সমুট্ঠানসীসৰণ্ণনা

২৫৭. অনত্তাতি অত্তৰিরহিতা ‘‘অলৰণভোজন’’ন্তিআদীসু ৰিয. করুণাসীতলভাৰেন চন্দসদিসো. কিলেসতিমিরপ্পহানতো আদিচ্চো. যস্মা তে দেসযন্তি, তস্মা অঙ্গীরসোপি. পিটকে তীণি দেসযি তেসং অঞ্ঞতরত্তাতি অত্থো. ৰিনযো যদি তিট্ঠতি, এৰং পটিপত্তিসদ্ধম্মাদি নীযতি পৰত্ততীতি অত্থো. অযং পন কথং তিট্ঠতীতি? আহ ‘‘উভতো চা’’তিআদি. পরিৰারেন গন্থিতা তিট্ঠন্তীতি অত্থো. তস্সেৰ পরিৰারস্স সুত্তে. নিযতসমুট্ঠানং কতং, ৰুত্তন্তি অধিপ্পাযো. অসম্ভিন্নসমুট্ঠানানি অসঙ্করসমুট্ঠানানি, অঞ্ঞেহি অসদিসসমুট্ঠানানীতি অত্থো. যস্মা পরিৰারে সতি ৰিনযো তিট্ঠতি, ৰিনযে সতি সদ্ধম্মো তিট্ঠতি, যস্মা সমুট্ঠানানি চ সুত্তে দিস্সন্তি, তস্মা সিক্খেতি অত্থো. ‘‘ধম্মকামো সুপেসলো’’তি পরিৰারে গারৰজননত্থং ৰুত্তং. তত্থাতি ‘‘দিস্সন্তী’’তি তত্থ. ‘‘একেন সমুট্ঠানেন সমুট্ঠাতীতি পঠমপারাজিকং একেন সমুট্ঠানেন সমুট্ঠাতী’’তি ৰুত্তং. পাল়িযঞ্হি নিদ্দিট্ঠসমুট্ঠানঞ্চ দিস্সতি. ‘‘তস্সেৰ পরিৰারস্স, সমুট্ঠানং নিযতো কত’’ন্তি ৰুত্তং পুরিমনযেতি অত্থো. যথাঞাযন্তি যথাভূতং. ‘‘সঞ্চরিত্তাভাসনঞ্চা’’তি পাঠো. ‘‘সঞ্চরিত্তানুভাসনঞ্চা’’তিপি অত্থি. নযৰজ্জেহি ৰিনযৰজ্জেহীতি অত্থো.

পঠমপারাজিকসমুট্ঠানৰণ্ণনা

২৫৮. নানুবন্ধে পৰত্তিনিন্তি ‘‘যা পন ভিক্খুনী ৰুত্থাপিতং পৰত্তিনিং দ্ৰে ৰস্সানি নানুবন্ধেয্যা’’তি ৰুত্তসিক্খাপদঞ্চ. অযং পাঠো একচ্চেসু পোত্থকেসু ন দিস্সতি. ছসত্ততি পঠমপারাজিকসমুট্ঠানা.

দুতিযপারাজিকসমুট্ঠানৰণ্ণনা

২৫৯. ‘‘কুক্কুচ্চং চীৰরং দত্ৰাতি কুক্কুচ্চুপ্পাদনঞ্চ ধম্মিকানং কম্মানং ছন্দং দত্ৰা খীযনঞ্চ চীৰরং দত্ৰা খীযনঞ্চা’’তি পাঠো. ‘‘দত্ৰা’’তি উপ্পটিপাটিযা ৰুত্তং, তস্মা ‘‘কুক্কুচ্চং ধম্মিকং দত্ৰাতি পাঠো সুন্দরো’’তি ৰদন্তি, ৰিচারেত্ৰা গহেতব্বং.

২৬৯. অকতন্তি অভিনৰং.