৪. তুৰট্টৰগ্গৰণ্ণনা

১. পঠমসিক্খাপদৰণ্ণনা

৯৩৪-৫. একায নিপন্নায অপরা নিপজ্জতি, আপত্তি পাচিত্তিযস্সাতি ‘‘উভিন্নম্পি পঠমনিপন্নায অনুট্ঠাপনা’’তি ৰত্ৰা এত্থ কিরিযাকিরিযন্তি একে, তং অট্ঠকথায ৰিরুজ্ঝতি. ‘‘কিরিয’’ন্তি হি অট্ঠকথাযং ৰুত্তং. অথ কস্সা আপত্তীতি? উভিন্নম্পি নিপজ্জনকিরিযং পটিচ্চ. ইমস্স অনাপত্তিৰারে ‘‘ৰৰত্থানং দস্সেত্ৰা’’তি নত্থি, তস্মা ৰৰত্থানং কত্ৰা নিপজ্জিতুং ন ৰট্টতীতি একে. ৰিপুলতরে ৰট্টতীতি একে. ‘‘অন্তরং কত্ৰা নিপজ্জিতুং ৰট্টতী’’তি পোরাণগণ্ঠিপদে লিখিতং.

পঠমসিক্খাপদৰণ্ণনা নিট্ঠিতা.

২. দুতিযসিক্খাপদৰণ্ণনা

৯৪০. ৰৰত্থানং দস্সেত্ৰাতি এত্থ উপরি পারুপনম্পি মজ্ঝে ওভোগং কত্ৰা উভিন্নং অন্তরে ওতারেতি, ৰট্টতীতি একে. ৰৰত্থানঞ্চ যথা ঠানে ন তিট্ঠতি, তথা অতিক্কমিত্ৰা তুৰট্টেন্তিযা আপত্তিযেৰাতি. ‘‘কিরিযাকিরিয’’ন্তি চ পোরাণগণ্ঠিপদে ৰুত্তং.

দুতিযসিক্খাপদৰণ্ণনা নিট্ঠিতা.

৩. ততিযসিক্খাপদৰণ্ণনা

৯৪১. অত্তনো সজ্ঝাযনট্ঠানে চে ৰুড্ঢতরা আগচ্ছতি, ৰন্দনকালে ৰা, আপুচ্ছনকিচ্চং নত্থি. একস্মিং ওৰরকে আপুচ্ছিতব্বং. ‘‘অথ ওৰরকে মহাথেরী ৰসতি, সম্মুখে ইতরা, আপুচ্ছিতব্বা তস্সা উপচারত্তা’’তি পোরাণগণ্ঠিপদে ৰুত্তং.

ততিযসিক্খাপদৰণ্ণনা নিট্ঠিতা.

৯৪৬-৯৫০. চতুত্থপঞ্চমসিক্খাপদং উত্তানত্থমেৰ.

৬. ছট্ঠসিক্খাপদৰণ্ণনা

৯৫৬. গহপতি নাম ঠপেত্ৰা সহধম্মিকে ৰেদিতব্বো, তস্মা ভিক্খুনা ৰা সামণেরেন ৰা অননুলোমিকেন সংসগ্গেন সংসট্ঠাপি ন সমনুভাসিতব্বাতি সম্ভৰতি এৰ.

ছট্ঠসিক্খাপদৰণ্ণনা নিট্ঠিতা.

৯৬১-৫. সত্তমঅট্ঠম সিক্খাপদং উত্তানত্থমেৰ.

৯. নৰমসিক্খাপদৰণ্ণনা

৯৬৯. একিন্দ্রিযন্তি কাযিন্দ্রিযেনেৰ একিন্দ্রিযং, নিগণ্ঠানং অচেলকানং মতং. কাপিলা পন ‘‘পঞ্চিন্দ্রিযা’’তি মঞ্ঞন্তা এৰং ৰদন্তি ‘‘সচক্খুকত্তা অলাবুমালুৰাদযো যত্থ আলম্বনং, তত্থ গচ্ছন্তি. সসোতকত্তা কদলিযো মেঘগজ্জিতং সুত্ৰা গব্ভং গণ্হন্তি. সঘানকত্তা পনসাদযো কুণপগন্ধেন ফলন্তি. সজিৰ্হকত্তা উদকং পিৰন্তি যেন, সব্বেপি ‘পাদপা’তি ৰুচ্চন্তি. সকাযপসাদত্তা ইত্থিসম্ফস্সেন অসোকরুক্খা পুপ্ফন্তী’’তি. সঙ্ঘাতন্তি ৰিনাসং.

৯৭০. ইধ চ ৰস্সচ্ছেদেন দুক্কটং. পঠমং আৰসিত্ৰা পচ্ছা চারিকা চরণপচ্চযা পাচিত্তিযং আপজ্জতীতি ৰেদিতব্বং. অথ ৰস্সং অৰসিত্ৰা চরতি, অৰস্সুপগমনপচ্চযা দুক্কটং আপজ্জতি. পোরাণগণ্ঠিপদে পন ‘‘অন্তোসত্তাহে অন্তোৰস্সে চারিকং চরন্তিযা পাচিত্তিযং. সত্তাহকরণীযেন পন ৰট্টতি, ভিক্খুনো দুক্কটং হোতী’’তি ৰুত্তং.

৯৭২. কেনচি উব্বাল়্হাতি ৰস্সচ্ছেদকারণেনাতি নো তক্কোতি আচরিযো. কিত্তাৰতা চারিকা হোতীতি? ইদং ন সব্বত্থ ৰিচারিতং. অনন্তরসিক্খাপদে ‘‘অন্তমসো ছপ্পঞ্চযোজনানিপী’’তি ৰুত্তত্তা সো চ মঞ্ঞে হেট্ঠিমপরিচ্ছেদোতি.

নৰমসিক্খাপদৰণ্ণনা নিট্ঠিতা.

১০. দসমসিক্খাপদৰণ্ণনা

৯৭৩. দসমে ‘‘আহুন্দরিকা’’তি পঠন্তি কির.

দসমসিক্খাপদৰণ্ণনা নিট্ঠিতা.

তুৰট্টৰগ্গৰণ্ণনা নিট্ঠিতা.