৩. নগ্গৰগ্গৰণ্ণনা

১-২. পঠমদুতিযসিক্খাপদৰণ্ণনা

৮৮৩. নগ্গৰগ্গস্স পঠমদুতিযানি উত্তানানি. পঠমে অযং ৰিসেসো – ভিক্খুস্স তথা ন্হাযন্তস্স দুক্কটং অঞ্ঞত্র জন্তাঘরউদকপটিচ্ছাদীহি. ন চ ৰিগরহি তত্থ ভগৰা অত্তনাৰ অননুঞ্ঞাতত্তা উদকসাটিকাযাতি পোরাণা. ‘‘একমেৰ নিৰাসেত্ৰা, পারুপিত্ৰা চ নহাযিতুং ন ৰট্টতী’’তি পোরাণগণ্ঠিপদে ৰুত্তং.

পঠমদুতিযসিক্খাপদৰণ্ণনা নিট্ঠিতা.

৩. ততিযসিক্খাপদৰণ্ণনা

৮৯৪. ততিযে অন্তোচতূহপঞ্চাহং ধুরং নিক্খিপন্তিযাপি আপত্তি এৰ. লিঙ্গপরিৰত্তে ধুরং নিক্খিপন্তিযা দুক্কটং তিকদুক্কটত্তা. ‘‘সম্বহুলাহি ভিক্খুনীহি সদ্ধিন্তি এত্থ চতস্সোপি সম্বহুলা’’তি পোরাণগণ্ঠিপদে ৰুত্তং.

ততিযসিক্খাপদৰণ্ণনা নিট্ঠিতা.

৪. চতুত্থসিক্খাপদৰণ্ণনা

৮৯৮. চতুত্থে সঙ্ঘাটিচারন্তি এত্থ সঙ্ঘাটিআদিৰসেন অধিট্ঠিতানংযেৰাযং ৰিধি, নেতরাসং কির. তত্থ তিচীৰরে এৰ ৰিপ্পৰাসপচ্চযা নিস্সগ্গিযং. অন্তোচীৰরকালেপি পঞ্চাহিকং সঙ্ঘাটিচারং অতিক্কামেন্তিযা আপত্তিযেৰ. ‘‘ৰিনা এতেহি চীৰরেহি উপসম্পদং কাতুং ন ৰট্টতী’’তি পোরাণগণ্ঠিপদে ৰুত্তং.

চতুত্থসিক্খাপদৰণ্ণনা নিট্ঠিতা.

৫. পঞ্চমসিক্খাপদৰণ্ণনা

৯০৬. পঞ্চমস্স অনাপত্তিৰারে তায ৰা অৰিপ্পৰাসাযাতি অত্থতো লব্ভতি.

পঞ্চমসিক্খাপদৰণ্ণনা নিট্ঠিতা.

৯০৭-৯১১. ছট্ঠসত্তমানি উত্তানানি.

৮. অট্ঠমসিক্খাপদৰণ্ণনা

৯১৬. সোকজ্ঝাযিকা নাম কির মাযাকারা. ৰিলুম্পকা ভণ্ডকাতি চ পোরাণা.

অট্ঠমসিক্খাপদৰণ্ণনা নিট্ঠিতা.

৯. নৰমসিক্খাপদৰণ্ণনা

৯২০. ‘‘কথঞ্হি নাম অতিক্কামেস্সতী’’তি ৰুত্তত্তা থুল্লনন্দা চীৰরকালসমযং আগমেথাতি অতিক্কমাপেসীতি সিদ্ধং হোতি.

নৰমসিক্খাপদৰণ্ণনা নিট্ঠিতা.

১০. দসমসিক্খাপদৰণ্ণনা

৯২৭. দসমে এককুলং এতদৰোচুন্তি এত্থ কুলং নাম তস্মিং মনুস্সা, তস্মা বহুৰচনং.

দসমসিক্খাপদৰণ্ণনা নিট্ঠিতা.

নগ্গৰগ্গৰণ্ণনা নিট্ঠিতা.