অন্তরপেয্যালং

কতিপুচ্ছাৰারৰণ্ণনা

২৭১. পটিনিদ্দেসন্তি পুনপ্পুনং নিদ্দিসনং. আপত্তিক্খন্ধেহি ৰিনীতানি সংৰরানীতি অত্থো. এতেহি আপত্তিক্খন্ধেহি. ‘‘আরকা’’তি নিৰত্তিঅত্থেন ৰুত্তত্তা তং পুন সরূপেন ৰত্তুকামো ‘‘ভুসা ৰা’’তি আহ. ‘‘গেহং ধূমেন পুণ্ণং আধূমিত’’ন্তিআদীসু ৰিয রাগাদিৰেরং মণতি ৰিনাসেতি. এতাযাতি ৰিরতিযা. ৰেল চলনে. নিয্যানং মগ্গং সিনোতি বন্ধতীতি সেতু. ‘‘সেতুঘাতোতি ৰীতিক্কমপটিপক্খভূতা ৰিরতি, তদত্থনিব্বত্তিকরচিত্তুপ্পাদো ৰা’’তি ৰুত্তং. ‘‘ধম্মস্সৰনগ্গন্তি ধম্মং সুণন্তানং সমূহ’’ন্তি লিখিতং. সচে ন গচ্ছতি, ৰিক্খিত্তো ৰা নিসীদতি. কাযপ্পাগব্ভিযং কাযদুচ্চরিতং. ‘‘পমাদে’’তি ৰত্ৰা তদত্থং দস্সেতুং ‘‘সতিৰিপ্পৰাসে’’তি ৰুত্তং.

২৭২-৩. সপরসন্তানে ৰাতি সসন্তানে ৰা পরসন্তানে ৰা. তথা ৰিৰদন্তা পনাতি ভেদকরৰত্থূনি নিস্সায ৰিৰদন্তা. উভযেহিপীতি থেরনৰেহি. নন্তি মেত্তং কাযকম্মং. যেসং পুগ্গলানং পিযং করোতি, তেসং মেত্তাকাযকম্মসঙ্খাতো ধম্মো. এত্তকন্তি আমিসৰিভত্তিদস্সনং. অসুকস্স চাতি পুগ্গলৰিভত্তিদস্সনং. ‘‘দুস্সীলস্স অদাতুম্পি ৰট্টতী’’তি ৰুত্তত্তা এৰ অলজ্জিপরিভোগো ৰারিতো. সব্বেসং দাতব্বমেৰাতি সন্নিট্ঠানেন অজানন্তেন ৰিভাগং অকত্ৰা দাতব্বভাৰং দীপেতীতি একে. ‘‘সব্বেসং দাতব্বমেৰা’’তি ৰুত্তং অট্ঠকথাসু. তত্থ ‘‘অলজ্জিউক্খিত্তকানং পরিভোগসীসেন সহত্থা ন দাতব্বং, দাপেতব্বন্তি অপরে’’তি ৰুত্তং. ৰিচিনিত্ৰা দানং ৰিচেয্য দানং. যস্মা অযং ৰিসেসো কাতব্বোযেৰাতি অযং করোতি, তস্মা পুগ্গলৰিভাগো ন কতোতি সম্বন্ধো. পকতিৰণ্ণেন ৰিসভাগৰণ্ণেন. ‘‘ইদং নাম আপন্নো’’তি পরেহি অপরামসিতব্বতো অপরামট্ঠানি. অনুলোমেহি গহিতসঙ্খারারম্মণেহি নিব্বানারম্মণং কত্ৰা নিয্যাতি.

ছআপত্তিসমুট্ঠানৰারাদিৰণ্ণনা

২৭৬. ‘‘পঠমেন আপত্তিসমুট্ঠানেন দুব্ভাসিতং আপজ্জেয্যাতি ন হীতি ৰত্তব্ব’’ন্তি ৰুত্তং ৰাচাচিত্তৰসেনেৰাপজ্জিতব্বতো.

২৭৭. কুটিং করোতীতি এত্থ সঞ্চরিত্তমৰত্ৰা দুক্কটথুল্লচ্চযসঙ্ঘাদিসেসানং একস্মিং ৰত্থুস্মিং পটিপাটিযা উপ্পত্তিদস্সনত্থমিদং ৰুত্তং. ন হি সঞ্চরিত্তে এৰ আপজ্জতি. ‘‘ইমিনা পন নযেন সব্বত্থ পটিপাটিযা অগ্গহণে কারণং ৰেদিতব্ব’’ন্তি ৰুত্তং.

২৮৩. ৰিৰেকদস্সিনাতি তদঙ্গৰিৰেকাদিপঞ্চৰিধৰিৰেকদস্সিনা.

২৮৪. অত্তনো দুট্ঠুল্লন্তি সঙ্ঘাদিসেসং.

২৮৮. ৰিৰাদাধিকরণপচ্চযাতি অঞ্ঞেহি, অত্তনা ৰা পুব্বভাগে আপন্নপচ্চযাতি অত্থো. ওমসতীতি ‘‘অযং ধম্মো, অযং ৰিনযো’’তি ৰিৰদন্তো ‘‘ত্ৰং কিং জানাসী’’তিআদিনা ওমসতি. তীহি সমথেহি সম্মুখাৰিনযপটিঞ্ঞাতকরণতিণৰত্থারকেহি. ‘‘সম্মুখাৰিনযঞ্চেত্থ সব্বত্থ ইচ্ছিতব্বতো ‘সম্মুখাৰিনযেন চেৰ পটিঞ্ঞাতকরণেন চা’তিআদিনা দ্ৰীহিপি যোজিতং. এস নযো সব্বত্থা’’তি ৰুত্তং.

২৯১. ঠপেত্ৰা সত্ত আপত্তিযোতি এত্থ ‘‘কিঞ্চাপি অৰসেসা নত্থি, তথাপি পটিপাটিযা পাটৰজননত্থং পুচ্ছা কতা’’তি ৰুত্তং.

অন্তরপেয্যালং নিট্ঠিতং.