অধিকরণভেদৰণ্ণনা

উক্কোটনভেদাদিৰণ্ণনা

৩৪০. অধিকরণউক্কোটেন সমথানং উক্কোটং দস্সেতুন্তি অধিকরণানি সত্তহি সমথেহি সম্মন্তি, তানি উক্কোটেন্তো সত্ত সমথে উক্কোটেতি নামাতি অধিপ্পাযো. পসৰতীতি সম্ভৰতি. ‘‘অনুৰাদাধিকরণে লব্ভন্তী’তিআদীনি ‘ধম্মো অধম্মো’তিআদীনং সমানত্তা তেসু ৰিসেসতো লব্ভন্তী’’তি ৰুত্তং. অনিহতন্তি সুত্তাদিনা. অৰিনিচ্ছিতন্তি ‘‘আপত্তিঅনাপত্তী’’তিআদিনা. ‘‘তত্থ জাতকং অধিকরণং উক্কোটেতি…পে… তিণৰত্থারকং উক্কোটেতী’’তি দসেৰ ৰুত্তা. ‘‘সম্মুখাৰিনযপটিঞ্ঞাতকরণযেভুয্যসিকা অৰুত্তত্তা উক্কোটেতুং ন সক্কা, কম্মৰাচাপি তেসং নত্থি. তস্মা তে উক্কোটেতুং ন সক্কাতি ৰদন্তী’’তি লিখিতং. পাল়িমুত্তকৰিনিচ্ছযেনেৰাতি ৰিনযলক্খণং ৰিনা কেৰলং ধম্মদেসনামত্তৰসেনেৰাতি অত্থো. খন্ধকতো ৰা পরিৰারতো ৰা আনীতসুত্তেন. নিজ্ঝাপেন্তি দস্সেন্তি. পুব্বে ধম্মৰিনযেন ৰিনিচ্ছিতং অধিকরণং উপজ্ঝাযাদীনং অত্থায ‘‘অধম্মং ধম্মো’’তিআদীনি দীপেত্ৰাতি অত্থো. ৰিসমানি কাযকম্মাদীনি নিস্সিতত্তা ৰিসমনিস্সিতো. এৰং সেসেসু.

অধিকরণনিদানাদিৰণ্ণনা

৩৪২-৩. কিংসম্ভারন্তি কিংপরিক্খারং, এত্থ কিন্তি লিঙ্গসামঞ্ঞমব্যযং. পুব্বে উপ্পন্নৰিৰাদং নিস্সায পচ্ছা উপ্পজ্জনকৰিৰাদো ৰিৰাদনিদানং নাম. আপত্তাধিকরণপচ্চযা চতস্সো আপত্তিযো আপজ্জতীতি ভিক্খুনী জানং পারাজিকং ধম্মং পটিচ্ছাদেতি পারাজিকং, ৰেমতিকা পটিচ্ছাদেতি থুল্লচ্চযং, ভিক্খু সঙ্ঘাদিসেসং পটিচ্ছাদেতি পাচিত্তিযং, আচারৰিপত্তিং পটিচ্ছাদেতি দুক্কটং. পুব্বে কতউক্খেপনিযাদিকিচ্চং নিস্সায উপ্পজ্জনককিচ্চানং. কীদিসানং? সমনুভাসনাদীনং ৰসেন. তং হীতি অধিকরণং.

৩৪৪. অধিকরণেসু যেন অধিকরণেন সম্মন্তি, তং দস্সেতুন্তি যদা অধিকরণেহি সম্মন্তি, তদা কিচ্চাধিকরণেনেৰ সম্মন্তি, ন অঞ্ঞেহীতি দস্সনত্থং ৰুত্তং, ন একন্ততো অধিকরণেনেৰ সম্মন্তীতি দস্সনত্থং.

৩৪৮. আপত্তাধিকরণে সঙ্ঘো ৰিৰদতীতি আপত্তানাপত্তীতি এৰং.

৩৫৩. সমুট্ঠানাভাৰতো সম্মুখাৰিনযে কম্মস্স কিরিযাকরণমিচ্চাদিনা অৰিভজিত্ৰাৰ সতিৰিনযাদীনং ছন্নংযেৰ ছ সমুট্ঠানানি ৰিভত্তানি. তং কস্মা? কম্মসঙ্গহাভাৰেন, সতিৰিনযাদীনং ৰিয সঙ্ঘসম্মুখতাদীনং কিচ্চযতা নাম নত্থীতি অধিপ্পাযো.

অধিকরণভেদৰণ্ণনা নিট্ঠিতা.