৬. আরামৰগ্গৰণ্ণনা

১০২১. পঠমসিক্খাপদং উত্তানত্থমেৰ.

২. দুতিযসিক্খাপদৰণ্ণনা

১০৩০. ভিক্খুনী চে ভিক্খুং অক্কোসতি, ইমিনা সিক্খাপদেন পাচিত্তিযং. ভিক্খুনিং চে অক্কোসতি, ওমসৰাদেন আপজ্জতি. ওমসৰাদে সম্মুখাৰ রুহতি, ইধ পন পরম্মুখাপি.

তত্রাযং ৰিচারণা – ভিক্খুৰিভঙ্গে ওসমৰাদসিক্খাপদে ভিক্খুনী অনুপসম্পন্নট্ঠানে তিট্ঠতীতি কত্ৰা ভিক্খুনিৰিভঙ্গেপি ওমসৰাদসিক্খাপদে ভিক্খু ভিক্খুনিযা অনুপসম্পন্নট্ঠানে তিট্ঠতীতি সিদ্ধং. ইধ চ অনুপসম্পন্নস্স অক্কোসনে দুক্কটং ৰুত্তং, ভিক্খুস্স উপসম্পন্নস্স অক্কোসনে পাচিত্তিযং ৰুত্তং, তস্মা ইমানি দ্ৰে সিক্খাপদানি ভিক্খুম্হি সংসন্দিযমানানি অঞ্ঞমঞ্ঞং ন সমেন্তি. যথা সমেন্তি, তথা জানিতব্বং. তত্থ পোরাণগণ্ঠিপদে ৰুত্তনযেন ভিক্খুনীনং ওমসৰাদসিক্খাপদে অনুপসম্পন্নোতি ন গহেতব্বো, ইদমেত্থ যুত্তং. পরিভাসেয্যাতি অঞ্ঞত্র অক্কোসৰত্থূহি. তেসু হি অঞ্ঞতরস্মিং সতি ওমসৰাদপাচিত্তিযমেৰাতি একে, তং ন যুত্তং. ওমসৰাদে পাল়িমুত্তকঅক্কোসে হি দুক্কটং হোতীতি. দুক্কটোকাসে ইদং পাচিত্তিযং তেহি নিদ্দিট্ঠং হোতি, তস্মা ‘‘বালা এতা’’তি পাল়িযং ইধ আগতপদানংযেৰ ৰসেন পরিভাসনং ৰেদিতব্বং.

দুতিযসিক্খাপদৰণ্ণনা নিট্ঠিতা.

১০৩৩. ততিযসিক্খাপদং উত্তানত্থমেৰ.

৪. চতুত্থসিক্খাপদৰণ্ণনা

১০৩৮. নিমন্তিতা ৰা পৰারিতা ৰাতি এত্থ পোরাণগণ্ঠিপদে তাৰ এৰং ৰুত্তং ‘‘পৰারিতাপি যাগুং পাতুং লভতি, ভোজ্জযাগুং ন লভতি. যাগু পনেত্থ খাদনীযভোজনীযসঙ্খ্যং ন গচ্ছতি. নিমন্তিতা ভিক্খুনী পিণ্ডায চরিত্ৰা ভুঞ্জিতুকামা সামিকে অপলোকেত্ৰাৰ ভুঞ্জিতুং লভতি. পরম্পরভোজনাপত্তি ভিক্খুনীনং নত্থি. নিমন্তিতা তং ভত্তং ভুঞ্জিত্ৰা ৰা অভুঞ্জিত্ৰা ৰা পৰারিতা কপ্পিযং কারাপেত্ৰা ভুঞ্জিতুং ন লভতি, অকপ্পিযনিমন্তনেন নিমন্তিযমানা দ্ৰে নিমন্তনানি সম্পটিচ্ছিতুঞ্চ ন লভতী’’তি. তত্থ ‘‘পৰারিতাপি যাগুং পাতুং লভতী’’তি ৰুত্তং পাল়িযং, অট্ঠকথাযঞ্চ অনুঞ্ঞাতত্তা. ‘‘নিমন্তিতা অপ্পৰারিতা যাগুং পিৰতী’’তি হি পাল়িযং ৰুত্তং. তত্রিদং সিক্খাপদৰণ্ণনাপুব্বঙ্গমসন্নিট্ঠানং – নিমন্তিতা ৰা পৰারিতা ৰাতি এত্থ ৰাসদ্দেন অকপ্পিযনিমন্তনেন নিমন্তিতা অপ্পৰারিতা ঠপেত্ৰা যাগুং অঞ্ঞং খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিযং অঞ্ঞত্র সামিকানং অপলোকনা. পরম্পরভোজনাভাৰেন ভিক্খুনীনং কো গুণো জাতোতি? ন এতাসং গুণলাভো, কেৰলং পাকটতরং জাতং. ভিক্খূপি ৰিকপ্পেত্ৰা মিস্সেত্ৰাৰ ভুঞ্জিতুং লভন্তি. সমযে যথাসুখং লভন্তি. ইমিনা অপলোকনেন কিন্তি? পৰারিতা ৰা অনিমন্তিতা ৰা ন কিঞ্চি কপ্পিযং কারাপেত্ৰা গিলানাতিরিত্তম্পি লভন্তি, নিমন্তিতা চ পৰারিতা চ যাগুম্পি ন লভন্তি, অপলোকেত্ৰাপি ন লভন্তীতি.

চতুত্থসিক্খাপদৰণ্ণনা নিট্ঠিতা.

আরামৰগ্গৰণ্ণনা নিট্ঠিতা.