৰুত্তং. দুট্ঠুল্লাপত্তি ৰুত্তাতি পুরিমসিক্খাপদে ৰুত্তেহি অধিকৰসেন দুট্ঠুল্লাপত্তি চ ৰুত্তাতি এৰমত্থো গহেতব্বো, ন পন দুট্ঠুল্লাপত্তি এৰাতি কাযসংসগ্গস্সাপি ইধ গহেতব্বতো. তেনেৰ ‘‘পারাজিকাপত্তিঞ্চ পরিহাপেত্ৰা’’তি এত্তকমেৰ ৰুত্তং, ইতরথা ‘‘কাযসংসগ্গঞ্চা’’তি ৰত্তব্বং ভৰেয্য.

তিসমুট্ঠানন্তিআদি পন পুরিমসিক্খাপদে আগতেহি অধিকস্স দুট্ঠুল্লৰাচাসঙ্ঘাদিসেসস্স ৰসেন ৰুত্তং কাযসংসগ্গাদীনম্পি পুরিমসিক্খাপদে এৰ ৰুত্তত্তা, ইধ পন ন ৰুত্তন্তিপি ৰদন্তি, ৰীমংসিত্ৰা গহেতব্বং.

দুতিযঅনিযতসিক্খাপদৰণ্ণনা নিট্ঠিতা.

নিট্ঠিতো অনিযতৰণ্ণনানযো.