পঠমগাথাসঙ্গণিকৰণ্ণনা

সত্তনগরেসু পঞ্ঞত্তসিক্খাপদৰণ্ণনা

৩৩৫. ৰচনসম্পটিচ্ছনত্থে ৰা নিপাতোতি অত্থো. অড্ঢুড্ঢসতানীতি তীণি সতানি, পঞ্ঞাসানি চ. ৰিগ্গহন্তি মনুস্সৰিগ্গহং. অতিরেকং ৰাতি দসাহপরমং অতিরেকচীৰরং. কাল়কন্তি ‘‘সুদ্ধকাল়কান’’ন্তি (পারা. ৫৫২-৫৫৪) ৰুত্তকাল়কং. ভূতন্তি ভূতারোচনং. পরম্পরভত্তন্তি পরম্পরভোজনং. ভিক্খুনীসু চ অক্কোসোতি যা পন ভিক্খুনী ভিক্খুং অক্কোসেয্য ৰা পরিভাসেয্য ৰা (পাচি. ১০২৯). অন্তরৰাসকন্তি অঞ্ঞাতিকায ভিক্খুনিযা চীৰরপটিগ্গহণং. রূপিযন্তি রূপিযসব্বোহারং. সুত্তন্তি সামং সুত্তং ৰিঞ্ঞাপেত্ৰা তন্তৰাযেহি. উজ্ঝাপনকেতি উজ্ঝাপনকে খীযনকে. পাচিতপিণ্ডন্তি ভিক্খুনীপঅপাচিতপিণ্ডপাতং. চারিত্তন্তি নিমন্তিতো সভত্তো সমানো সন্তং. চীৰরং দত্ৰাতি সমগ্গেন সঙ্ঘেন চীৰরং দত্ৰা. ৰোসাসন্তীতি ভিক্খূ পনেৰ কুলেসু নিমন্তিতা ভুঞ্জন্তি (পাচি. ৫৫৮), তত্থ চেসা. গিরগ্গচরিযাতি ‘‘যা পন ভিক্খুনী নচ্চং ৰা গীতং ৰা’’তি (পাচি. ৮৩৪) চ, ‘‘অন্তোৰস্সং চারিকং চরেয্যা’’তি (পাচি. ৯৭০) চ ৰুত্তদ্ৰযং. ছন্দদানেনাতি পারিৰাসিকছন্দদানেন সিক্খমানং ৰুট্ঠাপেয্য (পাচি. ১১৬৭). পারাজিকানি চত্তারি, ভিক্খুনীনং সঞ্ঞাচিককুটিঞ্চ কোসিযমিস্সসন্থতঞ্চ সেয্যা চ অনুপসম্পন্নেন সহ পথৰীখণনং. গচ্ছ দেৰতেতি ভূতগামপাতব্যতা সপ্পাণকউদকসিঞ্চনন্তি অত্থো. মহাৰিহারোতি মহল্লকৰিহারো. অঞ্ঞন্তি অঞ্ঞৰাদকং. দ্ৰারন্তি যাৰদ্ৰারকোসা. ‘‘অনাদরিযপাচিত্তীতি চ সহধম্মিকং ৰুচ্চমানো’’তি পাঠো. পযোপানন্তি সুরুসুরুকারকং. এল়কলোমানি পত্তো চাতি এল়কলোমধোৰাপনঞ্চ ঊনপঞ্চবন্ধনপত্তো চ. ওৰাদো চেৰ ভেসজ্জন্তি ভিক্খুনুপস্সযং উপসঙ্কমিত্ৰা ওৰাদো তদুত্তরিভেসজ্জৰিঞ্ঞাপনঞ্চ. সূচি অরঞ্ঞকোতি ‘‘অট্ঠিমযং ৰা দন্তমযং ৰা ৰিসাণমযং ৰা সূচিঘর’’ন্তি (পাচি. ৫১৭) চ ‘‘যানি খো পন তানি আরঞ্ঞকানি সেনাসনানি সাসঙ্ক…পে… পটিদেসেতব্ব’’ন্তি (পাচি. ৫৭০) চ. ওৰাদোতি যা পন ভিক্খুনী ওৰাদায ৰা সংৰাসায ৰা ন গচ্ছেয্য (পাচি. ১০৫৫). পারাজিকানি চত্তারীতিআদি দ্ৰীসু নগরেসু পঞ্ঞত্তসম্পিণ্ডনং.

চতুৰিপত্তিৰণ্ণনা

৩৩৬. একতিংসা যে গরুকাতি উভতো অট্ঠ পারাজিকা, ভিক্খূনং তেরস, ভিক্খুনীনং দস চ সঙ্ঘাদিসেসা. সাধারণাসাধারণৰসেন অট্ঠ অনৰসেসা নাম পারাজিকানি. তদেৰাতি সীলৰিপত্তিংযেৰ. ৰিত্থারতো দস্সেতুং ‘‘পারাজিক’’ন্তিআদিনা অপুচ্ছিতমেৰ ৰিস্সজ্জিতং. ‘‘তত্থ যো চাযং, অক্কোসতি হসাধিপ্পাযো’’তি পাঠো. দুট্ঠুল্লৰিভাৰনৰসেনাগতৰিপত্তিং ঠপেত্ৰা পুচ্ছাপটিপাটিযা যাৰততিযকপঞ্হং ৰিস্সজ্জিতুমারভি. উক্খিত্তানুৰত্তিকা ভিক্খুনী অট্ঠ যাৰততিযকসঙ্ঘাদিসেসা ইধ পুচ্ছিতত্তা অনন্তরপঞ্হা নাম জাতা.

