সেদমোচনগাথাৰণ্ণনা

অৰিপ্পৰাসপঞ্হাৰণ্ণনা

৪৭৯. তহিন্তি তস্মিং পুগ্গলে. অকপ্পিযসম্ভোগো নাম মেথুনধম্মাদি. ‘‘ৰরসেনাসনরক্খণত্থায ৰিস্সজ্জেত্ৰা পরিভুঞ্জিতুং ৰট্টতী’’তি গরুভণ্ডৰিনিচ্ছযে ৰুত্তো. একাদসাৰন্দিযে পণ্ডকাদযো একাদস. উপেতি সপরিসং. ন জীৰতি নিম্মিতরূপত্তা. ‘‘উব্ভক্খকেন ৰদামী’’তি ইমিনা মুখে মেথুনধম্মাভাৰং দীপেতি. অধোনাভিৰিৰজ্জনেন ৰচ্চমগ্গপ্পস্সাৰমগ্গেসু. গামন্তরপরিযাপন্নং নদিপারং ওক্কন্তভিক্খুনিং সন্ধাযাতি ভিক্খুনিযা গামাপরিযাপন্নপরতীরে নদিসমীপমেৰ সন্ধায ৰুত্তা. তত্থ পরতীরে গামূপচারো একলেড্ডুপাতো নদিপরিযন্তেন পরিচ্ছিন্নো, তস্মা পরতীরে রতনমত্তম্পি অরঞ্ঞং ন অত্থি, তঞ্চ তিণাদীহি পটিচ্ছন্নত্তা দস্সনূপচারৰিরহিতং করোতি. তত্থ অত্তনো গামে আপত্তি নত্থি. পরতীরে পন একলেড্ডুপাতসঙ্খাতে গামূপচারেযেৰ পদং ঠপেতি. অন্তরে অভিধম্মৰসেন অরঞ্ঞভূতং সকগামং অতিক্কমতি নাম, তস্মা গণম্হা ওহীযনা চ হোতীতি ঞাতব্বং. এত্তাৰতাপি সন্তোসমকত্ৰা ৰিচারেত্ৰা গহেতব্বং. ভিক্খূনং সন্তিকে উপসম্পন্না পঞ্চসতা মহাপজাপতিপ্পমুখা. মহাপজাপতিপি হি আনন্দত্থেরেন দিন্নওৰাদস্স পটিগ্গহিতত্তা ভিক্খূনং সন্তিকে উপসম্পন্না নাম.

পারাজিকাদিপঞ্হাৰণ্ণনা

৪৮০. ‘‘দুস্সকুটিং সন্ধাযা’’তি সহ দুস্সেন ৰীতিক্কমনস্স সক্কুণেয্যতায ৰুত্তং. লিঙ্গপরিৰত্তে পটিগ্গহণস্স ৰিজহনতো সামং গহেত্ৰা ভুঞ্জিতুং ন ৰট্টতি. কাকঊহদনং ৰাতি কাকেন ঊহদনং ৰা. ‘‘তযো পুরিসেপি উপগন্ত্ৰা’’তি পাঠসেসো.

পাচিত্তিযাদিপঞ্হাৰণ্ণনা

৪৮১. মেথুনধম্মপচ্চযা নাম কাযসংসগ্গো. তংহেতু মেথুনধম্মস্স পুব্বভাগভূতং কাযসংসগ্গং ৰাযামন্তিযাতি অট্ঠৰত্থুপূরণং সন্ধায. পরিভোগপ্পচ্চযাতি পরিভোগকারণা. তস্মাতি যস্মা পরিভোগপ্পচ্চযা আপজ্জতি, তস্মা ভোজনপরিযোসানে হোতীতি অত্থো. পোরাণপোত্থকেসু ‘‘তস্সা’’তি পাঠো. ‘‘কারণৰচনং সুন্দরং ভোজনপরিচ্ছেদদস্সনতো’’তি ৰদন্তি.

সেদমোচনগাথাৰণ্ণনা নিট্ঠিতা.