৫. চিত্তাগারৰগ্গৰণ্ণনা

১. পঠমসিক্খাপদৰণ্ণনা

৯৭৮. কীল়নউপৰনং নাম কঞ্চিনগরস্স নগরুপৰনং ৰিয দট্ঠব্বং. উয্যানং নাম তত্থেৰ নন্দৰনউয্যানং ৰিয দট্ঠব্বং. ‘‘তত্থেৰ ঠত্ৰা তং তং দিসাভাগং ৰিলোকেত্ৰা পস্সন্তিযা পন পাটেক্কা আপত্তিযো’’তি পাঠো. এৰং ৰুত্তে যং পুব্বে ৰুত্তং পদং ‘‘অনুদ্ধরমানা’’তি, তং একস্মিংযেৰ দিসাভাগেতি সিদ্ধন্তি একে. উপচারো দ্ৰে লেড্ডুপাতোতি চ.

পঠমসিক্খাপদৰণ্ণনা নিট্ঠিতা.

২. দুতিযসিক্খাপদৰণ্ণনা

৯৮৪. ‘‘আহরিমেহি ৰাল়েহী’’তি ‘‘অসংহারিমেনা’’তি চ দুৰিধো পাঠো. ‘‘ৰিসুং কত্ৰা পচ্ছা সদ্ধিং তেহি ৰাল়েহী’’তি লিখিতং. যথা তথা ৰাল়রূপে উট্ঠপেত্ৰা কতপাদং ‘‘পল্লঙ্ক’’ন্তি ৰুচ্চতি অনাপত্তিৰারে ‘‘অসংহারিমেহি ৰাল়েহি কতং পরিভুঞ্জতী’’তি ৰচনাভাৰতো.

দুতিযসিক্খাপদৰণ্ণনা নিট্ঠিতা.

৩. ততিযসিক্খাপদৰণ্ণনা

৯৮৮. ‘‘উজ্জৰুজ্জৰেতি হত্থপ্পসারণে’’তি লিখিতং, তং ন যুত্তং ‘‘যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে একাপত্তী’’তি ৰচনতো.

ততিযসিক্খাপদৰণ্ণনা নিট্ঠিতা.

৪. চতুত্থসিক্খাপদৰণ্ণনা

৯৯৩. ‘‘যাগুপানেতি যাগুদানে’’তি লিখিতং. পোরাণগণ্ঠিপদে ‘‘মাতাপিতূনং দাতুং ৰট্টতী’’তি ৰুত্তং.

চতুত্থসিক্খাপদৰণ্ণনা নিট্ঠিতা.

৯৯৪. পঞ্চমসিক্খাপদং উত্তানত্থমেৰ.

৬. ছট্ঠসিক্খাপদৰণ্ণনা

১০০১. ছট্ঠে ভিক্খুৰিভঙ্গে অচেলকসিক্খাপদেন একপরিচ্ছেদং. ইধ অগারিকো ৰিসেসো, তস্মা ‘‘অসাধারণ’’ন্তি ৰদন্তি.

ছট্ঠসিক্খাপদৰণ্ণনা নিট্ঠিতা.

১০০৩-৮. সত্তমট্ঠমেসু ৰত্তব্বং নত্থি.

৯. নৰমসিক্খাপদৰণ্ণনা

১০১৫. ‘‘খীলনমন্তং দারুসারখীলং মন্তেত্ৰা পথৰিযং পৰেসেত্ৰা মারণমন্তং. নাগমণ্ডলংনাম নাগরোধমন্তং, পিট্ঠাদীহি ৰা পরিক্খেপং কত্ৰা তত্থ মনুস্সে পৰেসেন্তি গুত্তত্থাযা’’তি লিখিতং.

নৰমসিক্খাপদৰণ্ণনা নিট্ঠিতা.

১০১৭. দসমসিক্খাপদং উত্তানত্থমেৰ.

চিত্তাগারৰগ্গৰণ্ণনা নিট্ঠিতা.