ছেদনকাদিৰণ্ণনা

৩৩৭. পমাণাতিক্কন্তমঞ্চনিসীদনকণ্ডুপটিচ্ছাদিৰস্সিকসাটিকাসুগতচীৰরপ্পমাণং ভিক্খুনীনং উদকসাটিকাতি ছ ছেদনকানি. চীৰরৰিপ্পৰাসসম্মুতিআদযো চতস্সো সম্মুতিযো. ‘‘অযং তত্থ সামীচী’’তি এৰং আগতা সত্ত সামীচিযো.

অসাধারণাদিৰণ্ণনা

৩৩৮. পুব্বে ৰুত্তচুদ্দসপরমানেৰ অন্তরপঞ্হে নিট্ঠপেত্ৰা পুরিমপঞ্হং ৰিস্সজ্জেন্তো. ধোৰনঞ্চ পটিগ্গহোতি গাথা অট্ঠকথাচরিযানং. দ্ৰে লোমানি এল়কলোমতিযোজনপরমানি.

দ্ৰেৰীসতি খুদ্দকাতি –

‘‘সকলো ভিক্খুনিৰগ্গো, পরম্পরঞ্চ ভোজনং;

অনতিরিত্তং অভিহটং, পণীতঞ্চ অচেলকং;

জানং দুট্ঠুল্লছাদনং.

‘‘ঊনং মাতুগামেন সদ্ধিং, যা চ অনিক্খন্তরাজকে;

সন্তং ভিক্খুং অনাপুচ্ছা, ৰিকালে গামপ্পৰেসনং.

‘‘নিসীদনে চ যা সিক্খা, ৰস্সিকায চ সাটিকা;

দ্ৰাৰীসতি ইমা সিক্খা, খুদ্দকেসু পকাসিতা’’তি. –

পাঠো. ‘‘কুলেসু চারিত্তাপত্তী’’তি পাঠো ন গহেতব্বো সাধারণত্তা তস্স সিক্খাপদস্স. ছচত্তারীসা চিমেতি ছচত্তারীস ইমে. ‘‘পারাজিকানি সঙ্ঘাদিসেসো’’তি এৰং ৰুত্তসিক্খাপদে এৰ ৰিভজিত্ৰা ৰুত্তত্তা ৰিভত্তিযো নাম. সাধারণন্তি অট্ঠন্নম্পি সাধারণং. পারাজিকভূতা ৰিভত্তিযো পারাজিকৰিভত্তিযো. সাধারণে সত্তৰজ্জো সঙ্ঘাদিসেসো. অঞ্ঞতরস্মিং গণ্ঠিপদে ‘‘অথ ৰা ‘দ্ৰে উপোসথা দ্ৰে পৰারণা চত্তারি কম্মানি পঞ্চেৰ উদ্দেসা চতুরো ভৰন্তি, নঞ্ঞথা’তি পাল়িং উদ্ধরন্তি. তত্থ ‘চত্তারি কম্মানী’তি ৰিসেসাভাৰা উদ্ধরিতপোত্থকমেৰ সুন্দরং, পুব্বেপি ৰিভত্তিমত্তদস্সনৰসেনেৰ চেতং ৰুত্তং. ‘ন সমথেহি ৰূপসমনৰসেনা’তি ৰত্ৰা চত্তারি কম্মৰিভজনে ‘সমথেহি ৰূপসম্মতী’তি ন ৰিসেসিতং উপোসথপ্পৰারণানংযেৰ ৰিভাগত্তা. কস্মা? এত্থাপি ‘উপোসথপ্পৰারণানংযেৰ ৰিসেসেত্ৰা নযং দেথা’তি ৰুত্তত্তা, অধম্মেন ৰগ্গাদিকম্মেন আপত্তিযোপি ৰূপসম্মন্তীতি আপজ্জনতোতি ৰেদিতব্ব’’ন্তি ৰুত্তং, ৰিচারেতব্বং. দ্ৰীহি চতূহি তীহি কিচ্চং একেনাতি দ্ৰীহি ৰিৰাদাধিকরণং, চতূহি অনুৰাদাধিকরণং, তীহি আপত্তাধিকরণং, একেন কিচ্চাধিকরণং সম্মতীতি অত্থো.

পারাজিকাদিআপত্তিৰণ্ণনা

৩৩৯. নিব্বচনমত্তন্তি ৰেৰচনমত্তং. সেসেতি আদিতো সেসা মজ্ঝন্তা. পদন্তি সিক্খাপদং. সদ্ধাচিত্তং পসন্নচিত্তন্তি অত্থো, ‘‘সন্তাচিত্ত’’ন্তি ৰা পাঠো. অনাল়িযন্তি দলিদ্দং. কিঞ্চাপি ইদং নিব্বচনং ‘‘গরুকং লহুকঞ্চা’’তিআদিপঞ্হে নত্থি, ‘‘হন্দ ৰাক্যং সুণোম তে’’তি ইমিনা পন ৰচনেন সঙ্গহিতস্সত্থস্স দীপনত্থং ৰুত্তন্তি ৰেদিতব্বং. ‘‘আকাসো পক্খিনং গতী’’তি চ পাঠো অত্থি, সো জাতিৰসেন যুজ্জতি. পক্খীনন্তি উজুকমেৰ.

পঠমগাথাসঙ্গণিকৰণ্ণনা নিট্ঠিতা.